Gado Wortoe abi libi

Joe ben sa anbegi wan popki?

San joe ben sa doe efoe na strafoe, foe di joe no ben sa anbegi, ben sa de dede strafoe? Joe ben sa anbegi wan popki dan? Dati den de na situwasi pe sma ben tanapoe a fesi ini owroe Babylon so wan 2.500 jari psa kaba.

NA KOWNOE NEBUKADNEZAR ben meki den opo wan kefarlek bigi gowtoe popki di ben hé sowan 27 meter na ini na lagipresi foe Dura. Dan a kari kon makandra ala en hé lantiman foe a heri kondre foe anbegi a popki. Dri anbegiman foe Jehovah di ben nen Sadrach, Mesach nanga Abednego soleki joe kan si ben de drape a mindri den man dati.

Wan sma di ben teki en presi foe na kownoe ben bari dati ala sma ben moe „fadon na gron èn anbegi na gowtoe popki di na kownoe Nebukadnezar ben opo.” Efoe joe ben de drape, san joe ben sa doe? Ibriwan sma ben fadon na gron foe anbegi, boiti Sadrach, Mesach nanga Abednego. Den ben tan tanapoe bikasi den ben sabi taki a ben de kontrari a wet foe Gado foe anbegi wan popki. — Exodus 20:4, 5.

Den dri anbegiman foe Jehovah Gado ben tjari go na fesi foe kownoe Nebukadnezar. „A de troetroe so”, a aksi, „Dati oenoe no e dini mi égi gado èn na gowtoe popki di mi ben opo?” Ne a taki: „Efoe joe no anbegi, na a srefi momenti joe sa trowe go na ini na faja onfoe di e bron èn soema de a gado dati, di kan ferloesoe oenoe poeroe foe mi anoe?”

Efoe joe ben tanapoe na fesi so wan tapoeskreki san joe ben sa doe? Sadrach, Mesach nanga Abednego soleki joe kan si e taki fri èn e ferteri: „Efoe a sa de so, wi Gado di wi e dini man foe ferloesoe wi . . . Ma efoe a no de so, meki a kon de bekenti gi joe, o kownoe, dati den gado foe joe no de den wan di wi e dini, èn a gowtoe popki di joe ben opo wi no sa anbegi.”

A kownoe ati bron srefsrefi. A ben komanderi: ’Meki na onfoe kon sébitron moro hati leki a gwenti de! Tai den èn trowe den go na ini!’ Ma san psa nanga Sadrach, Mesach nanga Abednego? Den fadon go let a mindri foe na faja. Dan den opo tanapoe èn ben e waka lontoe.

Di na kownoe loekoe, a si fo sma e waka lontoe sondro mankeri na presi foe soso dri! Na di foe fo sma na wan engel di Jehovah ben seni foe kibri en getrow dienstknegti. Tapoe dati na kownoe bigin kon skreki srefsrefi èn bari taki: „Sadrach, Mesach, Abednego oenoe dienstknegti foe na moro Hé Gado, kon na doro èn kon dja!” Èn den doe so. — Daniël 3:1-30.

Na bribi nanga dek’ati foe en dienstknegti ben plisi Jehovah. Wi sa plisi Jehovah toe, efoe wi abi dek’ati foe wégri foe anbegi ofoe gi grani na iniwan sortoe foe popki di grontapoe tiriman ben mag opo.