Tan waka na ini a leti di Gado e gi
„Gado na leti.” — 1 JOHANNES 1:5.
Na ini a ten foe a studie ini a gemeente foe a artikel disi èn den toe trawan di e kon, a studileider moe lési den pisi foe Wan Johannes di no skrifi efi ten de
1, 2. Oten èn pe den ben skrifi Wán Johannes, èn na brifi abi foe doe nanga soema?
JEHOVAH KOTOIGI de grantangi foe a leti di Gado e gi èn den abi a prakseri foe tan waka na ini. Ma dati no de makriki bika srefi den fosten discipel foe Jezus Kristus ben tanapoe na fesi na fadon komoto na bribi. Ma Jezus loyaal apostel ben tanapoe a pasi foe a panja go moro fara èn wan foe den sma di ’ben wroko leki wan skotoe’, ben de na apostel Johannes (2 Thessalonika 2:1-12). Di a ben libi leki wan boen grani man na ini ofoe krosbé foe Efese wan pisten foe 98 G.T., a ben skrifi en fosi brifi di Gado ben gi nanga en santa jeje. Na rai di ben skrifi drape ben jepi den fosi-jarhondro kristensma foe tan waka na ini a leti di Gado e gi. Ma fa a de nanga wi?
2 Den wortoe foe Johannes de net so boen gi kristen ini a di foe twenti jarhondro. Sorgoe foe dat’ede dati na a ten te joe e studeri persoonlek na artikel disi èn den toe trawan di e kon joe lési ini na takmakandra ala den tekst foe en fosi brifi di ben skrifi nanga santa jeje èn di de mindri haakjes. Na ini na brifi foe na apostel nanga den sani di wi o taki foe en dan den persoonlekvoornaamwoortoe „wi” nanga „oenoe” e sori moro foeroe tapoe Jezus salfoe bakaman. Ma fundamenti gronprakseri di abi foe doe nanga regtvaardikifasi, lobi, bribi nanga tra égifisi foe asrefi sortoe abi foe doe ooktoe nanga kristensma nanga wan grontapoe howpoe.
Na abi foe wan prati di e gi prisiri
3. San e bewijsi dati a Manpikin foe Gado ben libi èn njan pina leki libisma èn ben dede leki libisma, èn foe san-ede den e kari en „a wortoe foe libi”?
3 Johannes e taki fosi foe wan prisiri „abi-prati”. (Lési 1 Johannes 1:1-4). Jezus, „a wortoe foe a libi” ben de „foe sensi a bigin” na Jehovah leki a fosi meki-sani foe Gado, nanga jepi foe soema „ala tra sani ben meki” (Kolosse 1:15, 16). Bepaalde fosi jarhondro kristen di ben fadon komoto na bribi ben taki dati den ben de sondro sondoe èn den poti na reti presi foe Kristus ini a seti foe Gado na wan sé. Ma den apostel foe Jezus ben jere en e taki, ben loekoe en nanga ala prakseri èn ben fasi en. Den ben sabi dati a krakti foe Gado ben wroko nanga jepi foe en. Foe dat’ede bewijsi di ben komoto foe kotoigi di ben si en de dati a ben de a Manpikin foe Gado di ben libi èn njan pina leki wan libisma, èn di ben dede. En de a „wortoe foe libi” foedi „[tégo] libi ben kon na krin” nanga jepi foe Jezus, nanga jepi foe soema Gado gi na loesoeprijs. — Romeini 6:23; 2 Timotéus 1:9, 10.
4. Tapoe san na „abi prati” e sori ini san den salfoe-wan e prisiri?
4 Foe den sani di den apostel ben taki èn skrifi, ’den ben gi kotoigi’ foe na sondro sondoe sma Jezus Kristus. Johannes ben ’ferteri’ foe den sortoe afersi disi, sodati salfoewan ’ben kan abi wan prati’ ofoe ben sa de sma di e teki prati, nanga tra Kownoekondre-erfgenaam, nanga na Tata èn nanga en Manpikin. Na „abi prati” disi e sori tapoe wanfasi èn e meki bigi prisiri kon (Psalm 133:1-3; Johannes 17:20, 21). Sma di fadon komoto na bribi èn di ben tége fosten kompe ini na dienst foe Jehovah, no e prisiri moro na ini na teki prati nanga Gado èn Kristus.
’Gado na leti’
5. Sortoe „boskopoe” den apostel foe Jezus ben kisi, èn fa dati abi krakti tapoe a waka nanga libi foe Jehovah Kotoigi?
5 Dan moro fara wan tjari kon na krin e de foe wan boskopoe di den apostel, ben kisi foe Jezus. (Lési 1 Johannes 1:5-7) Disi de na boskopoe: „Gado na leti . . . Èn ini akroederi nanga en kwetkweti doengroe no de [nowan sani di no de santa, hoeroedoe sani, lé ofoe godelowsoe sani].” Jehovah Kotoigi e tan foe dat’ede farawe foe ala sondoe doe di abi foe doe nanga doengroe (Job 24:14-16; Johannes 3:19-21; Romeini 13:11-14; 2 Korinte 6:4; 1 Thessalonika 5:6-9). Foedi bepaalde sma di fadon komoto na bribi no e bribi na ini a de foe sondoe wroko, meki den ben de na ini jeje doengroe. Den ben taki dati den ben aibi kibri sabi, ma Gado na leti, a no de wan doengroe kibri sani. A e gi jeje leti soso na en getrow kotoigi. — Mattéus 5:14-16; 1 Petrus 2:9.
6. Efoe wi ’e beoefen na waarheid’, sortoe blesi e kon dan a tapoe wi?
6 Efoe wi e taki dati ’wi abi prati nanga Gado’ ma „tokoe e go doro foe waka na ini doengroe”, dan wi e „lé èn wi no o beoefen na waarheid” ofoe no e libi na ini akroederi nanga dati. Ma efoe wi e waka na baka wan libifasi di de ini akroederi nanga na waarheid, dan wi de netleki Gado na ini a leti. „Wi abi wan prati” nanga kompe kristen, di de alamala wan na ini leri, jeje loekoe, a meki foe discipel èn tra pisi foe na soifri anbegi.
7. Foe san-ede a broedoe foe Jezus kan ’krin wi foe ala sondoe’?
7 Tra fasi leki bepaalde fosten kristen di ben fadon komoto na bribi a de so dati wi di „e waka na ini a leti” e erkèn taki sondoe de wan sani di no krin. A broedoe foe Jezus „e krin wi foe ala sondoe” foe di wi no de espresi sondari (Mattéus 12:31, 32). Wi de troetroe grantangi dati Gado e sori srefi sar’ati na kristensma di lasi pasi ma di abi borow. — Psalm 103:8-14; Micha 7:18, 19.
Wan fundamenti foe verzoening
8, 9. (a) Tapoe a gron foe san Jehvoah sa gi wi pardon? (b) Sortoe sani di taki foe na tori foe sondoe ben fowtoe?
8 Dan moro fara Johannes e tjari kon na krin san de na fundamenti foe kon krin foe sondoe (Lési 1 Johannes 1:3–2:2.) Efoe wi e taki: „Wi no abi sondoe”, dan wi no wani foe bribi dati ala onvolmaakti libi, sma abi sondoe èn „na waarheid no de na ini wi” (Romeini 5:12). Ma Gado de „getrow”, èn e pardon wi ofoe wi „ferteri en wi sondoe” èn e sori na ini disi wan fasi foe berow di e bewégi wi foe tapoe nanga a doe foe ogri (Odo 28:13). Gado ben taki foe den sma di teki poti na ini a njoen ferbontoe: „Mi no sa prakseri den sondoe foe den moro” (Jeremia 31:31-34; Hebrewsma 8:7-12). A e hori ensrefi na a pramisi dati foedi a e gi den pardon.
9 Boiti foe dati, Gado de „regtvaardiki” a e hori ensrefi alaten na en markitiki foe regtvaardikifasi. A ben doro nanga jepi foe na ferloesoe ofrandi na marki foe geregtgheid èn a kan ’pardon wi sondoe èn krin wi foe ala onregtvaardikifasi’ efoe wi e ferteri nanga bribi na ini Jezus srakti-ofrandi dati wi de sondari (Hebrewsma 9:11-15). Nanga en dede na Messias ben tjari sondoe gwe, net soleki na bokoboko di den ben poti sondoe na en tapoe tapoe na Verzoen-dé ben seni go na ini na gran sabana (Leviticus 16:20-22; Jesaja 53:5, 8, 11, 12; 1 Petrus 2:24). Bepaalde sma di ben fadon komoto foe bribi ben taki: „Wi no ben sondoe” èn ’ben meki Jehovah na a fasi dati tron wan léman’. Ma ’Gado no kan lé’ èn en Wortoe e meki wi si dati ala onvolmaakti libisma e sondoe (Titus 1:2; Prékiman 7:20; Romeini 3:23). Ija, te wi e taki: „Wi no ben sondoe”, dan disi ben sa wani taki dati a Wortoe foe Gado „no de ini wi.”, no de na ini wi ati! — Teki gersi nanga Hebrewsma 8:10.
10. Fa Jezus de „wan zoenoffer”?
10 Johannes e skrifi „den sani disi” foe sondoe, gi pardon nanga kon krin sodati wi no e doe sondoe. Den wortoe foe en moesoe gi wi tranga foe feti tranga a baka foe no sondoe (1 Korinte 15:3). Ma efoe tokoe ete „wi doe wan sondoe” èn abi berow, dan wi „abi wan jepiman na a Tata”, dati wani taki „Jezus Kristus, wan regtvaardikiwan” di e taki foe na afersi foe oenoe na Gado (Hebrewsma 7:26; teki gersi nanga Johannes 17:9, 15, 20). Jezus de „wan zoenofrandi”. A dede foe en ben doro a marki foe geregtigheid èn a ben meki a de mogelek gi Gado ini a geval foe jeje Israëlsma èn „na heri grontapoe” makandra nanga na „bigi ipi” foe sori sar’ati èn foe teki na sondoe-paiman gwe (Romeini 6:23; Galacia 6:16; Openbaring 7:4-14). Wi e warderi na ofrandi dati srefsrefi!
Gi jesi na Gado èn sori lobi
11. Te wi sori san, wi e sabi dati wi de ini „wanfasi nanga” Gado?
11 Te wi wani tan waka na ini na leti di komoto foe Gado, dan wi moesoe gi jesi na Jehovah (Lési 1 Johannes 2:3-6.) Wi e ferstan dati wi „ben leri sabi” Gado, dati wani taki abi wan ferstan foe en nanga en égifasi, efoe „wi e tan hori en gebod”. Ibriwan sma di e taki dati a sabi Gado Jehovah ma no e gi jesi na en, „de wan léman”. Na a tra sé na „lobi foe Gado de tjari kon de volmaakti”, ofoe boen dorodoro, efoe wi e hori en wortoe. „Nanga disi”, foedi wi e sori dati wi e gi jesi èn e lobi Gado, wi e sabi dati wi de „ini wanfasi nanga en” èn wi de ferplekti foe waka net soleki en Manpikin na ini a wroko di de na ini a meki foe discipel èn ooktoe na ini a tori foe na matifasi foe wi nanga tra sma.
12. Sortoe „owroe gebod” kristen abi, èn foe san-ede a de ooktoe „njoen”?
12 Ooktoe brada lobi de toemsi prenspari (Lési 1 Johannes 2:7, 8) Johannes e skrifi „wan owroe gebod” di den getrowman ben kisi na ini a libi foe den leki kristen „foe sensi a bigin”. A de „owroe” foedi Jezus ben gi en jari a fesi, di a ben taigi en „foe lobi makandra net soleki en ben lobi den” (Johannes 13:34). Ma tokoe a de ooktoe „njoen” foedi a e go moro fara leki a lobi foe tra sma na joe sé di a wèt ben e aksi èn a e aksi dati wan sma de klari foe gi en sili abra foe a boen foe kompe libisma (Leviticus 19:18; Johannes 15:12, 13). Foedi na lobi foe wi di e offer ensrefi e bewijsi dati foe libi nanga ’a njoen gebod’ disi ’ini na geval foe Jezus èn ini wi geval de wan troe tori, dan na doengroe e hari psa èn a troe leti e skijn’ na mindri wi kaba.
13. Leki fa 1 Johannes 2:11 taki dan soema de „ini na leti” èn soema no de na ini?
13 Ma soema de troetroe „ini a leti”? (Lési 1 Johannes 2:9-11). We, „a sma di e taki a de ini a leti èn tokoe abi ogri-ati gi en brada”, de „te now ete” na ini jeje doengroe. Ma „a sma di e lobi en brada, e tan ini a lobi”, èn na ini en geval no wan „sani de, foe naki foetoe fadon”. Djaso a so dati na ini na Griki wortoe na prakseri de foe wan val di den poti gi meti nanga wan beti na ini èn a e sori na tapoe wan sani di e meki wan sma kan fadon go na ini na trapoe foe sondoe. Te joe loekoe en boen dan wan sma di e taki dati a de wan kristen ma di abi ogri-ati gi en brada, „no sabi pe a e go, bika na doengroe ben breni en ai” (Mattéus 13:13-15). Na warskow disi sa tjari joe go sofara foe tan farawe foe jeje doengroe foedi joe e wégri foe meki joe brada-lobi dede krinkrin foe persoonlek trobi, den lé foe sma di fadon noso a bribi ofoe foe wan tra sani ede?
A fundamenti foe fertrow
14. Soema de den „pikinnengre” èn den „tata” di Johannes ben taki nanga den?
14 Johannes e tjari moro fara fertrow kon a fesi ini den „pikinnegre”, ofoe jongoe pikin, di a de krin taki a e sori tapoe na heri gemeente. (Lési 1 Johannes 2:12.) Den sondoe foe wi kisi pardon ’foe na nen foe Kristus ede’, bika soso nanga jepi foe en Gado ben meki a kan foe kisi ferloesoe (Tori foe den Apostel 4:12). Salfoewan ’sabi na Tata’ foedi a ben wiki den nanga en jeje. Sonwan de „tata” — a de krin taki den de bribiwan di de moro owroe, abi moro ondrofeni èn di de a fesi na jejefasi. Den sabi Jezus, di „de foe sensi a bigin”, foedi Gado ben meki en bifo ala tra sani.
15. (a) Soema de den „jongoeman” nanga soema Johannes ben taki, èn fa den ben ’wini na godelowsoewan’? (b) Sori nanga wan eksempre fa wi kan ’wini’ na ini a ten disi Satan?
15 Den „jongoe man” di Johannes e taki nanga den, kan de moro jongoe, kristen di no abi someni ondrofeni. Den ben „wini na godelowsoewan [Satan]” foedi den no broko kindi gi en „bedoeling” (2 Korinte 2:11). Disi ben sa wani taki na ini a ten disi foe eksempre dati den e hori densrefi fara foe prisiri di no krin, sensueel pokoe nanga pornografie, sani di kan njan kristen gronprakseri na ondro èn di kan meki wan sma kan fadon go na ini seks hoeroedoe. Den „jongoeman” ben wini Satan foedi den ben de „tranga” na jejefasi èn „a Wortoe foe Gado” e tan na ini den. Meki a de dati wi de soleki den foedi wi e teki den jeje seti foe Gado, e trowe a fadon komoto na bribi èn e tan waka na ini a leti foe Gado.
Wan lobi di wi no moe abi
16. Sortoe lobi wi no moe abi, ma san sa de a geval nanga wi efoe wi abi grontapoe fasi foe loekoe sani èn e feti na baka sani foe kisi?
16 Ofoe wi de now jongoe ofoe owroe kristen, wan lobi de di wi no moe abi. (Lési 1 Johannes 2:15-17.) Wi no moe lobi ’na grontapoe èn no den sani di de na ini a grontapoe’. Wi moe waki moro foeroe foe no kisi flaka foe na pori fasi foe na onregtvaardiki libisma libimakandra èn wi no moe hari „na jeje” foe en kon na ini wi, dati wani taki wi no moe meki na sondoe jejefasi foe en di de na alasé bewégi wi ati (Efese 2:1, 2; Jakobus 1:27). Efoe wi sa abi grontapoe fasi foe loekoe sani èn feti na baka sani, dan „na lobi foe a Tata no de ini wi” (Jakobus 4:4). Disi de troetroe wan sani foe go denki dipi na ini begi, a no so?
17. Sortoe grontapoe lostoe kristensma no moesoe plisi?
17 „Ala sani san de na ini grontapoe” no e komoto foe Gado. Disi wani taki „na lostoe foe na skin” èn na plisi foe a skin wani taki dati wan sma e gi ensrefi abra na sondoe lostoe soleki hoeroedoeangri (1 Korinte 6:15-20; Galacia 5:19-21). Wi moe sorgoe ooktoe foe no broko kindi gi „na lostoe foe den ai”. Na froktoe di Eva nanga Adam no ben moesoe njan èn di ben de ini na ai wan sani di joe ben angri foe en, ben kori Eva, èn foe di David ben loekoe na Bathséba di a ben e wasi ensrefi ben tjari bigi sondoe kon (Genesis 3:6; 2 Samuël 11:2-17). Foe tan waka na ini a leti di Gado e gi, meki wi moe hori wisrefi foe dat’ede farawe foe pori prisiri èn tra sani di e wroko na tapoe sondoe lostoe èn e pori na ati. — Odo 2:10-22; 4:20-27.
18. Foe san-ede „na prodo nanga sani di wan sma abi foe tan na libi” de wan soso sani, èn san na a no e tjari kon nanga en?
18 San e kon ooktoe foe na grontapoe, de „na prodo nanga den sani di wan sma abi foe tan a libi”. Wan sma di abi hémemre kan meki bigi foe en goedoe, èn krosi di a abi èn den sortoe sani disi, di alamala kan lasi. „Na prodo” foe en kan meki indruk tapoe son sma èn tjari nanga en taki son sma e gafa en, ma no na blesi foe Gado. — Mattéus 6:2, 5, 16, 19-21; Jakobus 4:16.
19. San sa psa nanga a grontapoe disi, èn fa a sani disi moesoe wroko tapoe wi?
19 Denki na disi dati ’a grontapoe e pasa gwe’ èn kisi pori (2 Petrus 3:6). Den lostoe foe en èn den ferwakti di e gi sma howpoe sa go lasi makandra nanga en, so ooktoe den sma di lobi en. „Ma”, na so Johannes e taki, „a sma di e doe a wani foe Gado, e tan foe tégo.” Meki wi hori soboen wi ai tapoe tégo libi foedi wi ’e libi grontapoe lostoe a wan sé’ èn e tan waka na ini a leti di kon foe Gado. — Titus 2:11-14.
Loekoe boen foe a fadon komoto na bribi
20. Fa den e kari den sma di ’de kontrari Kristus’, èn a kon foe sortoe sani a sori foe densrefi de wan bewijsi?
20 Johannes e warskow now tége antikristen. (Lési 1 Johannes 2:18, 19). A e memre kompe-bribiman dati den ben jere foe den apostel ’dati na antikrist e kon’. Na kon na fesi foe „foeroe antikrist” e bewijsi dati na „laatste joeroe”, na kaba pisi foe na ten foe den apostel ben doro. Aladi den sma di ben de ’kontrari Kristus’ de wan samengestelde „antikrist”, tokoe foeroe aparti antikrist ben sori leki den e anbegi Gado, ma den „no ben de foe a sortoe foe wi” èn den drai baka gi na troe kristendom. Wi bréti dati a gwe ofoe a poeroe foe den sortoe sma disi ini a ten disi e sorgoe dati a gemeente no kon pori.
21. Foe san-ede den kristen di santa jeje wiki „abi sabi”, èn sortoe waarheid” den sabi?
21 Loyaal kristen di a jeje ben wiki den e trowe afasi foe loekoe sani foe sma di fadon komoto na bribi. Foedi nanga wan „salfoe foe na santawan”, Jehovah den e kisi jepi foe ferstan en wortoe, ’meki den alamala abi sabi’. (Lési 1 Johannes 2:20, 21.) Den sabi séker ’na waarheid’ di e go foe Jezus Kristus, aladi den sma di fadon komoto na bribi abi verdwaal-prakseri foe en. Foedi „nowan lé e komoto foe na waarheid” meki ala sma di lobi Jehovah e trowe den sortoe fowtoefasi foe loekoe sani disi èn den sma di e panja den disi.
22. San C. T. Russell ben doe di wan foe en fosten kompe ben taki a no e bribi na ini a loesoe-ofrandi?
22 A no de foe taki, „sortoe tra sma de na leḿan leki a sma di e taki dati Jezus Kristus”, „na salfoewan foe Gado” „no de”? (Lési 1 Johannes 2:22-25.) Ija, ’na sma di e taki dati a no sabi na Tata nanga na Manpikin, de na antikrist’! A de wan toemsi moi sani foe si dati di wan fosten kompe foe na bijbelondrosoekoeman Charles T. Russell ben poti na ferloesoe ofrandi na wan sé, Russell ben tapoe foe abi demakandra nanga en èn ben bigin nanga a tjari kon na doro foe na tijdschrift disi di alaten ben meki na waarheid bekenti di e go foe Kristus èn bigin en rol leki Messias èn a lobi dienst foe en leki na „zoenoffer”.
23. Fa a taki ’dati wan sma e bribi na ini a Manpikin’ abi krakti na tapoe wi matifasi nanga Gado èn den ferwakti foe wi?
23 Sma di fadon komoto a bribi èn di no wani sabi Kristus, no abi Jehovah leki Mati (Johannes 5:23). Ma wi di na ini publiki e ferteri ’dati wi e bribi ini na Manpikin, abi ooktoe na Tata’ foedi wi de na ini wan matifasi nanga Gado di a e feni boen (Mattéus 10:32, 33). Jezus loyaal fosten bakaman ben hori tranga na san den ini a libi foe den leki kristen ben kon sabi „foe sensi a bigin” foe a Manpikin foe Gado. Èn efoe na srefi waarheid de ini wi ati, dan wi sa tan na ini wanfasi nanga Gado èn Kristus èn wi sa kisi san „en ben pramisi”, tégo libi. — Johannes 17:3.
Kisi leri foe Jehovah
24. Soema kisi wan „salfoe” nanga sata jeje, èn san-ede den no abi fanowdoe dati wan sma leri den?
24 Efoe wi wani waka na ini na leti di e kon foe Gado èn no wani dati sma di fadon komoto na bribi kori wi, dan wi abi na joisti jeje leri fanowdoe. (Lési 1 Johannes 2:26-29.) Den wan di a jeje wiki, kisi wan „salfoe” foe santa jeje, leri sabi Gado nanga en Manpikin èn ’no abi fanowdoe dati wan sma [wan sma di fadon komoto na bribi] leri den’. Nanga jepi foe en jeje foe salfoe sma, Gado e leri jeje Israëlsma „foe ala sani” di de fanowdoe foe anbegi en tapoe wan fasi di a e teki (Johannes 4:23, 24; 6:45). Wi de nanga prisiri spesroetoe dati wi leki Jehovah Kotoigi e kisi sowan leri foe Gado nanga jepi foe „na getrow èn koni srafoe”. — Mattéus 24:45-47.
25, 26. (a) Foe san-ede salfoewan kan abi „fri foe taki sondro frede”? (b) San a wani taki foe doe „regtvaardikifasi”?
25 Johannes e taki nanga tranga nanga salfoewan di kisi boen leri foe tan „ini wanfasi” nanga Gado. Den sma di „de ini wanfasi” nanga Jehovah, de ooktoe ini wanfasi nanga en Manpikin (Johannes 14:19-21). Na tapoe na wanfasi disi wi e kisi tranga foe abi sodati „wi, te en (Kristus) sa sori ensrefi, sa abi fri foe taki sondro frede èn no afoe komoto a pasi nanga sjen na a ten foe en denoja [dati wani taki a ten foe en parousia]”.
26 Fa wi kan, foedi wi e libi now na ini a ten foe Jezus „denoja”, ondrosoekoe dati wi no afoe sjen foe noti èn troetroe waka na ini na leti di komoto foe Gado te wi e doe „regtvaardikifasi”? ’Efoe wi sabi dati Gado de regtvaardiki’, so Johannes e redeneer, dan ’wi e kisi na sabi dati ibriwan sma di e doe regtvaardikifasi, kon gebore foe en.’ ’Doe regtvaardikifasi’, wani taki gi jesi na den gebod foe Gado, tan fara foe onregtvaardikifasi èn hori wisrefi bezig nanga toemsi boen wroko soleki a meki foe discipel èn a jepi foe kompe-bribiman (Markus 13:10; Filippi 4:4-19; 1 Timotéus 6:17, 18). ’Kon gebore’ foe Gado wani taki, „kon njoen gebore” leki en jeje pikin. — Johannes 3:3-8.
27. San na apostel Johannes sa meki wi si moro fara?
27 Soboen Johannes ben sori wi fa wi kan tan waka ini a leti di Gado e gi. Moro fara a o meki wi si fa wi moe libi leki pikin foe Gado.
San joe ben leri?
◻ Sortoe bewijsi Johannes e gi dati a Manpikin foe Gado ben libi leki libisma èn ben pina èn ben dede leki wan libisma?
◻ Fa Jezus de wan „zoenoffer”?
◻ Sortoe „owroe” èn „njoen” gebod kristensma ben kisi?
◻ San sa psa naga a grontapoe disi, èn fa a sani disi moesoe abi krakti tapoe wi leki kristen?
◻ Fa salfoewan kan ondrosoekoe efoe den e waka na ini na leti di komoto foe Gado?