A di fu tu brifi gi den Tesalonikasma

2 Brada nanga sisa, unu sabi taki Masra Yesus Krestes o kon èn taki a o tyari wi kon na wán fu de nanga en. Ma wi wani aksi unu 2 fu no meki sma drai un ferstan es’esi te den e taki dati a dei fu Yehovah* doro kba. Un no musu bruya te den e taki dati a boskopu disi kon fu Gado noso te den e taki dati na wi skrifi a sani disi na ini wan brifi.

3 No meki nowan sma kori unu, bika fosi a dei dati doro sma o drai baka gi a tru bribi èn a o kon na krin suma na a ogriwan di no e hori ensrefi na Gado wet. En na a sma di o kisi pori. 4 A e gens Gado èn a e si ensrefi moro hei leki iniwan sma di trawan e kari „gado” noso iniwan sani di sma e anbegi. Na so a go sdon na ini a tempel fu Gado fu meki ala sma si en leki wan gado. 5 Unu sabi ete taki di mi ben de nanga unu, mi ben e taigi unu den sani disi.

6 Now unu sabi suma e tapu na ogriwan di no e hori ensrefi na Gado wet. Te a ten doro a o kon na krin suma na a ogriwan disi. 7 A tru taki a sma dati bigin du ogri kba, ma a no de krin fu si. A o kon na krin te a sma di e tapu en nownowde, no de moro. 8 Dan a o kon na krin suma na a ogriwan di no e hori ensrefi na Gado wet. Masra Yesus o puru en na pasi nanga den krakti wortu di e kmoto na ini en mofo.* Te a de krin fu si taki Masra kon, a o meki a sma disi tron noti. 9 Ma na ogriwan di no e hori ensrefi na Gado wet de ete, fu di Satan e horbaka gi en. A sma dati e du ala sortu kfalek sani èn a e sori sma bigi sani nanga wondru fu kori den. 10 Na ala sortu ogri fasi a e bedrigi den sma di o dede gwe. A strafu di den o kisi na taki den o kisi pori fu di den no ben teki a tru leri èn den no ben lobi en. Efu den ben o du dati, den ben kan kisi ferlusu. 11 Fu dati ede Gado e gi pasi taki trawan e kori den fu bribi lei. 12 Na so a kan krutu den alamala, bika den no ben bribi den tru tori di den ben yere. Na presi fu dati den ben lobi du ogri.

13 Brada nanga sisa, unu di Yehovah* lobi, na fu unu ede wi musu fu taki Gado tangi ala ten, bika sensi a bigin Gado teki unu fu ferlusu unu te fu kba. A du disi di a gebroiki en yeye fu meki unu kon santa èn di unu ben bribi den tru tori di unu yere. 14 A kari unu fu di wi ben preiki a bun nyunsu gi unu, so taki unu kan kisi glori tu neleki wi Masra Yesus Krestes. 15 We, brada nanga sisa, tnapu kánkan èn tan hori unsrefi na den sani di unu ben leri, awinsi unu ben leri den di wi ben taki nanga unu noso di wi ben seni wan brifi gi unu. 16 Wi Masra Yesus Krestes srefi nanga Gado wi P’pa ben lobi wi èn den trowstu wi fu ala ten. Den meki taki wi kon abi wan moi howpu tu fu di den sori wi bun-ati. 17 Sobun, meki den trowstu unu. Meki den gi unu a krakti fu du bun èn fu taki san bun ala ten.