Go doro foe libi leki pikin foe Gado
„Ibri wan sma di no e doe regtvaardikifasi, no e komoto foe Gado, èn ooktoe a sma di no lobi en brada.” — 1 JOHANNES 3:10.
1, 2. Sortoe rai foe na apostel wi sa loekoe aladi wi sa go moro fara nanga na studie foe wi foe 1 Johannes?
JEHOVAH abi wan osofamiri di de na hemel èn na grontapoe èn boen foeroe sma de wan pisi foe dati. Ma na ini sortoe fasi den de tra fasi leki tra sma?
2 Na ini en fosi brifi di ben skrifi na ondro krakti foe Gado santa jeje na apostel Johannes e meki wi kon sabi den sma disi di abi Gado boen-ati srefsrefi. A e gi ooktoe rai di e jepi den foe libi leki pikin foe Gado. Èn san a e taki, sa de leki wini gi ala kotoigi foe Jehovah di gi densrefi abra.
Fa na lobi foe Gado bigi troetroe
3. Fa son sma kon tron „pikin foe Gado”, èn fa grontapoe e si den?
3 Johannes e poti prakseri na tapoe na howpoe di salfoe kristen abi. (Lési 1 Johannes 3:1-3). Fa Jehovah ben sori wan bigi lobi foedi a ben teki den leki en égi manpikin èn ben meki den tron „pikin foe Gado” (Romeini 5:8-10). Na „grontapoe” — na onregtvaardiki libisma-maatschappij — no e sori na jeje foe den foe dini Gado èn no abi den marki èn ferwakti foe den foe a ten di e kon. So wan grontapoe maatschappij abi ogri-ati gi Kristus nanga en bakaman èn toe soboen gi na Tata (Johannes 15:17-25). Foe dat’ede meki na grontapoe sabi salfoewan kande leki aparti sma ma no leki pikin foe Gado, bika den „no ben leri sabi” Jehovah. — 1 Korinte 2:14.
4. San ibriwan sma moe di abi na howpoe tapoe hemel libi?
4 Salfoewan de now pikin foe Gado. „Ma”, so Johannes e taki „san wi sa de [baka te wi dede getrow èn kisi wan opobaka nanga wan jeje skin ini hemel libi], no kon ete na krin! (Loekoe Filippi 3:20, 21). Ma te Gado „tjari kon a krin”, dan den sa de „leki en” èn den sa „si en soleki a de” leki „Jehovah, na jeje” (2 Korinte 3:17, 18). Ibriwan sma di „abi na howpoe disi” tapoe hemel libi, moe kisi tranga foe soifri ensrefi „soleki en [Jehovah] de soifri”. Aladi den salfoewan de nownow onvolmaakti, den moe libi wan krin libi di de ini akroederi nanga na howpoe foe den foe si na soifri èn santa Gado ini na hemel kownoekondre. — Psalm 99:5, 9; 2 Korinte 7:1.
Doe regtvaardikifasi
5, 6. Te wi loekoe en foe a sé foe Gado dan san ibriwan sma di e doe sondoe e doe, ma fa a de ini disi nanga den sma di e „tan ini wanfasi nanga” Jezus Kristus?
5 Foe libi leki pikin foe Gado, wani taki ooktoe foe doe san de regtvaardiki. (Lési 1 Johannes 3:4, 5.) Ibri wan sma di e doe sondoe, e doe [foe loekoe en foe Jehovah sé, di na sondari e psa a wèt foe en] ooktoe kroektoedoe” (Jesaja 33:22; Jakobus 4:12). Ala „sondoe de kroektoedoe”, wan psa foe den wet foe Gado. A doe foe sondoe de kontrari na kristen jeje èn wi de grantangi dati Jezus Kristus „ben tjari kon na krin” leki libisma „foe poeroe wi sondoe”. Foedi „sondoe no de ini en”, meki a ben kan gi na Gado na wan enkri srakti-ofrandi di e verzoen sondoe èn di e tjari satisfaksi kon dorodoro. — Jesaja 53:11, 12; Hebrewsma 7:26-28; 1 Petrus 2:22-25.
6 „Ibri wan sma di e tan ini wanfasi nanga en [na Manpikin] no e doe sondoe.” (Lési 1 Johannes 3:6.) Foedi wi de onvolmaakti, dan ibritron wi sa doe kande wan sondoe. Ma den sma di de ini wanfasi nanga na Manpikin èn foe dat’ede e tan ini wanfasi nanga na Tata, no e doe na sondoe, no e meki a de wan gwenti. Den sma di e doe sondoe, no e si Jezus nanga na ai foe bribi; den sondari di gwenti foe doe sondoe soleki den sma di fadon komoto na bribi no „sabi” Kristus leki a „Lam foe Gado” di e verzoen sondoe, èn ooktoe den no e warderi en na ini a positsi dati. — Johannes 1:36.
7, 8. Foe soema soleki 1 Johannes 3:7, 8 e taki na espresi sondari e komoto, ma foe sortoe sani ede meki a manpikin foe Gado „ben kon na krin” ini a tori disi?
7 Johannes e gi na warskow foe no meki den kori joe. (Lési 1 Johannes 3:7, 8.) „No meki nowan sma kori-joe”, na apostel e taki èn a e taki moro fara: „A sma di e doe regtvaardikifasi [foedi a e hori a wèt foe Gado], de regtvaardiki, net soleki en [Jezus Kristus] de regtvaardiki.” Na sondoefasi e tapoe wi foe de na asrefi fasi regtvaardiki leki na Bigi Eksempre. Ma tangi foe na no-verdini-boenfasi foe Jehovah meki den salfoe bakaman foe Jezus Kristus kan go now doro foe libi leki pikin foe Gado.
8 Na espresi sondari „e komoto foe Didibri” di e sondoe kaba sensi „na bigin” foe en libi nanga waka foe oproeroe tége Jehovah. Ma a Manpikin foe Gado ’ben tjari kon na krin’ foe ’broko’ den „wroko” foe Satan di de ini a meki go na fesi foe sondoe nanga ogri. Disi wani taki dati nanga na verzoening foe sondoe nanga jepi foe Kristus èn a opobaka foe den sma disi na ini Sjeool (Hades), den bakapisi foe na sondoe foe Adam e tjari kon tron noti, èn diti na ede foe Satan ooktoe e kon masi (Genesis 15; 1 Korinte 15:26). Meki wi, dati wani taki na salfoe fikapisi èn na „bigi ipi”, loekoe boen foe no doe sondoe èn onregtvaardikifasi.
Hori a wèt foe Gado
9. Na ini sortoe fasi wan kristen di wiki nanga jeje „no kan doe sondoe”, èn foe san ede?
9 Dan Joannes e meki wan difrenti a mindri den pikin foe Gado èn di foe Didibri. (Lési 1 Johannes 3:9-12.) Ibri-wan sma „di gebore foe Gado, no e doe sondoe”, ofoe no e meki wan gwenti foe en foe sondoe. Na „siri foe Jehovah di e meki sani kon gebore” ofoe na santa jeje di e gi wan sma „wan njoen gebortoe” foe abi wan hemel howpoe, e tan na ini en, efoe a no e kakafoetoe gi na jeje dati èn na so wan fasi „e meki a kisi sari”, sodati Gado e hari dati poeroe baka (1 Petrus 1:3, 4, 18, 19, 23; Efese 4:30). Efoe wan foe den kristen di wiki nanga a jeje foe Gado wani tan wan pikin foe Gado, dan „a no kan doe sondoe”. Leki wan „njoen mekisani” di weri na „njoen sma”, a e feti nanga sondoe. A „lon komoto gi a pori di de ini a grontapoe nanga na jajo libi” èn en ati no de a tapoe foe de wan sma di e doe ogri foe di a de a gwenti foe en. — 2 Korinte 5:16, 17; Kolosse 3:5-11; 2 Petrus 1:4.
10. San de wán fasi foe kon sabi den pikin foe Gado foe di foe Didibri?
10 Djaso wan fasi e kon now fa wi kan sabi den pikin foe Gado foe di foe Didibri: „Ibriwan sma di no e doe regtvaardikifasi, no e komoto foe Gado.” Onregtvaardikifasi de sowan aparti marki foe den pikin foe Didibri dati den „no e sribi efoe den no e doe ogri, èn na sribi lon komoto foe den efoe den no meki wan sma naki foetoe fadon”, wan sani san den sma di fadon komoto na bribi ben sa wani doe sote nanga loyaal kristen. — Odo 4:14-16.
11. (a) San de ete wan fasi foe si soema no de den pikin foe Gado? (b) San moe poesoe wi efoe wi wani go denki foe na libifasi foe Kaïn?
11 Boiti foe dati, „a sma di no lobi en brada” no e komoto foe Gado. Efoe joe loekoe en boen dan „na boskopoe” di wi ben jere ini wi libi leki Jehovah Kotoigi „foe sensi a bigin” de, dati „wi moe abi lobi gi makandra” (Johannes 13:34). Wi no de soboen „soleki Kaïn”, di ben sori dati a ben „komoto foe na godelowsoewan” foedi a ben kiri en brada nanga tranga, wan sani di de leki wan marki foe na kiriman Satan. (Genesis 4:2-10; Johannes 8:44). Kaïn kiri Abel „foedi en égi wroko ben de godelowsoe ma di foe en brada regtvaardiki”. Te wi e go denki foe na libifasi foe Kaïn, dan séker wi sa kon ini bewégi foe loekoe boen dati wi no abi ogri-ati gi wi jeje brada tapoe na srefi sortoe fasi.
Sori lobi „nanga doe èn ini waarheid”
12. Fa „wi sabi dati wi go abra foe dede kon na libi èn san disi wani taki?
12 Efoe wi ben sa waka na baka Kaïn dan wi ben sa dede na jejefasi. (Lési 1 Johannes 3:13-15.) A ben abi ogri-ati gi en brada sote dati a ben kiri en, èn a no e forwondroe wi dati a grontapoe abi na ogri-ati na asrefi fasi gi wi bika Jezus ben taki disi a fesi (Markus 13:13). Ma „wi sabi [ofoe abi na fertrow] dati wi go abra foe na jeje dede kon ini na [tégo] libi foedi wi lobi den brada” [oenoe kompe kotoigi foe Jehovah]. Foe na brada lobi dati ede, makandra nanga bribi ini Kristus, meki wi no de „dede moro” ini pasa foe wèt èn sondoe ma Gado poeroe En kroetoe gi wi èn wi ben opobaka komoto foe na jeje dede foedi wi ben kisi na howpoe tapoe tégo libi (Johannes 5:24; Efese 2:1-7). Sma di fadon komoto na bribi di no abi lobi no abi na howpoe disi, bika „a sma di no lobi trawan, e tan ini [jeje] dede”.
13. Efoe wi abi ogri-ati foe wi brada, foe san-ede dan wi moe meki disi leki wan sani foe begi?
13 Ija, „libriwan sma di abi ogri-ati foe en brada de wan kiriman”. Kande den no e kiri wan sma troetroe (soleki di Kaïn ben kiri Abel foe big’ai ede èn foe ogri-ati ede), ma na sma di abi ogri-ati foe a trawan ben sa si moro foeroe dati en jeje brada no ben e libi moro. Foedi Jehovah e lési na ati, meki a e kroetoe na sma di abi ogri-ati (Odo 21:2; Mattéus 5:21, 22). Nowan sma di de sowan „kiriman” di no abi berow, ofoe wan sma di abi ogri-ati foe wan kompe-bribiman, „abi tégo libi ini en”. Efoe soboen wi abi ogri-ati gi wan kompe-kotoigi foe wi na ini kibrifasi, a no boen dan dati wi begi dati Jehovah jepi wi foe kisi wan tra jeje, wan jeje foe brada lobi?
14. Ofara na sori foe wi foe brada lobi moe go?
14 Efoe wi wani go doro foe libi leki pikin foe Gado dan na ini wortoe èn doe wi moesoe sori brada lobi (Lési 1 Johannes 3:16-18.) Disi moesoe foe kan foedi „wi ben leri sabi na lobi, foedi en [Jezus Kristus] ben gi en sili ofoe „libi” abra foe wi ede.” Foedi Jezus ben go sofara foe sori lobi, meki wi moesoe sori sowan srefi sortoe lobi (Griki: a’ga-pe) di abi en fundamenti na tapoe gronprakseri gi konpe-bribiman. Ini ten foe ferfolgoe foe eksempre „wi de ferplekti foe gi wi sili abra gi wi brada” net soleki Priska nanga Aquila „ben poti na sili foe den foe lasi gi na apostel Paulus”. — Romeini 16:3, 4; Johannes 15:12, 13.
15. Efoe wan brada e pina èn wi abi „den sani foe disi grontapoe foe hori a libi”, sortoe ferplekti lobi e poti dan tapoe wi?
15 Efoe wi wani gi wi libi abra gi wi brada, dan wi moe de klari foe doe foe na boen foe den sani di e aksi moro mendri foe wi. Kon oen taki dati wi „abi den sani foe na grontapoe disi foe hori wi libi” — moni, njanjan, krosi nanga den sortoe sani disi, di a grontapoe meki de mogelek. A kan psa dati wi e si wan brada e pina, dati wi no e si disi wawan frafra ma e si na situwasi srefsrefi foe krosbé. Den moeilek omstandigheid foe en kan tjari wi so so fara foe opo „na doro foe wi safoe sari-ati”, ofoe wi dipi firi. Ma efoe wi hori na „doro” dati tap’tapoe foedi wi e gi pasi dati a lobi di wi lobi wi srefi nomo e kiri na wani foe wani foe jepi? „Na ini sortoe fasi na lobi foe Gado” e tan na ini wi? A no de nofo wawan foe taki foe brada lobi. Leki pikin foe Gado wi moe sori dati nanga „troe èn waarheid”. Efoe foe eksempre wan brada e pina foe angri, dan a abi njanajan fanowdoe èn no soso wortoe. — Jakobus 2:14-17.
Wan ati di no e kroetoe wi
16. (a) Fa Gado de „moro bigi leki wi ati”? (b) San de soleki Johannes taki na réde foe san-ede Jehovah e jere wi begi?
16 Dan Johannes e poti na prakseri tapoe punt di e gi wi sékerfasi, dati wi de pikin foe Jehovah. (Lési 1 Johannes 3:19-24.) „Nanga disi”, foedi wi e sori brada lobi, „wi sa sabi dati wi kon foe na waarheid” èn no fadon gi kori foe fadon konoto na bribi. Nanga disi „wi e gi wi ati a sékerfasi” na a fesi foe Gado (Psalm 119:11). Efoe wi ati e kroetoe wi, foedi wi e feni dati wi no ben sori wi kompe-anbegiman nofo lobi, hori dan na ini prakseri dati ’Gado moro bigi leki wi ati èn a sabi ala sani’. A abi sar’ati foedi a sabi wi brada lobi sondro hoigrifasi”, wi stré nanga sondoe èn wi moeiti foe libi tapoe wan fasi di e plisi en (1 Petrus 1:22; Psalm 103:10-14). „Efoe wi ati no e kroetoe wi”, foedi nanga doe wi e sori wi brada lobi èn wi no e gi wisrefi abra na kibri sondoe, „dan wi abi fri foe taki na fesi foe Gado” na ini begi (Psalm 19:12). Èn a e jere wi begi „foedi wi e hori en gebod èn e doe den sani di e plisi en.”
17. Sortoe toe marki e fadon na ondro a „gebod” foe Gado?
17 Efoe wi e ferwakti dati Gado sa jere na begi foe wi, dan wi moe hori wisrefi na a gebod foe Gado, pe joe abi na mindri den toe disi (1) Wi moe abi bribi na ini Jezus „nen”, foedi wi e teki na ferioesoe-ofrandi èn e èrkèn na makti di Gado gi en (Filippi 2:9-11). (2) Wi moe „lobi ooktoe makandra”, soleki Jezus ben gi komando (Johannes 15:12, 17). Ibriwan sma di e bribi na ini Kristus nen, séker moe lobi trawan di abi asrefi bribi.
18. Fa wi sabi dati Jehovah „e tan ini wanfasi nanga wi”?
18 Wan sma di e hori den gebod foe Gado, „e tan ini wanfasi nanga en”, ini wanfasi nanga Jehovah. (Teki gersi nanga Johannes 17:20, 21). Ma fa wi e kon „sabi” dati Gado e tan „ini wanfasi nanga wi”? Wi sabi disi „tangi foe na [santa] jeje di a ben gi wi”. Efoe wi abi Gado santa jeje, èn man foe sori na froktoe foe en, makandra nanga brada lobi, dan disi de a bewijsi dati wi de ini wanfasi nanga Jehovah. — Galacia 5:22, 23.
Loekoe boen!
19, 20. Foe san-ede wi moesoe „tesi den wortoe di kon foe wan jeje” èn sortoe jepi Johannes e gi wi na ini disi?
19 Dan Johannes e meki wi si fa wi moe loekoe boen. (Lési 1 Johannes 4:2, 3.) Wi no moe bribi ibri jeje ofoe „wortoe di kon foe wan jeje”, ma wi moesi „tesi den wortoe di e kon foe wan jeje foe si ofoe den kon foe Gado”. Sainde? Foedi „foeroe falsi proféti ben go na ini a grontapoe”. Moro mendri wantoe foe den leriman disi di e kori sma ben e reis na a ten dati lontoe èn ben tai densrefi na difrenti gemeente ini wan moeiti „foe hari den discipel kon a den baka” (Tori foe den Apostel 20:29, 30; 2 Johannes 7). Soboen den getrowwan ben moe loekoe boen.
20 Wantoe fosi-jarhondro kristen ben abi na presenti foe a „si foe taki di komoto foe jeje”, wan presenti di tapoe wan wondroefasi ben kon foe a wroko krakti foe Gado, di a de krin ben meki den man foe si ofoe wortoe di komoto foe jeje ben feni den bigin na Jehovah (1 Korinte 12:4, 10). Ma na warskow foe Johannes gersi taki a abi foe doe nanga kristensma ini algemeen èn de ini na ten disi wan jepi gi wi te sma di fadon komoto na bribi e soekoe foe broko na bribi foe Jehovah Kotoigi saka. Aladi na presenti foe na jeje foe ’si taki di komoto foe jeje,’ lasi gwe, tokoe den wortoe foe Johannes e sori na fasi fa wi kan si efoe leriman abi na jeje foe Gado ofoe den krakti foe ogrijeje.
21. San ben de wán fasi foe tesi „wortoe di kon foe wan jeje”?
21 Loekoe wán fasi foe tesi „wortoe di kon foe wan jeje”. (Lési 1 Johannes 4:2, 3.) „Ibri wortoe di kon foe wan jeje di e taki dati Jezus Kristus ben kon na ini skin e kon foe Gado”. Wi e èrkèn dati Jezus ben libi wan dé leki libisma èn de a Manpikin foe Gado, èn a bribi foe wi e bewégi wi foe leri trawan den waarheid disi (Mattéus 3:16, 17; 17:5; 20:28; 28:19, 20). „Ma ibri wortoe di kon foe wan jeje di no e taki a e bribi ini Jezus, no kon foe Gado.” Moro foeroe „disi de na wortoe di kon foe wan jeje foe na antikrist”, wan wortoe di de tége Kristus nanga tége leri foe a bijbel di e go foe en. A de krin dati Johannes nanga tra apostel ben gi warskow dati „na wortoe di kon foe wan jeje foe na antikrist” ben sa kon (2 Korinte 11:3, 4; 2 Petrus 2:1). Foedi falsi leriman na a ten dati ben de wan kefar gi troe kristensma meki Johannes ben kan taki: „Now a de kaba ini a grontapoe.”
22. San de ete wan fasi foe tesi „wortoe di kon foe wan jeje”?
22 Ete wan fasi foe tesi „wan wortoe di kon foe wan jeje”, de foe si soema e arki en. (Lési 1 Johannes 4:4-6.) Leki Jehovah dienstknegti „wi ben wini” den falsi leriman, dati wani taki wi ben tan winiman foe den moeiti foe den foe hari wi poeroe foe na waarheid foe Gado. Na jeje wini disi ben man foe kon foedi Gado, di „de ini wanfasi” nanga loyaal kristen, „de moro bigi leki [na Didibri] di de ini wanfasi nanga a grontapoe”, ofoe de na onregtvaardiki libisma libimakandra (2 Korinte 4:4). Foedi sma di fadon komoto foe bribi ’e kon foe grontapoe’ èn abi na godelowsoe jeje foe en, „meki den e taki foe den sani san komoto foe a grontapoe èn grontapoe e arki na den”. Foedi wi abi Jehovah jeje meki wi kan si a no bijbelfasi foe „den wortoe foe den di kon foe wan jeje” èn di no de foe bijbel èn wi e trowe den foe dat’ede.
23. Soema e arki na wi èn e ferstan dati Gado jeje e tjari wi?
23 Ma wi sabi dati ’wi komoto foe Gado’ foedi „a sma di kisi a sabi foe Gado, e arki [na wi]”. Sma di joe kan teki gersi nanga skapoe e ferstan dati wi a leri na waarheid di abi en fundamenti tapoe a Wortoe foe Gado. (Teki gersi nanga Johannes 10:4, 5, 16, 26, 27.) A no de foe taki, „soema no komoto foe Gado no e arki na wi”. Den falsi proféti, ofoe leriman no ben arki na Johannes ofoe na tra sma ’di ben kon foe Gado’ èn di ben e gi gosontoe jeje leri. Soboen „tapoe a fasi disi wi e èrkèn na wortoe di komoto foe waarheid èn a wortoe di kon foe wan jeje foe kroektoedoe”. Wi di de na oso-famiri foe Jehovah anbegiman, e taki na „soifri tongo” foe bijbel waarheid di e kon foe na organisaatsi foe Gado (Zefanja 3:9). Èn sma di wi kan teki gersi nanga skapoe kan si krin na ini san wi e taki dati na jeje foe Gado e tjari wi.
24. San Johannes sa go ferklari moro fara?
24 Te nanga a punt disi Johannes ben gi wan ferklari foe wan-toe fundamenti marki di wi moe doro efoe wi wani go doro foe libi leki pikin foe Gado. Dan a sa sori foe san-ede wi moe sori alaten lobi nanga bribi.
San de a piki?
◻ Fa sowan e kontron pikin foe Gado?
◻ Fa wi kan kon sabi den pikin foe Gado foe den pikin foe Didibri?
◻ Te wi go denki foe na libifasi foe Kaïn dan disi sa bewégi wi foe doe san?
◻ Ofara wi moe go ini a tori foe brada lobi?
◻ Fa wi kan tesi „den wortoe di kon foe wan jeje”?
[Prenki na tapoe bladzijde 8]
Te wi e denki foe na libifasi foe Kaïn, dan disi moe bewégi wi foe loekoe boen foe no abi ogri-ati gi wan foe wi brada
[Prenki na tapoe bladzijde 9]
Jehovah anbegiman e taki na „soifri tongo” foe bijbel waarheid di e kon foe Jehovah organisaatsi