Disi na a pisi foe bijbel di moe lési na a theocratis skoro leki lezing nomroe toe (2) na ini a wiki foe:
9 september: Deuteronomium 1:29-46
Foe dat’ede mi ben taigi joe: ’Joe no moesoe krempi kon ini wán foe frede ede, èn no frede den. 30 Jehovah, joe Gado, de na sma di e go na joe fesi. En sa feti gi joe akroederi nanga ala sani di a ben doe a fesi joe ai ini Egypte, 31 èn ini a sabana, pe joe ben si fa Jehovah, joe Gado ben tjari joe neleki fa wan man e tjari en manpikin, tapoe na heri pasi di joe ben waka,te leki joe doro na presi disi. 32 Ma nanga ala di den wortoe disi ben taki, tokoe joe no ben abi bribi ini Jehovah joe Gado, 33 di ben go na joe fesi foe loekoe na kibrifasi wan presi gi joe pe joe ben sa man foe opo joe kampoe na neti nanga faja, sodati joe ben sa man foe si tapoe sortoe pasi joe moesoe go, èn na dé nanga wan wolkoe.
34 Ala a ten dati, Jehovah ben jere a sten foe joe wortoe. Foe dat’ede a ben kisi atibron èn ben sweri èn taki: 35 ’No wán na mindri den man disi foe na takroe geslagti disi sa si na boen kondre di mi ben sweri foe gi joe tata, 36 boiti Kaleb, na manpikin foe Jefunne. En sa si en, èn en nanga en manpikin mi sa gi na kondre pe a ben poti en foetoe, foe di a ben waka na baka Jehovah dorodoro. 37 (Srefi tége mi Jehovah ati ben kon bron foe joe ede taki: ’Ooktoe joe no sa go na ini.’ 38 Jozua, a manpikin foe Nun, di tanapoe na joe fesi, en sa go na ini. En a ben meki kon tranga, bikasi en sa meki Israël kisi en leki goedoe).
39 Èn foe taki foe den pikinwan foe joe, foe soema joe ben taki: „Leki wan sani foe foefoeroe den sa tron!” èn na den manpikin foe joe di no sabi now boen nanga ogri ete, den disi sa go na ini, èn na den mi sa gi en èn den sa teki en abra. 40 Èn foe a sé foe joe, teki wan tra pasi èn hari go na a sabana, langalanga a pasi foe a Redi Se. 41 Na tapoe disi joe ben piki en èn taigi mi: ’Wi ben sondoe tége Jehovah. Wi — Wi sa hari go èn feti akroederi ala san Jehovah wi Gado ben komanderi oen!’ Ibriwan foe oenoe ben weri foe dat’ede en fetisani èn oenoe ben denki dati a makriki foe kren a bergi. 42 Ma Jehovah ben taigi mi: ’Taigi den: „Oenoe no mag hari go èn feti, bikasi mi no de ini oenoe mindri; sodati oen no lasi na fesi foe oen féjanti.”’ 43 Soboen, mi ben taki nanga oenoe, ma oenoe no ben arki, ma oenoe ben bigin meki oproeroe tége na komando foe Jehovah èn oenoe ati ben proeberi foe kren a bergi. 44 Dan den Amorietsma di ben e libi na tapoe na bergi dati ben hari kon miti oenoe èn bigin lon na oen baka, neleki fa waswasi e doe dati, èn ini Seïr den ben panja oenoe foe makandra te doro Horma. 45 Baka dati oen drai kon baka èn oen go kré na fesi foe Jehovah, ma Jehovah no ben arki oen sten, èn ooktoe a no ben gi jesi na oenoe. 46 Oen ben tan foe dat’ede foeroe dé ini Kades, someni dé leki di oenoe ben tan troetroe drape.
16 september: Deuteronomium 5:6-22
’Mi na Jehovah, oen Gado, di ben tjari oen komoto foe na kondre Egypte, komoto foe na srafoe-oso. Oen no moe abi noiti wan tra gado kontrari mi persoon.
8 Oen no moe meki gi oensrefi wan popki di koti nanga anoe, no wan skin di gersi wan sani san de ini hemel na tapoe ofoe san de na grontapoe na ondro ofoe san de na ini den watra ondro na grontapoe. 9 Oen no moe boigi gi den, noso meki sma bewégi oenoe foe dini den, bikasi mi, Jehovah, oen Gado, de wan Gado di e aksi ala anbegi foe mi wawan, di e tjari strafoe foe a sondoe foe tata kon na manpikin, èn tapoe na di foe dri geslagti èn na tapoe na di foe fo geslagti, te ai go foe den di no wani si mi na ai, 10 ma di e sori lobi boen-ati fasi gi na a di foe doesoen geslagti te ai go foe den di lobi mi èn di e ori mi komando.
11 Oen no moe teki a nen foe Jehovah tapoe wan fasi di no de warti, bikasi Jehovah no sa libi nowan sma di teki en nen tapoe wan fasi di no de warti sondro foe strafoe en.
12 Foe ondrow na sabbatdé, foe ori en santa, joisti leki fa Jehovah ben komanderi oen, 13 oen moesoe doe diniwroko èn oen moesoe doe ala oen wroko ini siksi éd. 14 Ma a di foe sébi dé, de wan sabbat gi Jehovah, oen Gado. Oen no moe doe no wan enkri sortoe wroko, no oenoe, no oen manpikin, no oen oemapikin, no oen mansrafoe, no oen oemasrafoe, no oenmankaw, no oen boeriki no wan enkri osometi foe oen, no den freemde sma di e libi na oen, di de na inisé foe oen portoe, sodati oen man-srafoe nanga oen oema-srafoe kan rostoe a srefi leki oen. 15 èn oen moesoe prakseri dati oen ben tron wan srafoe na ini a kondre foe Egypte èn dati Jehovah, oen Gado, ben tjari oen komoto foe drape nanga tranga anoe èn wan anoe di ben langa. Foe dat’ede meki Jehovah, oen Gado, gi oen na komando foe ori na sabbatdé.
16 Respeki oen tata nanga mama, joisti soleki fa Jehovah, oen Gado, ben gi oen na komando; sodati den dé foe oen kan sori taki den de langa èn dati a kan go oen boen na tapoe na gron di Jehovah, oen Gado, e gi oen.
17 Oen no moe kiri.
18 Ooktoe oen no moe doe soetadoe.
19 Ooktoe oen no moe foefoeroe.
20 Ooktoe oen no moe gebroiki lé tége tra sma na oen sé foe na ogri foe en.
21 Ooktoe oen no moe abi bigi ai na tapoe na oema foe wan tra sma na joe sé. Sosrefi toe oen no moe abi wan tranga lostoe na tapoe a oso foe wan tra sma na oen sé tapoe en gron ofoe en mansrafoe ofoe en oema-srafoe, en mankaw ofoe en boeriki ofoe wan sani di de foe wan tra sma na oen sé.
22 Den wortoe disi Jehovah ben taki gi na heri gemeente na tapoe na bergi, na mindri foe na faja, na wolkoe nanga na deki doengroe, nanga tranga sten, èn a no ben poti noti na tapoe; èn baka dati a ben skrifi den na tapoe toe ston tafra, èn gi mi den.