Yob
38 Baka dati, Yehovah en sten ben de fu yere na ini wan tranga winti. A taigi Yob:
2 „Suma na a sma di e drai den wortu fu mi drape
èn di e taki sondro fu sabi sani?
3 Tai yu mindri leki wan man.
Mi o poti aksi gi yu, dan yu musu piki mi.
4 Pe yu ben de di mi ben e meki grontapu?
Taigi mi, efu yu sabi dati.
5 Efu yu sabi, dan taigi mi suma besroiti o bigi grontapu musu de.
Suma hari wan lin fu marki en?
6 Na tapu sortu sani den pilari fu grontapu e tnapu?
Suma meki den ukuston fu en
7 di ala den m’manten stari bari fu prisiri
èn di den manpkin fu Gado* prèise en nanga wan tranga sten?
8 Suma tapu a watra fu a se nanga doro
di a bigin pusu kon, neleki fa wan pkin na ini en m’ma bere e pusu kon na doro?
9 Mi poti den wolku leki wan krosi gi en
èn mi domru en na ini dungru.
10 Mi poti skotu gi en
èn mi poti stanga nanga doro gi en.
11 Dan mi taigi en: ’Yu mag kon te dya, yu no musu kon moro fara.
Te dyaso yu bigi skwala kan kon.’
12 Oiti* yu taigi m’manten san a musu du?
Na yu meki musdei sabi en presi?
13 Na yu taigi a leti fu m’manten fu go te na den moro farawe pisi fu grontapu
èn fu yagi den ogrisma?
14 Grontapu e kenki neleki te wan sma e naki wan stampu na tapu klei.
A gersi leki a weri wan moi nyun krosi.
15 Dan a leti fu den ogrisma no de moro.
Den anu fu den di opo go na loktu, o broko.
16 Yu saka go na a presi pe a se e bigin?
Yu go na ini a se fu ondrosuku san de drape?
18 Yu sabi o bigi grontapu de?
Piki mi, efu yu sabi ala den sani disi.
19 Yu sabi a pasi di e go na a tanpresi fu leti?
21 Yu ben gebore na a ten dati, so taki yu ben o sabi ala den sani disi?
Na so langa yu e libi kba?
22 Yu go na ini den maksin pe snew de?
Yu si pe den maksin de fu den pispisi ijs di e fadon kmoto na hemel?
23 Mi kibri den drape teleki a dei fu bigi ogri doro
èn teleki a dei fu feti doro.
24 Fu sortu presi a leti* e kmoto te a e skèin go na ala sei?
Fu sortu presi a winti fu owstusei e kmoto te a e wai na grontapu?
25 Suma opo wan pasi gi fruduwatra
èn gi sibibusi nanga dondru?
26 Suma e meki alen fadon na den presi pe nowan sma e tan
èn na den sabana pe libisma no de?
27 Na so den drei sabana e kisi watra
èn grasi e bigin gro baka.
28 Alen abi wan papa?
Suma na a papa fu den dowdropu?
29 Na suma bere ijs kmoto?
A finfini ijs di e saka kon fu hemel abi wan mama?
30 A watra e kibri ensrefi, leki a de na ondro wan ston.
Tapsei fu a watra e tron ijs.
32 Yu man meki wan starigrupu* kon de fu si na a yoisti ten?
Yu man tiri a starigrupu As* makandra nanga den pkin fu en?
33 Yu sabi den wet fu hemel
èn yu man gebroiki den fu tiri grontapu?
34 Yu man bari den wolku
fu meki hebi alen fadon na yu tapu?
35 Yu man seni bliksem fu du wan sani gi yu?
Den o kon taigi yu: ’Dya wi de’?
37 Suma koni nofo fu teri den wolku?
Suma man kanti watra puru na ini den watrakan fu hemel
38 so taki finfini doti tron tokotoko
èn pispisi doti e plak na makandra?
39 Yu man onti meti gi wan lew
èn yu man tapu na angri fu den yongu lew
40 te den e d’don e luru na ini den olo fu den,
noso te den e kibri na wan presi fu grabu wan meti?
41 Suma e gi den blaka fowru n’nyan
te den pkin fu den e bari suku yepi na Gado
èn te den e frei lontu fu di den no abi noti fu nyan?