Go soekoe rai na a moro boen ati-datra foe wi tem
„Joe ben ondrosoekoe mi ati, joe ben hori ai na tapoe”. — Ps. 17:3
1. Foe sainde a de gi wan soema toemsi prisiri foe jere wan ati-datra taki dati hem ati de ini wan toemsi boen kondisi?
FA A de wan toemsi prisiri sani gi wan soema, te wan ati-datra ondrosoekoe hem ati en verteri hem dati hem ati de ini wan boen kondisi. Na soema de kisi na djaranti dati na ogri foe wan mankeri na hem ati de farawe en dati wan langa libi de wan sani di de na hem fesi. Disi de spesroetoe wan troostoe ini wan tem leki di foe wi, pe ati-siki de nomroe wan ondro dem siki di wi sabi, di de kiri soema.
2. Foe sainde libisoema foe now moe gi foeroe grantangi na ati-datra?
2 Ini wi tem joe habi foeroe barinem ati-datra, di foeroe soema de go soekoe rai na dem. Dem de behandel foeroe soortoe ati-siki. Ooktoe dem de doe operasi na a ati. Srefi kunst-klep dem de poti ini na ati. Ala dem sani disi de doe nanga na prakseri foe jepi wan soema nanga wan siki ofoe mankeri na ati foe tan libi moro langa. Wi moe gi dem koni ati-datra disi foeroe grantangi foe dem moi diniwroko di dem de doe gi libisoema.
3. Soortoe makti na libisoema ati habi, en san dem ati-datra no ben kan doe nanga na ati?
3 Na libisoema ati habi na makti ofoe a kan foe ponpoe na libibroedoe foe teego. Dem datra de taki dati disi de so. A ben sa de wan bigi sani foe na see foe dem ati-datra, efoe dem ben feni fa dem ben kan meki wi ati wroko volmaakti, sodati wi ben sa kan libi foe teego ini volmaakti gosontoe! Aladi na sabi nanga koni di dem kisi kaba de bigi, tokoe dem no kon so fara foe doe so wan bigi sani. Nanga disi ini prakseri wi de go verstan, dati a de wan soso sani foe verwakti foe onvolmaakti ati-datra, dati dem ben sa kan doe so wan bigi sani.
4. Soortoe soema ati ben wroko moro langa en soortoe verwakti foe na libi di Mozes ben taki, de te now ete so?
4 Nanga na Mekiman foe na ati a de tra fasi. A ben meki na ati nanga na makti foe meki na broedoe, di de hori na libi, lon pasa ini wi skin foe teego. Hem de kisi na grani foe na bigi wroko foe meki wan libisoema ati doe hem prenspari wroko neegi hondro siksitenti na neegi jari langa. Disi ben pasa nanga na man Methusalah, na manpikin foe Henoch, bikasi hem ben libi so langa. Hem ben de na di foe aiti bakapikin ini na famiri-lo foe na fosi libisoema na grontapoe, Adam. San na ati foe Methusalah ben doe no wan tra ati kan doe pasa hem en a de meki wi si san libisoema ati troe troe kan doe. Leki fa na owroetem historia-skrifiman Mozes, na manpikin foe Amram, ben taki, dan na Methusalah disi di libi so langa ben dede ini na jari 2370 bifo wi gewoon teri. Sensi na tem dati dan libisoema ati ben kon swaki toemsi ini krakti nanga san a kan doe. Na mindri moro foeroe foe dem kondre foe disi tem di de go na fesi na verwakti foe libi gi soema di de man, de seebi tenti jari. Soboen wan kenki no kon ini san na historia-skrifiman Mozes ben taki: „Dem dee foe wi jari, te joe sa loekoe dem, de seebi tenti en efoe nanga spesroetoe krakti, aitintenti; tokoe san dem de gi wi tranga de moeiti nanga ogri sani, bikasi a moe waka pasa esi, en wi de free gowe.” — Ps. 90:10.
5. Foe sainde wi moe teki dem wetti foe na Mekiman foe na ati en soema kan bepaal toe o langa na ati sa ponpoe?
5 Soleki wan uitvinder sabi ala sani foe san a ben meki, en kan gi foe dat ede konmando fa foe wroko en sorgoe foe hem, na so na Mekiman foe na libisoema ati sabi ala sani foe na wrokosani disi en san habi krakti na tapoe — moro boen leki soortoe anatoom ofoe chirurg (datra di de operasi soema). Wi de doe boen foe dat ede foe teki hem wetti tapoe na prenspari titee disi foe na skin. Leki soema di habi wan ati, wi kan doe foeroe ofoe wi wani wi ati tan wroko foe teego. A sani disi kan. Na okasi foe disi de now. Sensi na ati de na mama presi ini na de foe wi, wi habi ini na bijbel woortoe leki „na ati foe na se” nanga „na ati foe grontapoe”. — Ex. 15:8; Matth. 12:40.
6, 7. (a) Foe sainde wan aksi de kon na fesi foe di na ati no de wroko boen moro? (b) Na soema moro boen wi kan go soekoe rai en foe sainde?
6 Na Mekiman foe na man nanga na oema sabi san de na a „ati” foe na problema foe disi tem. A ben meki na waka foe na broedoe ini na fosi libisoema foe ben kan libi foe teego. A ben opo na okasi foe dati. Foe sainde disi no pasa dan? Efoe wi wani sabi foe sainde, dan wi sa moe go soekoe rai na hem leki na moro boen ati-datra.
7 Ini hem skrifi Woortoe, na bijbel, a ben meki kon na krin foe sainde wi de dede. Foe na bigin te na a kaba na bijbel habi foeroe foe taki foe na ati; Moro leki aiti hondro tron dem de taki foe na ati ini na boekoe disi. Foe di wi de si dat a poti hemsrefi spesroetoe tapoe na ati, wi kan de seker dati a sabi foe san hem de taki. Moro boen leki soortoe libisoema datra di de specialist now, a kan gi rai na wi, san de spesroetoe fanoodoe foe tjari wi ati kon ini na kondisi pe foe teego a sa dini wi. Srefi na moro prenspari hee soema foe wan owroe naatsi, koonoe David foe Jeruzalem, ben go na hem foe fanoodoe ondrosoekoe. Foe dat ede David ben kan taki: „Joe ben ondrosoekoe mi ati, joe ben . . . hori mi na tapoe.” — Ps. 17:3.
8. Soortoe djaranti wi kan habi te wi de go na Gado foe ondrosoekoe wi ati?
8 Wi kan go na a moro koni ati-datra disi nanga na djaranti, dati a sa verstan wi afersi boen srefi srefi, aladi kande wi no kan taki hem soifri nanga wi eegi wortoe. Leki wan bewijsi foe dati wi de leesi ini bijbel, ini Romeini 8:27: „Hem di de ondrosoekoe na ati, sabi san de na prakseri foe na geest.” Ja, a de verstan san wi wani tjari kon na krin nanga mofo, te wi de go na hem foe ondrosoekoe wi. Efoe wan soema de libi wan krin libi akroederi nanga na bijbel, a no habi foe frede. Foe dati ede na psalmsingiman foe owroetem ben kan begi foe ondrosoekoe hem nanga dem wortoe: „Ondrosoekoe mi, o Gado, en sabi mi ati.” — Ps. 139:23.
„DEM PRAKSERI FOE LIBISOEMA ATI”
9. Fa a ben de nanga na ati foe libisoema ini dem 1600 jari di a ben de na grontapoe en soema ati ben tan naki te baka na Vroedoe?
9 Te ini na bigin foe na historia foe libisoema, na moro boen datra tapoe na pisi tori disi ben ferteri fa a ben de nanga na ati foe libisoema. Ini na fosi boekoe foe na bijbel en foe taki na di foe siksi kapitel foe hem, wi de leesi soortoe moreel kondisi ben de ini na libi foe libisoema. Na tori de taki: „Nanga dati Jehovah ben si taki na ogri foe libisoema ben de foeroe na grontapoe en dati ibri prakseri foe hem ati alatem ben de soso ogri. En Jehovah ben firi sari, dati a ben meki libisoema na grontapoe, en a ben afrontoe hem ini hem ati” (Gen. 6:5, 6). Djaso a de taki foe na ati foe libisoema soleki na ati foe Gado. Foe di Jehovah ben afrontoe so ini hem ati, a ben meki, ini na jari di Methusalah dede, wan grontapoe vroedoe kon. A ben meki soso wan oso-famiri tan na libi, foe taki Noach nanga hem oema nanga hem dri manpikin nanga dri oema foe hem manpikin — aiti libisoema sili. Wantron wantron di dem ben komoto ini na ark di ben pasa na vroedoe, dem ben teki na aanbegi baka foe na soema di ben kibri dem en di ben de libi ini hemel. Di dem ben tjari makandra wan slagti-ofrandi gi Jehovah Gado, wan alen-bo, ben kon ini na loktoe en dati ben pramisi dem wan boen sani. Fa Jehovah ben teki disi?
10, 11. (a) San Jehovah ben taki na a tem dati foe na ati foe libisoema? (b) O langa libisoema ati ben sa tan naki leki fa dem woortoe foe hem de sori en pe?
10 „Dan Jehovah ben smeri wan korostoe switi smeri en foe dat ede Jehovah ben taki ini hem ati: ’Nooiti moro mi sa kari wan vloekoe kon tapoe grontapoe foe libisoema ede, bikasi na lostoe foe libisoema ati de takroe foe hem jongoejari kaba; en nooiti moro mi sa naki ala san de libi soleki mi ben doe.’” — Gen. 8:21.
11 Moro fara Jehovah ben sori dati na troe troe grontapoe foe wi ben sa tan foe teego. Djaso libisoema ben sa tan naki makandra foe alatem.
12. Foe sainde na lostoe foe na ati foe libisoema ini na tem dati, foe sensi hem jongoe jari ben takroe?
12 Foe sainde Jehovah ben taki ini 2369 bifo wi gewoon teri, na jari baka na Vroedoe, dati na „lostoe foe na ati foe libisoema de takroe foe sensi hem jongoe jari kaba”? Disi doe kon foe di na libisoema-famiri ben kisi na takroe lostoe disi foe na ati foe na fosi libisoema na grontapoe, Adam, na man foe Eva. Jehovah ben gi Adam na komando: „Doe na wani foe mi en tan libi. Te joe tranga jesi na wani foe mi, joe sa dede” (Gen. 2:15-17). Di tesi ben kon tapoe na lobi foe Adam foe dini hem Mekiman wawan, a ben teki na bosroiti foe prisiri hem oema, foe di a meki hem ati go lostoe takroedoe nanga tranga jesi na a soema di ben gi dem libi, Jehovah Gado.
13. Otem na ati foe Adam ben tapoe foe naki, en san a ben libi gi wi na baka?
13 Libisoema nooiti ben kon fri foe na takroe lostoe dati foe na ati. Adam ben moesoe foe kisi strafoe foe na espresi sondoe di a ben sondoe na hem Mekiman. Di Adam ben tron neegi hondro nanga dri-tenti jari, hem ati, di ben meki nanga na krakti foe wroko foe teego sondro wan enkri problema, ben tapoe foe naki. Broedoe no ben e ponpoe moro ini dem broedoetitee foe hem skin. Adam ben dede foe dat ede. Ma bifo hem dede, Adam ben kisi foeroe manpikin nanga oemapikin, di ben trow nanga makandra en di ben meki oso-famiri (Gen. 5:1-5). Adam ben libi na takroe lostoe foe hem ati gi ala dem bakapikin foe hem. Wi alamala habi hem ini na tem disi. Disi de meki joe versta foe sainde na ati foe na libisoema-famiri foe sensi hem jongoe jari de takroe. — Rom. 5:12.
14. Soortoe aksi dem woortoe „ibri lostoe foe na prakseri foe na ati” de meki kon na fesi?
14 Kande wi alamala de memre dati ini Genesis 6:5, pe e taki foe na kondisi foe libisoema pe a ben fadon go na ini, dem woortoe de gebroiki „ibri lostoe foe na prakseri foe hem ati”. Wi moe verstan nanga disi dati na ati foe libisoema de denki ofoe dati na bijbel de gebroiki geest ofoe verstan leki wan tra woortoe foe libisoema ati? Na prakseri disi no de kon na krin ini Spreuken 16:9 nanga 19:21? Djaso a tanapoe: „Na ati foe na grontapoe libisoema kan prakseri san hem pasi sa de, ma Jehovah srefi de tiri hem foetoe.” „Foeroe dem prakseri de ini na ati foe wan man, ma a de na rai foe Jehovah di sa tan.” Ini 1 Korinte 2:9 a de taki boiti dati: „A no ben kon ini na ati foe wan soema, ala san Jehovah ben sreka gi dem wan di lobi hem” (Loekoe toe Jesaja 64:4). Te joe no loekoe hem fini fini, dan agersi leki na woortoe „Ati” de gebroiki ini na fasi foe „geest” ofoe „verstan”, wi krakti foe denki.
15. Soortoe tekst wi kan teki foe sori, dati na bijbel de meki wan difrenti mindri „ati” nanga „geest”?
15 Na bijbel e gi wan krin difrenti mindri „ati” nanga „geest” (verstan). So na apostel Paulus foe eksempel de teki Jesaja 40:13 (Griki Septuagintavertaling) en a de taki: „Bikasi ’soema ben kon leri sabi na memre (verstan) foe Jehovah, dati a ben sa kan leri hem?’ Ma wi habi na memre foe Kristus” (1 Kor. 2:16). Ooktoe Paulus de taki ini Filippi 4:7: „na vreede foe Gado, di pasa ala prakseri (Griki: neus, geest, verstan) sa kibri joe ati nanga joe jeje krakti nanga jepi foe Kristus Jezus.” En ini Matteus 22:37 dem woortoe foe Jezus de skrifi: „Joe moe lobi Jehovah, joe Gado, nanga joe heri ati, nanga joe heri sili nanga joe heri verstan.” Markus 13:20 de poti dem wortoe disi na tapoe toe: „en nanga joe heri krakti” (Loekoe toe Lukas 10:27). So, wan difrenti wi no moe tjari wawan kon tapoe dem Kristen Griki Skrifi. Te wi wani de konsequent dan wi moe gebroiki hem ini ala dem boekoe di santa meki dem skrifi.
16. San na a ati na skinfasi, en fa dem de loekoe hem na agersi fasi?
16 Na geest (memre) foe dat ede, de na krakti foe na ede-tonton pe wi de tjari tori kon na wan, seti dem en loekoe dem sjatoe en pe wi de meki bosroiti. Foe taki foe na ati, a de na pisi foe na skin di de wan spier, de e ponpoe na broedoe di de kon na ini go moro fara en di e sorgoe dati na broedoe de tan lon lontoe na heri skin nanga na ede-tonton. No wawan na kondisi foe na skin habi krakti na tapoe, ma ooktoe firi nanga inisee beweegi. Te joe loekoe na krakti foe hem di de troesoe go na fesi, nanga reti dem de si hem leki na presi foe sainde joe de doe ofoe no de doe sani, pe e kon na krin ofoe wan soema de doe wan sani nanga lobi ofoe nanga ogri-ati, nanga frede ofoe nanga gridi.
17. Soortoe eksempel wi habi foe na krakti foe na ati foe troesoe go?
17 Ini Exodus 35:21, 26 dem de agersi na fasi foe na ati foe sainde a de doe sani: „Dan dem ben kon, ibriwan di hem ati ben troesoe hem, en dem ben tjari, ibriwan di hem ati ben drifi hem, wan bijdrage gi na wroko . . . En ala oema, di hem ati ben troesoe hem, ben vrekti na krabita-wiwiri” (Ooktoe Ex. 36:2). Jehovah ben taigi Mozes: „Foe ibriwan, di hem ati de drifi hem, joe moe tjari wan bijdrage kon na wan gi mi” (Ex. 25:2). Wan ati di foeroe nanga wan sani, de troesoe na eeginari foe hem foe taki foe dati: „Foe na foeroe di na ati foeroe pasa marki (di de pree nanga prakseri) na mofo de taki.” — Matt. 12:34.
18. San na ati habi te make nanga sani di de komoto foe na mofo, en fa na ati nanga na geest de wroko makandra?
18 Aladi na ati no kan denki hemsrefi, tokoe a kan wiki prakseri. Disi ben de na prenspari foe dem woortoe foe Jezus gi dem tranga ede man di ben de feti gi na kerkigwenti foe wasi dem anoe: „Den sani di de komoto foe na mofo de doti na libisoema. Foe na ati de komoto foe eksempel ogri prakseri, kiri, soetadoe, hoeroedoe, foefoeroe, falsi kotoigi nanga gongosa” (Matteus 15:18, 19). Falsi kotoigi nanga gongosa de komoto troe troe foe na mofo en dem ogri prakseri foe na geest, di nanga jepi foe na mofo de kon na fesi, na a takroe lostoe foe na ati de troesoe dem kon. Ja, na ati de boigi dem prakseri, bikasi a wani sref-srefi, dati dem boigi go na wan bepaalde presi. Foe dat ede, dati ini Genesis 6:5 ben kan taki, dati „dem prakseri foe na ati” habi wan takroe lostoe. Prakseri de doe kon ini wrokomakandra nanga na ati.
19. Fa na ati de go teki na presi foe wan firi foe waarderi?
19 Na ati de meki wan lostoe, wan tranga lostoe, wan firi gro gi wan sani. Nanga disi a kan go waarderi wan soema ofoe sani. Te joe loekoe na a fasi disi, dan na ati de teki na presi foe wan firi ofoe waarderi, makandra nanga waarderi foe sani di habi te make nanga na situatie.
„A MANKERI ATI”
20, 21. San de woortoe „mankeri ati” wani taki, en foe san dem wan di habi na marki foe dati no sa kan tapoe?
20 So na bijbel de taki dati wan soema de kisi ati ofoe „a mankeri ati”. So wan „mankeri foe ati” de marki wan soema di no habi ondrofeni ofoe wan soema di no habi trobi nanga dem bakapisi foe wan sani. Ini ala foe dem tori disi a soema kan sori dati a habi wan takroe beweegi foe ati, ma a de sori toe, dati a no habi waarderi. Dati a no wani poti prakseri tapoe strafoe ofoe bakapisi, no wani taki dati dem no sa kon na hem tapoe. Wi de leesi foe eksempel:
21 „Ala soema (soleki wan trowman) di doe soetadoe nanga wan oema, de mankeri ati; hem di de doe hem, de trowe hem eegi sili ini pori” (Spr. 6:22). Ooktoe: „Mi ben loekoe go na ondro, foe kan loekoe dem wan di no habi ondrofeni. Di mi ben poti prakseri, mi ben si ondro dem manpikin, wan jongoe man, di ben mankeri ati, di waka ini na strati krosibee foe na oekoe foe hem; en di waka go na hem oso . . . en loekoe! wan oema ben waka kon miti hem, nanga na krosi foe wan motjo en a ben de bedrigi ini ati” (Spr. 7:6-10). „Na tiki de foe na baka foe na soema di mankeri ati” (Spr. 10:13). „Foe di dem mankeri ati meki dem law soema e dede” (Spr. 10:21). „Soema di de feti baka sani di no waarti noti, de mankeri ati” (Spr. 12:11). „Law-fasi de wan prisiri gi na soema, di mankeri ati, ma na man di habi na koni foe si sani boen, de wan soema di de waka go letopoe.” — Spr. 15:21; Ooktoe 12:8; loekoe 28:16.
22. Nanga san joe kan agersi „troe koni” en san a habi gi wi leki bakapisi te wi teki na kari foe hem?
22 Contrari wan „oema di no habi verstan”, troe koni joe kan gersi nanga wan krin, soifri oema. A de kari „dem wan di mankeri ati” foe kon inisee foe hem oso en nanga boen winimarki gebroiki wan fesa-njanjan na hem (Spr. 9:1-9). Now wi de doe boen foe dat ede foe „arki na troe koni” en teki na kari foe hem. Disi sa tjari wi go na teego libi ini na boen ati foe Gado. Na so fasi wi sa „kisi ati”, en Spreuken 19:8 de gi na djaranti „Hem di de kisi ati, lobi hem eegi sili. Hem di de kibri na koni foe si sani boen, sa feni boen.” — Agersi disi nanga Spreuken 9:13-18.
BOIGI NA ATI
23. Soortoe lostoe foe na ati wi ben kisi en soortoe begi ini Psalm wi moe seni go foe dat ede na Gado?
23 Efoe wi loekoe ala dem sani foe dat ede, a de fanoodoe foe visiti na moro boen ati-datra ini wi tem? Ja, troe troe! Foe hem skrifi Woortoe, di habi waarti recept, wi de kisi foe sabi, dati wi ben kisi dem takroe lostoe foe wi ati srefi sensi na vroedoe ini Noach dee (Gen. 8:21). A de sori foe dat ede foe wi see dati wi koni, te wi leri sabi dem gosontoe wetti ini na Woortoe foe Gado di kan gi libi en begi opregti na hem leki na psalmsingiman: „Boigi mi ati go na joe vermane, en no na a wini foe goedoe” (Ps. 119:36). „O Jehovah, mi ben kari joe. Kon esi na mi . . . No boigi mi ati go na wan sani di takroe, foe doe ini goddelosoe fasi ogridoe nanga man di e doe san di de takroe foe mi no njan dem switi sani foe dem.” — Ps. 141:1, 4; Loekoe Daniël 11:27.
24. (a) Fa wi de teki na kari: „Mi manpikin, gi mi tog joe ati” foe habi prisiri ini dem pasi foe Gado? (b) Efoe Gado ondrosoekoe wi ati, ini soortoe kondisi wi ben wani sref-srefi dati a moe feni hem?
24 Na lobi Mekiman foe wi wani dati wi,leki hem grontapoe mekisani, waka wan verstan pasi. A de taki: „Mi manpikin, gi mi tog joe ati en meki dem ai foe joe habi prisiri nanga mi pasi” (Spr. 23:26). A wani sref-srefi dati wi sori hem na waarderi di a verdini, so dati wi sa habi soboen prisiri ini hem en ini hem volmaakti eegifasi en pasi. Dan dati sa beweegi wi foe waka tapoe hem pasi, di hem woortoe de sori wi foe waka. Disi sa tjari so fara foe poti prakseri tapoe san de taki ini Spreuken 2:2: „Poti prakseri . . . tapoe na koni foe joe kan boigi joe ati go na a koni foe si sani boen.” Disi de wan verstan sani, foe di Jehovah de na Gado de „de tesi wi ati” (1 Thess. 2:4). Te a de doe dati, dan wi sa wani dati a si dati na lobi nanga firi foe wi de tapoe hem wawan leki na Wan di wi de aanbegi opregti en no tapoe falsi gado (Joz. 24:23; 1 Kon. 8:57, 58; 11:3, 4, 9). Te disi wani de troe na wi, dan wi, te foe kaba, moe kan taki san na psalmsingiman ben taki gi Jehovah: „Mi ben boigi mi ati go foe doe dem wetti foe joe, te tem di no marki.” — Ps. 119:112.
25. Foe sainde wi moe wani jeje gosontoe ini wan siki grontapoe en soortoe Gado recept wi moe teki?
25 Ini disi tem, now di libisoema siki de kon moro ala di na sabi foe datra-wroko nanga psychoterapie (na dresi foe jeje siki) ben go na fesi, tokoe jeje siki de dem moro ogri siki. Dem siki no habi krakti wawan tapoe na libi foe wi now, ma ooktoe tapoe na kisi foe teego libi ini wan volmaakti seti foe retidoe. Wi wani now foe de gosontoe na jeje fasi na mindri foe wan siki grontapoe? A de wan verstan sani foe doe moeiti foe dati, bikasi disi de gi wi na pramisi foe teego libi ini na kolokoe demakandra nanga Gado nanga hem organisaatsi foe hemel nanga grontapoe. Te wi de meki disi de wi opregti lostoe, dan nanga wi heri konsiënsi wi sa teki na djaranti recept, di na moro boen ati-datra foe wi tem ben skrifi: „Kibri joe ati, ja, moro leki ala tra sani, di de foe kibri, bikasi na foe drape dem bron foe libi de.” — Spr. 4:23.