Gi Titus

1 Mi, Paulus, na wan srafu fu Gado èn wan apostel fu Yesus Krestes. Mi abi a srefi bribi leki den sma di Gado kari. Mi kon sabi finfini san na den tru tori fu Gado di e sori fa wi musu dini en nanga wi heri ati. 2 Wi e du disi fu di wi abi a howpu fu libi fu têgo. Na dati Gado, di no man lei, pramisi wi langa ten psa kba. 3 Na a ten di a ben feni bun a meki sma kon sabi a wortu fu en. Na dati mi ben e preiki, soleki fa Gado, wi Ferlusuman, ben taigi mi fu du. 4 Mi e skrifi yu, Titus di de leki mi eigi pkin èn di abi a srefi bribi leki a di fu wi.

Meki Gado a P’pa, èn Krestes Yesus, wi Ferlusuman, sori yu bun-ati. Meki a freide fu den de nanga yu.

5 Mi libi yu na Kreita fu kenki sani di no e go bun èn fu poti owruman* na ini ibri foto, soleki fa mi ben taigi yu. 6 Wan owruman musu de wan sma di trawan no man feni fowtu na en tapu. A musu de a masra fu wán frow nomo. Den pkin fu en musu de na bribi èn sma no musu sabi den leki sma di e libi wan yayolibi noso leki sma di trangayesi. 7 Wan man di e teki fesi na ini a gemeente na wan futuboi di abi a frantwortu fu luku na oso fu Gado. A musu de wan sma di trawan no man feni fowtu na en tapu. A no musu du nomo san en wani. A no musu kisi atibron esi. A no musu de wan sopiman. A no musu de wan sma di lobi du ogri nanga trawan.* A no musu de wan sma di gridi gi moni èn di e suku en eigi bun. 8 Ma a doro fu en musu opo gi ala sma.* A musu lobi san bun. A musu de nanga krin ferstan.* A musu de wan ret’ati sma. A musu tai hori na Gado. A musu man dwengi ensrefi. 9 A fasi fa a e gi leri musu sori taki a e hori finfini na a wortu di tru.* Na so a o man gi sma dek’ati nanga a soifri leri èn a kan pir’ai gi den sma di e taki sani di no e kruderi nanga dati.

10 Disi de fanowdu fu di yu abi furu sma di trangayesi, sma di e taki soso lawlaw sani, nanga sma di e kori trawan, spesrutu den wan di e hori a gwenti fu besnèi* sma. 11 A de fanowdu fu tapu a mofo fu den sma disi, bika na den srefi sma disi e tan bruya heri osofamiri, fu di den e leri sma sani di den no musu leri. Den e du disi fu di den gridi gi moni èn den e suku den eigi bun. 12 Wan man fu Kreita srefi, wan fu den eigi profeiti, ben taki: „Kreitasma lobi lei èn den de leki ogri meti. Den lesi èn den gridi fu nyan, ma den no wani wroko.”

13 A tori disi tru. Na fu dati ede, yu musu tan pir’ai gi den na wan seryusu fasi, so taki den kan abi wan tranga* bribi. 14 Dan den no o poti prakseri na den anansitori fu den Dyu èn na den wet fu sma di no e bribi a tru leri. 15 Ala sani krin gi sma di krin. Ma noti krin gi sma di doti èn di no abi bribi, fu di a denki nanga a konsensi fu den doti. 16 Den e taigi ala sma taki den sabi Gado, ma den sani di den e du e sori taki den no sabi en. Den e du wan lo fisti sani èn den trangayesi. Den no bun fu du nowan enkri bun sani.