Di boto singi a wan paati

LUKU andi ta pasa ku di boto! A ta booko kaba a sösö! I si dee sëmbë di djombo go a wata u? So u de sun go a tela kaa. Paulosu hën di dë u? Boo go luku andi pasa ku ën.

I sabi jeti taa tu jaa longi Paulosu bi dë a dunguwosu a Sesalia. Baka di dë, hën de butëën ku wan tu u dee woto sitaafuma a boto. Hën de tei pasi nango a Loomë. Di de ta pasa a bandja së u di paati de kai Keeta, hën wan gaan ventu ta naki di boto. Di ventu böö taanga tee taa dee womi an bi sa tii di boto. Di sonuwojo seei de an sa si a didia, nöö teeja seei de an sa si a ndeti. Sö a pasa sömëni daka. Te u kaba fëën dee sëmbë a di boto an bi mëni möön seei taa de sa tan a libi.

Hën Paulosu hopo taanpu piki de taa: ’Na wan fuunu o lasi libi. Di boto nöö o booko kaba a sösö. Di soni mbei mi taki sö, di ndeti di pasa dë wan engel u Gadu ko piki mi taa: „Paulosu, na fëëë e! I musu taanpu a di Gaan Könu u Loomë fesi. Nöö Gadu o hoi hii dee sëmbë dee dë ku i a libi.”’

Nöö a di ten u tuwalufu juu ndeti, a di u 14 daka u di gaan ventu, hën dee sëmbë dee ta tii di boto ko si taa de zuntu ku së tela, biga di wata an bi fundu sö möön. Nöö u di de fëëë taa di boto o naki a gaan sitonu a di dungu, mbei de saka dee hanka u de tuwë a wata djolou. Debooko fëën hën de si wan kamian ku sandu balalaa. Hën de taa de o tja di boto go tjökö dë a tela.

Wë di de ta zuntu ku tela, hën di boto tjökö a di sandu djou booko. Hën di ventu ta seki di wata ta naki di boto djugudjugu tefa a booko pisipisi. Hën di sodati kabiteni taa: ’Be hii sëmbë di sa’ u sun djombo a wata sun go a së ufö. Nöö be dee wotowan subi a dee bookobooko boto pisi liba hai go a së.’ Sö dee sëmbë du tu. Nöö hii dee 276 sëmbë di bi dë a di boto dou a tela libilibi, leti kumafa di engel bi paamusi.

De ta kai di paati Malita. Dee sëmbë dë abi bunuhati seei, nöö de sölugu dee sëmbë dee bi dë a di boto. Di di ventu kötö, hën de buta Paulosu a wan woto boto tja go a Loomë.