Esekièl
17 Baka dati Yehovah taigi mi: 2 „Manpikin fu libisma, fruteri den sma fu Israel+ wan raitori+ èn wan agersitori. 3 Yu musu taigi den: ’Disi na san a Moro Hei Masra Yehovah taki: „A bigi aka+ di abi bigi frei+ di langa èn di lai wiwiri di abi ala sortu kloru, frei kon na Libanon+ èn a broko na ede+ fu a sedrebon+ puru. 4 A broko na ede fu den yongu taki fu a bon, dan a tyari en go na a kondre Kanan.+ A prani en na ini wan foto pe bisnisman de. 5 Ne a teki siri fu a kondre,+ dan a sai den na wan gron di bun fu sai siri. A prani en leki wan wilge-bon di de na sei wan bigi liba,+ iya, a prani en leki wan wilge-bon. 6 Na so a siri bigin gro èn safrisafri a kon tron wan moi fatu droifibon. A no ben hei.+ Boiti dati, den wiwiri fu en ben e gro go na inisei. Safrisafri den rutu fu en ben e gro, ma den ben tan leti na en ondro. Na so a gro kon tron wan droifibon di ben e sproiti èn di ben e gi taki.+
7 Baka dati ete wan bigi aka frei kon.+ En srefi ben abi bigi èn langa frei.+ Ne a droifibon langa den rutu fu en go na a aka, fu di a ben wani meki na aka yepi en.+ Boiti dati, a droifibon langa den wiwiri fu en go na a aka fu a gi en watra. A opo ensrefi go na loktu farawe fu a doti pe a bon ben prani.+ 8 A bon disi ben prani na bun gron, na wan presi pe furu watra de,+ so taki a ben kan kon abi bigi taki di e gi furu nyan. Na so fasi a ben o tron wan bigi droifibon.”’
9 Taigi den: ’Disi na san a Moro Hei Masra Yehovah taki: „Sani o waka bun gi a droifibon?+ Nôno, sani no o waka bun gi en, bika wan sma o rutu en puru,+ dan den froktu fu en o pori. San o pasa nanga den moi yongu taki fu en di den broko puru?+ A no drei den o kon drei? Iya, na drei den o kon drei. Ma a no wan sma di abi bigi makti, noso wan bigi grupu sma o rutu en puru. 10 Luku, na prani den prani en na wan tra presi. Ma yu denki taki sani o waka bun gi en? A o drei gowe krinkrin, neleki te a faya winti fu owstusei ben o wai kon na en tapu, a no so?+ Leti drape na ini a doti pe a ben e gro kon, a o drei gowe.”’”+
11 Yehovah taigi mi tu: 12 „Mi e begi yu, taigi den sma disi di e opo densrefi teige mi:+ ’Na sabi unu no sabi san den sani disi wani taki?’ Yu musu taigi den: ’Luku, a kownu fu Babilon kon na Yerusalem. A grabu a kownu+ nanga den heihei man fu a foto, dan a tyari den go na Babilon.+ 13 Ne a teki wan sma di ben de fu a famiri fu den kownu+ èn a meki wan frubontu nanga en. A kownu fu Babilon meki a sma disi sweri taki a o du san a pramisi.+ A teki den moro prenspari man fu a kondre tyari gowe,+ 14 fu broko a kownukondre.+ Na so fasi a kownukondre no ben o man kon tranga baka. A kownukondre fu en ben o tan, soso te a ben o hori a frubontu di a ben meki.+ 15 Ma te fu kaba a opo ensrefi teige en,+ fu di a seni den boskopuman fu en go na Egepte fu go begi Egepte meki a gi en asi+ èn fu meki furu sma kon yepi en. We, yu denki taki sani o waka bun gi en? Yu denki taki a sma di du den sani disi, a sma di broko a frubontu, no o kon na ini problema? Yu denki taki noti no o pasa nanga en?’+
16 ’„Neleki fa a de seiker taki mi de na libi,”+ na so a Moro Hei Masra Yehovah taki, „na so a de seiker taki a man di a kownu fu Babilon poti leki kownu, ma di no hori a frubontu fu mi èn di no du san a ben sweri fu du,+ o dede. A o dede na a presi pe a kownu e tan. Leti drape na ini Babilon a o dede.+ 17 A bigi legre fu Farao nanga den bun furu sma fu en no o man yepi en na ini a feti,+ te den kon fu meki wan dan lontu a foto èn fu bow wan skotu lontu en. Na so furu sma o lasi den libi.+ 18 A no hori a frubontu fu mi, aladi a ben sweri fu du dati.+ Boiti dati, a meki wan kruderi+ èn a du ala den sani disi sosrefi. Dati meki a no o man kibri ensrefi gi den sani di o pasa nanga en.”’+
19 ’Dati meki a Moro Hei Masra Yehovah taki: „Neleki fa a de seiker taki mi de na libi, na so a de seiker taki mi o strafu en, fu di a no du san a sweri fu du+ èn fu di a broko a frubontu di mi ben meki nanga en. 20 Mi o trowe a nèt fu mi na en tapu. Na so fasi mi o fanga en.+ Dan mi o tyari en go na Babilon. Drape mi o krutu en gi ala den sani di a du fu trangayesi mi.+ 21 Ala den srudati fu en di e suku fu lowe gowe o dede, fu di sma o kiri den nanga feti-owru. Dan sma o panya den wan di tan abra go na ala sei pe winti e wai.+ Unu sa musu fu sabi taki na mi, Yehovah, taki den sani disi.”’+
22 ’Disi na san a Moro Hei Masra Yehovah taki: „Mi srefi o teki na ede fu wan bigi sedrebon.+ Mi o broko wan safu pisi fu na ede fu den yongu taki fu en puru,+ dan mi srefi o prani dati na tapu wan bigi hei bergi.+ 23 Iya, mi o prani en na tapu a hei bergi fu Israel.+ Dan den taki fu en o kon bigi èn a o gi nyanyan.+ A o kon tron wan bigi sedrebon.+ Ala sortu fowru di e frei na loktu o kon libi na ini a bon disi. Den o tan na ondro den wiwiri fu en.+ 24 Dan ala den tra bon na ini a gron sa musu fu sabi taki na mi, Yehovah,+ ben lagi a hei bon.+ Den o kon sabi taki na mi poti a lagi bon+ na wan hei presi, taki na mi meki a moi fatu bon kon drei+ èn taki na mi meki a drei bon gi bromki baka. Na mi Yehovah taki den sani disi èn na mi du den tu.”’”+