Sakaria
2 Ne mi opo mi ede, dan mi si wan man di ben abi wan titei na ini en anu fu marki sani.+ 2 Mi aksi en: „Pe yu e go?”
A piki mi: „Mi e go marki Yerusalem fu si o bradi èn o langa a de.”+
3 Ne na engel di ben e taki nanga mi komoto na mi sei èn wan tra engel kon miti en. 4 A taigi a tra engel: „Lon go taigi a yongu man drape: ’„Yerusalem o de leki wan foto sondro skotu, fu di bun furu sma nanga osometi o tan drape.+ 5 Misrefi o lontu en leki wan skotu fu faya”,+ na so Yehovah taki, „èn a glori fu mi o de drape.”’”+
6 „Esi-esi! Esi-esi! Un lon komoto fu a kondre fu noordsei”,+ na so Yehovah taki.
„Mi meki unu go na ala sei+ pe den fo winti fu hemel e wai”, na so Yehovah taki.
7 „Esi-esi, Sion!+ Lowe gowe, yu di e tan nanga na umapikin fu Babilon.+ 8 ’Baka di a kisi glori,+ Gado seni mi go na den pipel di ben teki ala sani fu unu na wan ogri-ati fasi.’+ Yehovah di e tiri den legre taki: ’A sma di e fasi unu+ e fasi a popki fu mi ai.+ 9 Dati meki mi o opo mi anu fu naki den,+ dan den srafu fu den o teki ala sani fu den.’+ Na so un pipel o sabi taki na Yehovah di e tiri den legre seni mi.+
10 Bari nanga wan tranga sten èn prisiri, umapikin fu Sion,+ bika mi e kon+ fu tan nanga yu”,+ na so Yehovah taki. 11 „Furu pipel o kon na Yehovah na a ten dati+ èn den o tron mi pipel,+ dan mi o tan nanga yu.” Na so yu o sabi taki na Yehovah di e tiri den legre seni mi kon na yu.+ 12 Dan Yehovah o teki Yuda leki a santa pisi gron+ fu en èn a o teki Yerusalem baka.+ 13 Ala sma, un tan pî na fesi Yehovah,+ bika a sreka ensrefi fu komoto+ fu en santa tanpresi.+