Kisi bekwaamheid leki leriman ini na gemeente
„Soema de koni en habi verstan fasi mindri oen? Meki a sori nanga hem toemsi boen fasi foe waka nanga libi hem wroko nanga wan safrifasi di fiti koni”. — Jakobus 3:13.
1. Foe sainde a de toemsi prenspari, dati dem wan di e dini ini na kristen gemeente leki leriman, de bekwaam man?
NA KRAKTI di e komoto foe wan leriman kan doe ofoe boen ofoe ogri. Disi de spesroetoe so ini afersi di habi foe doe nanga aanbegi. Jezus Kristus ben taki foe dem Fariseeman: „Dem de breni tjariman. Efoe now wan breni man en tjari wan breniman, dan ala toe sa fadon ini wan olo” (Matt. 15:14). Ala dem soema di ben waka baka dem leri foe dem Fariseeman di no tanapoe ini bijbel, ben e waka go miti jeje pori en na dede, ma dem wan di ben poti prakseri tapoe na gosontoe leri foe na Pikin foe Gado, ben waka na pasi di e go na libi (Matt. 7:13-20, 24-27). Foe di disi habi foe doe nanga na libi foe sma, a de wan tranga fanowdoe sani, dati soso bekwaam man doe diniwroko leki leriman ini na kristen gemeente.
2. Foe sainde na apostel Paulus ben kan taki: „Mi de krin foe na broedoe foe ala soema”?
2 Na sani di na apostel Paulus ben taigi dem owroeman foe hemsrefi, e sori dati wan kristen leriman kan poti tapoe hemsrefi ofoe broedoe-paiman ofoe de fri foe disi nanga na fasi fa a de teki hem frantwortoe. Na apostel ben taki: „Mi de kari oen tapoe na dee foe tide leki kotoigi, dati mi de krin foe na broedoe foe ala soema, bikasi mi no ben hori mi srefi na baka foe verteri oen ala dem rai foe Gado” (Tori foe dem Apostel 20:26, 27). Te bepaalde owroeman ini na gemeente Efese ben sa de ontrouw en ben sa drai na bijbel, san ben sa tjari jeje pori gi demsrefi en ben sa doe ogri na kompe-bribiman foe dem, dan na fowtoe foe disi joe no ben kan gi Paulus. (Loekoe Tori foe dem Apostel 20:29, 30). Demsrefi ben sa poti broedoe-paiman tapoe demsrefi. Na apostel ben doe ala moeiti foe verteri dem „ala rai foe Gado”. A no ben hori noti na baka, di dem ben habi fanowdoe foe na kisi foe libi. A no ben soekoe foe kon popu nanga a tigri foe jesi ofoe libi na wan see tori di ben tjari kon na krin fowtoe fasi, wortoe nanga doe. — Loekoe 2 Tim. 4:3, 4.
3. Akroederi nanga na eksempel foe Paulus, san wi kan verwakti foe wan man di habi na bekwaamheid foe de leriman ini na gemeente?
3 Akroederi nanga na eksempel foe na apostel Paulus, dan wan man di dem feni boen foe doe diniwroko ini na kristen gemeente leki leriman, moe sabi en verstan ala sani di de fanowdoe foe kisi libi, sodati na leri foe hem no sa sori ernstig mankeri. A moe de klari toe foe gi „ala dem rai foe Gado”, wans fa na gemeente e si disi. Tem kan de dati na gemeente e teki boen na piri-ai nanga tranga leri di tanapoe ini Gado Wortoe. Ma tem kan de toe dati foeroe no wani kenki dem fowtoe fasi nanga pasi troe troe. Wan kristen leriman moe tan hori hemsrefi na a bijbel te a de gi jepi na jeje fasi. Te son wan e sori wan verkeerti loestoe, dan a moe hori hemsrefi foe no lasi hem pasensi en a moe tan meki na waarheid bekenti. Loekoe ini na pisi tori disi san na apostel Paulus ben skrifi gi Timoteus: „Preeki na wortoe, de bezig nanga hem leki wan tranga fanowdoe sani, ini boen tem, ini moeilijk tem, gi piri-ai, vermane nanga ala pasensi nanga koni foe leri soema.” — 2Tim. 4:2.
4. Gi soema na rai ini Jakobus 3:1 ben de?
4 Foedi na gosontoe leri habi foe doe nanga na kisi foe libi, dan na gi foe leri de wan frantwortoe di mag gi wawan na bekwaam man. Na kristen discipel Jakobus ben skrifi: „Foeroe foe oen no moe de leriman, mi brada” (Jak. 3:1). Na vermane disi no ben gi foe meki bekwaam man lasi ati foe tron leriman, bikasi wi e leesi ooktoe ini na bijbel: „Efoe wan soema wani foe kisi na wroko foe wan opziener, dan a de soekoe wan toemsi boen wroko” (1 Tim. 3:1). Jakobus ben skrifi hem wortoe gi man di ben poti demsrefi leki leriman foe dem kompebribiman, aladi dem no ben poti dem ofoe de bekwaam foe leri trawan. Dem man disi di no ben habi na reti foe leri trawan ben wani na nem nanga na makti di ben go makandra. nanga na leriman wroko, sondro dati dem ben broko dem ede nanga dem fasi di ben de fanowdoe. Dem moe ben de leki dem man di leki fa na apostel Paulus ben skrifi „ben wani de leriman foe na wet, ma di no ben verstan srefi dem sani di dem ben taki en di dem ben taki dati a de so”. — 1 Tim. 1:7.
„WAN MORO HEBI KROETOE”
5. Fa leriman e kisi wan moro „hebi kroetoe”?
5 Foedi dem sokari leriman no ben habi wan krin verstan foe na heri „rai foe Gado”, dem ben moe kisi na dem verstan ini sortoe ernstig positie wan leriman de. Jakobus ben verteri en a no poeroe hemsrefi na ini, dati leriman „sa kisi wan moro hebi kroetoe” (Jak. 3:1). Foedi wan leriman tanapoe fesi trawan di a de leri en tjari, dem e verwakti moro foe hem leki foe tra memre foe na gemeente. Disi de akroederi nanga na gronprakseri foe bijbel: „Na a soema di kisi foe loekoe foeroe sani, dem sa aksi hem moro” (Luk. 12:48). Sma a poti moro foeroe ai tapoe dem wortoe en doe foe wan leriman, dan tapoe di foe wan tra kristen. Efoe wan soema e gi fowtoe leri nanga na bakapisi dati memre foe na gemeente e kisi nanga disi problema, ofoe efoe dem doe foe hem de tapoe so wan fasi, dati nanga reti soema e naki foetoe, dan boiti dati a de boen dati Jehovah Gado, nanga jepi foe Masra Jezus Kristus, gi hem wan tranga kroetoe. Na Manpikin foe Gado ben taki: „Mi e taigi joe, dati foe ibri soso wortoe sma sa gi frantwortoe tapoe na Kroetoedee, bikasi nanga dem wortoe foe joe dem sa verklaar joe regtvaardiki en nanga dem wortoe foe joe dem sa kroetoe joe.” — Matt. 12:36, 37.
6. Sortoe gevaar de soleki Jakobus 3:2 e sori ini na gi foe leri?
6 Na discipel Jakobus e go doro nanga foe taki: „Wi ala e misi sani so meni tron. Efoe wan soema no e misi nanga wortoe, hem de wan volmaakti man” (Jak. 3:2). Efoe srefi toemsi boen leriman e wani son tron foe taki verkeerti sani, dan na gevaar dati disi e pasa na onbekwaam man de moro bigi. En o moro fowtoe wan leriman e meki, o moro bigi na ogri de di na gemeente e ondrofeni foe dati en o moro hebi na kroetoe de di sa kon tapoe dem.
„SOEMA KONI EN HABI VERSTAN FASI?”
7. San na aksi ini Jakobus 3:13 e tjari kon na krin foe na aksi ofoe wan soema habi na bekwaamheid foe de wan leriman?
7 Te wi loekoe na gevaar di de ini na leri foe trawan, dan nanga reti wi ben kan aksi: Soema de bekwaam foe dati? Na so wan aksi na discipel Jakobus ben aksi: „Soema de koni en habi verstan fasi na oen mindri?” (Jak. 3:13) A de wan froewondroe sani dati Jakobus no aksi soso: „Soema abi toemsi moi bekwaamheid leki takiman?” Na soema di wani de wan boen leriman, habi moro fanowdoe leki na koni foe kan tjari hem prakseri boen kon ondro wortoe. Koni nanga inzicht de toemsi prenspari. Wan koni soema habi na joisti frede gi Jehovah Gado en a sabi foe wroko tapoe so wan fasi nanga sabi dati disi sa tjari boen winimarki kon (Spr. 9:10). Wan soema di habi verstan nanga inzicht kan go soekoe na dipi foe wan sani, kon verstan san a wani taki, en si fa dem difrenti pisi foe na situatie ofoe omstandigheid tanapoe nanga makandra. A kan sabi fini fini san a de si wani taki. Disi wani taki dati a moe de wan lepi kristen „di na gebroiki foe hem waarnemingsvermogen oefen foe si boen nanga ogri”. — Hebr. 5:14.
8. San o sori efoe wan soema habi na inzicht nanga na koni di de fanowdoe foe kan leri hem kompe-bribiman?
8 Fa wi kan si efoe wan soema habi na koni nanga na inzicht di de fanowdoe foe leri hem kompebribiman? Hem libi moe sori, dati a habi troe troe na koni nanga na inzicht, di e go makandra nanga wan dipi respeki frede foe Jehovah Gado. Na discipel Jakobus e go moro fara foe taki: „Meki a sori nanga hem toemsi boen waka nanga libi hem wroko nanga wan safrifasi di fiti koni” (Jak. 3:13). Tra soema moe kan si soboen, dati a de tjari hemsrefi tapoe wan fasi di e akroederi nanga Gado eegifasi, pasi nanga doe.
9. Fa wan soema kan sori „na safrifasi di fiti koni” en foe sainde disi de prenspari te a wani dini leki leriman?
9 So wan fasi foe libi wani taki dati a de sori na „safrifasi di fiti koni”. Wan soema di wani kisi na bekwaamheid foe dini leki leriman, moe habi switifasi, moe de kalm en nanga vreedefasi, a no moe de nanga tranga-ati, oproeroe en tranga-ede ofoe asranti. Ooktoe a no moe taki krakti sani sondro foe habi wan boen argument ofoe bewijsi di de leki fundamenti. Wan soema di no habi safrifasi, sa habi foeroe moeiti foe doe akroederi nanga na rai foe Paulus gi Timoteus: „Wan srafoe foe Masra no habi foe stree, ma moe de nanga switifasi nanga ala soema, de bekwaam foe leri trawan, dwengi hemsrefi ondro ogridoe, leri nanga safrifasi dem soema di no e sori boen fasi.” — 2 Tim. 2:24, 25.
EEGIFASI DI E MEKI JOE NO DE BOEN
10. (a) San de alamala ini „bita djaroesoe”? (b) San na trobifasi?
10 Aladi na discipel Jakobus ben poti hemsrefi spesroetoe foe taki nanga dem soema di ben feni dati dem boen nofo foe de leriman ini na gemeente, a ben sori moro fara tapoe dem eegifasi di e meki wan soema no de boen. Wi e leesi: „Ma efoe oen habi bita djaroesoe nanga trobi fasi ini oen ati, oen no meki bigi en no lee gi na waarheid” (Jak. 3:14). Dem wortoe disi e meki a de fanowdoe foe ondrosoekoe wisrefi. Wan man ben sa kan aksi hemsrefi: „Mi habi bita djaroesoe ini mi ati? Mi habi trobifasi?” Bita djaroesoe ben sa wani taki, dati wan soema habi wan toemsi bigi lostoe foe gi hemsrefi en hem prakseri grani. Na fasi disi ben sa kan kon na fesi nanga na fanatiek, tranga-ede faja di a habi gi hem eegi prakseri, aladi di a de kroetoe boen tranga dem prakseri di kenki nanga di foe hem ofoe a no de erken dati trawan habi na koni nanga na inzicht di e akroederi nanga di foe hem ofoe di de moro boen leki di foe hem. Moro fara, wan soema di habi trobi fasi, habi wan geest foe meki trobi ofoe meki trobi kon. A kan habi na lostoe foe gebroiki sani di kan meki sekseki kon, foe meki trawan kon ini broeja meki hem eegi prakseri go na fesi. So wan trobi fasi e komoto foe bigimemre nanga gridifasi.
11. Foe sainde Jakobus ben kan sori dati na bita djaroesoe nanga trobifasi sokari leriman e „meki bigi en lee gi na waarheid?”
11 Efoe wan bita djaroesoe en trobifasi man e poti prakseri tapoe hem eegi bekwaamheid leki leriman, dan a de troe troe wan soema di e meki bigi ofoe gafa. Ma ete na kristen waarheid di a taki a de leri e kroetoe dem takroe fasi di a de sori. Foe datede meki wan soema di habi wan geest foe pratifasi nanga streefasi en tog e prakseri dati hem boen foe de wan kristen leriman, e meki soema prakseri verkeerti foe na waarheid, di na bijbel e sori wi; a de lee gi na waarheid. Foedi a habi dem sortoe fasi disi di no boen, meki na gafa foe hem tapoe na bekwaamheid foe hem leki wan leriman no habi wan enkri fundamenti. Dati a de doe disi wel, e meki hem de wan leeman. Foedi hem ati de nanga gridifasi en trobifasi, a no de boen foe de wan kristen leriman.
12. Sortoe koni wan man di habi bita djaroesoe en trobifasi habi?
12 Na koni di so wan man di habi gridifasi nanga trobifasi taki a habi, wi no kan kari hemel koni. Na discipel Jakobus e skrifi: „Disi no de na koni di komoto foe tapoesee, ma a de foe grontapoe, metifasi nanga didibrifasi” (Jak. 3:15). Koni foe Gado de trafasi leki bita djaroesoe nanga trobifasi. — Spr. 6:16-19.
13-15. Fa na sortoe koni disi de (a) nanga grontapoefasi, (b) metifasi, en (c) didibrifasi?
13 Na agersi koni di so wan leriman taki a habi, de spesroetoe leki wan marki foe grontapoe soema di kon de vreemde soema foe gado. Hem de leki soema di no habi jejefasi, ma di e gebroki hem tem nanga krakti foe gi hem srefi abra na dem lostoe foe hem foe prisiri ofoe foe kisi ini na seti foe sani disi di e kenki alatem en di no de vaste, boen nem nanga goedoe (Fil. 3:19; Kol. 3:2). Dem beweegi foe ati foe wani de wan leriman, no boen. Foedi a habi bigimemre, a de lostoe na respeki nanga na grani di ini hem geest a tai makandra nanga na positie.
14 Na koni foe wan man di habi bigimemre, soekoe trobi, de ooktoe nanga metifasi (Griki: psuchiké = leki foe wan sili). A de kon moro foeroe foe na sani dati libisoema de wan mekisani nanga firi, ofoe wan sili. Leki fa na bijbel e sori dan libisoema nanga meti de sili (Gen. 2:7; Num. 31:28; Openb. 16:3). Libisoema nanga firi (sili) habi moreel nanga verstan fasi, ma meti de leki mekisani nanga firi di no habi verstan (2 Petr. 2:12; Judas 10). Dati na spesroetoe koni disi dem e kari „metifasi”, e sori foe datede dati a de wan sani di no kan dresi, na bakapisi foe skin lostoe, firi nanga angri.
15 Moro fara Jakobus e kari na koni disi nanga reti nanga didibrifasi. Disi de so foedi demon (ogri jeje) e sori wan jejefasi di de kontrari na koni foe Gado. Dem no habi safrifasi, ma ogri-ati nanga tai-ati, soleki e kon na krin ini dem sari kondisi foe dem soema di dem teki abra (Mark. 5:2-5). Na bijbel e tjari kon na krin foe Satan Didibri, na rigeriman foe dem demon, dati gridifasi heememre, nanga ambisi meki a fadon. — 1 Tim. 3:6.
DEM BOEN EEGIFASI DI HABI FOE DOE NANGA KONI FOE HEMEL
16. San de dem marki foe na koni foe hemel?
16 Efoe wan soema wani dem feni hem boen foe doe wroko leki leriman foe hem kompebribiman, dan a moe de fri foe eegifasi di habi te make nanga grontapoefasi, metifasi nanga didibrifasi koni. Hem libi moe sori dati hemel koni e tjari hem. Na discipel Jakobus e skrifi foe na koni disi so: „Na koni foe tapoesee na a fosi presi de soifri moro fara a lobi vreede, redelijk, de klari foe gi jesi, foeroe nanga sari-ati en boen froktoe, a no de teki partijfasi, no nanga korifasi” (Jak. 3:17). Loekoe pikinso san disi wani taki.
17. San a wani taki foe de „soifri” nanga „lobi vreede”?
17 Foe dem soema di dem e feni boen foe doe wroko leki leriman, dem taki dati dem de „soifri” ofoe sondro vlaka ini dem geest nanga ati. Foedi dem „lobi vreede”, dem e sori dati dem wani meki vreede go na fesi. No wawan dem no wani foe go bigin feti ofoe habi lostoe foe stree, ma dem e doe foeroe moeiti foe meki boen matifasi de mindri dem nanga trawan en mindri trawan makandra (Rom. 14:19; 1 Tim. 3:13). Dem no de bezig nanga sani ofoe dem no e keur noti boen di kan pori na vreede. — Loekoe Spreuken 16:28; 17:9.
18. Fa wan soema e sori dati a de (a) „redelijk”, (b) „klari foe gi jesi” (c) „foeroe nanga sari-ati nanga boen froktoe”?
18 Wan soema di de „redelijk”, de wan soema di e gi leti, di de safri ofoe di de verdrage en di no de fanatiek ini hem faja. A no sa tanapoe taki ala sani moe pasa tapoe hem fasi ofoe leki na letter foe na wet, ma a sa loekoe wan afersi nanga firi foe trawan en foe hori trawan na prakseri (loekoe 1 Petr. 2:18). Na presi foe a de nanga tranga-ede, dan wan soema di habi koni foe hemel de „Klari foe gi jesi”. A habi wan geest foe wroko makandra, de klari foe doe sani te dem aksi hem sani di fiti. So wan man sa skeki hemsrefi na dem sani di na bijbel e taki en no sa hori winsi san de kon na wan standpunt di a ben teki. A sa tjari esesi wan kenki kon te krin bewijsi de, dati a ben teki wan verkeerti standpunt ofoe ben teki bosroiti di no ben boen. Wan soema di habi koni foe hemel, de „foeroe nanga sari-ati nanga boen froktoe” toe. Ini hem demakandra nanga trawan a de sori sari-ati toe. A de sori sari-ati nanga dem wan di e kisi kwinsi en dem wan di e sari en a de klari nanga hem heri ati foe ala san a kan foe jepi dem. Dem „boen froktoe” de ala doe di de akroederi nanga boenfasi, retidoe nanga waarheid. — Efese 5:9.
19. San a wani taki dati wan soema habi „partijfasi”?
19 Wan soema di hemel koni e tjari hem, „no habi partijfasi”. A no e poti wan soema na fesi wan trawan foe a de foe hem na skinfasi, hem positie, goedoe, hem presi ini na libi ofoe hem makti ini na gemeente (Loekoe Jakobus 2:1-4). A de feti ini na demakandra foe hem nanga tra soema foe no sori partijfasi.
20. (a) Soema na wan farsi soema? (b) Fa wan soema di habi hemel koni e sori dati a no habi farsi fasi?
20 Na koni foe hemel noiti e meki wan soema de nanga „korifasi”. Wan farsi soema e sori hemsrefi leki fa a no de. Wan soema di e sori na koni foe hemel, no e weri noiti wan djakti. Ini ala hem demakandra nanga tra soema a de opregti en betrouwbaar. — Efese 4:25.
21. Fa wi kan poti tapoe wisrefi libi dem bijbel marki foe wan soema di wani dini leki wan leriman ini na gemeente?
21 San dem e aksi foe kristen leriman, moe tjari wi ala so fara foe ondrosoekoe wisrefi fini fini. Wi e sori dati wi wani libi akroederi na koni foe hemel? Alwasi wi no de wan leriman ini na gemeente, tokoe wi alamala habi na frantwortoe leki Kristus discipel foe leri tra soema. Foe datede a de wan toemsi prenspari sani dati dem fasi, dem wortoe nanga doe foe wi de akroederi nanga san wi e taki wi de (Rom. 2:21, 22). Meki wi tan doe moeiti foe de moro betre foetoeboi foe wi Hemel Tata en prisiri wisrefi ini dem blesi di a ben gi wi. — Loekoe 1 Timoteus 4:15, 16.