Yesaya

21 Disi na wan krutuboskopu gi a kontren fu a sabana na a se:+ Wan rampu de na pasi e kon. A de leki den bigi winti+ di e komoto na zuidsei. A e kon fu a sabana, fu wan kondre di sma e frede.+ 2 Mi si wan fisyun+ di ben meki mi frede. Na ini a fisyun mi yere: A bedrigiman e bedrigi sma+ èn na ogri-ati fufuruman e fufuru sma sani na wan ogri-ati fasi. Opo, Elam! Go feti, Media!+ Mi o sorgu taki a no meki nowan sma geme moro.+ 3 A sani disi meki mi kisi hebi pen na mi dyonku.+ Mi kisi hebi krampu neleki wan uma di de fu meki wan pikin.+ Mi bruya so te, taki mi no man yere. Mi skreki so te, taki mi no man si. 4 Mi ati e naki esi-esi. Mi skin e beifi, fu di mi e frede srefisrefi. Mi ben lobi mofoneti, ma now mi e beifi te mofoneti doro.+

5 Meki sma seti a tafra èn meki den seti den sturu. Meki den nyan èn dringi!+ Un granman, opo.+ Un salfu a skelt.+ 6 Yehovah taigi mi:

„Go poti wan waktiman meki a luku san e pasa èn meki a taigi yu ala san a e si.”+

7 Ne a waktiman si fetiwagi di asi e tyari, fetiwagi di buriki e tyari, nanga fetiwagi di kameili e tyari. A ben e luku finifini nanga ala prakseri. 8 Dan a bari nanga wan tranga sten neleki wan lew:+ „Yehovah, mi e tanapu na tapu a toren e hori wakti doronomo na deiten, èn mi e tan na mi presi e hori wakti ala neti!+ 9 Luku! Wan grupu srudati e kon na tapu wan fetiwagi di tu asi e hari!”+

Dan a waktiman bari: „A fadon! Babilon fadon!+ Ala den popki di Babilon ben e anbegi leki gado fadon broko na gron!”+

10 Ai mi pipel di den fon leki aleisi, ai mi manpikin di de leki aleisi na a presi pe sma e fon aleisi,+ mi fruteri unu ala san mi yere fu Yehovah di e tiri den legre, a Gado fu Israel.

11 Disi na wan krutuboskopu gi Duma: Wan sma na Seyir+ e bari gi mi: „Waktiman, fa sani e go tideneti? Waktiman, fa sani e go tideneti?”+ 12 A waktiman taki: „Mamanten musu fu kon èn neti musu fu kon. Efu unu wani sabi sani, dan un musu aksi. Moro lati un kan aksi mi baka!”

13 Disi na wan krutuboskopu gi a sabana: Un man fu Dedan+ di e waka fu a wan presi go na a trawan, na neti unu o sribi na a busi fu a sabana. 14 Un tyari watra gi den wan di no abi watra fu dringi. Un sma di e tan na Teima,+ tyari brede gi den wan di e lowe gowe. 15 Bika den e lowe gowe, fu di sma wani kiri den. Nanga feti-owru èn nanga bo den wani kiri den. Den e lowe gi wan ogri feti.

16 Yehovah taigi mi: „Na ini wán yari nomo Keidar+ o lasi ala a glori fu en. (A yari disi na soleki fa wrokoman e teri yari.)+ 17 Keidar ben abi tranga man di ben e sutu nanga bo. Ma soso wan tu fu den nomo o tan abra,+ bika na Yehovah, a Gado fu Israel, taki dati.”+