Trowe a fadon komoto na bribi, hori tranga na a waarheid!
„Ibriwan sma di e poesoe go na fesi èn no e tan na ini na leri foe Kristus, no abi Gado. Na soema di e tan na ini na leri dati, en abi na Tata èn na Manpikin.” — 2 JOHANNES 9.
1, 2. (a) Fa Satan ben proberi ten na ten foe kiri na waarheid na mindri Jehovah pipel? (b) Foe san-ede a de gi Jehovah Kotoigi na moro prenspari sani foe trowe a fadon-komoto na bribi?
JEHOVAH GADO de na fonten foe jeje waarheid. Foe dat’ede a ben de wan sani di fiiti di a psalmsingiman ben begi na en: „Seni joe leti èn joe waarheid go na doro!” (Psalm 43:3). Waarheid de foe dat’ede wan marki foe kon sabi den anbegiman foe Jehovah. — Joh. 8:31, 32; 17:17.
2 Ini wan moeiti foe kiri na waarheidleti na mindri foe Jehovah pipel, dan Satan Didibri ben proberi ten na ten foe pori na kristen gemeente nanga jepi foe leri di no de foe na troe bribi (2 Kor. 4:1-6; Jud. 3, 4). Ma den moeiti disi foe en ben kon tron noti foe di kotoigi foe Jehovah ben trowe a fadon-komoto na bribi èn den hori tranga na a jeje waarheid. Te joe e loekoe en boen dan disi de a moro prenspari sani foe kan tan na ini wan krosbé matifasi nanga Jehovah Gado nanga Jezus Kristus, bika na kristen apostel Johannes ben skrifi na ondro na krakti foe santa jeje: „Ibriwan sma di e poesoe go na fesi èn no e tan na ini na leri foe Kristus, no abi Gado. Na soema di e tan na ini na leri dati, en abi na Tata èn na Manpikin.” — 2 Joh. 9.
3. Sortoe aksi wi sa go loekoe te wi e go loekoe Toe nanga Dri Johannes?
3 Ma san Jehovah Kotoigi moesoe doe foe kaka foetoe gi na fadon-komoto foe na troe bribi? Èn fa den leki „medewrokoman na ini na waarheid” kan meki kristen afersi go na fesi? (3 Joh. 8) Foe kisi wan piki dan wi sa loekoe na di foe Toe èn na di foe Dri brifi di na apostel Johannes ben skrifi na ondro krakti foe sante jeje na a pisiten foe 98 G.T. ini ofoe krosbé foe Efese (Pikin-Azië).
Waarheid nanga lobi de na moro prenspari afersi
4, 5. (a) Foe san-ede na apostel Johannes nanga reti ben kan kari ensrefi „na owroe man”? (b) Soema ben de „na misi di den verkisi” nanga en „pikin”?
4 Johannes ben bigin en brifi nanga den wortoe di e kon now:
„Na owroeman gi na misi di den ben verkisi èn gi den pikin foe en, di mi lobi troetroe, èn no wawan mi, ma ook toe ala den sma di ben leri sabi na waarheid, foe na waarheid ede di e tan na wi ini, èn a sa tan foe tégo nanga wi. — 2 Joh. 1, 2.
5 Na a kaba foe na fosi jarhondro na apostel Johannes ben de troetroe „na owroe man”, bika a ben de sowan wán hondro jari owroe èn ook toe wan owroeman di a ini jeje gro ben lepi srefsrefi. (Teki gersi Galatiasma 2:9.) Foe di a de taki nanga „na misi di den ben verkisi”, dan a ben kan sori na wan aparti gemeente di ben de ini wan presi di a no e kari na nen, èn den wortoe disi den ben kan gebroiki foe kori ferfolgoeman. Ini na geval dati dan en „pikin” ben de jeje pikin, memre foe na gemeente dati èn kristen di ben doe kon nanga jepi foe na jeje èn di Gado ben „verkisi foe na kari foe hemel (Rom. 8:16, 17; Fil. 3:12-14). Na tra sé Kuria (a Griki wortoe gi „Misi”) kan de ook toe na nen foe wan ofoe tra kristen oema.
6. (a) San na „a waarheid” di Johannes e sori a tapoe? (b) Fa „a waarheid” e tan na ini troe kristen èn fa a de „foe tégo” nanga den?
6 Wi kan taki awins fa a no fa, dati Johannes nanga ala tra kotoigi foe Jehovah di ben leri sabi „na waarheid”, ben lobi ’na misi disi èn en pikin’ troetroe. Nanga „na waarheid” den e sori tapoe na heri leri di anga na makandra, èn pe Jezus Kristus de na centrale figuur. A ben de troetroe fanowdoe foe hori tranga na a waarheid disi foe kan kisi ferloesoe (Joh. 4:24; Ef. 1:13, 4; 1 Joh. 3:23). Wan fundamenti rede foe san-ede Kotoigi foe Jehovah na fositen èn now abi lobi gi makandra, de dati den abi wan gemeenschappelek lobi gi „na waarheid”. Disi „e tan na ini” den, foe di a waarheid e tan libi ini den ati. A waarheid disi „te foe tégo” sa de leki wan alaten mati nanga den sortoe troe kristen disi. A de nanga leti wan diri goedoe foe Jehovah Kotoigi na ini disiten èn den e taki den hemel Tata opregti tanga foe disi.
7. Fa no-ferdini boenfasi, sar’ati èn vréde, alamala komoto foe Gado?
7 Den sma di e hori getrow na „na waarheid” kan de séker foe den blesi foe Gado. Na apostel e sori na tapoe disi te ai taki moro fara:
”No-ferdini boenfasi, sar’-ati nanga vréde sa de nanga wi foe Gado, na Tata, èn foe Jezus Kristus, na Manpikin foe na Tata. nanga waarheid èn lobi” (2 Joh. 3).
Jehovah èn Jezus e gi na no-ferdini boenfasi, foe di sondoe sma „nanga jepi foe [Gado] no-ferdini boenfasi e kon de regtvaardiki tapoe na fundamenti foe na ferloesoe nanga jepi foe na loesoe-prijs di Kristus Jezus ben pai” (Rom. 3:23, 24). Sosrefi toe na hemel Tata de na fundamenti foe sari-ati, ma disi onvolmaakti sma e kisi nanga jepi foe Kristus (Hebr. 4:14-16; Jud. 20, 21). Boiti dati, dan den sondoe foe sondari moe verzoen efoe den wani abi vréde nanga Jehovah èn disi sa kan foe de so nanga jepi foe na dede foe Jezus leki loesoe-ofrandi. — Kol. 1:18-20.
8. San kan bedoel na ini 2 Johannes 3 nanga den wortoe „nanga waarheid èn lobi”?
8 Johannes e poti den wortoe a tapoe „nanga [ofoe „ini”] waarheid èn lobi.” (Kingdom Interlinear Translation). Na so fasi a ben kan wani taki dati kristen ’boiti waarheid nanga lobi’ moe abi ook toe no-ferdini boenfasi, sar’ati nanga vréde. Ofoe Johannes ben kan bedoel dati Jehovah dienstknegti ben sa ondrofeni den blesi disi efoe den ben sa tan na ini na waarheid èn den sa tan sori lobi.
’Waka na ini waarheid nanga lobi’
9, 10. (a) Foe san-ede Johannes ben abi réden foe ’prisiri srefsrefi’? (b) San „wantoe” ben doe nanga na waarheid?
9 Na apostel kari wan réde foe persoonlek prisiri èn gi sosrefi toe wan krakti vermane di a taki moro fara:
„Mi e prisiri srefsrefi foe di mi ben feni na mindri joe pikin wantoe di e waka na ini na waarheid, leki wi ben kisi wan komando foe na Tata. Now wi e begi joe foe dat’ede, misi, leki wan sma di no e skrifi joe wan njoen komando, ma wan komando di foe bigin-bigin wi ben abi, dati wi lobi makandra.” — 2 Joh. 4, 5.
10 Johannes ben abi réde foe abi bigi prisiri, foe di „wantoe” ’e waka na ini na waarheid’. Den ben poti bribi na ini na nen foe Jezus Kristus, ben abi lobi gi makandra èn den ben feti foe libi akroederi na patron di Gado Manpikin ben gi (Hebr. 12:1-3; 1 Joh. 3:23). Efoe Johannes ben skrifi gi wan oema di ben nen Kuria , dan wantoe foe en égi pikin ben de na ini na waarheid. Efoe a ben gebroiki den wortoe „pikin” èn „misi di den ben verkisi” na agersi fasi, dan a ben kan prisiri dati wantoe memre foe a gemeente na ini a presi di a no ben kari a nen ben kakafoetoe gi na fadon-komoto na ini bribi èn ben hori tranga na a waarheid èn ben feti baka wan libi foe getrowfasi na Gado. Loyaal kristen kotoigi foe Jehovah foe troe ben si en alaten leki den plekti foe hori tranga na a waarheid ofoe ’waka na ini’. Den e si disi leki na komando foe den hemel Tata èn den no e feni en wan hebi foe hori na komando disi. — Teki gersi 1 Johannes 5:3.
11. (a) San a e aksi foe hori a komando, ’dati wi moe lobi makandra’? Foe san-ede Johannes ben kan taki dati disi no ben de „wan njoen komando”?
11 Na apostel ben aksi na „misi” foe hori na komando di e aksi foe kristen foe „lobi’makandra’. (Teki gersi 1 Johannes 3:11.) Di Jezus ben tjari Gado wani kon na fesi gi sma di ben frede Gado, a ben gi en discipel na komando foe lobi makandra soleki en ben lobi den.’ Tapoe na fundamenti foe na komando disi, dan no wawan lobi gi den sma na joe sé ben e aksi, ma sosrefi toe wan lobi di joe e offer joesrefi, èn pe wan sma srefi de klari foe gi en libi foe na boen foe makandra (Lev. 19:18; Matt. 22:39; Joh. 10:14, 15; 13:34; 15:13). Na komando ben de wan verprekti gi Kristus bakaman „foe sensi na bigin’ foe a matifasi foe den nanga Gado pe den gi densrefi abra na en — eigenlek foe sensi a ten di Jezus ben gi na komando èn seker foe sensi na momenti di na kristen gemeente ben opo nanga Pinksteren na ini na jari 33 G.T. Na a fasi dati dan foe dat’ede a no „ben de wan njoen komando”, soleki Johannes taki.
12. San Johannes ben bedoel di a ben taki: „Disi na a komando, . . . dati joe moe tan waka na ini dati”?
12 Moro fara Johannes taki foe lobi:
”Èn disi wani taki na lobi, dati wi tan waka na ini akroederi nanga en komando. Disi na a komando, soleki oenoe ben jere foe sensi na bigin, dati oenoe moe tan waka na ini” (2 Joh. 6).
Troe anbegiman e gi jesi na Jehovah nanga ala prisiri, foe di den lobi en nanga den heri ati, sili, krakti, nanga froestan (Luk. 10:27). Den sma di Johannes ben skrifi gi, ben sabi na komando foe lobi „foe sensi na bigin”, dati wani taki, foe sensi na ten foe Jezus diniwroko, foe sensi den ben gi densrefi abra na Gado. Ma san na apostel ben bedoel di a ben taki: „Disi na a komando . . . dati joe moe tan waka na ini”? Aladi „na ini” ben sa kan abi foe doe nanga na „komando” foe lobi (Bigi Njoensoe Bijbel), na tekst kande séker abi foe doe nanga „lobi” srefi. Na ini ala toe geval „tan waka na ini” ben wani taki dati kristen moe tan sori lobi gi makandra. — 1 Joh. 3:18; teki gersi Romeini 13:8-10.
Loekoe boen gi sma di fadon komoto na bribi
13. (a) Na mindri soema den „bedrigiman” ben wini sma di ben sa kon na den sé? (b) Sortoe falsi leri den „bedrigiman” ben panja?
13 A ben sa aksi moeiti foe tan waka na ini lobi èn waarheid. Johannes verklari sortoe réde ben de foe dati di a skrifi:
„Bika foeroe bidrigiman ben go na doro na ini na grontapoe, sma di no e erken na kon foe Jezus Kristus na ini skin. Disi de na bedrigiman èn na antikrist“ (2 Joh. 7).
A de krin dati na a ten dati wan toe falsi proféti ben e waka lontoe èn ben e proeberi foe wini na mindri den troe kristen sma di drai kon na den sé. (Teki gersi Tori foe den Apostel 20:30.) Aladi den bidrigiman „disi di ben e kori sma ben taki dati den ben de den-srefi kristen, tog den no ben erken dati Jezus Kristus ben kon leki libisma na ini skinfasi. Den sortoe falsi leri disi ben sa njan Jezus rol leki Messias nanga loesoeman na ondro, èn ook toe en moro hè positie na ini hemel. — Mark. 1:9-11; Joh. 1:1, 14; Fil. 2:5-11.
14. Foe san-ede Johannes kari den sma di fadon komoto foe bribi „den bedrigiman èn na antikrist”?
14 Johannes ben kari den sma disi di fadon-komoto na bribi „na bidrigiman èn na antikrist” foe di den leri foe den ben e kori sma èn densrefi ben de kontra Kristus. Dati na apostel e sori tapoe „foeroe antikrist”, e sori dati boen foeroe aparti féjanti foe Kristus ben de aladi den alamala ben sa kan de wan samengesteld persoon di ben sa kan kari na „antikrist” (1 Joh. 2:18). Foe di den taki dati den no sabi Jezus leki Kristus èn leki Gado Manpikin, dan den ben e taki sosrefi toe, dati den no sabi na heri leri di komoto foe a bijbel èn di abi foe doe nanga en. Getrow Kotoigi foe Jehovah sa trowe krinkrin den fasi foe loekoe foe den falsi leriman disi.
15. (a) Sortoe „paiman dorodoro” den kristen di ben wiki nanga jeje ben sa kisi te den ben „poti ai na den-srefi”? (b) Foe san-ede meki ibri Kotoigi foe Jehovah moe loekoe boen gi falsi leri?
15 Foe di gefaar ben de dati kristen ben sa kan drai poeroe foe na waarheid èn den ben sa kan fadon komoto foe bribi, meki Jehannes ben gi den tranga:
„Loekoe na joesrefi, sodati den sani di ben kon foe de nanga jepi foe den wroko foe wi, no lasi gwe. ma kan kisi wan paiman dorodoro. Ibriwan sma di e poesoe go na fesi èn no e tan na ini na leri foe Kristus, no abi Gado. Na sma di e tan na ini na leri dati, abi na Tata èn na Manpikin” (2 Joh. 8, 9).
Foe di Johannes nanga trawan ben doe wroko soleki na prèki foe na „boen njoensoe”, dan den ben meki froktoe ’doe kon’ di ben abi leki bakapisi na bekering foe den sma di biginbigin ben kisi na brifi disi. Ma soso te na jeje fasi den ’ben sa poti ai na densrefi’, dan den no ben sa ’lasi’ na ini na tori foe no-ferdini boenfasi, sar’ati nanga vréde foe Jehovah èn en Manpikin èn ook toe na ini na tori foe demakandra nanga ala sma di ben smeti kon makandra nanga banti foe waarheid èn lobi. Efoe den medebribiman foe Johannes di ben kisi salfoe nanga na jeje ben sa tan getrow, dan den ben sa tan prisiri na ini dienst gi Jehovah di e tjari pai kon. Foe di Johannes e taki foe „wan paiman dorodoro”, dan a de krin dati a e bedoel ook toe na hemel „kroon” di loyaal salfoe kristen ben sa kisi (Openb. 2:10; 1 Kor. 9:24-27; 2 Tim. 4:7, 8; Jak. 1:12) A no de foe taki dati ibri kotoigi foe Jehovah moe trowe leri di no e kroederi nanga na troe leri foe di disi ben kan poeroe tégo libi foe den anoe, ofoe na ini hemel ofoe na grontapoe.
16. (a) Fa den sma di fadon komoto foe bribi „ben go na fesi”? (b) Fa wi kan taki dati getrow kotoigi foe Jehovah abi „na Tata èn na Manpikin”?
16 Den „bidrigiman” di fadon komoto foe bribi ’ben poesoe go na fesi’ èn no ben ’tan na ini na leri foe Kristus’, foe di den no ben hori tranga na a waarheid di Jezus nanga en getrow apostel ben leri. Foe dat’ede meki den ketter disi no ’ben abi Gado’, bika den no ben de ini wanfasi nanga Jehovah èn den no ben de ini wán boen matifasi nanga en (1 Joh. 1:5, 6; 2:22-25). Na a tra sé, dan getrow kotoigi foe Jehovah e „taki” ’dati Kristus ben kon na skin-fasi’, bika den e sori bribi na ini a ferloesoe ofrandi èn den e hori tranga na san en nanga en loyaal apostel ben leri (Matt. 20:28; 1 Tim. 2:5, 6; 2 Joh. 7). Den opregti kristen disi e hori tranga na a waarheid èn foe dat’ede abi „na Tata èn na Manpikin” foe di den sabi den, e warderi den égifasi foe den èn e tan prisiri na ini wan krosbé matifasi nanga den.
Fa wi moe de nanga den sma di fadon-komoto foe na bribi
17. Fa loyaal kristen ben moe behandel den „bidrigiman” leki fa 2 Johannes 10, 11 taki?
17 Kristen moe lobi foe teki sma na oso, ma disi no moesoe de so gi sma di fadon komoto foe bribi (1 Petr. 4:9). Johannes e meki disi kon na krin te a e taki:
”Efoe wan sma e kon na joe èn no e tjari na leri disi, no teki en noiti ini joe oso èn no taki en odi toe. Bika na sma di e taki en odi e teki prati na ini en ogri wroko” (2 Joh. 10, 11).
Den „bidrigiman” ben waka lontoe èn ben de druk bezig foe panja falsi leri. A no de foe taki dati a ben sa de wan fowtoe sani gi ibri kristen di ben gi ensrefi abra foe langa na anoe foe matifasi gi den falsi leriman disi foe di a ben teki den na ini en oso. Sosrefi toe a ben sa de wan sani di no de joisti foe taki tapoe na wan ofoe tra fasi odi na den sma disi di fadon-komoto na bribi, kande wan odi foe switikon te den ben doro ofoe wan blesi winsi te den ben e gwe. No wan enkri loyaal kristen sa winsi boen gi wan sma di foe espresi e meki falsi leri go na fesi. Foe dat’ede meki séker no wan enkri getrow kotoigi foe Jehovah sa wani foe abi prisiri demakandra nanga so wan sma. — 1 Kor. 5:11-13.
18. Foe san-ede meki nowan loyaal kotoigi foe Jehovah sa wani gi odi srefi a wan sma di fadon komoto foe bribi?
18 Boiti dati, efoe wan dienstknegti foe Jehovah di gi ensrefi abra ben sa teki sowan bidrigi leriman na ini en oso, dan a ben sa de tjari frantwortoe toe na ini den „ogri wroko” foe na sma dati. Foe dat’ede meki no wan enkri loyaal, disiten kotoigi foe Jehovah sa wani taki odi na wan sma di fadon-komoto na bribi èn di sluit uit ofoe di hari ensrefi poeroe, ofoe sa wani gi pasi dati sowan sma sa gebroiki en kristen oso leki wan presi pe a e panja en falsi leri. Wan bribiman séker ben sa tjari wan bigi frantwortoe na fesi foe Gado te a ben sa teki wan sma di fadon-komoto na bribi na ini oso èn disi ben sa kan tjari na jeje dede foe wan mede-anbegiman foe Jehovah kon. — Teki gersi Romeini 16:17, 18; 2 Timoteus 3:6, 7.
19. Sortoe sé loyaal kotoigi foe Jehovah e teki na ini a tori foe disiten sma di fadon komoto na bribi?
19 Son sma di wan tron ben doe dienst leki wan kotoigi foe Je hovah ben trowe difrenti bijbel loekoe foe sani di abi den fundamenti tapoe den leri foe Jezus Kristus nanga en apostel. Den e taki foe eksempre nanga sékerfasi dati wi no e libi na ini den „laatste dé”, aladi den bewijsi de psa marki dati disi de so (2 Tim. 3:1-5). Den sma disi di fadon-komoto na bribi ’ben komoto na wi mindri foe di den no de foe na sortoe foe wi’ (1 Joh. 2:18, 19). Den ketter disi, di abi den égi afersi na prakseri foe kon na fesi, no abi foe dat’ede prisiri demakandra moro nanga loyaal salfoe kotoigi foe Jehovah nanga den kompe foe den èn leki wan bakapisi foe en den no abi wan prati nanga na Tata èn na Manpikin, awansi den e gafa dati den abi getrow demakandra nanga Gado èn Kristus. Na presi foe dati den de ini jeje doengroe (1 Joh. 1:3, 6), Den sma di lobi leti nanga waarheid, moe teki wan krakti bosroiti tegen den sma disi di e meki falsi leri go na fesi. Loyaal kotoigi foe Jehovah ini no wan fasi sa wani de frantwortoe na den ogri wroko foe den sortoe ontrouw sma disi foe di den e hori baka gi den ogri wortoe nanga doe foe den tapoe wan ofoe tra fasi. Meki wi moro foeroe „stré sondro foe weri gi na bribi di wan de èn foe alaten ben gi abra na den santa wan”. — Jud. 3, 4, 19.
Hori tranga na a waarheid
20. San Johannes ben howpoe foe den, na presi dati a ben skrifi moro fara?
20 Baka di Johannes ben gi en medebribiman a tranga foe trowe a fadon-komoto na bribi èn foe hori tranga na a waarheid, a bosroiti en di foe toe brifi di skrifi ondro krakti foe santa jeje nanga den wortoe:
„Aladi mi abi foe skrifi joe foeroe sani, tokoe mi no wani foe doe en nanga papira nanga enki ma mi howpoe foe kon na joe èn foe taki fesi na fesi nanga joe sodati joe kan abi prisiri doro-doro. Den pikin foe joe sisa, na wan di den ben verkisi e seni gi joe den odi” (2 Joh. 12, 13).
San na apostel ben abi ete na prakseri, a no ben wani skrifi en na ini brifi. Foe dat’ede a ben poti en papirus papira, en ken pèn èn na enki (séker kande wan blaka moksi foe goma, blaka smoko èn watra). Awansi a ben de boen owroe, tokoe a ben wani go fisiti den èn taki nanga den „fesi na fesi”, ofoe letterlek foe „mofo nanga mofo” èn na a fasi dati prisiri ensrefi ini wan krosbé takmakandra (Kingdom Interlinear Translation; teki gersi Numeri 12:6-8). Na fisiti foe na owroe apostel séker ben sa de wan jeje kenki-makandra foe dek’ati di ben sa tjari winimarki leki bakapisi èn den ben sa de toemsi switi. — Teki gersi Romeinisma 1:11, 12.
21. San den laatste wortoe foe 2 Johannes e tjari kon na krin?
21 Den odi di Johannes ben tjari kon abra, e sori na kristen lobi di de tai Jehovah anbegiman makandra. Efoe a ben skrifi na wan sma di ben nen Kuria, dan a de krin dati a ben abi wan sisa na skinfasi di den pikin foe en ben gi en switi odi. Ma efoe na apostel ben poti prakseri na tapoe wan tra gemeente (kande na Efese), dan na sisa ben de a heri gemeente dati èn den „pikin” ben de den aparti memre foe en.
22. (a) San Jehovah Kotoigi sa kan doe nanga jepi foe a di foe 2 brifi foe Johannes? (b) Foe sortoe afersi wi moe taki ete?
22 Na ini en tweede brifi di ben skrifi na ondro krakti foe santa jeje Johannes sondro draidrai ben gi lobi rai di ben jepi medebribiman foe trowe a fadon-komoto na bribi èn foe hori tranga na a waarheid. Disi na precies san Jehovah Kotoigi na ini disi ten wani teki na faste bosroiti foe doe nanga a jepi foe Gado. Ma leki „medewrokoman na ini na waarheid” di de klari, wi moe meki den kristen afersi kon na fesi (3 Joh 8). Fa disi kan doe?
Joe kan memre den sani di e kon now?
□ San a wani taki foe ’waka na ini na waarheid’?
□ Sortoe falsi leri den „bedrigiman” e panja?
□ Fa Jehovah Kotoigi moe si sma di fadon komoto na bribi soleki 2 Johannes 10, 11 e taki?
[Prenki na tapoe bladzijde 4]
Loyaal kotoigi foe Jehovah ben trowe alaten na fadon komoto na bribi