Fa yu kan kon sabi san na den tru tori di abi fu du nanga Gado?

1, 2. Sortu agersitori e sori taki wi abi wan sani fanowdu di kan yepi wi fu kon sabi sortu bribi e fruteri tru tori fu Gado?

FA WI kan kon sabi Gado? Yu denki taki a de fanowdu fu ondrosuku ala den leri fu den someni difrenti bribi? Wi no ben o man du dati noiti. Èn srefi efu wi ben o man du dati, dan fa wi ben o sabi sortuwan fu den leri tru?

² Fu di sma abi someni difrenti denki fu a sma di Gado de, meki a de krin taki wi abi wan sani fanowdu di kan yepi wi fu sabi san tru, iya, wan markitiki di sma kan frutrow. Fu eksempre: Kon meki wi taki dati wan tu sma na wowoyo e haritaki o langa wan pisi krosi de. A sma di e seri a krosi, e taki dati a langa dri meter, ma a sma di wani bai en, e taki dati a no doro dri meter. Fa a tori disi kan lusu? We, den kan gebroiki wan markitiki fu luku o langa a krosi de trutru.

3. Fu san ede Gado meki sma skrifi a Bijbel?

³ Wan markitiki de di kan yepi wi fu kon sabi sortu bribi e fruteri tru tori fu Gado? Iya, dati na a Bijbel. Gado ben meki sma skrifi a Bijbel, so taki sma na alape kan kon sabi den tru tori di abi fu du nanga en. Milyardmilyard kopi fu Bijbel de. Sma poti a heri Bijbel, noso pisi fu en, abra na ini moro leki 2100 tongo. Pikinmoro ibriwan sma kan leisi na ini en eigi tongo san na den tru tori di abi fu du nanga Gado.

4. Sortu sani skrifi na ini Bijbel?

⁴ Bijbel na wan tumusi warti presenti fu Gado. Bijbel e tyari sani kon na krin di wi no ben o man sabi noiti efu a no ben de. A e fruteri suma na den yeye, noso den wan di libisma no man si nanga ai. A e sori fa Gado e denki, sortu fasi a abi, èn san a abi na prakseri fu du. A e fruteri fa a handri nanga libisma dusundusun yari langa. A e taki fu sani di o pasa na ini a ten di e kon. Èn a e sori fa wi kan feni a pasi di e tyari sma go na têgo libi.

Fu san ede yu kan bribi san skrifi na ini Bijbel

5. Sortu eksempre e sori taki Bijbel e kruderi nanga sabidensi?

⁵ Furu reide de fu san ede wi kan bribi taki Bijbel na a Wortu fu Gado trutru. Wan reide, na taki Bijbel e kruderi nanga sabidensi. Na ini owruten, sma na ala sei ben e bribi taki wan sani e tyari grontapu. Fu eksempre, na ini West-Afrika, sma ben e bribi fosi, taki wan sneki di drai ensrefi leki wan tyatyari, e hori grontapu; 3500 leisi a drai na tapusei fu grontapu, èn 3500 leisi a drai na ondrosei fu grontapu. Ma moro leki 3500 yari pasa, wan Bijbel skrifiman ben skrifi taki Gado „e anga grontapu na noti”, èn sabidensi sori taki na so a de trutru.​—Yob 26:7.

6. San na a moro prenspari buweisi di e sori taki Bijbel komoto fu Gado?

⁶ A moro prenspari buweisi di e sori taki Bijbel komoto fu Gado trutru, na taki a e fruteri finifini san o pasa na ini a ten di e kon. Tra fasi leki libisma di e kari densrefi lukuman, Gado sabi soifri san o pasa na ini a ten di musu kon ete; ala sani di a e taki, e kon tru ala ten.

7. San na wan tu Bijbel profeititori di ben kon tru na ini owruten?

⁷ Hondrohondro Bijbel profeititori ben kon tru na ini owruten. Fu eksempre, 700 yari na fesi, Bijbel ben taki finifini dati Yesus ben o gebore na ini a foto Betlehem, èn disi pasa trutru (Mika 5:2; Mateyus 2:3-9). Boiti den furu tra profeititori di taki fu Yesus, Bijbel ben taki na fesi tu dati na wan nyunwenke ben o meki en, èn dati te fu kaba sma ben o tori Yesus fu 30 solfru moni. Den profeititori dati ben kon tru sosrefi. A no de fu taki dati nowan libisma ben sa man taki na fesi dati den sani disi ben o pasa!​—Yesaya 7:14; Sakaria 11:12, 13; Mateyus 1:22, 23; 27:3-5.

8. San na wan tu profeititori di e kon tru na ini a ten disi, èn san den e sori?

⁸ Furu Bijbel profeititori e kon tru na ini a ten fu wi. Luku wan tu fu den:

• „A wan pipel o opo go feti nanga a tra pipel, èn a wan kownukondre nanga a tra kownukondre; bigi gronseki o de, nanga takru siki di e kiri ipi-ipi sma èn sosrefi angriten na difrenti presi.”​—Lukas 21:10, 11.

• „Moro nanga moro sma o du ogri.”​—Mateyus 24:12.

• „Na ini den lasti dei . . . sma sa lobi densrefi nomo, den sa lobi moni, . . . den sa trangayesi papa nanga mama, . . . den no sa man dwengi densrefi, den sa du sani nanga trawan na wan ogri-ati fasi, den no sa lobi san bun; . . . den sa abi bigimemre, den sa de sma di lobi prisiri na presi taki den lobi Gado.”​—2 Timoteyus 3:1-5.

Yu no e agri taki den sani disi e pasa now? Fu di Bijbel profeititori e taki soifri na fesi san o pasa èn fu di den sani e pasa so trutru, meki dati e sori taki Bijbel no de wan buku di wan libisma skrifi. A de a santa Wortu di komoto fu Gado!​—2 Timoteyus 3:16.

Sma kenki den sani di skrifi na ini Bijbel?

9, 10. San e sori taki Gado no gi sma pasi fu kenki san skrifi na ini Bijbel?

⁹ Kon meki wi taki dati yu abi wan fabriki èn yu skrifi wan tu wet na san den wrokoman fu yu musu hori densrefi, dan yu poti den na wan presi pe ala sma kan leisi den. Efu wan feanti ben o kon kenki den sani di yu skrifi, dan san yu ben o du? Yu ben o kenki den baka soleki fa den musu de, a no so? Na so a de tu taki Gado no e gi sma pasi fu kenki den tru tori na ini en Wortu, Bijbel.

¹⁰ Den sma di pruberi fu kenki den leri di skrifi na ini Gado Wortu, no ben abi bun bakapisi. Te wi abi wan Bijbel fu a ten fu wi, èn wi e teki en gersi nanga wan Bijbel fu owruten, dan wi o si taki na den srefi sani skrifi na ini. Disi e sori taki den sani di skrifi na ini Bijbel, no kenki na ini ala den yari di pasa.