Gado Wortoe abi libi
San na a Kownoekondre foe Gado?
DI JEZUS KRISTUS ben de na grontapoe, dan en moro prenspari wroko ben de foe préki èn leri sma foe a kownoekondre foe Gado. „Mi moe barwroko gi na boen njoensoe foe na kownoekondre foe Gado”, a ben taki wan dé, „bika foe na réde disi den ben seni mi kon” (Luk. 4:43). Leki fa joe kan si dja, dan Jezus ben seni en bakaman foe doe na srefi kownoekondre-prékiwroko disi (Matt. 10:1, 7). A ben leri en bakaman foe begi na Gado: „Joe kownoekondre moe kon. Joe wani moe psa soleki na ini hemel, sosrefi toe na grontapoe.” — Matt. 6:10.
San na a kownoekondre disi foe Gado, èn foe san-ede a de so prenspari?
We, joe sabi san na wan kownoe. A de na tiriman foe wan kondre ofoe kontren. Foe di a de wan kownoe, meki den e kari en tiri wan kownoekondre. A kownoekondre foe Gado de ook toe wan tiri. Na bijbel e ferteri foe en ini den wortoe disi: „Bika wan pikin ben gebore gi wi, wan manpikin ben gi na wi; èn na tiri sa de na tapoe en skowroe, èn en nen den sa kari: . . . Na kownoe foe vréde. Foe na kon moro foeroe foe en tiri èn vréde kaba no sa de.” — Jes. 9:6, 7, AV.
Na kownoe disi — na Manpikin disi foe na Gran Kownoe, Jehovah Gado — na Jezus Kristus. Gado ben poti en leki tiriman foe en kownoekondre-tiri. Foe kan si dati a kownoekondre foe Gado ben de wan prenspari afersi foe na ten foe Jezus Kristus diniwroko meki wi go loekoe san ben psa na a dé foe en dede.
A bijbel e ferteri wi dati den sma ben gi Jezus nen nanga den wortoe: „Wi ben feni dati na man disi e gi wi naatsi tranga foe meki oproeroe èn e tapoe sma foe pai lanti-moni èn e taki foe ensrefi dati a de Kristus, wan kownoe.” Di na Romein Pontius Pilatus jere disi, a aksi Jezus: „Joe de na kownoe foe den djoe”? — Luk. 23:1-3.
Jezus no piki na aksi foe Pilatus direkt, ma a taki: „Mi kownoekondre no de wan pisi foe na grontapoe disi” (Joh. 18:36). Jezus gi na piki disi foe di en kownoekondre no ben sa de wan grontapoe kownoekondre pe politiek foe libisma ben de na ini. Leki a kownoe foe Gado a ben sa tiri komoto foe hemel, no leki wan libisma komoto foe wan troon na grontapoe.
Joe ben si na ini den Wortoe foe Jesaja san ben de na réde dati a kownoekondre foe Gado sa kon moro foeroe sodati wan kaba no sa kon na en? Ija, vréde. Joe kan si foe dat’ede now foe san-ede a tiri dati de so prenspari? No wan enkri libisma tiri kan meki vréde kon di e tan; soso a kownoekondre foe Gado sa man doe disi. Jezus ben gebroiki en libi na grontapoe foe ferteri den libisma den wondroe waarheid foe a Kownoekondre tiri foe Gado. A ben de en moro prenspari boskopoe. A Kownoekondre de te now ete na ini disi ten na moro prenspari afersi pe ala sani e drai lontoe en.