Esekièl
11 Dan wan yeye+ opo mi+ èn a tyari mi go na a owstusei portu fu na oso fu Yehovah di de na owstusei.+ Ne mi si tutenti na feifi man+ na fesi a portu. Na mindri den man disi mi si Yasanya, a manpikin fu Asur, nanga Pelatya, a manpikin fu Benaya. Den man disi ben de granman fu a pipel.+ 2 Dan Gado taigi mi: „Manpikin fu libisma, disi na den man di e prakseri fu du soso ogri èn di e gi sma na ini a foto disi takru rai.+ 3 Den e taki: ’Dyonsro+ wi o bow moro oso. A foto de leki wan bradimofo patu.+ Wi na a meti di de na ini.’
4 Fu dati ede, manpikin fu libisma, taigi den sortu ogri o miti den. Taki profeititori.”+
5 Dan a yeye fu Yehovah kon na mi tapu+ èn a taigi mi: „Yu musu taki: ’Disi na san Yehovah taki:+ „Un Israelsma, unu taki bun, èn mi sabi san unu e prakseri.+ 6 Unu kiri furu sma na ini a foto disi. Unu furu den strati fu a foto nanga dede sma.”’”+ 7 „Fu dati ede, disi na san a Moro Hei Masra Yehovah taki: ’Den dedewan fu unu di unu poti na ini a foto, na a meti.+ A foto na a bradimofo patu.+ Na unu den feanti o tyari gowe fu a foto.’”+
8 „A Moro Hei Masra Yehovah taki: ’Unu ben frede feti,+ ma now mi o meki sma kon feti nanga unu.+ 9 Mi o puru unu na ini a foto, mi o libi unu meki trakondre sma+ wini unu èn mi o strafu unu.+ 10 Nanga feti-owru den o kiri unu.+ Na a lanki fu Israel+ mi o strafu unu. Unu sa musu fu sabi taki mi na Yehovah.+ 11 A foto no o de leki wan bradimofo patu+ gi unu èn unu no o de leki a meti na ini en. Na a lanki fu Israel mi o strafu unu. 12 Unu sa musu fu sabi taki mi na Yehovah. Disi o pasa nanga unu, fu di unu no gi yesi na den wèt fu mi èn unu no hori den komando fu mi,+ ma unu hori den komando fu den pipel di de na un lontu.’”+
13 Wantewante di mi kaba taki a profeititori, Pelatya, a manpikin fu Benaya, dede.+ Ne mi boigi nanga mi fesi go na gron èn mi bari:+ „Ke, mi Moro Hei Masra Yehovah,+ fu san ede yu wani kiri ala den Israelsma di tan abra?”+
14 Dan Yehovah taigi mi: 15 „Manpikin fu libisma, den sma di e tan na ini Yerusalem taigi den brada fu yu,+ den kondreman fu yu, den famiriman fu yu di abi a reti fu bai den gron fu yu baka, iya, den taigi sosrefi ala den Israelsma: ’Gowe fara fu Yehovah. A kondre disi na fu wi. Na wi kisi a kondre disi.’+ 16 Fu dati ede yu musu taki: ’A Moro Hei Masra Yehovah taki: „Aladi mi seni den go bun fara na ini katibo èn mi yagi den go na tra kondre,+ toku mi o tron leki wan santa presi gi den fu wan syatu pisi ten na ini den kondre pe den de.”’+
17 Yu musu taki: ’A Moro Hei Masra Yehovah taki: „Mi o puru den na mindri den pipel èn mi o puru den na den kondre pe mi ben yagi den go, èn mi o gi den a kondre Israel.+ 18 Den o kon drape èn den o puru ala den fisti gado èn den tegu sani na ini a kondre.+ 19 Mi o meki den tron wán+ èn mi o meki den kisi wan nyun denki.+ Na ini den skin+ mi o puru den ati di tranga leki ston èn mi o gi den wan ati di safu.+ 20 Dan den o hori den komando nanga den wèt fu mi èn den o du ala san mi taki.+ Den o tron mi pipel trutru+ èn mi o tron den Gado.”’+
21 ’„Ma den sma di anbegi den fisti gado nanga den tegu sani+ fu den ete, o kisi a strafu gi den ogri di den du”, na so a Moro Hei Masra Yehovah+ taki.’”
22 Dan den kerub-engel+ opo den frei. Den wiel ben de krosibei fu den+ èn a glori+ fu a Gado fu Israel ben de na tapusei+ fu den. 23 A glori fu Yehovah+ di ben de na tapusei fu a foto, opo gowe fu drape èn a go tanapu na tapusei fu a bergi+ di de na owstusei fu a foto.+ 24 Na ini a fisyun di mi kisi fu Gado nanga yepi fu en yeye, wan yeye+ opo mi+ èn a tyari mi go na den katiboman+ na ini Kaldeya. Ne mi no si a fisyun moro. 25 Dan mi fruteri den katiboman ala den sani disi di Yehovah ben meki mi si.+