’Heri Israël sa kisi jepi’
„Na a fasi disi heri Israël sa kisi jepi. Soleki skrifi: ’Na ferloesoeman sa kon foe Sion èn poeroe den ogridoe foe Jakob.’” — ROMEINI 11:26.
1. (a) Sortoe aksi wi e poti foe a tekst foe Romeini 11:26? (b) Foe san-ede na republiek Israël no ben sa tron na Israël „di sa kisi ferloesoe”?
SORTOE naatsi den e bedoel dja? Fa a e kisi jepi? Èn fa a jepi foe en abi krakti na tapoe ala tra naatsi? We, di na ini 1948 a ten ben doro dati den Ingrisiman no ben abi a reti moro foe taki abra Palestina, dati den djoe ben teki wan pisi foe na gebied èn ben opo na republiek Israël. Nanga na wini di den ben wini den Arabis sroedatiman ini na siksi dag oorlog foe 1967, den Israëlsma ben bradi den grens foe na republiek foe den. Ma sensi na opo foe na republiek foe Israël, a ben tan hori ensrefi tanapoe nanga feti sani. Efoe na disiten Israël abi efoe no abi kernbom foe den kibri densrefi leki wan naatsi, ma séker a no e fertrow tapoe wan ’ferloesoeman foe Sion’. Ija, makandra nanga den heiden naatsi na jongoe politiek skin disi de wan pisi foe den Verenigde Naatsi! A de krin dati na republiek disi no de wan theocratie, wan fasi foe tiri wan kondre di na naatsi Israël na ini den dé foe Mozes na ini 1513 bifo G.T. ben kisi.
2. Fa na opo foe na republiek Israèl ben kenki foe na drai go baka foe den djoe na ini den kondre na ini 537 G.T.?
2 Na Israëlman foe Oostenrijk Theodor Herzl, di na ini 1897 ben opo na Zionistis grontapoe organisaatsi, ben taki dati den djoe ben de wan naatsi èn ben tanapoe a tapoe dati gebied ben poti gi den foe opo wan djoe kondre. Ma noti na ini ala ontwikkeling lontoe na republiek Israël e sori wan enkri kroederi nanga na drai go baka foe den djoe na ini 537 bifo G.T., na fosi jari foe na tiriman Cyrus na Bigiwan foe Perzië. Na kon boen baka dati na ini owroeten ben de wan kontroe foe na prakseri foe na Gado foe Israël, Jehovah, di a ben meki bekenti èn di de ini Jesaja 45:1-5 foe feni (2 Kron. 36:22, 23; Ezra 1:1-4). Ma soleki wi ben si, dan na opo foe na republiek Israël no ben waka a pasi foe vréde nanga foeroe bribi na ini na Gado foe na owroe Israël. Disi wi no kan leg uit leki wan kontroe foe den profétitori foe den Hebrew boekoe èn a no de ooktoe wan bewijsi dati na djoe Messias de krosbé.
3. Sortoe loekoe den internationaal bijbelondrosoekoeman ben abi wan dé foe a fasi di „heri Israël” ben sa kisi ferloesoe, ma san ben psa ini a tori disi na ini 1932?
3 Te leki na jari 1929 den memre foe na internationaal vereniging foe bijbelondrosoekoeman ben prakseri dati den djoe na skinfasi ben de te now ete wan pipel foe Gado di a ben teki, dati na ini ongeloof den ben sa drai go baka na Palestina, taki drape den ben sa drai den libi kon na Jezus Kristus leki na pramisi siri foe Abraham èn dati baka dati den ben sa tron na naatsi na grontapoe di ben sa teki fesi èn ben sa dini leki blesi gi na heri libismafamiri. Ma na ini 1932 bewijsi ben gi dati disi ben de wan fowtoe ferstan foe den bijbel profétitori, makandra nanga na profétitori di de na ini Romeini kapitel 11 vers 26 èn di e go foe na jepi foe „heri Israël”. — Loekoe Studie VII foe a boekoe Thy Kingdom Come, di na Watch Tower Bible & Tract Society ben tjari kon na doro ini 1891.
Sortoe sma de na ini „heri Israël”?
4. Sortoe disiten omstandigheden e sori dati na republiek Israël no de na „Israël foe Gado”?
4 Na sani di na djoe skrifiman foe Romeini 11:26 ben kari „heri Israël”, a e kari na ini Galaciasma 6:16 leki „na Israël foe Gado”. Ma efoe den djoe na skinfasi na ini na republiek Israël èn na ala tra presi na grontapoe no de „heri Israël”, soema dan de den memre foe na naatsi disi? Na aksi disi de toemsi prenspari, foe di den disiten djoe na skinfasi no sabi foe sortoe wan foe den twarfoe lo foe Israël den roetoe de. Den abi rabbisma ma no wan priester-wroko, no wan hépriester na grontapoe, no wan tempel na ini Jeruzalem èn no wan altari na ini a foto dati pe akroederi a wet di Gado ben gi den via Mozes, den kan tjari srakti-ofrandi. Ala den sani disi no de moro sensi na ten di den Romeinisma ben pori Jeruzalem na ini 70 G.T. Noti de ooktoe di e sori dati a Gado disi di den e wégri foe kari a nen foe en de ete nanga den leki naatsi. Tokoe Jehovah Gado abi srefi na ini na di foe twenti jarhondro disi wel wan Israël na grontapoe. Soema de foe dat’ede den memre foe dati?
5, 6. Fa Paulus ben sori dati a no ben e anga foe natuurlek, skinfasi omstandigheden efoe wan sma ben sa de foe na „Israël foe Gado”?
5 Na djoe na skinfasi Saulus foe Tarsus, di ben abi na grani foe tron na kristen apostel Paulus e gi wi wan satisfaksi piki. Na ini a ten foe na jari 56 G.T. a ben skrifi wan langa brifi go gi „ala sma di de na Rome leki den lobiwan foe Gado, di den kari foe de santawan” (Romeini 1:1, 7). Na ini a brifi dati Paulus e meki wi kon sabi den sma di Gado e si leki troe Israëlsma — no Israëlsma na skinfasi, ma na jejefasi. Paulus ben skrifi:
6 „A no ala sma di e sproiti komoto foe Israël de troetroe ’Israël’. Ooktoe a no ala den de pikin, foe di den de siri foe Abraham, ma: ’San den sa kari „joe siri”, sa de nanga Izaäk.’ Dati wani taki: den pikin na skinfasi no de troetroe den pikin foe Gado, ma den pikin foe na pramisi den e teri leki na siri. . . . Boiti foe dati Jesaja e bari taki foe Israël: ’Awasi na nomroe foe den manpikin foe Israël ben de leki a santi foe se, a de na fika-pisi di sa kisi ferloesoe. Na Jehovah sa aksi frantwortoe na grontapoe, di a sa tjari es’esi èn boen kon a wan kaba.’ Ooktoe soleki Jesaja granwe ben taki: ’Efoe Jehovah foe den legre no ben libi no wan siri gi wi, dan wi ben sa de leki Sodom èn ben sa tron leki Gomorra.’” — Romeini 9:6-9, 27-29
7, 8. Foe san-ede meki den Israëlsma na skinfasi ben misi foe teki ala den presi di den poti gi den bontaki foe na agersi olijfbon di Romeini kapitel 11 e taki foe en?
7 Bakaten na ini Romeini kapitel 11, Paulus ben teki na naatsi Israël gersi nanga wan olijfbon di abi foe doe nanga „a mati foe Jehovah”, na famiri-edeman Abraham (Jakobus 2:23). Bakadi na „mati” dati ben sori taki a e gi jesi, Gado ben taigi en: „Nanga jepi foe joe siri ala naatsi foe grontapoe sa blesi densrefi, leki wan bakapisi foe di joe be arki mi sten” (Genesis 22:18). Foe di a moro bigi pisi foe den djoe no ben sori taki den ben abi na bribi foe den fosten tata Abraham èn no ben gi jesi na Gado, meki den ben koti den Israëlsma dati di no ben sori biribi, poeroe foe na agersi olijfbon di ben abi en roetoe na ini a Moro Bigi Abraham, Jehovah Gado. Ini a presi foe den den ben poti den heidensma di ben e sori bribi, ofoe den no-djoesma, sodati na agersi olijfbon ben sa abi na heri nomroe foe taki. Den wan di ben teki na presi foe den Israëlsma na skinfasi, ben tron „siri foe Abraham” soleki proselietsma, ofoe Israëlsma di ben tron disi tapoe na gron foe a adoptie ofoe a teki foe den foe na sé foe Gado, a Moro Bigi Abraham (Gal. 3:26-29). Den ben tron Israëlsma na jejefasi, dati wani taki, jeje Israëlsma. Foe dat’ede Paulus e go moro fara nanga den wortoe:
8 „Bika, oen brada foe di oen no ben sa sori taki oen sabi ala sani, meki mi no wani libi oenoe sondro foe oen de nanga sabi foe na kibritori disi: wan gedeeltelek kon tranga foe ati ben kon abra Israël te leki na volheid foe den heiden ben kon na ini sé, èn na so fasi heri Israël sa tan na libi, soleki ben skrifi: Na Ferloesoeman sa kon foe Sion, en sa poeroe godlowsfasi foe Jakob. Èn disi na mi ferbontoe nanga den, te mi e teki den sondoe foe den poeroe.” — Rom. 11:25-27, Njoen Vertaling foe na Nederlands Bijbelgenootschap.
9. Fa na republiek Israël tanapoe nanga na Mindriman foe na njoen ferbontoe, aladi den „faste ten foe den naatsi” ben kon na wan kaba na ini 1914?
9 Wi e si dati Paulus no e taki, „te leki den ten foe den heiden ben kon reti”. Na presi foe dati, a e taki, „te leki na volheid foe den heiden kon na inisé”, noso „te leki na heri nomroe foe den sma foe den naatsi ben kon na inisé”. Den ten foe den heiden, noso „den faste ten foe den naatsi”, ben kon na wan kaba na ini 1914, na jari pe na Fosi Grontapoefeti ben kon (Luk. 21:24; Statenvertaling). Ma tokoe ete, baka sébitenti jari na republiek Israël nanga den djoe na skinfasi na alape na grontapoe no e taki dati den ben teki poti na ini na njoen ferbontoe, di soleki Jehovah ben taki, a ben sa sroto nanga na oso foe Israël (Jeremia 31:31-34). Moro leki tin-na-négi-hondro jari psa kaba, tapoe 14 Nisan 33 G.T. tapoe a neti foe na djoe Pascha, dan na toekomstige Mindriman foe na ferbontoe dati ben pristeri en getrow apostel wan beker win èn a ben taki nanga dati: „Na beker disi wani taki na njoen ferbontoe ini na krakti foe mi broedoe di sa trowe foe na boen foe oen ede” (Luk. 22:20). Ma baka ala a ten dati na republiek Israël no e erken Jezus Kristus leki na Mindriman foe na ferbontoe di den taki a fesi foe en na ini na profétitori foe Jeremia.
10. O bigi na nomroe foe djoe bribiman na skinfasi ben de di ben go tron wan pisi foe na „siri” foe Abraham, sodati na heri libismafamiri ben sa kan kisi blesi, èn san ben de na bakapisi foe dati?
10 Leki fa den Israëlisma e taki, dan „na ferloesoeman” no ben kon ete foe Sion (Jes. 59:20; Rom. 11:26). A tapoe na pinksterdé ini 33 G.T. wan fika-pisi foe na owroe Israël ben teki Jezus wel leki na Messias. Na fika-pisi dati na a ten dati ben bigin foe kisi na pramisi santa jeje èn foe sensi a ten dati ben teki poti na ini na njoen ferbontoe foe di den ben taki foe en. Tokoe wan fika-pisi no de nofo foe den meki na jeje „bruid” foe Kristus di ben o de ala nanga 144.000 memre, doro na marki (Openb. 7:1-8; 14:1-3; 21:9). Soboen, nofo Israëlsma na skinfasi no ben de di ben go de wan pisi foe na agersi olijfbon di ben abi en roetoe ini na moro bigi Abraham, di ben pramisi dati a „siri” foe na famiri-edeman Abraham ben sa tjari blesi kon gi ala famiri foe grontapoe, gi djoe nanga no djoe.
11, 12. Sortoe Israël den bedoel nanga „heri Israël” èn fa wi kan bewijsi disi?
11 Ma fa „heri Israël” ben sa kisi „ferloesoe” dan nanga jepi foe na pramisi „ferloesoeman”? Loekoe pikinso dati Paulus ben skrifi en brifi gi den Romeinisma ini na jari 56 G.T. Baka di a ben skrifi den Galaciasma (sowan 50-52 G.T.) Romeini 11:25-27 soboen ben skrifi baka di a ben taki na ini Galaciasma 6:16 foe „na Israël foe Gado”. Na dati na a Israël di nanga jepi foe Jezus Kristus, no nanga jepi foe na proféti Mozes, den ben sroto na njoen ferbontoe nanga den. Jezus ben de na Mindriman gi wan kristen Israël, wan jeje Israël, di ben gebore leki naatsi tapoe na Pinksterdé ini 33 G.T. di na santa jeje ben kanti na tapoe den djoe di Jezus Kristus ben teki leki Mindriman.
12 Na djoe apostel Petrus ben de na a okasi dati. Bakaten a ben skrifi gi den sma di „den ben ferkiese akroederi na sabi foe Gado a fesi” èn ben taki: „Oenoe na wan geslagti di Gado ben teki poeroe, wan kownoe priesterwroko, wan santa naatsi, wan pipel . . . wan dé oen no ben de wan pipel, ma now, oen de na pipel foe Gado” (1 Petr. 1:1, 2; 2:9, 10). Nanga dati a tori e kon kisi krakti dati na Israël di „helemaal sa kisi ferloesoe” no de na disiten republiek di den Israëlisma ofoe den Israelsma na skinfasi di panja abra na heri grontapoe den e bedoel. „Na heri Israël” di ben sa kisi ferloesoe, ben de na jeje Israël di ben kon gebore tapoe 33 G.T. foe di a ben kon njoen gebore nanga jeje foe Gado. Na a Israël disi foe Gado na pramisi ferloesoeman ben sa kon.
13. (a) Fa èn oten na pramisi Ferloesoeman ben komoto kon foe Sion? (b) Soema ben go tron te foe kaba wan pisi foe „na Israël foe Gado”?
13 Na Ferloesoeman disi ben kon foe troe na tapoe na Pinksterdé ini 33. G.T. Fa dan? Foe di Jehovah santa jeje ben kanti tapoe sowan 120 discipel di ben kon makandra ini na nationaal foto Jeruzalem na ini wan tapsé sodro. Na so fasi den discipel dati ben tron a fosi pisi foe na „Israël foe Gado”; den ben kon njoen gebore foe kisi jeje libi, èn den abi na howpoe na tapoe tégo libi na ini wan jeje kondre na ini hemel. Te foe kaba dan den no-djoe sma di ben poti bribi na ini na pramisi Ferloesoeman, kon tron wan pisi foe na jeje Israël. Oten disi ben psa? Na a ten di den Samaritaansma ben drai den libi — èn bakaten foe sma di ben de krinkrin heiden, di na Romein edeman foe Hondro Cornelius nanga en osofamiri nanga mati ben drai den libi ini 36 G.T. Jehovah, na Moro Bigi Abraham, ben tjari ala den no-djoe bribiman disi kon na ini wánfasi nanga en wán enkri gebore Manpikin Jezus Kristus na agersi bonroetoe foe na agersi olijfbon foe di a ben teki den. Na a fasi disi den no-djoe disi ben kan teki na presi foe den djoe di no ben sori bribi èn di den ben broko poeroe foe na olijfbon dati nanga 144.000 „bontaki”. — Tori. kap. 10; 15:14-21.
Na ènter foe bontaki doro en marki now
14. San wi kan bewijsi boen now foe na tori foe „heri Israël”?
14 Na toemsi prenspari sani disi di psa foe 36 G.T. de moro leki 1948 jari now na wi baka. A de foe dat’ede wan logis sani dati a wroko di na Almakti Gado e doe, èn di de na ini na ferloesoe foe na „heri Israël”, e tjari kon na wan toemsi bigi fasi na en marki. Na pisiten disi ben de moro langa leki na djoe pisiten, di Gado spesroetoe ben sori boen-ati gi na pipel disi èn di ben waka foe 1513 bifo G.T., ini a ten foe Mozes, te go doro 36 G.T., di foe na fositron no-djoe sma di no ben besnij, ofoe heidensma ben drai den libi. A no de foe taki dati a moro langa pisiten disi ben gi nofo ten foe ferloesoe „heri Israël”, dati wani taki, foe gi nofo memre na en. Foe a tori disi wi abi now boen bewijsi.
15. Fa den „wan di den ben teki poeroe” ben sa tjari kon makandra soleki a profétitori foe Jezus foe na „marki” foe „na bosroiti foe na seti foe sani” e taki?
15 Jezus Kristus ben sori a tapoe a ten dati di a ben gi wan profétitori di ben e go foe en „denoja” di no ben sa de foe si nanga ai leki wan jeje mekisani èn „foe na bosroiti foe na seti foe sani” èn a ben taki: „Dan na marki foe na Manpikin foe libisma sa kon de foe si ini hemel, èn dan ala lo foe grontapoe sa naki densrefi te den kré, èn den sa si na Manpikin foe libisma tapoe den wolkoe foe hemel nanga krakti nanga glori èn a sa seni den engel go nanga tranga trompetibabari, èn den sa tjari den sma di a ben teki poeroe kon makandra foe den fo oekoe foe grontapoe, foe na wan oekoe foe den hemel te go na a tra oekoe foe en” (Matt. 24:3, 30, 31). Oten na „denoja” dati foe Kristus ben bigin?
16, 17. Oten na „denoja” foe Jezus Kristus bigin, èn sortoe spesroetoe sani ben psa baka di den „wan di den ben teki poeroe” ben tjari kon a wan?
16 Na „denoja” foe Jezus ben bigin na a kaba foe den „sébi ten” foe den heiden ini na bigi dréten foe 1914 (Dan. 4:23-36) Ne na glori Jezus Kristus ben poti en prakseri tapoe na grontapoe di ben de ini feti èn ben go sori en makti a tapoe. Den troe tori foe a historia e bewijsi, dati na kownoe Jezus Kristus di ben e tiri ben seni ini na jari 1919 baka na feti en hemel engel go foe tjari „den sma di a ben teki poeroe” kon makandra foe ala pisi foe a grontapoe. Na ondro na loekoe foe na Watch Tower Bible and Tract Society den ben tjari kon makandra ini wan grontapoe wánfasi foe bondroe foe sensi a ten dati den krakti foe den kon makandra ini na doe foe na proféti komando foe Jezus di skrifi ini Mattéus 24:14: „Na boen njoensoe disi foe na kownoekondre sa préki tapoe na heri grontapoe pe libisma e libi leki wan kotoigi, èn dan na kaba sa kon.”
17 Tapoe na algemeen congres foe a pipel foe Gado di ben hori na ini 1931, den ben teki nanga wán mofo na njoen nen, sodati sma ben sa kan sabi den ini a ten di e kon leki Jehovah Kotoigi. Na boekoe Jehovah, di na Genootschap ben druk ben kon a baka disi, èn ini na boekoe disi njoen prakseri ben poti na tapoe na nen foe Gado di den ben wani tjari sote. Nanga foeroe tangi na ati Jehovah Kotoigi ben teki na njoen boekoe dati na ini 1934, na jari pe nazi-tiriman Adolf Hitler ben bigin doe ala san a man foe wai kotoigi poeroe na ini centraal Europa.
18. Foe sortoe sani di psa ben kon na krin dati na a retiten, na heri nomroe „foe den wan di den ben teki poeroe” ben tjari kon na wan?
18 Foe den sani di psa bakaten, a kon ben kon na krin dati na tjari makandra foe den dopoe „sma di Gado ben teki poeroe” èn di ben gi densrefi abra foe kisi a hemel kownoekondre ben doro en marki. Fa so? Foe di ini a jari 1935 na prakseri nanga den moeiti foe den „sma dati di Gado ben teki poeroe” ben poti tapoe na „bigi ipi” foe na visioen foe Openbaring 7:9-17. Soema ben sa kon de na ini na „bigi ipi” disi? Sma di ben sa gi grani nanga glori na Jehovah Gado nanga Jezus Kristus èn di ben sa kisi na paiman foe tégo libi tapoe wan paradijs grontapoe, di den ben sa go na ini baka te den ben psa libilibi a moro bigi „benawtoe” foe na heri libisma historia. Den sma disi di abi na boenati foe gado, sma ben kon sabi leki den grontapoe „tra skapoe” foe na Toemsi Boen Herder, Jezus Kristus. Leki wan bigi prisiri gi den, a ben de so, dati den ben sa go de wan ipi nanga na fika pisi foe „heri Israël” di ben de a libi ete na grontapoe. — Joh. 10:16.
Fa na piki foe joe ben sa de?
◻ Foe san-ede meki na republiek Israël no de na Israël di Romeini 11:26 e taki foe en?
◻ Foe san-ede meki den Israëlsma na skinfasi ben misi foe teki ala presi di ben poti gi den bontaki foe na agersi olijfbon?
◻ Soema ben de na pramisi Ferloesoeman, èn oten èn fa a ben komoto kon foe Sion?
◻ Soema de wan pisi foe „heri Israël”, èn oten na heri nomroe foe den ben tjari kon makandra?
[Prenspari pisi na tapoe bladzijde 4]
Ini 1935 „den tra skapoe” di ben kon sroiti densrefi na a fika pisi foe „heri Israël” den ben kon si den krin leki „na bigi ipi”
[Prenki na tapoe bladzijde 3]
San na „beker” ben wani taki, di Jezus ben seti na Avondmaal foe Masra?
[Prenki na tapoe bladzijde 4]
Congresfisitiman tapoe na Washington congres (1935) di no ben man foe feni presi moro ini na zaal