’No meki joe denki broeja esesi’
„[Wi e begi oenoe] foe oenoe no meki oen denki broeja esesi, noso oen ati kon bron nanga wan taki di kon foe na jeje ofoe nanga wan mofo-boskopoe ofoe nanga wan brifi di ben sa kon foe wi.” — 2 THESSALONIKA 2:1, 2.
1. Sortoe switi sani wi kan memre te wi e denki baka na a ten di wi ben leri sabi na waarheid njoenjoen?
A NO kan tra fasi ofoe wi e memre prisiri sani te wi e denki baka leki kristen na a ten di oen ben kon sabi foe a fositron na waarheid foe a Wortoe foe Gado. Na waarheid ben de moi, rédelek, e gi satisfaksi. Fa wi ati ben kon foeroe foe warderi di wi ben kisi sabi foe Jehovah nanga den hé égifasi foe en, èn ooktoe foe en bigi lobi èn en sar’ati! Wi ben prisiri di wi ben kon ini kontakti nanga kompe-bribiman di ben sori opregti kristen lobi èn ben libi akroederi den gronprakseri foe bijbel.
2. Sortoe ferwakti wi abi leki Jehovah dienstknegti, èn na ini sortoe jeje situwasi wi de?
2 Fa wi ben de nanga tangi di wi ben sabi taki Jehovah djonsro sa poeroe pen, sari nanga srefi dede na pasi (Openbaring 21:3, 4). Go prakseri pikinso, foe kan libi foe tégo tapoe wan paradijs grontapoe, ini volmaakti gesontoe èn foe de kolokoe dorodoro! A ben de pikin-moro toemsi moi foe de troe. Ma a ben de troe. Wortoe foe Gado ben de a fundamenti foe dati. A ben de wan span sani! Sondro degedege wi ben firi wisrefi net so leki den discipel foe Jezus di a ben sori ensrefi na den di a ben opobaka. Den ben taigi makandra: „Wi ati no ben naki di a ben e taki nanga wi na pasi, di a ben tjari den Boekoe kon na krin gi wi?” (Lukas 24:32) Ija, di wi ben leri sabi na Waarheid èn wi ben gi wi libi abra na Jehovah, dan wi ben kon ini wan jeje paradijs. Fa disi ben de wan blesi!
3. Fa Didibri nanga tra gensman wani foefoeroe wi gwe foe den jeje marki foe Jehovah jeje paradijs?
3 Ma dati wi de na ini wan jeje paradijs wi no mag si leki wan sani di e kon foe ensrefi. Nanga wi fri wani wi ben kon na ini a paradijs disi; wi kan waka komopo baka foe en (ofoe den kan poti wi a dorosé foe en) efoe wi fadon go ini wan toestand pe wi no e bribi moro ofoe e pasa den regtvaardiki wet foe Jehovah foe espresi. Disi, a no de foe taki, no sa pasa efoe wi hori na wan krakti fasi na a ’lobi di wi ben abi fosi’ èn wi e tan warderi ala den seti foe Jehovah di e tranga wi na jejefasi. (Openbaring 2:4). Ma Didibri nanga tra gensman foe na troe anbegi de basi-koriman. Wi no mag frigiti noiti dati den tanapoe klarklari foe broko wi soifri-retifasi efoe dati ben sa kan. Na propaganda foe den de foe swaki wi bribi, foe meki a lobi foe wi gi Gado kon kowroe èn foe sai twijfel na ini wi jeje — ija, foe meki a gersi leki a jeje paradijs no de kwetkweti wan paradijs.
4. Na ini san a kan tjari wi go efoe wi gi pasi dati wi bribi kon swaki èn wi meki serjoesoe twijfel gro na ini wi?
4 Wi ben sa kan doro na marki, foe taki en nanga den wortoe foe wan odo, dati wi e feni en moeilek ofoe leki wan sani di no kan foe si a boesi foe na jeje paradijs, foe di wi e loekoe so finifini na den onvolmaakti libisma bon di de now na ini. Na faja di wi ben abi di wi ben leri sabi na waarheid foe a Wortoe foe Gado, na moro bigi howpoe di wi ben abi, na lobi di wi ben meki gro gi Gado nanga wi jeje brada nanga sisa èn na faja di wi ben abi gi Jehovah dienst kan kon flaw. Efoe bigi sani no doe foe tapoe so wan go na baka na jejefasi, dan heri esi den lobi marki di di Gado poti foe wi hori sa gersi leki den e kwinsi sma. Na gosontoe jeje njanjan foe „na getrow èn koni srafoe” kan gersi wan tegoe sani èn a bradafasi foe lobi dienstknegti foe Jehovah kan gersi wan osofamiri foe féanti. Dan a kan psa dati wan sma e bigin naki en kompesrafoe nanga lé foe pori wan sma nen èn afoe waarheid. — Mattéus 24:45-51.
5. Fa wan sma ben kan kisi wan srefi sortoe lasi leki Adam nanga Eva di den ben jagi poeroe foe na paradijs foe Eden?
5 Ija, wi no ben sa kan lasi wawan den blesi foe na jeje paradijs ma, èn dati de moro serjoesoe, wi kan lasi ooktoe na howpoe tapoe tégo libi na ini na grontapoe paradijs èn wi ben sa kan lasi ala den sani disi foe asrefi réde foe san-ede Adam nanga Eva ben lasi na paradijs foe Eden. Den ben abi ala sani di ben de fanowdoe foe de volmaakti èn kolokoe èn ben kan libi foe tégo. Ma onafhankelekheid — wan tra leri te joe loekoe en boen — ben de moro prenspari gi den leki na gi jesi na Jehovah èn den blesi foe Eden. Den ben kori Eva. Aladi den no ben kori Adam, tokoe a ben meki nanga na druk foe den omstandigheid, èn ooktoe na krakti wroko foe en oema tapoe en, foe go so fara foe sondoe ooktoe. Foe na réde dati den ben jagi den poeroe foe na paradijs foe te leki den dede, libi wan pina libi. Den ben lasi na ferwakti tapoe tégo libi gi densrefi èn ben tjari wan goedoe foe sondoe nanga dede kon tapoe den bakapikin foe den (Genesis 3:1-7, 14-19, 24; 1 Timotéus 2:14; Romeini 5:12). Fa disi ben de wan takroe prijs di den ben moe pai gi na sokari onafhankelekheid foe den!
6. (a) Fa Paulus ben taki foe a brok’ede di a ben abi foe wan toe memre foe na gemeente na ini Korinte? (b) Fa na srefi brok’ede ben de foe si na ini san ben skrifi gi na gemeente na ini Thesalonika?
6 Na apostel Paulus ben tjari na brok’ede disi foe en ondro wortoe: „Mi e frede taki tapoe wan ofoe tra fasi, so leki fa a sneki nanga a triki foe en ben kori Eva, joe jeje ben sa kan pori èn ben sa kan wai komoto foe na opregtifasi èn na krinfasi di de foe Kristus” (2 Korinte 11:3). Paulus ben feni en fanowdoe foe skrifi foe wan fowtoe leri di ben waka lontoe na ini en ten. Na ini en di foe toe brifi gi na gemeente na ini Thessalonika a ben skrifi: „[Wi e begi oenoe] foe oen no meki oen denki broeja esesi, noso ati kon bron nanga wan taki di kon foe na jeje ofoe nanga wan mofo-boskopoe, ofoe nanga wan brifi di ben sa kon foe wi èn di e taki disi, dati na dè foe Jehovah ben doro kaba. No meki no wan sma kori oenoe tapoe wan ofoe tra fasi.” — 2 Thessalonika 2:1-3.
No abi noti foe doe nanga sma di fadon komoto foe bribi
7. (a) Sortoe aksi e kon a fesi efoe lektuur foe sma di fadon komoto na bribi e kon na joe via postbode? (b) Foe san-ede a de kefarlek foe abi wan toemsi bigi fertrow na ini wisrefi te wi loekoe na kibri di wi moe kibri wisrefi tége na krakti foe sma di fadon komoto na bribi?
7 Ma, san joe sa doe te joe kon tanapoe na fesi foe fowtoe leri — fini tak-go-tak-kon — di te disi, dati san joe e bribi leki wan kotoigi foe Jehovah no de waarheid? San joe sa doe foe eksempre efoe joe kisi wan brifi ofoe wan boekoe, èn joe iti wan ai na ini èn wantewante joe si dati a sani di skrifi komoto foe wan sma di fadon komoto foe bribi? Joe sa lési en foe gribi ede, soso foe si san a sma abi foe taki? Kande joe e tak-go-tak-kon srefi: ’A no e doe mi noti tog; foe dati mi tanapoe toemsi tranga na ini a waarheid, èn boiti foe dati, efoe wi abi na waarheid, wi no abi noti foe frede. Na waarheid sa meki mi psa a tesi.’ Son sma, foe di den e denki so, ben gi njanjan na den jeje nanga fowtoe tak-go-tak-kon èn ben fadon go na ini serjoesoe onsékerfasi nanga twijfel. (Teki gersi nanga Jakobus 1:5-8) Soboen go denki na a warskow na ini 1 Korinte 10:12: „A sma di denki dati a tanapoe moe loekoe boen dati a no fadon.”
8. (a) Sortoe jepi wan sma abi fanowdoe di degedege e teki en abra?
8 Nanga na lobi jepi foe brada di e sorgoe gi wi dan son sma di ben fadon gi den twijfel di sma di fadon komoto na bribi ben sai ini den ati ben kisi den balansi agen baka wan pisten foe bigi jeje broeja nanga hebi pen. Ma na pen disi no ben a foe de. Na ini Odo 1:9 den e taigi wi: „Nanga en mofo a sma di fadon komoto a bribi, e troesoe en naaste go ini pori, ma nanga sabi den regtvaardikiwan e kisi ferloesoe.” Judas ben komanderi kompekristen ’foe go doro foe sori sar’ati gi son sma di e degedege èn foe ferloesoe den foe hari den komoto foe a faja’ (Judas 22, 23). Paulus ben gi na opziener Timotéus na rai „[foe leri] den sma di no teki sabi na wan boenfasi nanga safrifasi, san kan tjari wan soifri sabi foe a waarheid kon èn foe tjari den kon a den prakseri baka komoto foe den trapoe foe Didibri, foe di a ben kisi den libilibi foe doe en wani”. — 2 Timotéus 2:25, 26.
9. San na a sari bakapisi gi den sma di drai baka gi a troe anbegi?
9 A wan sari sani foe taki ma trawan ben kon na ini doengroe dorodoro èn srefi drai go baka na den fowtoe leri foe na kristenheid. Na apostel Petrus ben skrifi foe na takroe bakapisi gi son sma di ben waka fosi na ini a waarheid ma di ben drai bakaten komoto foe dati. A ben taki: „Efoe den, baka di den ben lon komoto foe den doti libi foe a grontapoe nanga jepi foe wan soifri sabi foe Masra èn Ferloesoeman Jezus Kristus, ben drai go baka na ini den srefi sani di ben wini den, dan den laaste toestand de séker moro ogri gi den leki na fosi wan.” Petru ben taki dati den de leki na dagoe di drai go baka na en braak èn na pikin agoe di ben wasi ben drai go baka na ini a tokotoko. — 2 Petrus 2:20-22.
10. (a) San Jehovah e taki foe na arki na sma di fadon komoto na bribi? (b) San a ben sa wani taki te wan sma ben sa lési boekoe di komoto foe sma di fadon komoto na bribi?
10 Efoe wan tra sma e taigi wi: „No lési disi” ofoe ’no arki na dati’, dan kande wi abi a firi foe poti a rai foe den a wan sé. Ma go prakseri dati na ini a geval disi Jehovah de a Sma di e taigi wi na ini en Wortoe san wi moe doe, èn san a e taki foe sma di fadon komoto na bribi? „Tan farawe foe den” (Romeini 16:17, 18), ’no de moro langa na ini na kompani foe den’ (1 Korinte 5:11) èn „no teki den noiti na ini joe oso èn no taki den odi ooktoe” (2 Johannes 9, 10). Disi de krakti wortoe, krin wèt. Efoe foe gridi foe sabi sani wi ben sa lési den lektuur foe wan sma di wi sabi leki wan sma di fadon komoto foe bribi, dan disi no ben sa de disi, dati wi e tjari a féanti disi foe troe anbegi kon langalanga na ini oen oso foe go sidon rustig foe ferteri oenoe den denki foe en?
11, 12. (a) Sortoe agersitori e gi foe jepi wi foe ferstan dati wi foe ferstan dati wi no kan lési boekoe foe sma di komoto na ini bribi èn ala onnowsel fasi? (b) Fa disi kan tjari kon a tapoe brok’ede foe Jehovah gi en pipel?
11 Meki wi taki na afersi disi na ini wan agersitori: Kon oen taki dati na tini manpikin foe joe sa kisi lektuur nanga fisti fowtow na ini, san joe ben sa doe? Joe ben sa taigi en efoe a ben sa wani lési na lektuur disi foe di a gridi foe sabi sani: ’Boen so boi, go-hed lési en. A no sa doe joe ogri. Foe sensi pikinnegre ten mi ben leri joe dati hoeroedoe takroe. Boiti foe dati joe moe sabi san ben psa na grontapoe foe si dati a de troetroe takroe’? Joe ben sa tak-go-tak-kon na so wan fasi? Kwetkweti! Na presi foe dati joe ben sa sori en séker na tapoe den kefar di a lési foe lektuur nanga fisti fowtow e tjari kon nanga en èn joe ben tanapoe a tapoe dati a ben sa pori den. Foe san-ede? Foe di awinsi o tranga-wan sma kan de ini a waarheid, en jeje nanga ati ben sa kon ondro na krakti dati efoe a gi en jeje njanjan nanga den doti denki di skrifi ini den sortoe lektuur dati. Wan fowtoe lostoe di sribi pikinso èn di kibri na ini den oekoe foe wi ati, te foe kaba kan meki wan pori lostoe foe seks doe kon. Èn na bakapisi? Jakobus e taki dati wan fowtoe lostoe di e meki froktoe, e tjari sondoe kon èn sondoe e tjari joe go na dede (Jakobus 1:15). Soboen, foe san-ede wi ben sa meki na keti disi ben bigin waka?
12 We, efoe oen ben sa opo teki wan faste bosroiti foe ben kibri wi pikin tége pornografie (pori, nanga fisti boekoe), dan wi no ben sa moe ferwakti dati wi lobi hemel Tata ben sa warskow wi na sowan srefi sortoe fasi èn ben sa kibri wi tége jeje hoeroedoe, èn ooktoe fadon komoto foe bribi? A e taki: Tan farawe foe en!
13. San ben kan doe efoe na ini a ten foe na prékiwroko foe wi aksi e kon na fesi di e kari wi kon foe stré, èn di abi na fundamenti na tapoe san sma di fadon komoto na bribi ben taki ofoe skrifi?
13 Ma kon wi taki dati sma, efoe wi e préki na boen njoensoe, e aksi sani ofoe e tjari bezwaar kon na fesi di e kroederi nanga den sani san gensman ben taki? Efoe wan sma no de opregti ma soso wani foe debateer dan a no de foe taki dati moro foeroe tron a de moro boen foe wi pardon wisrefi èn go na a tra doro. Ma san foe doe efoe wan sma e aksi opregti sani foe wan sma di fadon komoto na bribi? Wi kan aksi en ini a fosi presi san broeja en precies. Kande ai go soso foe wan ofoe toe punt. Wi kan hori na dati èn gi piki nanga jepi foe den Boekoe, den publikatie foe na Genootschap èn san wi sabi foe a tori akroederi na waarheid. Wi no afoe teki a bosroiti dati wi moe lési wan boekoe ofoe papira di foeroe nanga létori foe pori wan sma nen èn afoe-waarheid, soso foe sori dati den falsi sani nanga leri foe gensman no de troe.
Fertrow tapoe Jehovah
14. Sortoe lobi brok’ede wi hemel Tata abi gi wi, èn foe san-ede wi kan fertrow tapoe en dorodoro?
14 Efoe wi e go a fesi, e bow wi bribi èn e tan de druk bézig na ini a Kownoekondredienst, dan wi kan fertrow dorodoro tapoe Jehovah, na ini a sabi dati en leki wi lobi hemel Tata, abi na Moro boen-sani gi wi. Gado e leri wi; a e warskow wi. A e doe disi nanga jepi foe en Wortoe èn nanga jepi foe krin wet di en organisaatsi di wi kan si e gi. Efoe wi ben sa aksi wan lobi papa nanga mama foe brede nanga fisi, dan a no ben sa gi oenoe ston ofoe wan sneki. Na so ooktoe Gado no sa kori ofoe bedrigi wi (Mattéus 7:7-11). Tokoe Gado no sa kibri wi dorodoro tége kori ofoe srefi lé di e kori sma èn propaganda foe Didibri. A e taki foe ensrefi: „Mi, Jehovah de joe Gado, a Sma di e leri joe foe kisi wini gi joesrefi. A Sma di e meki joe go a tapoe a pasi di joe moe waka” (Jesaja 48:17). Ija, Jehovah ’e leri wi foe kisi wini gi oensrefi’. A e taigi oenoe dati wi moe hori wisrefi aparti foe sma di fadon komoto foe bribi èn foe den leri foe den, soso foe kibri wisrefi. A wani taki libi gi wi.
15. Sortoe warskow na apostel Paulus ben gi foe sma di ben sa proeberi foe hari discipel gwe?
15 Na apostel Paulus ben warskow kristen kompe-owroeman: „Foe oen ègi mindri wan sa opo di sa taki kroektoe sani foe hari discipel kon a den baka” (Tori foe den Apostel 20:30). Efoe wi e tan arki finifini argument èn tak-go-tak-kon di e sori moi, dan „kroektoe sani” kan gersi reti gi wi. O moro Eva ben e loekoe na a froktoe di a no ben mag njan èn ben arki na a kroektoe tak-go-tak-kon foe Didibri, o moro a ben kisi a overtoigi dati Didibri ben abi leti. Paulus ben warskow: „Loekoe boen: Kande wan sma sa foefoeroe joe gwe nanga jepi foe na filosofie èn nanga jepi foe soso bedrigi-fasi akroederi den gwenti foe libisma, akroederi den elementaire sani foe grontapoe èn no akroederi Kristus” (Kolosse 2:8). Na apostel ben sori oktoe dati sma di ben fadon komoto na bribi ’nanga moi wortoe èn prijse wortoe e kori na ati foe den onnowselwan’ (Romeini 16:17, 18; teki gersi nanga 2 Korinte 11:13-15). Dati a sortoe propaganda dati e hari wantoe gwe, no wani taki soboen dati wi moe waka baka na eksempre foe den. Tokoe wi moe tan loekoe boen alaten.
16. Te wi gebroiki sortoe e foe na bijbel, wi sa kisi jepi foe kakafoetoe gi den moeiti foe Satan foe kori sma èn foe hari den poeroe foe na troe anbegi?
16 Na taktik foe Didibri foe sensi Eden no kenki. A e gebroiki kefarlek fini kori-aksi di kan tjari degedege kon na ini wan sma ferstan èn a e taki nanga wan sma ati foe en ègi belang. Petrus ben skrifi: „A mindri oenoe falsi leriman sa de ooktoe. Den disi sa tjari na wan fini fasi pori sekte kon. Èn foe bigi ai ede den sa soigi sma nanga falsi wortoe” (2 Petrus 2:1-3). Wan sani di e meki kon de falsi abi leki marki foe gersi leki a de troetroe ofoe dati a de troetroe ini wan sma jesi. Na ini 2 Timotéus 2:14-19 Paulus e poti krakti a tapoe, o prenspari a de foe gebroiki Jehovah Wortoe foe poti sani kon reti; ma a ben gi a warskow dati a de fanowdoe foe tan farawe foe sma di fadon komoto na bribi èn di ’nanga den olo babari foe den den e doe ogri na san de santa’ bika, so a ben taki, „a wortoe foe den sa panja ensrefi leki wakawaka-soro”.
17, 18. (a) Fa lori di faisi de leki wakawaka-soro? (b) Sortoe warskow na apostel e gi foe den sma di e proeberi foe hari wi poeroe foe na troe anbegi? (c) Sortoe aksi wi sa gi wan piki na tapoe ini a studi di e kon?
17 Disi de séker wan kroederi di fiti! Neleki wakawaka-soro na tak-go-tak-kon foe sma di fadon komoto na bribi de noti moro leki wan esesi jeje dede di e graboe lontoe ensrefi. Èn foe di den memre foe na gemeente de leki wán skin, dan a kefar de dati tra sma kan kisi problema. Efoe wan sma di fadon komoto a bribi e panja falsi-leri no kon boen baka na jeje fasi nanga jepi foe lobi èn krakti gebroiki foe na balsem foe na Wortoe foe Gado, den a koti poeroe foe na memre disi (poti na dorosé foe na gemeente), de a wanenkri sani foe kibri den tra memre foe na skin (Teki gersi nanga Titus 1:10, 11.) Sorgoe dati jeje wakawaka-soro di e tjari dede kon no kisi joe! Tan boen gesontoe na jeje fasi foe tan farawe foe kon siki nanga wan denki foe wan sma di fadon komoto na bribi. Poti prakseri na tapoe na gesontoe rai na ini 2 Petrus 3:17, 18: „Oenoe foe dat’ede, lobiwan, loekoe boen, now di oen sabi dati na fesi, dati oen no meki na ferdwaal pasi foe sma di e kakafoetoe gi na wèt srepi oen gwe nanga den, èn oen lasi oen ègi stanfaste fasi. Nono, ma go doro foe gro na ini na no-ferdini-boenfasi èn sabi foe oen Masra èn Ferloesoeman Jezus Kristus.”
18 Ma fa wi kan kibri wisrefi tége a fadon komoto foe bribi? Fa wi kan kibri wi ati, sodati a no teki den kroektoe tak-go-tak-kon abra? Den aksi disi wi sa go loekoe na ini na tra artikel di e kon.
Joe kan memre disi
◻ Fa wi ben sa kan lasi den winimarki foe a jeje paradijs foe Jehovah?
◻ Foe san-ede a lési foe boekoe foe sma di komoto na bribi wi kan teki gersi nanga a lési foe lektuur foe fisti pori libi?
◻ San wi kan doe efoe sma e aksi wi foe bepaalde sani san sma di fadon komoto na bribi taki?
◻ Foe san-ede leri foe sma di fadon komoto na bribi de leki wakawaka-soro?
[Prenki na tapoe bladzijde 3]
Joe de so koni foe trowe materiaal foe sma di fadon komoto foe bribi?