Titus

1 Mi, Paulus, na wan srafu+ fu Gado èn wan apostel+ fu Yesus Krestes. A bribi fu mi de a srefi leki a bribi fu den wan di Gado kari.+ Mi kon sabi finifini+ san na den tru tori fu Gado+ di abi fu du nanga a libi fu wi leki sma di e dini Gado fayafaya.+ 2 Wi e dini en fayafaya, fu di wi abi a howpu fu libi fu têgo.+ Na dati Gado, di no man lei,+ pramisi wi langa ten pasa kaba.+ 3 Na Gado en eigi reti ten a ben meki sma kon sabi a wortu di mi ben e preiki, soleki fa Gado, wi Frulusuman, ben taigi mi fu du.+ 4 Mi e skrifi yu, Titus di de wan trutru pikin+ fu mi èn di abi a srefi sortu bribi leki a di fu wi:

Meki Gado a Tata,+ èn Krestes Yesus, wi Frulusuman,+ sori yu bun-ati. Meki a freide fu den de nanga yu.

5 Mi libi yu na Kreita+ fu poti sani reti di no ben bun èn fu poti+ owru man na ini ibri foto, soleki fa mi ben taigi yu fu du.+ 6 Wan owru man musu de wan sma di trawan no man feni wan sani na en tapu.+ A musu de a masra fu wán wefi nomo.+ Den pikin fu en musu de na bribi èn den no musu abi a nen taki den e libi wan yayolibi noso taki den trangayesi.+ 7 Wan man di e teki fesi na ini a gemeente na wan futuboi di abi a frantwortu fu na oso fu Gado.+ A musu de wan sma di trawan no man feni wan sani na en tapu.+ A no musu du nomo san en wani.+ A no musu kisi atibron esi.+ A no musu de wan sopiman.+ A no musu de wan sma di lobi du ogri nanga trawan.+ A no musu gridi fu feni wini na wan fasi di no fiti.+ 8 Ma a musu lobi fu teki trawan na ini oso.+ A musu de wan sma di lobi san bun. A musu de nanga krin frustan.+ A musu de wan reti-ati sma. A musu tai hori na Gado.+ A musu man dwengi ensrefi.+ 9 A fasi fa a e gi leri, musu sori taki a e hori finifini na a wortu di tru.+ Na so fasi a man gi sma deki-ati nanga a soifri leri+ èn a kan piri-ai+ gi den sma di e taki sani di no e kruderi nanga dati.

10 Disi de fanowdu fu di furu sma de di trangayesi, sosrefi sma di e taki soso lawlaw sani+ èn sma di e kori trawan. Na den mindri yu abi spesrutu den wan di e hori a gwenti fu besnèi sma.+ 11 A de fanowdu fu tapu a mofo fu den sma disi, bika na den srefi sma disi e tan bruya heriheri osofamiri,+ fu di den e leri sma sani di den no musu leri, soso fu kan feni wini na wan fasi di no fiti.+ 12 Wan fu den, den eigi profeiti, ben taki: „Kreitasma lobi lei. Den na ogri+ meti èn gridi nyanman di no wani wroko.”

13 A tori disi tru. Na fu a sani disi ede, meki yu musu tan piri-ai gi den na wan seryusu fasi,+ so taki den kan abi wan tranga*+ bribi. 14 Den no o poti prakseri na den anansitori+ fu den Dyu èn na den wèt fu sma+ di no e bribi a tru leri.+ 15 Ala sani krin gi sma di krin.+ Ma noti krin gi sma di doti+ èn di no abi bribi,+ fu di a denki nanga a konsensi+ fu den doti. 16 Den e taigi ala sma taki den sabi Gado,+ ma den sani di den e du, e sori taki den no sabi en,+ fu di den de wan tegu sani èn den trangayesi. Den no bun+ fu du nowan enkri bun sani.