Trowoso foe kristen di e gi prisiri

1, 2. Fa moro foeroe sma e teki ten te den jere na wortoe „trowoso” èn foe san-ede? (Mattéus 19:4-6)

NA APOSTEL Johannes, wan ai-kotoigi e taki: „Na Kana now na ini Galiléa wan trowoso ben feni presi, èn na mama foe Jezus ben de drape. Jezus nanga en discipel ben kisi kari toe foe de na a trowfesa.” (Wi e poti wan strépi na ondro den wortoe.) — Johannes 2:1, 2.

² Fa joe e doe te joe e lési den wortoe dati a ini Johannes 2:1, 2? A no ben sa de wan freemde sani efoe den wortoe disi ben kari kon a ini joe switi prakseri, bika na wortoe „trowoso” abi foe doe nanga wan switi afersi. Sma lobi foe de na wan trow-oso. Soleki wi e lési na ini Genesis 2:18-24, dan na fosi trow ben feni presi a ini na paradijs, di a libisma ben de sondro sondoe. A trow dati foe wan volmaakti man nanga oema, na a Mekiman foe wi ben seti en èn feni en boen. A ben abi wan hémarki èn a ben poti wan prisiri eksempre gi trow di ben o feni presi bakaten.

3. Sortoe stemming na bijbel e tjari kon ini akroederi nanga trowoso ma sortoe moeilekheid ben kon? (Jeremia 7:34)

³ Dati joe e de nanga ala prisiri na wan trowoso, e akroederi nanga san wi e lési na ini na wortoe foe Gado. Te Psalm 45:15 e taki foe den sma di e teki prati a ini wan trowoso foe wan kownoe a e taki: „Den e tjari kon nanga prisiri èn brétifasi; den sa waka kon na ini a paleisi foe na kownoe.” Prisirifasi e kon ooktoe na fesi a ini den bijbel eksempre di e sori tapoe trowoso (Mattéus 22:2-4; 25:1-10; Openbaring 19:6-9). Ija, aladi na wan serjoesoe stap wan sma e teki — wan paar e go na ini na santa trowlibi — tokoe wan sma kan loekoe baka na tapoe a trowdé leki wan prisiri, warti sani di feni presi. Ma tori di wi jere foe na heri grontapoe e sori taki foeroe trowoso e misi a marki disi èn foe disi foeroe problema nanga takroe bakapisi gi na trowpaar e kon èn sari gi den sma di ben de drape. Disi ben de srefi so nanga son trowoso pe dienstknegti foe Jehovah ben de na ini. Fa so?

4. (a) Foe san-ede meki moro foeroe trow de publiki afersi? (b) San Jezus ben taki foe trow na ini wi ten?

⁴ Na ini moro foeroe kondre wan paar kan go trow nanga jepi foe wan ceremonie di doro den marki foe lantiboekoe èn pe soso wantoe sma de. Efoe wan paar wani foe meki gebroiki foe sowan ceremonie dan tra sma no moe feni fowtoe a tapoe den ofoe denki dati den moe sjen foe dati. A kande eenvoudig san den wani èn a kan abi srefi boen winimarki, foe eksempre tapoe economis kontren te den e sreka densrefi dorodoro foe abi wan prati na ini na dienst foe Jehovah (Lukas 12:29-31). Tokoe moro foeroe foe den trowoso de sani di de a publiki, pe foeroe mati nanga famirman e de. A so fasi ala sma ini a heri gemeenschap e kon sabi a status di kenki foe a paar. Efoe wan kerki ceremonie ofoe wan bijbellezing e hori, dan wan jeje pisi e kon a tapoe toe. Èn tra sma kan prisiri makandra nanga na paar. Disi na positief waarde. Tokoe a de so dati moro bigi trow séker e tjari kefar kon nanga den, spesroetoe na ini na ten disi, now di a grontapoe abi so foeroe foe doe nanga ’trow èn gi abra foe trow’ dati wan sma ’no e poti prakseri a tapoe’ dati a ogri seti foe sani disi djonsro sa kon na wan kaba. — Mattéus 24:37-39.

5. Soema moe abi belangstelling gi a rai foe Gado di abi foe doe nanga trow?

⁵ Efoe ini joe égi geval joe wani abi wan prisiri kristen trowoso, dan bepaalde afersi de di moe abi na prakseri foe joe. Ma wi alamala di de na ini na tori leki fisitiman ofoe di abi wantronwantron foe doe nanga na trowoso, kan njan foeroe boen foe wan loekoe foe na bijbelrai foe a tori disi.

Na problema foe toemsi foeroe psa marki

6. Sortoe problema bigi trowfesa kan tjari kon?

⁶ Gi foeroe grontapoe sma, wan bigi trowoso-fesa kan de wan status symbool, wan bewijsi di de foe si, taki wan sma na monisé ofoe na maatschappeleksé moro bigi leki wan trawan. A wan sari sani foe taki, dati srefi kristensma e fadon na ini a trapoe disi dati nanga diri krosi noso sani di sreka kefarlek bigi ben sa proberi foe meki indruk tapoe trawan (Galaciasma 5:26). Son kristen owroeman a ini West Afrika no so langa psa kaba ben taki na publiki kontrari na „krakti firi foe ’waka na baka’ na grontapoe tapoe na kontren foe gwenti èn pranpran èn kefarlek bigi prisiri” te trowosofesa de. A sani disi e broko na wartifasi nanga prisiri di e fiti na ini na libi foe den sma di no e tjari densrefi „moro langa akroederi nanga na skin, e doe den sani di a skin wani” (Efesesma 2:3). Na presi dati den trowoso disi de wan fonten foe prisiri nanga switi memre, nofotron den de wan sani di e meki ’loesoe libifasi, féjantifasi, djaroesoe, trobi, bigi-ai nanga dringi èn njan psa marki’ kon, wroko foe na skin. — Gal. 5:19-21.

7. San kan tjari son sma kon so fara foe wani abi wan diri trow-oso nanga sani psa marki?

⁷ Na historia e ferteri taki di Ptolemaeus VI Philometor ben gi en oemapikin foe trow nanga Alexander Balas foe Syrië, na ini ’Ptolemaïs den hori a trowoso foe en nanga na glori foe wan kownoe’ (1 Makkabeeën 10:58, Willibrordvertaling). Nownow foeroe sma di no abi foeroe moni e prakseri dati den (noso den plkin foe den) moesoe trow ooktoe „nanga na glori foe wan kownoe”. Kande na reclame grontapoe poti na prakseri disi di no de wan troetroe sani go ini den. Bisnisman di e soekoe den égi belang foe boen bigi moi trowoso, e sori a publiki wan prenki foe wan trowmisi di „de wan dé koningin”, neleki wan bepaalde sortoe foe uitnodiging di druk, fowtow, bromki noso linga e djaranti joe wan volmaakti trowdé. Den wani gi joe a firi, dati joe ’ferdini na wan tron disi leki a moro boen wan’ — efoe joe kan gi joesrefi pasi foe doe dati ofoe no kan gi joesrefi pasi foe dati. Na „prodo disi nanga den sani di wan sma abi foe tan na libi”, de foe na grontapoe, di e pasa gowe (1 Johannes 2:15-17). Wantoe kristen owroeman ben taki: „Wi si wan jejefasi foe strélibi. Na ondro na krakti foe grontapoegwenti a e psa [foe eksempre] dati na trowmisi nanga den sma di e waka na en baka e weri sontron fo noso féfitron tra diri krosi baka.”

8. (a) San wi kan leri foe bepaalde vers foe a bijbel foe a krosi foe wan trowmisi? (b) Foe san-ede meki son kristen ben wani moro foeroe na aparti trowkrosi di den ben sa weri na tapoe den trowdé?

⁸ Na bijbel no e gi na prakseri dati trowoso moesoe de wan afersi pe notnoti no de srefi neleki den Spartaansma. Wi e lési foe eksempre foe „na bruidegom di, tapoe wan priesterfasi e poti wan tai-ede, èn . . . na trowmisi di e moi ensrefi nanga en gowtoe sani” (Jesaja 61:10; Psalm 45:13, 14; Jesaja 49:18; Jeremia 2:32; Ezechiël 16:9-13; Openbaring 21:2). Na agersi trow-oema foe Kristus den e skrifi foe en leki „a weri . . . krin, soifri, fini linnen”. Foe dat’meki a fiti taki na trowoema nanga na bruidegom nanga den sma di e waka na den baka weri krin moi krosi, ma den no abi krosi fanowdoe di e meki den kon na ini problema foe moni. Son trowpaar ben teki foe espresi krosi di no ben de so diri leki den ben man foe pai. Foe san-ede? Foe sorgoe foe no weri krosi di kande e meki indruk ma di ben sa abi leki bakapisi dati fisitiman no ben sa firi densrefi switi noso di ben sa pori na eenvoudig wartifasi, prisiri nanga jejefasi foe na trowplechtigheid. — Openbaring 19:8; Odo 11:2; 1 Timotéus 2:9.

9. Fa wi moesoe loekoe den gwenti ofoe traditie di de ini a tori foe trow?

⁹ Ete wan sani di e meki sani e doe psa marki na trowoso de a toemsl bigi nadruk di e poti tapoe protocol — na heri ritueel di leki fa „sabiman” ini etiquette (maniri fasi) e taki moe doe. Disi no wani taki dati den dienstknegti foe Gado moesoe poti ala gwenti na ini na presi pe den e libi na ini na tori foe trowoso na wan sé.a Na bijbel e ferteri fa Simson a ini na tori foe en trow ’ben poti wan fesatafra, bika na dati den jongoesma ben gwenti foe doe’ (Kroetoeman 14:10). Ma efoe wan sma e hori ensrefi leki wan srafoe na maatschappelek gwenti, dan wan trowoso no ben sa waka so vlot èn boen, sodati san na fesa troetroe wani taki e poti go na baka èn ibri sma e lasi a prisiri di moe de.

Lantitrow — ini bijbelten èn now

10. San na trow foe sma na ini bijbelten ben wani taki?

¹⁰ Wi kan njan boen foe san na bijbel e taki foe na trow foe sma awinsi den gwenti na ini wi ten èn na ini na gebied pe wi e libi de tra fasi. Na ini bijbelten wan spesroetoe ceremonie na lanti noso kerki no ben de fanowdoe. Na trowmasra ben go na a oso foe na oema di a poti mofo na en èn na publiki a ben tjari en go na en oso. Disi ben psa nanga prisiri foe a sé foe na paar, den krosbé famirman nanga sma di kon loekoe èn di ben sori foeroe belangstelling na ini na prisiri sani disi. Gewoonlek na bruid nanga na bruidegom ben weri moi krosi èn na ini den oso den ben hori trow fesa nanga den sma di den ben kari. — Genesis 24:65-67; Mattéus 1:24; 25:1-10; teki gersi 1 Makkabeeën 9:37, 39.

11. Fa na situwasi ben de na ini owroeten na ini a tori foe trow paira?

¹¹ Den naatsi di ben libi lontoe den Hebrewsma ben abi wet di ben aksi wan skrifi trowkontrakt. Aladi a Wortoe foe Gado no e ferteri foe den sortoe papira disi, tokoe a bijbel e ferteri foe na trowlibi ini wortoe foe wan „ferbontoe” (Maleachi 2:14). Den geslagti register di skrifi na ini bijbel finfini e meki oenoe prakseri dati trow tapoe na wan ofoe na tra fasi ben e skrifi ini boekoe, èn a de wan moi sani foe si dati Jozef nanga Maria ben doro a marki foe sowan sortoe prekti foe go skrifi den nen (Lukas 2:1-5; 3:23-38). Papyri foe na di foe féfi jarhondro bifo G.T., di komoto foe na djoe kolonie tapoe na eilanti Elephantine (Egypte), abi trowkontrakt di wan foe den e taki disi:

’. . . Mi ben kon na joe oso sodati joe ben sa gi mi joe oemapikin Miftahia foe trow. Foe bigin nanga na dé foe tide a de foe alaten mi oema èn mi de en masra. Mi ben gi joe leki bruidsprijs foe joe oemapikin Miftahia (wan moni foe) 5 sikkel . . .’

12. (a) Fa Jehovah Kotoigi e denki foe a trow na lanti? (b) San de wan sani di wi e gi leki rai efoe wan trow na lanti èn wan trow na ini kerki feni presi?

¹² Jehovah Kotoigi e ferstan dati toe sma di e trow moe doro den marki foe na wet foe a presi pe den sma de, sodati den kan ’gi na Caesar baka san de foe Caesar’ (Markus 12:17; Romeini 13:1, 7). Na wet e aksi kande dati wan paar saka densrefi na ondro wan broedoe test, moe kisi wan vergunning èn e pramisi sani a fesi wan sma di de bevoegtoe foe trow sma. Na ini son kondre soso den lantisma soleki wan districtkomsarsi noso wan kroetoeman kan trow sma. Tokoe kerkisma foe den kerki foe na kristenheid nofotron abi na prakseri dati den trow troetroe te wan kerkitrow feni presi fosi. Troe kristen e erken na krakti di wan trow na lanti abi ma tog son sma e feni en wan sani di den e poti a fesi (ofoe e feni en tapoe na gron foe na gwenti pe den e libi wan ferstan sani) dati baka na trow na lanti wan bijbellezing hori. Te sani e seti foe dati, a de moro boen dati a sani disi sa feni presi baka na trow na lanti.b

13. Te wan kristen owroeman e trow sma, dan san sa psa séker bifo na trowplechtigheid?

¹³ Na ini son kondre bedinari foe Jehovah Kotoigi kisi na makti foe trow sma. Gewoonlek disi e psa nanga jepi foe gemeente owroeman, man nanga ondrofeni, inzicht, lepifasi èn sabi foe a Wortoe foe Gado. Wan owroeman, di wan sma aksi foe trow en, sa abi wan takimakandra a fesi kande nanga na bruid nanga bruidegom di wani trow. A no de foe taki dati den moe gi en na djaranti dati moreel noso wettelek problema no de gi na trow foe den. A kan gi krakti rai foe na bijbel èn rai leki wan papa. Ooktoe a sa taki kande nanga den foe den sani di seti foe a plechtigheid èn foe a prisiri demakandra di kande sa hori baka dati foe di a sa wani abi wan soifri konsensi na ini na sani disi di den aksi en foe pré wan prenspari rol na ini. — Odo 1:1-4; 2:1; 3:1; 5:15-21; Hebrewsma 13:17, 18.

14. Sortoe trowlezing de lezing disi fiti?

¹⁴ Efoe wan trowlezing sa hori ofoe no sa hori nanga mofo foe wan bedinari foe Jehovah Kotoigi baka na trow na lanti, na prakseri foe na lezing de, foe jepi poti krakti na tapoe dati wan trow foe sensi na fosi bigin moe abi wan jeje fundamenti. Den lezing disi no e hori langa, neleki ala sani san moe ferteri na ini san na bijbel e taki foe trow, èn ooktoe krakti no sa poti na ini den lezing disi na tapoe meki spotoe ofoe prijse pasa marki na paar. Na balans èn prisiri inhoud foe den lezing disi foe a bijbel kan meki na trowman nanga oema nanga ala tra sma di de drape njan boen foe en. — 2 Tim. 3:16.

15. Fa den pramisi di Jehovah Kotoigi e gebroiki e kenki foe tra pramisi di sma e gebroiki foeroe na ini a ten disi?

¹⁵ Na moro foeroe foe den trow wan pramisi moesoe gi. Den pramisi di e gebroiki na son „modern” trow ceremonie ben meki na anoe foe poewema di no de gewoon, ofoe den e tjari kon na fesi wan ofoe tra persoonlek loekoe tapoe na libi. Ini wan tori ini na tijdschrift Time di e go foe „den kefar foe pramisi di sma meki densrefi”, den e taki foe wan domri di ben aksi: „Gina, joe e agri foe lobi Peter moro leki skrati?” Èn na aksi gi Peter ben de: „Joe e agri foe lobi Gina moro leki na mamantenkoranti?” Na artikel ben poti na prakseri dati „wan trow foe sma de wan publiki afersi” èn moe gi wartifasi na na prenspari maatschappelek stap di den sma e doe. Te Jehovah Kotoigi e trow sma dan den pramisi sa de ini akroederi nanga den marki di a wet foe lanti foe a presi dati e poti. Pe pasi e gi foe disi, dan den pramisi e gebroiki di e kon now, sodati Gado, na Sma di poti a trowlibi, e kisi grani:

„Mi ​——​ e teki joe ​——​ leki mi trow oema na a wet èn ini akroederi nanga na wet foe Gado, soleki disi e kou na krin na ini den Santa Boekoe ini na tori foe kristen trowman, e pramisi foe lobi joe solanga wi sa libi makandra na grontapoe akroederi a seti foe Gado foe na trowlibi.”

„Mi ​——​ e teki joe ​——​ leki mi trowman na a wet èn ini akroederi nanga na wet foe Gado soleki disi e kon na krin na ini den Santa Boekoe na ini na tori foe kristen trow-oema, e pramisi foe lobi joe èn sori dipi respeki gi joe solanga wi sa libi na grontapoe akroederi na seti foe Gado foe na trowlibi.”

Den pramisi disi no moe kenki ofoe trawan kon na ini na presi foe den foe di wan ofoe tra firi foe wan paar moesoe kon na fesi.c

Trow na ini na kownoekondrekomakandrapresi

16, 17. (a) Fa na skin foe owroeman de ini a tori foe wan trow di moe hori na ini na kownoekondre-komakandra presi? (Jakobus 3:17) (b) Foe san-ede meki te den owroeman de ini a tori disi a de wan boen sani?

¹⁶ Kristensma e kisi na komando foe „trow soso na ini Masra” (1 Korintesma 7:39). Te toe kristen di abi wan boen nen na ini na gemeente, wani trow na ini na kownoekondre-komakandrapresi, ofoe wani foe den hori na ini na zaal wan trowlezing, dan den moe aksi pasi foe na skin foe owroeman.d Den man disi no sa meki san den e firi persoonlek kon na fesi ini a tori foe den seti foe trow, ma den sa soekoe foe kon sabi toe na plan foe na paar, sodati noti ben sa kan psa na ini na kownoekondre-komakandrapresi di ben sa kan tjari degedege kon na ini na gemeente. — Teki gersi 1 Korintesma 14:26-33.

¹⁷ Foe eksempre skreki sani ben psa foe trow di ben hori na ini kownoekondre-komakandrapresi. Ini wan geval pokoe ben pré tranga bifo na trow ben bigin èn na trowmisi, èn trowmasra nanga den sma di ben waka nanga den ben dansi go na ini na joeroe zaal. Den fisitiman ben bigin dansi, te leki wan fesiman ben kon na mindri, sodati na baka wan begi na trowlezing ben kan bigin. Dati ben de krin taki a no ben de na joisti sfeer foe wan trow di moe feni presi. Ma disi e sori foe san-ede den owroeman moe hori ai tapoe na trow foe sma ofoe na ori foe lezing na ini na kownoekondre-komakandrapresi. Na ini na kownoekondre-komakandrapresi soso pokoe sa pré di de na wan hé presi, soleki de na ini den singiboekoe foe Jehovah Kotoigi. Bromki nanga tra moimoi moe de bescheiden èn redelek, èn disi moe de toe na a fasi fa na gezelschap e waka kon na ini na kownoekondre-komakandrapresi, èn na fasi fa fowtow e meki. — Filipisma 4:5.

18. Soema sa de nanga na trowman nanga trow-oema na a trowdé? (1 Korintesma 5:13; Jakobus 2:1-4)

¹⁸ Ini bijbelten gewoonlek wan „mati foe na bruidegom” èn na bruid „mati” ben de (Johannes 3:29; Psalm 45:14). Disi ooktoe de nototron a geval na wan trow na ini na kownoekondre-komakandrapresi. Ma redelekheid moe de na ini na nomroe foe den sortoe sma disi di de na ini na tori èn ooktoe na ini na tori foe den krosi èn na fasi fa den e tjari densrefi. A no ben sa de wan sani di fiti gi sma di sluit uit ofoe di a sjen libifasi foe den de kontrari bijbel gronprakseri foe den de ini na groepoe foe na trow disi (2 Korintesma 6:14-16). Na presi foe teki sma di abi wan hépresi a grontapoe ofoe di kande kan gi wan diri kado, meki foeroe kristenpaar (èn takiman) e feni en boen foe abi ini na groepoe foe na paar sma di lobi foe dini Jehovah.

19. Na sortoe tra sani prakseri moe poti foe meki na trow foe wan sma noso na hori foe wan lezing na ini na kownoekondre-komakandrapresi de wan prisiri sani?

¹⁹ Efoe na kownoekondre-komakandrapresi e gebroiki, dan sjatoe den kan ferteri foe na trow di o trow ofoe na lezing di o hori. Na a fasi dati na gemeente sa sabi dati na kownoekondre-komakandrapresi sa gebroiki èn dati sma kan de drape efoe den wani. Foe di na kownoekondre-komakandrapresi moro foeroe e gebroiki gi kristen komakandra meki na trow foe sma ofoe na hori foe lezing sa poti tapoe so wan ten dati den komakandra no sa kon kisi problema. Awinsi sortoe ten poti, wan sma e sori lobi èn konsideratie gi ala sma te a de biten. Na ini wan agersitori foe Jezus, di ben go foe wan trow, ’na bruidegom ben tan lati foe kon’, sodati den sma ben kon na ini problema. — Mattéus 25:1-12.

20. Sortoe tra sani foe trowdé e aksi na prakseri foe wi?

²⁰ Na proféti Jesaja ben skrifi foe „na toemsi bigi prisiri di wan bruidegom abi foe en bruid” (Jesaja 62:5). Na bruid e prisiri toe foe en trowdé. Ooktoe foeroe mati di e méne en nanga den e ’abi bigi prisiri’ te wan kristen e trow (Johannes 3:29). Nofotron na prisiri dati e kon na fesi èn e kon moro bigi nanga na prisiri komakandra baka te a trow waka — wan receptie ofoe wan trowosofesa. Wortoe di a jepi meki wan kolokoe sfeer de na tapoe den sortoe komakandra dati, na presi dati problema kon? Meki oenoe go loekoe pikinso.

[Foetoewortoe]

Joe kan memre den punt disi?

◻ Tapoe sortoe kefar na ini a tori foe bigi trowoso kristen sma moe hori ai?

◻ Sortoe sé Jehovah Kotoigi e teki na ini na tori foe trowplechtigheid na lanti ofoe na ini kerki?

◻ Fa den bosroiti foe wan jongoe paar ini na tori foe a trowplechtigheid foe den kan meki kristen prisiri kon foe na sani disi?

◻ Na sortoe trow na kownoekondrekomakandrapresi kan gebroiki?

[Prenki na tapoe bladzijde 4]

Na Hebrew trowman ben tjari en trow-oema kon na ini en oso nanga prisiri èn wartifasi