Esekièl

17 Baka dati Yehovah taki baka nanga mi. A taigi mi: 2 „Manpkin fu libisma, ferteri den sma fu Israel wan dipi tori èn wan agersitori. 3 Yu musu taigi den: ’Disi na san a Moro Hei Masra Yehovah taki: „A bigi aka di abi bigi langa frei èn di lai w’wiri nanga ala sortu kloru, frei kon na Libanon èn a broko na ede fu a sedrebon puru. 4 A broko na ede fu den yongu taki fu a bon, dan a tyari en go na a kondre fu den bisnisman.* A prani en na ini wan foto pe bisnisman de. 5 Ne a teki siri fu a kondre, dan a sai en na ini wan gron pe sani e gro bun. A prani en leki wan wilge-bon di de na sei wan bigi liba. 6 Na so a siri bigin gro èn a tron wan moi fatu droifibon. A no ben hei èn den w’wiri fu en ben e gro go na insei. Den rutu fu en ben e gro leti na en ondro. Na so a tron wan droifibon di ben e kisi nyun taki di ben e gro go na ala sei.

7 Baka dati ete wan bigi aka frei kon. En srefi ben abi bigi langa frei. Ne a droifibon langa den rutu fu en go na a aka, fu di a ben wani taki na aka yepi en. Boiti dati, a droifibon langa den w’wiri fu en go na a aka fu a gi en watra. A opo ensrefi go na loktu farawe fu a doti pe a ben prani. 8 A bon disi ben prani kba na ini wan bun gron, na wan presi pe furu watra de. Drape a ben kan kisi bigi taki, a ben kan gi furu n’nyan èn a ben kan tron wan bigi droifibon.”’

9 Taigi den: ’Disi na san a Moro Hei Masra Yehovah taki: „Sani o waka bun gi a droifibon? Nôno, sani no o waka bun gi en, bika wan sma o rutu en puru, dan den froktu fu en o pori èn den yongu taki fu en o drei gwe. Den o drei so te taki furu krakti noso furu sma no o de fanowdu fu rutu en puru. 10 Aladi a prani na wan tra presi, sani no o waka bun gi en. A o drei gwe krinkrin te a faya winti fu owstusei wai kon na en tapu. A o drei gwe leti drape na ini a doti pe a ben e gro.”’”

11 Yehovah taki baka nanga mi. A taigi mi: 12 „Grantangi, taigi den sma disi di e opo densrefi teige mi: ’Na sabi unu no sabi san den sani disi wani taki?’ Yu musu taigi den: ’Luku, a kownu fu Babilon kon na Yerusalem. A teki a kownu nanga den heihei man fu a foto tyari go na Babilon. 13 Ne a teki wan sma di ben de fu a famiri fu kownu èn a meki wan ferbontu nanga en. A kownu fu Babilon meki a sma disi sweri taki a o du san a pramisi. Baka dati a teki den moro prenspari man fu a kondre tyari gwe 14 fu swaki a kownukondre. Na so fasi a kownukondre no ben o man kon tranga baka. A kownukondre fu en ben o tan soso te a ben o hori a ferbontu di a ben meki. 15 Ma te fu kba a kownu opo ensrefi teige en, fu di a seni boskopuman go na Egepte. A seni aksi asi nanga wan bigi legre. Yu denki taki sani o waka bun gi en? Yu denki taki a sma di e du den sani disi no o kisi strafu? Yu denki taki a kan broko a ferbontu sondro taki a kisi problema?’

16 ’„Neleki fa a de seiker taki mi de na libi,” na so a Moro Hei Masra Yehovah taki, „na so a de seiker taki a o dede na ini Babilon, na a presi pe a kownu* di poti en* leki kownu e tan. A o dede fu di a no hori a ferbontu di a meki èn a no du san a ben sweri. 17 A bigi legre fu Farao nanga den bun furu srudati fu en no o man yepi en na ini a feti, te den o meki wan dan lontu a foto èn te den o bow wan skotu lontu en. Na so furu sma o lasi den libi. 18 A no hori ensrefi na a ferbontu di a meki èn a no du san a ben sweri. A du ala den sani disi aladi a ben pramisi* taki a o hori ensrefi na san a taki. Dati meki a o kisi en strafu nomonomo.”’

19 ’Dati meki a Moro Hei Masra Yehovah taki: „Neleki fa a de seiker taki mi de na libi, na so a de seiker taki mi o strafu en, fu di a no du san a sweri fu du èn fu di a broko a ferbontu di mi ben meki nanga en. 20 Mi o trowe a net fu mi na en tapu èn mi o fanga en. Mi o tyari en go na Babilon, dan mi o krutu en drape fu di a trangayesi mi. 21 Nanga fet’owru sma o kiri ala den srudati fu en di e suku fu lowe. Den sma di tan abra o panya go na ala sei.* Dan unu sa musu fu sabi taki na mi, Yehovah, taki den sani disi.”’

22 ’Disi na san a Moro Hei Masra Yehovah taki: „Mi o teki wan taki fu na ede fu a bigi sedrebon, dan mi o prani en. Mi o broko wan safu pisi fu na ede fu den yongu taki fu en puru, dan mi o prani dati na tapu wan bigi hei bergi. 23 Iya, mi o prani en na tapu wan hei bergi fu Israel. Dan den taki fu en o kon bigi èn a o gi n’nyan. A o tron wan bigi sedrebon. Ala sortu fowru di e frei na loktu o kon libi na ini a bon disi. Den o tan na ondro den w’wiri fu en. 24 Dan ala den tra bon na ini a gron sa musu fu sabi taki na mi, Yehovah, ben lagi a hei bon èn taki na mi poti a lagi bon na wan hei presi. Den o kon sabi taki na mi meki a moi fatu bon kon drei èn taki na mi meki a drei bon gi bromki baka. Na mi Yehovah taki den sani disi èn na mi du den tu.”’”