Yesaya

30 Yehovah taki: „Helu fu den tranga-ede man+ di e du san den wani aladi mi no taigi den fu du dati.+ Den e tyari dringi-ofrandi, ma mi yeye no de na den tapu. Na so den e du a wan sondu baka a trawan.+ 2 Sondro fu aksi mi,+ den go na Egepte+ fu kibri na a fortresi fu a kownu. Den go suku yepi na Egepte!+ 3 Ma a fortresi fu a kownu o gi unu syen.+ Te unu go suku yepi na Egepte a o meki un fesi fadon.+ 4 Den granman kon na a foto Sowan+ srefi èn den boskopuman doro te na Hanes. 5 Ibriwan sma o syen gi den Egeptesma, bika den de wan soso pipel di no man yepi nowan sma èn di no e tyari nowan wini kon gi sma. Na soso syen nanga porinen den o gi den Israelsma.”+

6 Disi na wan krutuboskopu gi den meti fu zuidsei:+ Wan grupu sma waka na ini wan kondre fu banawtu+ nanga bigi problema, wan kondre pe lew nanga penitigri e bari, wan kondre fu takru sneki nanga sneki di e dyompo beti sma esi-esi.+ Na tapu a baka fu buriki nanga kameili+ den poti den gudu fu den fu tyari dati gi wan pipel di no o tyari nowan wini gi den. 7 Den Egeptesma na soso sma èn a yepi fu den na fu soso.+ Dati meki mi kari den Rahab,+ a wan di e sidon nomo e du noti.

8 „We kon now. Skrifi den sani disi na tapu wan skrifiplanga meki sma si. Skrifi na ini wan buku,+ so taki sma kan sabi bakaten san ben pasa.+ 9 Bika a pipel disi na wan tranga-ede pipel.+ Den de manpikin di e lei+ èn di no wani gi yesi na den wèt fu Yehovah.+ 10 Den taigi den sma di e kisi fisyun: ’Un no musu si fisyun.’ Den taigi den profeiti: ’Un no musu fruteri wi tru profeititori di abi fu du nanga wi.+ Na switi tori un musu fruteri wi. Fruteri wi sani di no tru.+ 11 Komoto na a reti pasi. Drai gowe na wan tra sei.+ No meki wi yere nowan sani moro fu a Santawan fu Israel.’”+

12 Fu dati ede a Santawan fu Israel taki: „Unu no wani arki den wortu disi.+ Un lobi bedrigi sma. Na soso kori unu e kori trawan. Dati na un libi.+ 13 Dati meki a sondu fu unu kon de leki wan broko pisi fu wan skotu di o meki a heri skotu fadon. A kon de leki wan swaki pisi fu wan hei skotu.+ A o broko èn wantronso a heri skotu o fadon broko.+ 14 A o broko neleki te wan sma e naki wan bigi prapi panya+ nanga ala en krakti. Nowan pisi fu a prapi o bigi nofo fu man puru krofaya na ini wan faya, noso fu man teki pikinso watra na wan patyapatya presi.”+

15 A Moro Hei Masra Yehovah, a Santawan fu Israel,+ taki: „Efu unu drai kon baka na mi èn unu tan tiri, unu o kisi frulusu. Efu unu wani de tranga, dan a wan-enkri sani di un musu du na fu tan tiri èn frutrow na mi tapu.”+ Ma unu no ben wani du dati.+ 16 Unu taki: „Kwetikweti! Nanga asi wi o lowe gowe!”+ Dati meki unu o abi fu lowe trutru. Unu taki: „Na tapu asi di e lon esi-esi, wi o rèi!”+ Dati meki un feanti o kon esi-esi na un baka tu.+ 17 Te wan fu den bari, wan dusun sma fu unu o beifi.+ Te feifi fu den bari, un alamala o lon gowe. Na disi o pasa teleki wan tu fu unu nomo tan abra. Unu o de leki wan postu di tanapu leti-opo na tapu wan bergi-ede èn leki wan marki di ala sma man si na tapu wan pikin bergi.+

18 Ma Yehovah o tan wakti unu, fu di a wani du bun gi unu.+ A o opo du wan sani fu sori unu sari-ati.+ Bika Yehovah na wan Gado di e koti krutu na wan reti fasi.+ Koloku+ fu ala den sma di e tan wakti en.+ 19 Te sma kon tan baka na Sion+ èn na Yerusalem,+ dan den no o krei srefisrefi.+ Te a yere wan fu unu e bari kari en, a o du bun gi en nomonomo. Fa a o yere a babari fu en, a o piki en.+ 20 Yehovah o meki banawtu de leki nyanyan gi unu èn nowtu o de leki watra fu dringi.+ Ma dan a Gran Leriman fu unu no o kibri moro èn den ai fu unu o si un Gran Leriman.+ 21 Efu unu ben o komoto na a reti pasi èn beni go na reti-anusei noso na kruktu-anusei,+ dan nanga un eigi yesi unu o yere wan sten na un baka e taki: „Disi na a pasi.+ Waka na tapu, un pipel.”

22 Un musu pori den popki di unu ben anbegi èn di unu ben tapu nanga solfru+ èn nanga gowtu.+ Un musu naki den panya.+ Neleki wan uma di abi en munsiki, un musu taki: „A sani disi fisti!”+ 23 Dan Gado o meki alen fadon na tapu den siri di unu sai na un gron+ èn unu o abi furu bun nyanyan.+ Na a ten dati den meti fu unu o abi bun furu presi pe den kan nyan grasi.+ 24 Den kaw nanga den buriki di e wroko na den gron o kisi ala sortu bun nyanyan di moksi nanga makandra. Den o nyan srefi na aleisi di sma drai nanga skopu fu puru den buba.+ 25 Na tapu ibri hei bergi nanga pikin bergi watra o lon na ini liba nanga pikin gotro,+ na a dei te furu sma o dede èn te den toren o broko fadon.+ 26 Te Yehovah o tai a soro+ fu en pipel èn te a o dresi+ a hebi mankeri di a ben gi den di a naki den, dan a leti fu a furu mun o kon de leki a leti fu a brenki son. A leti fu a brenki son o skèin seibi tron moro+ leki fa a gwenti skèin, iya, a o skèin a leti di a e skèin na ini seibi dei.

27 Yehovah* o kon fu farawe nanga bigi atibron+ èn nanga dungru wolku. En mofo furu nanga a strafu di a o gi sma èn en tongo de leki wan faya di e pori ala sani.+ 28 En yeye de leki a fruduwatra fu wan liba di e doro te na a neki fu den sma.+ A o seki den go-kon nanga wan manari+ teleki nowan fu den no de moro. Neleki fa wan sma e poti wan titei na ini wan asi en mofo fu tyari en,+ na so a o poti wan titei na ini a mofo fu den pipel,+ ma a o tyari den go lasi. 29 Dan unu o singi wan singi neleki fa unu gwenti singi+ na a neti te unu e hori wan santa fesa.+ Unu o meki prisiri neleki wan sma di e bro wan froiti+ te a e kon na a bergi fu Yehovah+ di de leki wan stonbergi gi Israel.+

30 Yehovah o meki sma yere a kefalek sten fu en+ èn den o si fa a e saka en anu+ fu naki den feanti te a kon nanga bigi atibron,+ nanga wan faya di e pori ala sani,+ nanga alen, nanga wan bigi sibibusi+ èn nanga pisipisi ijs di e fadon komoto na hemel leki alen.+ 31 A sten fu Yehovah o meki Asiria frede srefisrefi.+ A o naki Asiria nanga wan tiki.+ 32 Ibri leisi te Yehovah naki Asiria nanga en tiki, sma o yere tyengretyengre nanga harpu.+ Nanga fetisani a o kon feti nanga den.+ 33 Bika a seti wan presi*+ kaba fu pori en. A sreka en gi a kownu srefi.+ A furu wan dipi presi nanga wan ipi udu. Wan lo faya nanga udu de. A blo fu Yehovah de leki wan liba fu faya di o bron en.+