„Heri Israël” e kisi ferloesoe foe blesi na heri libismafamiri
1. Foe san-ede meki na republiek Israël no mag ferwakti dati a de a wrokosani foe Gado foe blesi na heri libismafamiri, foe di a de wan memre foe den Verenigde Naatsi?
JEHOVAH ben pramisi Abraham dati ala famiri foe grontapoe ben sa kisi blesi nanga jepi foe na siri foe na getrow famiri-edeman dati (Gen. 12:3; 22:17, 18). Ma de pramisi dati di ben gi ini na di foe twenti jarhondro bifo wi G.T. no ben wani taki dati Gado sa blesi den Verenigde Naatsi, na opvolger foe na Folkoebontoe di no de moro. Na disiten republiek Israël foe dat’ede no mag ferwakti dati tapoe na gron foe a de di den de wan memre foe den Verenigde Naatsi, dati a Gado foe na Israël foe owroeten sa gebroiki den foe blesi na heri libismafamiri. Den V.N de foe troe wan ston a pasi gi na kownoekondre foe Gado ini anoe foe na „siri” foe Abraham, èn a de foe dat’ede ooktoe a disiten „tegoe sani di e tjari pori kon” (Matt. 24:15). Nono, den V.N. no de wan blesi, awasi den kerki leriman foe na kristenheid nanga den di foe a djoebribi e begi na blesi foe hemel gi na organisaatsi dati. A de foe troe „na prenki foe na wilde meti”, na politiek nanga bisnis organisaatsi di wi kan si nanga ai foe na „gado foe na seti foe sani disi”. Den V.N. foe dat’ede djonsro sa go ini pori makandra nanga na organisaatsi dati di gersi wan meti. — Openb. 13:1-18; 2 Kor. 4:4.
2. Fa na fika-pisi foe „heri Israël” e handri krinkrin trafasi leki na republiek Israël?
2 Ma ini a heri ten dati na republiek Israël e feti foe tan a libi tégen tra memre kondre foe den V.N. Ma na fika-pisi foe „heri Israël” no e waka ini disi baka na republiek Israël (Rom. 11:26). Na fika pisi dati no e anbegi „na prenki foe na wilde meti”. Na presi foe dati den jeje Israëlsma e poeroe na bere foe na V.N. kon na doro leki na organisaatsi di a de na ini a ai foe Gado — wan falsi sani di e tjari sma go so fara foe fertrow tapoe na V.N. na presi foe fertrow na tapoe Jehovah Kownoekondre ini anoe foe Jezus Kristus. Foe na réde disi meki na fika pisi foe „heri Israël” e tan wan pisi foe Jehovah universele organisaatsi. Na fikapisi foe na jeje ’siri foe Abraham’ e bewijsi nownow kaba foe de wan blesi gi ala naatsi nanga famiri gi na libismafamiri. Den proféti pramisi foe Jehovah soboen sori dati den de troe.
3, 4. San Jehovah ben meki Jesaja ben skrifi na ondro krakti foe en jeje foe „ala naatsi” sowan 2700 jari bifo 1914?
3 Moro leki 2700 jari psa kaba Jehovah Gado ben sori tapoe na pisten di ben o kon ete, pe isri fetiwagi nanga opolani foe na fositron ben sa gebroiki na ini oorlog, èn pe sma ben sa poti den prakseri a tapoe na loop graaf-oorlog, aladi sroedati ben sa moe weri gasmasker èn den ben moe o poti na ini a feti kanoe di bo soetoe boen fara go soleki na „Deki Bertha”, na ini wan totale oorlog. Ija, sowan 27 jarhondro bifo na Fosi Grontapoefeti Jehovah Gado ben meki na proféti Jesaja ben skrifi na ondro na krakti foe en santa jeje foe wan heri tra sani di ben sa psa na ini a ten dati.
4 „A sani di Jesaja, na manpikin foe Amoz, ben si ini a tori foe Juda nanga Jeruzalem: Èn a moe psa na ini na laatste foe den dé dati na bergi foe na oso foe Jehovah ben sa poti stéfi na tapoesé foe den ede foe den bergi, èn séker a sa poti hé tapoe den pikin bergi; èn na drape ala naatsi sa moe lon go. Èn foeroe pipel séker sa go èn taki: ’Oen kon, èn meki oen go na a bergi foe Jehovah, na a oso foe a Gado foe Jakob [Israël]; èn en sa leri wi foe en pasi, èn wi sa waka séker tapoe en pasi.’ Bika foe Sion na wet sa komoto kon na doro èn a wortoe foe Jehovah foe Jeruzalem, èn séker a sa hori kroetoe na mindri den naatsi èn seti den afersi reti na mindri foeroe folkoe. Èn den sa moe naki den feti-owroe tron ploegoe èn den lansri tron kron-nefi. Naatsi no sa opo owroe tége naatsi, èn den no sa leri na feti moro. O oen soema foe na oso foe Jakob, oen kon èn meki wi waka ini na leti foe Jehovah.” — Jesaja 2:1-5.
5. Foe sortoe sé wi moe loekoe a profétitori foe Jesaja di e go foe „na oso foe Jehovah”, te wi loekoe na fasi fa na republiek Israël e tjari ensrefi?
5 Na ini a ten disi wi no e si na wondroe profétitori disi e kon troe na ini Jeruzalem, na mamafoto foe na republiek Israél di didon na ini na Midden-Oosten. Na tapoe san den ben kari wan dé na bergi Sion, wi no e si wan tempel foe Jehovah, ma moro foeroe na mohammedaans Rotskoepel èn wan moskee di de gi Allah. Toeristsma foe foeroe naatsi e go fisiti den santa presi disi no foe go anbegi drape, ma soso foe si na moi islamitis bowwroko disi. Soboen, a no wan sani di wan sma no kan taki dati a no de so dati a profétitori foe Jesaja no e kon troe srefsrefi tapoe a modern kondre foe Israël na ini „na laatste pisi foe den dé” foe na siki seti foe sani disi di de foe dede. Na Israël disi no de a wan ini na kontroe foe Jehovah pramisi na Abraham foe de na ’heri Israël’ di sa kisi ferloesoe foe blesi na heri libismafamiri. Den proféti wortoe „na bergi foe na oso foe Jehovah” foe datlede wi moe si foe wan jeje sé ini a tori foe na „Israël foe Gado”. — Gal. 6:16.
6. (a) Fa Petrus ben sori sortoe naatsi „na Israël foe Gado” de? (b) Di sortoe sani ben psa na ini grontapoe meki „ala naatsi” ben bigin kon go na „oso foe Jehovah”?
6 Na „Israël foe Gado” de wan jeje naatsi, soleki na apostel Petrus ben sori ini en brifi: „Oenoe de ’wan geslagti di den ben teki poeroe, wan kownoepriesterwroko, wan santa naatsi, wan pipel di de foe wan spesroetoe goedoe, sodati ala presi oen ben sa meki bekenti den moi sani’ foe na sma di ben kari oenoe poeroe foe oenoe kon ini en wondroe leti” (1 Petr. 2:9). Na disiten fika-pisi foe na santa naatsi disi e agersi na „oso foe Jehovah” èn de na kern foe na gemeenschap foe Jehovah Kotoigi ini a ten disi. Na ini na di foe 22 jari foe „na laaste foe den dé” — di na lomsoe katholiek fascisme nanga na nazisme foe Hitler ben seki Europa — dan „ala naatsi” ben bigin lon go na a jeje „oso foe Jehovah” di te joe loekoe en boen Jehovah Kotoigi ben poti hé tapoe na ede foe den bergi.
7. Foe san-ede meki a no ben de wan afersi di no ben wani taki noti di den naatsi ben lon go „na na oso foe Jehovah”?
7 Na bigin disi, di ben wani taki foeroe, ben abi leki marki wan algemeen congres di ben hori na ini na baka-jari foe 1935 ini Washington D.C., na mamafoto foe den Verenigde Staten foe Amerkankondre. Na ini wan toemsi aparti lezing di ben hori na tapoe na congres, wan memre foe „jeje Israël” J.F. Rutherford, na presidenti foe na Watch Tower Bible and Tract Society ini a ten dati, ben tjari wan fowtoe prakseri di ben de a mindri den internationaal bijbelondrosoekoeman kon reti. A ben tjari kon na krin dati na „bigi ipi”, di ben sa tjari kon makandra foe ala pisi foe den sma foe na grontapoe èn di ben sa anbegi na ini en jeje tempel (foe di na stoffelek tempel na Jeruzalem ben pori ini 70 G.T. nanga anoe foe den Romeinsma), ben sa de wan grontapoe klasse (Openb. 7:9-17). A klasse disi ben abi na ferwakti foe psa libilibi Armageddon èn go na ini na njoen seti foe sani di sa de na ala presi na grontapoe na ini na ten foe na doesoen jari tiri foe Jezus Kristus di e tiri sensi 1914 ini hemel.
8. (a) Sortoe ferwondro sani ben psa na ini 1935 tapoe na congres na ini Washington, D.C.? (b) Foe san-ede wi kan taki dati „ala naatsi” e lon go na a „oso foe Jehovah”?
8 Na reactie tapoe na geopenbaarde leti disi ben de wan aparti sani. Na a ten foe na aparti komakandra disi 840 congresfisitiman ben teki dopoe leki na symbool foe na gi di den gi densrefi abra na Jehovah Gado via Jezus Kristus. Omeni naatsi di ben de ini a groepoe dati, den no ben loekoe, ma na howpoe di den ben abi na den fesi, ben de foe kan libi ini wan grontapoe paradijs. Now baka féfi tenti jari, dan na nomroe foe Kotoigi foe Jehovah ben psa krinkrin na nomroe foe „heri Israël”. Den e wroko na ini 205 kondre foe na heri grontapoe. Foe taki en moro bradi dan „ala naatsi” e lon foe dat’ede go na Jehovah oso foe anbegi di de a hé.
Sortoe sma Jehovah Kotoigi de?
9. Na baka sortoe libifasi Jehovah Kotoigi ben waka leki wan kontroe foe Jesaja 2:4, kontrari na fasi foe na republiek foe Israël?
9 Te wi e loekoe foe Jehovah Kotoigi na ini a ten disi tége na achtergrond foe na republiek Israël, dan sortoe sma den de dan? Den de net leki den onderdaan foe na republiek dati nanga wapen foe kan feti wan oorlog na skinfasi tege den sma di wani foe figi den poeroe? Nono! Na presi foe dati den de joisti na sortoe foe sma di Jesaja 2:4 ben taki foe den na fesi. Foe di den e poti na anbegi foe Jehovah na ini na jeje oso foe Gado na hé, meki na agersifasi den ben naki den feti-owroe foe den tron ploegoe èn den lansri tron kronnefi. Foe di den e waka na baka na Tiriman foe den, Jezus Kristus, meki den e fertrow tapoe Jehovah Gado leki a Sma di e kibri den. Aladi den komoto foe bijna ibri naatsi foe grontapoe, tokoe den no ben meki nationalistis féjantifasi basi den èn ooktoe den no e go moksi densrefi na ini na politiek foe grontapoe, Den stop letterlek foe leri na koni foe feti na skinfasi. Den e hori wan neutraal standpunt te trobi de foe a grontapoe èn foe politiek afersi. Ija, den no e gebroiki wapen foe verdedig densrefi ofoe foe go val aan moro. Den e bribi san Jezus Kristus ben taki — dati en kownoekondre „no de wan pisi foe na grontapoe disi”. Noso en discipel ben sa feti nanga wapen foe na moro geavanceerde sroedati type. — Joh. 18:36.
10. (a) Soso ini sortoe feti Jehovah Kotoigi de na ini? (b) Na sortoe gebod den Kotoigi e hori densrefi, èn fa den e doe dati?
10 Na presi foe dati, Jehovah Kotoigi de soso na ini wan jejefeti. Na feti foe den de tegen den ogri jeje ini den hemel kontren. Den wapen foe den no de a skinfasi soboen; joe no kan trowe broedoe nanga den (Ef. 6:10-18). Na feti foe den no de tegen na libismafamiri èn den no e feti kwetkweti nanga den jeje brada foe den na inisé foe Jehovah organisaatsi. Den e hori densrefi na a komando foe Jezus Kristus foe lobi den jeje brada foe den joisti soleki en ben lobi wi èn pe a ben go so fara dati a ben gi en libi leki libisma abra gi en discipel. Disi de ini akroederi nanga na njoen ’gebod’ di Jezus ben gi en bakaman, dati den ben moe lobi makandra net soleki en ben lobi den. — Joh. 13:34
11. Sortoe wet e kon troe nanga na lobi di Jehovah Kotoigi e sori?
11 Na sortoe foe lobi di e meki na wet kontroe, di kon nanga jepi foe Mozes, e gi Jehovah Kotoigi rede foe doe sani. Sowan sortoe lobi no e doe noiti wan sma ogri èn de moro leki soso a jepi foe mofinawan noso a gi foe presenti. Ini na bijbel den Hebrew nanga Griki wortoe foe „lobi” wani taki foeroe moro leki soso liefdadigheid. Loekoe voetnoot na 1 Korintesma 13 na ini na verklaring foe na Njoen Testament foe na anoe foe Matthew Henry.
Foe blesi, no foe floekoe
12. A ben de fanowdoe dati „heri Israël” ben sa de alamala nanga a heri nomroe ini hemel bifo na blesi foe „ala naatsi” ben kan bigin?
12 Foe den sani di wi taki na fesi wi kan si taki a no de fanowdoe dati na fika-pisi foe „heri Israël” go na ini hemel foe go moksi densrefi na Jezus Kristus, na Moro Prenspariwan foe na „siri” foe na Moro Bigi Abraham, Jehovah Gado, bifo na blesi foe ala famiri nanga naatsi foe na grontapoe kan bigin nanga jepi foe na „siri” dati. Memre foe den famiri nanga naatsi foe na grontapoe e kisi now kaba sowan 50 jari kaba blesi di komoto foe na pramisi „siri” foe Abraham. Moro leki toe nanga afoe miljoen „tra skapoe” tjari kon makandra kaba foe de „wán ipi” nanga na fikapisi foe den bakaman foe na toemsi boen Herder di kon njoen gebore nanga jeje èn di gersi skapoe èn di abi na hemel howpoe. — Joh. 10:16.
13. Sortoe marki ini a tori foe den „tra skapoe” Jezus ben abi na prakseri di a ben kon na a tempel, èn fa a fasi foe en sa de nanga den djonsro tapoe wan fasi di psa marki?
13 Den blesi „tra skapoe” abi na boenede foe abi na howpoe foe wantron wantron na a bigin foe kisi na paradijs kaba di sa kon a grontapoe baka na ini na ten foe a doesoen jari tiri foe Jezus Kristus, na kownoe. Di Jezus Kristus ben kon soboen na a jeje tempel leki Jehovah „boskopoeman foe na ferbontoe” foe hori kroetoe, a ben kon nanga na prakseri foe blesi den „tra skapoe”, no foe floekoe den (Maleachi 3:1-3). Na blesi disi sa doro en hémarki foe di a sa kibri den èn meki den sa go libilibi na ini na Njoen Ordening na a ten foe na „feti foe a bigi dé foe Gado na Almaktiwan” di e kon krosbé pe a sa opo feti nanga en grontapoe féjanti di konmakandra na „Har-mágedon” (Openb. 16:14, 16). Na owroeten na foto Megiddo ben de na presi pe Jehovah Gado ben wini kownoe (Joz. 17:11; Zach. 12:11). A tapoe na agersi presi Har-mágedon, Gado sa abi a moro bigi wini foe en, leki wan tégo grani gi en. Na drape en glori Manpikin Jezus Kristus, sa de en Sroedati-edeman. — Openb. 19:11-21.
14. (a) Foe a ferloesoe foe soema den „tra skapoe” kan prisiri nanga reti? (b) O bigi na nomroe foe „tra skapoe” de kaba?
14 Den „tra skapoe” na a ten dati foe na kefarlek sori foe makti nanga glori foe Gado sa kisi kibri. Fa ala sma di sa loekoe èn tan na libi foe na beslissende stré dati sa bréti, dati na fika-pisi foe „heri Israël” ben kisi „ferloesoe” na ini a pisiten foe vréde a mindri na Fosi èn na di foe foe Grontapoe feti. Sensi na pikin dréten foe 1935 na „bigi ipi”, di na nomroe foe den no bepaal, ben poti go moksi nanga na Israël disi di kisi ferloesoe. Leki „tra skapoe” foe na Toemsi Boen Herder. Jezus Kristus, na nomroe foe den e doro now dri miljoen. Den „komoto foe ala naatsi nanga lo nanga pipel nanga tongo” foe na libismafamiri, leki wan kontroe foe na pramisi di Jehovah ben gi na a sma di e prenki en, namkoe en „mati” Abraham (Openb. 7:9-17; Jak. 2:23). Èn a tjari kon makandra foe den „tra skapoe” disi no psa ete. O bigi a nomroe foe den te foe aba sa de te na Toemsi Boen Herder sa tjari a konmakandre foe den kon na wan kaba bifo na pori bigin foe Babylon a Bigiwan nanga Gado feti tégen en politiek fréri na Armageddon, wi no sabi. — Openb. 17:1-18:24.
15. Foe sortoe heri blesi a de a bigin dati den „tra skapoe” de makandra nanga na fika-pisi foe „heri Israël” ini „wán ipi”?
15 Dati den „tra skapoe” sa de nanga na fika-pisi foe „heri Israël” ini „wán ipi” na ondro na Toemsi Boen Herder, Jezus Kristus, na moro prenspariwan foe na „siri” foe Abraham, ben sori kaba a bigin foe wan sani. Foe sortoe sani? Foe na heri blesi di „heri Israël” sa kanti go ete tapoe den „tra skapoe” dati na ini a ten foe na doesoen jari rigeri foe Jezus Kristus, di den sa ondrofeni, tangi foe na kibri di Gado sa kibri den.
16. Foe san-ede meki den „tra skapoe” de faste ini den bosroiti foe tan dini Jehovah na a sé foe na fika-pisi foe „heri Israël”?
16 Leki wan kontroe foe Openb. 7:14-17 dan den „tra skapoe” ben „wasi den langa krosi kaba èn ben meki den kon weti na ini na broedoe foe na Lam”. Foe dat’ede meki den e kisi pasi foe Gado, foe taki en na jejefasi, „foe anbegi dé nanga neti na ini en tempel”. Ija, na „Lam foe Gado”, Jezus Kristus. e gi den jeje njanjan, sodati den „no abi angri moro” (Johannes 1:29). Boiti foe dati, a getrow Herder foe den e tjari den go na „peti foe watra foe libi” — libi tapoe wan paradijs grontapoe. Nanga tangi na ati foe ala den blesi di den ben kisi kaba via na fika pisi foe „heri Israël”, meki dati na „bigi ipi” sa tan dini Jehovah na a sé foe na getrow fikapisi disi. Den „tra skapoe” disi sa doe disi ini na ’wán ipi’ ondro na ’wan Herder’, ini na belang foe na kownoekondre foe Gado di Jezus Kristus e rigeri na ini. Den teki na faste bosroiti foe doe disi te leki ala féjanti foe na kownoekondre ben figi poeroe foe na fesi foe grontapoe, na „foetoebangi” foe Gado. — Jes. 66:1; Matt. 5:34, 35; Tori. 7:49.
Fa joe ben sa piki?
◻ Foe san-ede meki na republiek Israël no de moro na sani nanga san Jehovah sa blesi na heri libismafamiri?
◻ Foe san-ede wi kan taki dati „ala naatsi” e lon go now na „a oso foe Jehovah”?
◻ Fa Jehovah Kotoigi ben meki Jesaja 2:4 kon troe?
◻ Sortoe fasi Jezus Kristus e sori den „tra skapoe” èn fa na pasi disi heri esi sa sori tapoe wan wánfasi di psa marki?
◻ Sortoe blesi dorodoro ben abi en bigin foe di den „tra skapoe” de makandra nanga na fika-pisi foe „heri Israël” ini „wán ipi”?
[Prenki na tapoe bladzijde 6]
„Nanga jepi foe joe siri ala naatsi foe grontapoe sa blesi densrefi foe di joe ben arki na mi sten.” — GENESIS 22:18.
[Prenki na tapoe bladzijde 8]
Jehovah Kotoigi abi lobi mindri densrefi èn den ben naki den ’feti-owroe tron ploegoe’