Wan piki womi mii ta dini Gadu

NA WAN hanse piki womi mii disi ö? Hën në da Samuëli. Nöö di womi di buta maun a Samuëli hedi da Eli, di Gaan Mindima u Isaëli. Dee tu sëmbë dee tja Samuëli go a Eli da Samuëli tata Elikana ku hën mama Hana.

Samuëli abi fö nasö feifi jaa nöö. Ma a o libi a di tenti u Jehovah makandi ku Eli ku dee woto mindima. Faandi mbei Elikana ku Hana ta tja sö wan njönku mii kuma Samuëli go u go dini Jehovah a di tenti fëën? Boo go luku faandi mbei.

Wan tu jaa a fesi ufö di soni aki pasa, Hana bi ta tjali seei. An bi sa pai miii, nöö a bi kë wan mii seei. Wan daka di Hana bi go a di tenti u Jehovah, hën a begi ën taa: ’Jehovah o, na fëëkëtë mi e! Mi ta soi taa ee i da mi wan womi mii, mi o da i ën faa sa dini i hii ën libi longi.’

Jehovah piki di begi u Hana, nöö baka wan tu liba a pai Samuëli. Hana lobi di womi mii fëën, nöö fuukufuuku a bigi lei ën soni u Jehovah kaa. A piki ën manu taa: ’Te Samuëli bigi tjika taa an dë a bobi möön, nöö mi o tjëën go a di tenti u Jehovah faa dini ën ala.’

Di soni dë u ta si Hana ku Elikana ta du a di peentje. Nöö u di Samuëli kisi bumbuu lei u dee gaan sëmbë fëën, mbei a dë waiwai taa a sa dini Jehovah a di tenti fëën. Hiniwan jaa Hana ku Elikana nango begi a di apaiti tenti aki, nöö de nango luku di womi mii u de tu. Nöö hiniwan jaa Hana ta tja wan njunjun djakiti söndö maun di a mbei da Samuëli.

Dee jaa ta pasa, Samuëli dë fëën ta dini a di tenti u Jehovah, nöö Jehovah ku dee sëmbë tuu lobi ën. Ma Hofini ku Pinaasi, dee womi mii u di Gaan Mindima Eli, dë hogi seei. De ta du sömëni hogi, nöö de ta mbei dee woto sëmbë pasa Jehovah buka tu. Eli bi musu puu de kuma mindima, ma an du ën.

Di mii Samuëli an mbei dee hogi soni sëmbë ta du a di tenti u Jehovah tapëën u dini ën. Ma u di hia sëmbë an lobi Jehovah tuutuu, mbei a bi dë longi kaa di Jehovah an fan ku libisëmbë möön. Di Samuëli ko möön bigi, hën wan soni pasa:

Wan daka di Samuëli bi dë ta duumi a di tenti u Gadu, hën wan töngö weki ën. Hën a piki: ’Mi dë aki.’ Hën a hopo kule go a Eli, piki ën taa: ’I kai mi nö? Luku mi aki.’

Ma Eli piki ën taa: ’Ma kai i, toona go kandi fii baka.’ Hën Samuëli toona go kandi.

Hën di töngö kai ën di u tu pasi: ’Samuëli o!’ Samuëli hopo baka kule go a Eli. A piki: ’I kai mi nö? Luku mi aki.’ Ma Eli piki ën taa: ’Ma kai i di mii. Go kandi fii baka e.’ Hën Samuëli toona go kandi.

Di töngö kai ën di u dii pasi: ’Samuëli o!’ Hën Samuëli kule go a Eli. A piki ën taa: ’Luku mi aki, a musu u dë taa i kai mi di pasi aki.’ Hën Eli ko sabi awaa taa a musu u dë Jehovah di ta kai Samuëli. Fëën mbei a piki Samuëli taa: ’Go kandi fii baka, nöö ee a kai i baka, i musu piki taa: „Jehovah, mi ta haika i.”’

Sö Samuëli piki Jehovah di a toona kai ën. Hën Jehovah piki Samuëli taa a o sitaafu Eli ku dee womi mii fëën. Bakaten Hofini ku Pinaasi dëdë a wan feti de bi ta feti ku dee Filisiti sëmbë. Nöö di Eli jei andi pasa, hën a kai holou booko hën gangaa, dëdë piii. A sö wan fasi dee soni Jehovah taki, ko tuu.

Samuëli göö ko bigi, hën a toon di lasiti kuutuma u Isaëli. Di a ko gaandi, dee sëmbë piki ën taa: ’Da u wan könu be a tii u.’ Samuëli an bi kë du di soni dë, u di Jehovah hën da di könu u de tuutuu. Ma Jehovah piki ën faa haika dee sëmbë.