Njan boen foe trowfesa na wan balansfasi
1, 2. (a) Foe san-ede wi moe poti prakseri ini a ten disi na trowreceptie? (b) O fanowdoe trowreceptie de?
SONDRO DEGEDEGE JOE ben si krin bewijsi taki na profétitori de troe taki den sma ben sa abi „ini den laatste dé moro lobi gi prisiri leki gi Gado” (2 Timotéus 3:1-4). Disi e kon na krin na ini na fasi fa foeroe sma e si trowoso-fesa ofoe receptie èn a fasi fa den e tjari densrefi na den okasi dati.a Fa wi moe si den okasi dati? Kristensma no moe hori trowoso-fesa ofoe go na den? Ofoe na tori e go foe disi dati wi, foe abi lobi gi Gado, moe tan farawe foe bepaalde trapoe?
2 Awinsi fa a de a gwenti toe ini a presi pe wi e libi foe abi wantewante baka te wan paar trow wan prisiri komakandra, tokoe kristensma séker no de ferprekti foe doe disi te joe e loekoe en foe na sé foe na bijbel. Son paar ben wani moro foeroe foe komakandra soso nanga krosbé famirman foe den ofoe wantoe boen krosbé mati èn kande na ini besloten kring njan makandra. Tokoe wi no kan taki somaar foe sma di e hori wan trowoso-fesa ofoe e go na den, dati den „abi lobi gi prisiri”, bikasi na ini Kana Jezus nanga en discipel ben de na so wan fesa.
3. O fara trowfesa ben de a gwenti na ini bijbel ten?
3 Na trowdé na wan ten foe prisiri gi den sma di trow pas èn gi den famirman nanga mati foe den. Prisiri trowoso pe wan fesa njanjan e poti, de wan sani di de boen langa kaba na gwenti (Gen. 29:21, 22; Kroetoeman 14:3, 10, 17). Foe di den djoe ben de bekenti nanga den sortoe trowoso-fesa disi, meki Jezus na ini dri agersitori ben kan sori a tapoe (Mattéus 22:2-14; 25:1-13; Lukas 14:7-11). Srefi na ini na laatste boekoe foe na bijbel den e taki: „Kolokoe den sma de di kisi kari foe kon na a avondmaal toe na trow foe na Lam.” — Openbaring 19:9.
4. San wi kan taki foe foeroe trowfesa?
4 Den dienstknegti foe Gado na ini owroeten — Jezus nanga en discipel ooktoe — ben e prisiri na wan balansfasi na trowoso-fesa. Disi wi kan taki toe foe doesoendoesoen kristen na ini wi ten. Wan famirman di no de ini bribi èn di ben go na so wan fesa na ini Zuid-Afrika, ben taki: „Mi no ben sabi, dati den kotoigi ben abi den sortoe moi trowoso dati. Wi no wani abi noti moro foe doe nanga den dringi nanga den oproeroe pokoe di de na ini a ten disi na tapoe trowoso.” Boen foeroe kristen receptie e kisi den sortoe prijse disi.
5. Sortoe problema ben kon?
5 Ma a druk foe na grontapoe foe abi „lobi gi prisiri” de tranga. Na so son kristen owroeman e ferteri:
„Difrenti sma e graboe na okasi foe [wan trowoso] foe trowe ala skotoe a wan sé. Den e redeneer dati pikinso nomo foe den sortoe okasi dati, èn dati meki den wani njan boen foe den someni leki den kan foe prisiri srefsrefi, foe gi densrefi abra na lostoe di na ini den tra ten den moe dwengi den. A no de wan ferwondroe sani dati na sfeer de leki wan skwala.” — Europa
„A gersi taki wan trowfesa abi ini en wan lezing, foe njan wan pkin sani èn dan dansi te bam. Son sma e méne dati tapoe receptie, den kan dringi moro leki de a gwenti, èn foeroetron den e dringi toemsi foeroe.” — Latijns-Amerika.
„Tapoe wan trowoso foeroetron den ’e dansi te mamanten’. Sonwan foe den sortoe fesa disi de troetroe foe grontapoe oproeroe nanga foeroe dringi nanga grontapoe dansi. Foeroe sma e proberi foe prodo nanga san den abi leki a weri foe krosi èn foeroe kisi biri.” — Afrika.
A de fanowdoe foe doe sani nanga marki
6. San wi kan leri foe wan sani di ben taki na Kana foe djoe trowfesa?
6 Moro foeroe sma sabi dati Jezus na a trowfesa na ini Kana ben kenki watra tron win. Ma hori san e kon now na ini prakseri: „Di now na man foe na fesa ben tesi a watra di ben tron win, a ben kari na bruidegom èn taigi en: ’Ibri tra sma e poti fosi a moro boen win, èn te den sma droengoe . . . na wan di no de so boen’” (Johannes 2:9, 10). A no ben taki dati den fisitiman ben droengoe na tapoe a spesroetoe fesa disi.b A de srefi wan sani di no de foe prakseri dati Jezus ben sa feni droengoe boen èn ben sa meki disi kon moro ogri foe meki moro win. Tokoe a man disi ben sabi taki na tapoe djoe trowfesa sma ben abi a gwenti foe dringi toemsi foeroe.
7. San wan kristen moe hori na prakseri ini a tori foe na kanti foe sopi?
7 Na tapoe son receptie na gastheer kwetkweti no ben meki den kanti sopi foe di na ini na birti sma abi na gwenti foe dringi toemsi foeroe èn den foe dat’ede no ben wani taki wan fisitiman di ben abi wan dringiproblema kon na ini tesi. Son Afrikan brada ben taki srefi dati a no abi foe sopi, ben abi wan „soifri kristen trowoso” leki bakapisi. A de troe dati a kan de wan koni sani foe no gi dringi di abi sopi te ini na birti sma de di e kakafoetoe gi en troetroe dati kristen gebroiki tranga dringi (Romeini 14:20, 21). Tokoe wan kroetoe foe sani na wan balansfasi de fanowdoe. Aksi joesrefi: Na fesa di Jezus ben de a tapoe ’no ben de soifri’ foe di win ben kanti drape? Na bijbel e kroetoe droengoe, ma no a gebroiki foe dringi di abi sopi na wan fasi di abi marki. — Odo 23:20, 21; 1 Petrus 4:3.
8, 9. (a) Fa wi kan sori dati wi e doe sani nanga marki te dringi di abi sopi e gi? (b) San wan owroeman ben taki foe na problema?
8 Te na trowpaar wani taki tapoe na receptie foe den sopi-dringi sa gi, dan na wan koni sani foe poti prakseri di fiti na tapoe dringi nanga marki (1 Timotéus 3:2; Mattéus 23:25). Fa foe eksempre den fisitiman na tapoe na trow foe Kana ben kisi san ben de fanowdoe? A de krin foe di den ben kisi sani foe „den sma di ben dini den” (Johannes 2:5, 9). Na so wan trowpaar kan aksi sma foe kanti dringi èn (kande hori na omeni di moe kanti na ini bepaalde marki). Tapoe ibri kristen receptie a no de foe taki dati dringi di no abi sopi moesoe de gi den sma di den sortoe dringi disi den moe abi noso di den lobi.
9 Wan owroeman ini Midden-Amerika ben taki: „Na problema de nofotron taki den receptie de toemsi bigi, sodati a no de mogelek foe hori wan ai tapoe ala sma di de drape. Sontron grontapoe sma di den no kari ben kon na inisé èn di ben tjari batra nanga dringi na den èn ben meki wan heri oproeroe kon.” Soboen soema kan hori wan ai ofoe sorgoe foe tiri sani? Omeni sma sa de? San sa psa na tapoe den sortoe fesa disi?
Soema e tiri sani?
10. Te wi waka baka sortoe marki foe a bijbel meki dati receptie kande kan hori moro boen na ini anoe?
10 Na a fesa foe Kana joe ben abi wan „fesiman foe a fesa” (Johannes 2:9). Na so toe na tapoe receptie na ini na ten disi wan bekwaam frantwortoe brada sa kisi na makti foe hori wan ai tapoe ala den finfini sani. Foe di a sabi den winsi foe na paar di trow pas, dan a kan sori sortoe pokoe moe de, den sma di o tjari sani lontoe nanga tra sma, noso a kan go takmakandra nanga na jongoe paar èn bakadati doe san den e winsi. Na ini a tori disi dan de ooktoe na tiri di a abi na abra den sma di e hori loekoe a tapoe dati sani waka boen. Makandra den kan jepi den fisitiman èn efoe a de so dati elementi kon di den no ben kari èn foe opo doe wan sani nanga den. Loekoe pikinso na tapoe a tori foe na hori foe wan ai san ben psa na ini na agersitori foe Jezus nanga wan fisitiman di tapoe wan trowoso-fesa na publiki ben sori taki a no abi respeki. — Mattéus 22:11-13.
11. San wi moe loekoe te den e loekoe foe teki wan sma di sa jepi na jongoe paar na ini na algehele leiding?
11 Tapoe foeroe grontapoe receptie na sma di e loekoe na zaal ofoe na bandleider e doe wroko leki ceremoniemeester. Gewoonlek a sabi fa sani e go normaal èn e hori wan taki kande ofoe e ferteri wantoe spotoe di no de so krin. Ma efoe joe wani wan receptie di de ini akroederi nanga kristen gronprakseri, joe sa wani wan grontapoe man — di no de joe jeje brada, èn ooktoe no de wan famirman foe joe — foe taki nanga joe fisitiman ofoe di de a sma di ala sma poti en prakseri na tapoe en? Dati ben sa kroederi nanga na rai foe „doe boen gi ala sma, ma spesroetoe gi den wan di de na ini na srefi bribi leki joe”? — Galaciasma 6:10.
12. Fa a bijbel sori soema moro foeroe de frantwortoe foe san e psa na tapoe receptie?
12 Sontron a papa nanga mama foe na bruid noso bruidegom e jepi na trowpaar foe di den e pai na receptie. Den papa nanga mama, ben kan abi foe dat’ede na prakseri dati den moe abi wan prenspari sten na ini na bepaal foe soema sa moesoe kisi wan kari foe kon, sortoe njanjan ofoe dringi ben moe poti ofoe fa na programma sa waka. Na ini na bijbel den no e taki soema ben pai na trowfesa na ini Kana, ma drape e ferteri wi wel dati di wan prenspari afersi ben kon ’na fesiman foe na fesi ben kari na bruidegom’ (Johannes 2:9). Na ini wan receptie na bruidegom de na ede foe na osofamiri di doe kon pas soleki na bijbel taki (Efesesma 5:22, 23). Aladi na tapoe wan lobifasi a sa hori na prakseri den winsi foe en bruid tapoe na spesroetoe dé disi, èn nanga den winsi foe den famiri foe den, tokoe na a fosi presi a moe teki foe dat’ede na frantwortoe foe san o psa ofoe no o psa.
Soema sa de drape?
13. O bigi trowfesa ben de na ini ten foe bijbel?
13 Wi no sabi o bigi den trowfesa ini bijbelten ben de. Na a trowoso foe Simson en papa nanga mama ben de drape, dritenti sabiman foe en bruid èn kandé wantoe tra mati ofoe famirman (Kroetoeman 14:5, 10, 11, 18). Den fisitiman na djoe trowoso ben de kompe bribiman foe a foto srefi èn ooktoe tra sma di ben kon. Jezus nanga en discipel, di ben komoto foe wan tra presi na Galilea ben go na a fesa na ini Kana. Na omeni win di kan meki, e meki wi denki na wan boen bigi groepoe. — Johannes 2:1, 2, 6.
14, 15. Fa son sma ben orga „open house receptie”, ma sortoe problema kan sori densrefi?
14 Na ini a ten disi den gwenti nanga den sani di sma e poti a fesi e kenki na ini na tori toe na fasi èn na bigi foe na receptie. Na ini son presi a de na gwenti foe hori open house; ala kompe kristen di de mati foe den sma di trow pas nanga prisiri den kan kon. Den e gi den wantoe switisani èn dringi, èn a prakseri ben de foe meki ibriwan sma bere foeroe ma foe gi den na okasi foe fristeri na trowpaar èn abi wan prisiri demakandra. Na tra presi foeroe sma e tjari tapoe komakandra di opo gi mati, njanjan nanga den — njan di densrefi bori, wan dringi ofoe wan desert. Ala sma di gi na a fasi disi nanga den fri wani jepi, e ondrofeni foe dati na prisiri, aladi ibri sma kan firi switi foe den difrenti njanjan di de drape, sondro dati na jongoe paar ofoe wan tra sma go boekoendoen na ondro den kostoe. — Tori foe den Apostel 20:35.
15 Na ini den agersitori foe Jezus a sori dati wi kan ferstan dati na tapoe djoe trowoso wan bigi njanjan ben poti (Mattéus 22:2; Lukas 14:8). A no de foe taki dati a e aksi wan boen planning foe pristeri na a ten disi na ala fisitiman wan njan. Wan mama na ini Noord-Amerika ben ferteri na sari ondrofeni tori disi:
’Di a njoensoe ben panja dati wan trowoso ben de, den jongoesma ben kon foe farawe presi foe njan foe soso èn foe dansi. Aladi den sma di den ben kari ben de na ini na kownoekondre-komakandrapresi dan trawan ben go na a zaal pe na receptie ben o hori èn den ben teki ala tafra di ben de drape gi densrefi. Di mi doro mi ben kan kré bika presi no ben de. Mi ben mandi nanga na mankeri foe lobi di ben sori foe kon na wan trowoso sondro dati den kari joe èn foe njan a njanjan di ben bedoel gi krosbé mati nanga famirman.’
16. San wi kan leri foe na bijbel foe fisitiman foe trowfesa?
16 Maria, Jezus nanga en discipel no ben kon na tapoe a fesa na ini Kana sondro dati den ben kisi wan kari; den ben ’kisi wan kari’ (Johannes 2:1, 2). Jezus ben taki: „Efoe wan sma ben kari joe kon tapoe wan trowfesa . . .” (Lukas 14:8, 9, 16, 17). Na ini na agersitori foe na trow foe na manpikin foe na kownoe Jezus ben taki ooktoe foe den „sma di ben kisi kari” (Mattéus 22:3, 9, 10). Èn di wan man di ben kisi kari ben tjari ensrefi tapoe wan fasi di no ben sori lespeki, dan den sma di ben abi na wroko foe hori wan ai ben kisi na komando foe poeroe en. Na ini wan tra agersitori den féfi wenke di ben wani go na a trowfesa den ben tapoe foe psa na doro go na inisé (Mattéus 22:11-13; 25:10-12). A no moe de wan freemde sani gi oenoe te wan receptie poti gi soso den fisitiman di kisi wan kari, di, a no de foe taki sa weri krosi di fiti. Èn a de wan sani di de foe ferstan dati a lobi foe gi sani foe wan gastheer no a foe go na sma di na a fosi presi abi belangstelling gi njanjan nanga prisiri. — Filipisma 3:18, 19; Prékiman 5:11.
17. Sortoe problema ben kon a ini na tori foe na bigi foe trowfesa?
17 Efoe den sma di trow pas noso den famirman foe den wani pristeri wan bigi nomroe foe fisitiman wan boen njanjantafra, dan disi kan go makandra nanga hé kostoe. (Teki gersi Markus 6:35-37.) Foe na kontren foe a Tiri Zuidsé na tori disi kon na wi:
„Na firi de foe meki receptie toemsi bigi. Son smae poti densrefi ini paiman foe orga wan bigi fesa, sodati foe sensi a bigin foe a trowlibi foe den den de boen dipi na ini paiman. Nofotron agersi taki sma e wani foe den fesi no fadon, sodati den e gi wan receptie di moro a krakti foe den na monisé.”
Fa a de wan sari sani te wan jongoe paar bigin na trowlibi nanga wan lai foe paiman di kan tjari spanning kon na ini na matifasi foe den. Ofoe fa den ben sa firi densrefi te den sabi dati den papa èn mama foe den de nanga na problema fa foe pai den hé kostoe foe wan bigi receptie. A no de foe taki dati a de heri boen mogelek dati grontapoe sma e gi densrefi na pasi foe poti densrefi go dipi na ini wan kefarlek bigi paiman foe a lostoe foe den di e kon foe bigi memre foe meki indruk na tapoe tra sma ofoe foe den fesi no fadon na ini na birti (Odo 15:25; Galaciasma 6:3). Ma disi mag de so na kristensma, efoe wi lési san tanapoe na ini Lukas 12:19-31?
18, 19. (a) Foe san ede meki son sma ben teki na bosroiti foe gi wan bigi receptie? (b) Fa wi moesoe teki en te wi no kisi kari foe de na tapoe wan trowoso foe wan mati (Lukas 14:12)
18 Na boewégi foe ati na baka wantoe kefarlek bigi trowfesa de na lostoe foe hori stré nanga trawan ofoe foe psa den. Owroeman na ini West-Afrika ben taki:
„Son sma e meki boen foeroe kostoe gi njanjan nanga dringi. A sma di orga a moro diri trowfesa, de a man. Disi ben gi problema na den sma di no ben kan abi na dek’ati foe de tra fasi. Na prodo nanga sani di wan sma abi, kan meki trawan naki foetoe fadon, aladi den moeiti foe ’ori strélibi nanga den birti’ no de fanowdoe.” — Loekoe 1 Johannes 2:15-17.
19 Tra sma ben firi a dwengi foe gi wan kefarlek bigi receptie foe di den ben frede foe no meki tra sma mandi. Den e prakseri dati son sabiman efoe den no kisi wan kari, den sa mandi. Foe dat’ede meki moro sma e kisi kari leki de fanowdoe. Ma meki wi de eerlek, sortoe wan foe oenoe ben sa wani dati wi mati ben moe frede so foe meki wi no mandi dati den go poti densrefi na ini paiman èn kande no kan go na ini na foeroeten diniwroko? Efoe wi no kisi wan kari, dan a de tog moro betre foe fertrow dati na trowpaar ben loekoe ala sani, ooktoe na monisé foe na afersi, leki lepi sma? Foe di den no kari wi, kande srefi wan sori foe a fertrow foe den dati wi de lepi èn wi no sa mandi srefsrefi (Prékiman 7:9; 1 Korintesma 13:4-7). Wi kan prisiri makandra nanga den foe go na a trowlezing, di de moro prenspari. Efoe wi e si na lezing dati no so prenspari leki na receptie, dan kande wi ben sa de a pasi foe tron sma di abi „moro lobi gi prisiri leki lobi gi Gado”? — 2 Timotéus 3:4.
20. Sortoe sani wi kan komoto na pasi foe den te wi skotoe na bigi foe receptie?
20 Redelekheid na ini na tori foe na bigi èn den kostoe foe receptie e meki wi tan farawe ooktoe foe doe sani di no boen. Na lostoe foe moni foe eksempre ben tjari son sma go so fara foe bai spesroetoe krosi gi na fesa èn moro fara foe aksi den bruidsmeisjes foe bai den krosi disi foe den foe moro diri. Den fisitiman tapoe na receptie moe „bai” pisi foe na taart ofoe moe pai foe wan dansi nanga na bruid, foe di den e pina moni a tapoe en japon. So wan krakti di e poti na tapoe moni kan de ooktoe na fundamenti réde foe san-ede fisitiman e prodo nanga na moni foe den foe di den e trowe moni go na den pokoeman ofoe e gi bigi kado foe kisi wan spesroetoe presi krosibé foe den sma di trow pas. — Lukas 14:8-11.
Jepi ala sma foe den prisiri
21. Sortoe rol pokoe e pré tapoe trowoso fesa?
21 Na ini a ten foe den Makkabeesma wan djoe trowgroepoe ben kon „nanga na naki foe pauk èn nanga na singi foe singi” (Makkabeeën 9:39, Willibrordvertaling; teki gersi Psalm 45:8). Ooktoe now pokoe e pré tapoe trow receptie. Disi kan meki prisiri kon na so wan okasi — ofoe broko a prisiri saka. Foe san-ede a laatste sani disi kan de so? Na ini wan toe geval a pokoe ben de tranga èn oproeroe. Son pokoeman lobi disco sortoe foe pokoe, ofoe den e gi densrefi krinkrin foe meki sma si sa den kan. Ma wan kristen receptie no de gi no wan foe den toe na joisti presi. Fisitiman, jongoe noso owroe kan njan boen foe a kristen demakandra efoe na pokoe de so tranga dati a de onmogelek fee taki nanga sma di sidon na a srefi tafra?
22. Fa problema di abi foe doe nanga pokoe kan skotoe?
22 A de krin dati na pokoe na trowoso-fesa e aksi foe wan soifri planning èn wan sma di e hori ai boen, spesroetoe pokoe di wan band e pré. Wi e feni en moro boen efoe grontapoe pokoeman no kon pré. Efoe pokoeman di joe e pai kon pré, dan na bruidegom ofoe na brada di den poti foe doe a wroko disi, moe tjari kon na krin gi den pokoeman sortoe pokoe mag èn sortoe pokoe no mag pré (Exodus 32:6, 17, 18). A moe aksi foe den dati no wan spesroetoe aksi foe fisitiman den mag pré sondro na bruidegom ofoe na brada di abi na tiri foe na receptie gi pasi. Foe di problema di e kon ini algemeen ini a tori foe dansi èn na tranga foe na pokoe di a band e pré, meki foeroe jongoe paar ben feni en boen foe gebroiki grammofoonplaat ofoe cassettelolo di e meki sma jere precies san den ben soekoe poti na wan sé a fesi. Den ben meki wan bigisma drai den di no e meki jongoesma di no lepi drai en prakseri foe san de populair. — 1 Korintesma 13:11; Hebrewsma 5:14.
23-25. Sortoe tra praktis stap jongoesma di trow pas kan doe foe kan de séker foe wan switi kristen komakandra?
23 Jongoesma di trow èn di de kristen moe sorgoe dati den fisitiman foe den kan loekoe baka nanga prisiri na a receptie. Soboen efoe na pokoe e pré ofoe den e dansi na tapoe dan disi moe de ini akroederi nanga kristen gronprakseri. Efoe den e aksi wan sma foe go wan mofo dan den sma di den e teki poeroe foe doe a wroko disi èn den wortoe di den e taki moe de ini akroederi nanga wan warti kristen komakandra.
24 Na ini na agersitori foe den tin wenke a fesa ben bigin „a mindri neti” foe di na trowgroepoe ben lasi ten (Mattéus 25:5, 6). Na ini wan tra geval den wortoe foe Jezus e sori foe wan kownoe di ben sreka wan fesa njanjan èn ben seni dinari go na den pasi foe kari sma, dati na fesa ben hori na déten (Mattéus 22:4, 9) Ini a ten disi receptie sontron e go doro te dipi ini na neti èn den e komoto na ini anoe o moro lepi sma e gwe foe go kisi wan redelek neti sribi. Foe meki disi no psa meki foeroe balans trowpaar ben poti wan ten gi a bigin èn gi na kaba foe na receptie foe den. Na a fasi dati ibriwan sma kan meki en plan, ooktoe plan gi wan kristen activiteit tapoe na dé baka wan prisiri receptie.
25 Wan trowreceptie kan de gi kristensma wan moi okasi foe prisiri na tapoe wan joisti balansfasi, ma sortoe presi a e teki na ini a tori foe san e kon now — a trowlibi leki troe kristen?
[Foetoewortoe]
a Ini son kondre ala fisitiman kan de baka wan trow-plechtigheid na tapoe van receptie pe den e prati softdringi (kowroedringi) noso kofi nanga koekoe. Bakaten den sma di trow pas abi, makandra nanga den famiri èn son mati, wan njantafra na oso noso na ini wan restaurant, Na tra presi na receptie de wan demakandra di e feni presi baka te den trow den sma — a kan de nanga switi sani ofoe na wan fesanjanjan.
b Foe na Griki methuskoo, dati wani taki „kon droengoe, dringi te joe droengoe”. Son commentator e taki dati na wortoe wani taki taki wan sma e dringi netso meni foe a kan lasi pikinso foe en tesi ofoe a e kon vrolijk. Tra tekst no e tnapoe baka na fasi disi foe si sani. — Mattéus 24:49; Lukas 12:45; Tori foe den Apostel 2:15; Efesesma 5:18; 1 Thessalonikasma 5:7.
Joe kan membre den sani di e kon now?
◻ Foe san-ede meki kristen moe abi belangstelling gi a fasi fa sani e go tapoe receptie?
◻ San na wan boen sani foe doe na ini na tori foe dringi di abi sopi na ini?
◻ Soema abi na frantwortoe foe san e pasa tapoe receptie?
[Prenki na tapoe bladzijde 11]
Na fesiman foe na fesa ben go taki nanga na trowmasra foe na win