Lobi ini wroko
„Lobi no e fadon nooiti”. — 1 Kor. 13:8.
1. Foe sainde wi no froewondroe foe na mankeri foe troe troe lobi ini grontapoe?
INI na grontapoe disi na woortoe „lobi” e gebroiki te a fiti en te a no fiti. Joe e feni hem ini singi, boekoe nanga film en ooktoe tapoe poster, aanplakbiljet nanga „buttons”. Tokoe a de so dati wi e libi ini wan grontapoe pe troe troe pikinso joe e feni lobi, di e offer hem srefi gi trawan. Disi no habi foe froewondroe wi, bikasi foeroe soema, no nanga reti, e meene dati hartstocht (tranga firi gi wan sani) nanga sentimentaliteit (firi sani pasa marki) de na sori foe lobi. Dem no sabi na lobi, di e poti troe discipel foe Jezus Kristus aparti foe tra soema. Na lobi disi e go moro fara leki na lobi foe na naaste foe wan soema. Ooktoe de na ini, dati wan soema de klari foe gi hem libi abra gi hem kristen brada. Na a fasi dati wan soema e waka na Jezus Kristus baka, di nanga hem fri wani ben gi hem libi abra foe libisoema ede. — 1 Joh. 3:16-18.
2. Soortoe tori e taki ini 1 Korinte kapiter 13?
2 A de krin dati na kristenfasi foe lobi de actief en a de sori hemsrefi ini positief doe foe boen sani, di a de doe gi tra soema. Foedi na lobi disi na wan firi ofoe wan emoti, joe no kan taki makriki san na hem. Ma na fasi fa a de sori hem srefi joe kan verteri wel. En ini 1 Korinte kapiter 13 wi e feni troe troe wan toemsi moifasi fa dem skrifi foe na lobi di kristen soema moe habi. Ini na kapiter disi krakti no e poti tapoe na sori foe na lobi foe Gado gi libisoema, en ooktoe no tapoe na lobi foe wi gi Gado. Na moro prenspari prakseri foe na materiaal de moro foeroe fa lobi moe sori gi tra soema.
3. Soortoe problema ben de so ini na gemeente Korinte?
3 Dem kristen soema ini Korinte ben habi na leri disi fanowdoe, bikasi dem no ben e prisiri demsrefi ini so wan boen matifasi nanga makandra. Soleki e kon na fesi ini na loekoe foe na brifi foe 1 Korinte, dan na gemeente drape ben habi problema foe djaroesoe, trobi, pratifasi, nanga gi demsrefi toemsi foeroe fri. Son wan ini na gemeente Korinte ben wani nanga ala prisiri habi makti. Dem ben wani sori na makandra dati dem moro boen leki trawan ini na habi foe bekwaamheid, koni ofoe talent. — 1 Kor. 1:10, 11; 3:2, 3; 4:6, 7; 5:1, 2; 6:7, 8; 8:1, 2, 7-13; 11: 18, 19; 12:14-18.
„WAN PASI DI PASA ALA-SANI”
4. Ala kristen soema ini na fosi eeuw G.T. ben habi dem srefi gave?
4 A no ben de wan sani di ben de verkeerti efoe wan soema ben si dem moro bigi gave foe na geest leki wan sani di a wani en te wan man ben wani dini ini na gemeente leki apostel, wan profeeti ofoe wan leriman. Na apostel Paulus ben verteri: „Na alamala de apostel kande? Na alamala de profeeti kande? Na alamala de leriman kande? Na alamala de doe krakti wroko kande? Na alamala habi gave foe dresi kande? Na alamala e taki ini tongo kande? Na alamala de vertaler kande?” (1 Kor. 12:29, 30). Ma wan sani ben de di alamala ini gemeente ben kan doe. A ben de srefi wan sani di ben de moro moi leki na feti baka dem „moro bigi gave”. Disi e kon na krin ini na tranga di Paulus e gi: „Tan . . . feti faja faja baka dem moro bigi gave. En tokoe mi e sori joe wan pasi di pasa ala-sani.” — 1 Kor. 12:31.
5, 6. (a) San na apostel Paulus ben meene nanga dem woortoe „wan pasi di pasa alasani”? (b) Fa a ben sori dati na habi foe koni nanga gave no ben de na moro prenspari sani gi troe kristen soema?
5 San de na pasi disi di pasa alasani? A de na pasi foe lobi. Ja, dem kristen soema ini Korinte ben moe tjari wan kenki kon ini na waarde di dem ben gi na dem „gave” en dem ben moe sorgoe dati lobi ben kon ini wroko. Foe sori fa lobi ben habi moro waarde leki bekwaamheid nanga gave ofoe talent, Paulus ben skrifi: „Wans mi ben taki dem tongo foe libisoema nanga foe dem engel, ma mi no habi lobi, dan mi de a stem foe wan pisi kopro ofoe van gengen di e lui. En wans mi habi na gave foe profeetitaki en mi sabi ala kibritori en ala sabi, en wans mi habi ala bribi, sodati mi kan opo bergi poeroe, ma mi no habi lobi, dan mi no de noti. En wans mi gi ala mi goedoe foe gi trawan njanjan en wans mi gi mi skin abra foe kan meki bigi, ma mi no habi lobi, dan a no de tjari wini gi mi kwet-kweti.” — 1 Kor. 13:1-3.
6 Te wan kristen boiti hem mama-tongo, ben kan taki tra tongo toe, dan disi ben de troe troe wan waarti gave. Na koni foe ben taki ini na tongo foe engel, di de leki mekisani moro hee leki libisoema, ben sa de moro bigi. Ma efoe na soema ben sa gebroiki na gave foe meki a kon moro prenspari ofoe efoe na firi foe hem ati ben sa de verkeerti, dan a no ben sa de foe gi tranga na tra soema, pe hem kristen brada de na ini toe. Soso a ben sa meki foeroe babari, net soleki wan kopro preti ofoe gengen foe pree pokoe. Sondro lobi, boiti dati, dem gave foe profeetitaki, wondroe sabi nanga wondroe bribi no ben sa de leki wan tranga gi trawan. Dem gave ofoe talenti disi no ben sa gebroiki boen. Na so toe a ben sa de nanga wan soema di sondro gridi ben sa gi trawan hem goedoe foe a ben kan meki bigi, no ben sa kisi wini foe disi. A no ben sa kisi wan paiman. Ma fa a ben sa de efoe a ben verkisi foe ondrofeni pina ofoe srefi dede, kande nanga na prakseri foe de ini na ai foe soema leki wan held (wan sma di habi dekati)? Efoe a no ben sa habi troe troe lobi gi Gado nanga hem kompe-libisoema, dan na de klari di a de klari foe tjari na moro bigi ofrandi, no ben sa tjari wini gi hem toe di ben sa tan. Boiti dem prijse foe libisoema di e dede, a no ben sa kisi troe troe noti. (Loekoe Matteus 6:1-4). Foe di lobi de so wan prenspari sani, wi e doe boen foe loekoe fa a de nanga wi ini na sori foe na toemsi moi fasi disi. Wi de feti baka na „pasi disi di pasa ala sani”?
FA LOBI KAN SORI NANGA JEPI FOE DOE SANI
7. Fa wi de sori ondro moeiliki omstandigheden lobi?
7 Ini 1 Korinte 13:4 tanapoe: „Lobi de hori pasensi en a de sori switifasi”. San ai aksi foe wi tapoe na gron foe dati? Te tra soema e tergi wi, kwinsi, ferferi ofoe meki soema prakseri verkeerti foe wi, fa wi moe doe dan? Wan soema nanga pasensi no de doe esesi wan sani ofoe kisi atibron. A sa kaka foetoe nanga pasensi gi moeiliki fasi foe libi, ini na hoopoe dati dem soema di sorgoe foe situatie di no de switi, nanga disi ben sa kisi jepi foe kenki dem fasi foe libi. Na foe na srefi fasi disi wi moe de nanga switifasi, no grofoe, ofoe nanga ogri-ati, ma nanga lobi, safrifasi, switimaniri en de klari foe jepi (loekoe Rom. 12:20, 21; 1 Petr. 2:18-23). Nanga opregti broko-ede gi kompe-bribiman, wi moe verdrage nanga prisiri dem aparti-eegi-fasi nanga swaki-fasi foe dem ini dem konsensi. Na presi foe tanapoe tapoe san wi habi reti a tapoe, wi moe dwengi wisrefi foe no gebroiki wi kristen fri ten volle. Na so fasi, wi no sa meki trawan naki foetoe, sodati wi ben sa gi dem wan reden foe libi na troe aanbegi. — Rom. 14:1-4, 19-21.
8. Foe sainde prodo nanga meki bigi nanga djaroesoe no de na sori foe lobi?
8 Moro fara dem e taigi wi: „Lobi no e djaroesoe, a no de soekoe foe prodo, a no de meki hemsrefi bigi” (1 Kor. 13:4). Efoe wi lobi wi kristen brada troe troe, fa wi ben kan djaroesoe ofoe habi bigi-ai tapoe dem sani di dem e doe, ofoe tapoe dem bekwaamheid foe dem? Moro foeroe wi sa prisiri nanga dem en breeti foe na prati di dem kan habi foe bow na gemeente (Rom. 12:15, 16). Ja, fa wi ben sa kan poti wisrefi alatem na fesi en meki bigi tapoe dem sani di wi doe nanga dem ondrofeni foe wi? Disi ben sa meki dem soema di e arki na wi lasi ati. Dem ben sa kan denki dati dem doe pikinso te dem agersi demsrefi nanga wi. Na prodo nanga meki bigi foe wi ben sa broko trawan saka en a ben sa poeroe na grani di ben sa moe gi na Jehovah Gado. Fa dati ben sa de leki wan sani pe wi no e sori lobi! Wi ben sa doe moro boen foe meki na rol foe wi no de so bigi. Wi de soso srafoe foe Gado, en ala grani nanga prijse foe na gro ini na kristen gemeente moe gi na Hem (1 Kor. 3:5-9). Sakafasi sa jepi wi foe habi wan bigimemre prakseri foe wisrefi en a sa tapoe wi foe no proberi foe meki indruk nanga na prensparifasi di wi e prakseri dati wi habi.
9. San dati e aksi foe wi foedi lobi „no e tjari hemsrefi tapoe wan fasi di no fiti”?
9 Boiti dati, „lobi no e tjari hemsrefi tapoe wan fasi di no fiti” (1 Kor. 13:5). Efoe wi habi troe troe lobi, dan wi no sa wani si no wan enkri fasi foe ogridoe. Dem woortoe „No tjari hemsrefi tapoe wan fasi di no fiti”, wani taki toe „no de grofoe”. Ini ala demakandra lobi e tjari wan joisti waka nanga libi kon. Wan soema di habi lobi no de veragti dem pôti-sma, sodati a de lon komoto foe hem birti. A no de soekoe foe de soso nanga wan pikin groepoe di a ben soekoe. (Loekoe Jak. 2:1-9.) Waka tapoe wan fasi di fiti wani taki toe habi respeki gi joisti makti. Efoe wi habi troe lobi, dan wi sa respeki na soema nanga dem goedoe foe trawan. Ini disi de toe dem konmakandra-presi foe wi. Fa a de wan sani di no fiti efoe pikin-negre e skrifi tapoe stoeroe ofoe e lon en kande srefi toeka nanga soema! Dem soortoe waka nanga libi disi no e fiti na kristen gemeente. A no de poti wan boen nem tapoe na fasi fa dem papa nanga mama e tiri dem pikin.
10. Fa wi kan sori dati wi no de soekoe wi eegi afersi?
10 Na apostel Paulus e go doro foe skrifi foe lobi: „Lobi no de soekoe hem eegi afersi” (1 Kor. 13:5). Ja, a de sori wan actieve belangstellling gi ala memre foe na gemeente — dem, jongoewan soleki dem owroewan, dem sikiwan nanga swakiwan nanga dem di e wroko tranga ini na gi foe leri, na preeki nanga na meki foe discipel. Lobi nanga opo-ai a de loekoe dem fanowdoe foe kompe-bribiman en sa doe wantron wantron wan sani en gi jepi. A no de tanapoe foe doe sani tapoe hem eegi fasi (1 Kor. 10:23, 24). Na toemsi moi fasi disi no habi noti foe doe nanga na „mi fosi” filosofie. A no de soekoe troe troe hem eegi wini.
11. San wi no moe doe, foedi „lobi no e kisi atibron”?
11 Foedi „lobi no de kisi atibron”, a ben sa de troe troe fowtoe te wi ben sa soekoe pasi foe kisi atibron (1 Kor. 13:5). Wi „no moe kisi atibron esesi” en wi moe libi atibron na wan see (Jak. 1:19). Ini na osofamiri disi wani taki, dati ala soema moe feti foe de nanga pasensi tapoe dem swakisee foe makandra. En ini na gemeente spesroetoe dem owroeman moe de wan eksempel ini pasensi te brada nanga sisa e frigiti sani ofoe no e doe san dem moe doe ofoe dem de libi dem kristen frantwoortoe.
12. San sa sori dati na ogri di dem doe wi, wi „no e memre hem”?
12 Akroederi nanga san bijbel skrifi foe lobi, boiti dati, wi no moe „memre na ogri” di dem doe na wi (1 Kor. 13:5). A no ben sa de wan sori foe lobi foe ben habi wan soema na ati en loekoe na ogri di bepaalde soema ben doe na wi ete wan tron, leki wi skrifi hem na ini boekoe. San pasa wi moe poti na wan see en dem soema di kande no ben doe boen na wi, wi no mag tapoe foe sori dem switifasi. — Spr. 20:22; 24:29; 25:21, 22.
13. San na wan toe foe dem onregvaardiki sani di lobi no e prisiri na ini?
13 San lobi no sa doe moro ete? „A no de prisiri foe si kroektoe” (1 Kor. 13:6). Lobi foe datede no sa prisiri te ogri de kisi trawan, e tjari demsrefi tapoe wan sjemfasi en dem e fadon ini porifasi. Troe kristen no e prisiri foe dati en no sa taki dati na soema verdini hem, dati a ben kon ini moeilijkheid (Spr. 17:5; 24:17, 18). Ooktoe wi no sa prisiri te wan soema tapoe wan koni fasi poeroe hemsrefi ini wan situatie . . . dati a no kisi strafoe (Ps. 50:18). Srefi te wi e si onregvaardiki sani ini film ofoe televisie-programma, dan disi no moe gi wi prisiri. Moro fara a no ben sa de joisti foe teki partij gi memre foe na gemeente di habi tranga-ede en feni fowtoe tapoe na piri-ai di ben gi dem. Na soema di ben doe na ogri no sa kisi jepi nanga disi foe doe positief sani foe kon boen doro doro foe na jeje swakifasi di ben meki a waka wan verkeerti pasi.
14. Tapoe soortoe sani lobi e prisiri hemsrefi?
14 Ini san wi moe prisiri wisrefi? Lobi „e prisiri ini waarheid” (1 Kor. 13:6). Foedi dem e poti ini na tekst disi waarheid na a tra see foe kroektoe, dan disi wani taki kande dati wi moe prisiri te wi de si na tranga krakti foe retidoe, di waarheid habi tapoe na libi foe soema. Wi moe habi prisiri ini ala sani di e tjari blesi kon, di habi wan gosontoe krakti di e bow trawan en di e meki na afersi foe waarheid nanga retidoe go na fesi.
„LOBI NO DE FADON NOOITI”
15. Soortoe djaranti na bijbel e gi wi, dati troe lobi nooiti sa mankeri wan sani?
15 Boiti dati lobi de wan pasi di pasa alasani, na pasi foe lobi no sa kaba nooiti ofoe sa mankeri wan sani. Disi e kon moi na fesi ini dem woortoe disi: „A de verdrage ala sani, a de bribi ala sani, a de hoopoe ala sani, a de hori doro ondro ala sani. Na lobi no de fadon nooiti”. — 1 Kor. 13:7, 8.
16. Fa „lobi de verdrage ala sani”?
16 Foedi troe lobi e verdrage ala sani, a no de meki dem poesoe hem esesi poti na wan see, lasi ati ofoe poeroe hem na pree. A no de firi sani pasa marki en ooktoe a no de kon toemsi esi na a bosroiti, dati soema no habi foe hoopoe foe si trawan kenki kon moro boen. Efoe wi de nanga lobi, dan wi sa doe wi kompe-libisoema boen, wans dem de sondro tangi. — Matt. 5:44-48.
17. Ini soortoe fasi „Lobi e bribi ala sani”?
17 Fa wi moe verstan dem woortoe „na lobi de bribi ala sani”? Disi no wani taki dati wi e bribi sani esesi en no ondrosoekoe san de troe troe ogri. A wani taki moro foeroe dati lobi no de achterdochtig. Soboen, wans wi kristen brada e doe en taki sani kande, di e ati wi, toekoe wi no sa prakseri wantron wantron dati foe espresi dem meki wi kisi pen. Te wi si na waka nanga libi foe trawan, wi no sa prakseri wantron wantron na moro ogri sani, ma wi sa feti foe si hem ini wan moro boen leti. Wi sa meki wi kristen brada kisi na winimarki foe na degedege en no sa poti ini dem soesoe ogri plan nanga beweegi foe ati. — Pred. 7:21, 22.
18. San lobi sa meki wi man foe doe te a kon tapoe hoopoe nanga horidoro?
18 Na so toe lobi e hoopoe dati alasani sa waka boen. Disi no wani taki dati lobi sempel. A de hoopoe, ja a de begi moro foeroe dati wan boen baka pisi sa de. Lobi de optimistisch. Te foe eksempel wi e visiti wan tranga gebied, wi kan doe disi ini na hoopoe, dati baka wan pisi tem son wan sa drai kon na a waarheid. (Loekoe Romeini 9:1-3). Ooktoe wan patna di e bribi e hoopoe nanga reti dati na wan patna di no e bribi te foe kaba sa teki na „boen njoensoe” (1 Petr. 3:1, 2). Aladi lobi e jepi wi foe hoopoe na moro boen sani, ete a de jepi wi toe foe hori doro ondro ala soortoe vervolgoe, tesi, kosi nanga ogrinem.
19. Foe sainde wi no sa habi sari dati wi ben handri nanga lobi?
19 Ini soortoe situatie wi sa de toe, a sa tjari alatem boen froktoe te wi sori lobi. Wi no sa habi sari dati wi ben handri nanga lobi. Lobi, troe lobi di e offer hemsrefi, nooiti ben meki wan takroe omstandigheid kon moro takroe. Foe datede, wi no habi ala reden foe waka baka wi hemel Tata, di na eegifasi foe hem di e kon moro na fesi, de lobi? — 1 Joh. 4:7, 8.
20. (a) O langa na pasi foe lobi soleki 1 Korinte 13:8-13 e sori, sa de na pasi di pasa alasani? (b) Fa wi kan kon sabi dem troe discipel foe Kristus te now ete, aladi dem wondroe gave foe na geest kon na wan kaba?
20 No wawan ini na seti foe sani disi, ma te foe teego lobi sa tan na pasi di e pasa alasani. A no sa fadon nooiti ofoe kon na wan kaba. Na apostel Paulus ben verklari disi, di a ben taki: „Efoe gave foe profeetitaki de, dem sa poeroe dem; efoe sabi de, a sa poeroe . . . Ma now bribi, hoopoe, lobi, dem dri disi e tan; ma na moro bigi wan foe dem disi na lobi” (1 Kor. 13:8-13). Na historia foe na kristen gemeente e bewijsi dati dem wondroe gave troe troe ben komoto, kande ini na di foe tweede eeuw G.T. Ma te now ete troe discipel foe Jezus Kristus joe kan sabi dem nanga na lobi di dem e sori gi makandra.
21. San wi kan aksi wisrefi te wi loekoe na prensparifasi foe lobi?
21 Fa a de ini na tori disi nanga wi? Wi de meki wisrefi kon bradi ini wi lobi gi wi brada? Wi de go na fesi ini na sori foe lobi tapoe na fasi fa na apostel Paulus ben skrifi foe hem? Disi moe de so troe troe. Wi de begi, foedi lobi de wan froktoe foe na geest, foe kisi moro foe na geest, foe lobi kan kon moro foeroe ini na libi foe wi? (Gal. 5:22). Meki lobi de actief ini wi libi foe wi kan tan libi foe teego, ja, tan lobi leki loyaal dienstknegti foe na Gado foe lobi, Jehovah. — 1 Joh. 4:20-5:3.