Tu womi mii toona libi baka

EE WAN mii dëdë, nöö unfa i mëni hën mama bi o fii ee a toona ko a libi baka? A bi o wai te na soni! Ma wan sëmbë di dëdë sa toona libi baka u? Di soni dë pasa wan daka kaa u?

Luku di womi aki, ku di mujëë ku di piki womi mii. Di womi da di tjabukama u Gadu de kai Elia. Di mujëë da wan mujëë di manu fëën dëdë. A ta libi a di foto de kai Safati, nöö di mii da di womi mii fëën. Wë wan daka, hën di womi mii ko siki. A ko dë a maunmaun u tee a dëdë. Hën Elia piki di mujëë taa: ’Da mi di mii.’

Elia tei di dëdëdëdë mii tja go a liba, hën a kandi ën a bedi. Hën a begi: ’Ke Jehovah o, be di mii aki libi baka e.’ Hën di mii bigi hai böö! Nöö Elia toona tjëën ko a basu, hën a piki di mujëë taa: ’Luku, di womi mii fii dë ku libi!’ Di soni dë mbei di mama ta wai sö.

Wan woto gaan tjabukama u Jehovah da di womi de kai Elisa. A ta heepi Elia ku di wooko fëën. Ma bakaten Jehovah mbei Elisa du gaan foombo wooko tu. Wan daka Elisa go a di foto Sunëmi, ka wan mujëë libi suti ku ën seei. Bakaten di mujëë dë ko pai wan womi mii.

Baka di di womi mii ko bigi, hën wan mamate a faaka hën tata di dë ta wooko a goon dendu. Hën de sai dë te u de kë mëni, hën di womi mii kai wan gaan wolo taa: ’Heei, hedi ta njaan mi ooo!’ Baka di de tjëën go a wosu, hën böö fëën koti. Na piki tjali hën mama tjali! Wantewante di mama go suku Elisa baka te a feni ën.

Di Elisa dou, hën a go a di kamba ka di dëdëdëdë mii dë. A begi Jehovah, hën a kandi a di mii liba. Hesihesi di mii sinkii kendi baka, hën a mbei hekise seibi toon. Na piki wai di mama wai di a denda a di kamba, si taa di womi mii fëën ta libi baka!

Gaan hia sëmbë dëdë. Di soni dë mbei dee famii ku dee mati u de ta tjali seei. Wa a’ di makiti u weki wan sëmbë puu a dëdë. Ma Jehovah abi ën. Bakaten woo lei unfa a o tja milionmilion sëmbë ko a libi baka.