San na gebortoe foe na naatsi ben wani taki gi a libisma-famiri?
1, 2. (a) Jehovah e piki direct den aksi di ensrefi ben aksi ini Jesaja 66:9? (b) Akroederi Jesaja 66:10-14 sortoe kari a ben gi?
NA PRESI dati Gado piki en égi aksi, di skrifi ini Jesaja 66:9, nanga No!, a ben meki Jesaja taki den wortoe disi foe victori:
2 „Prisiri nanga Jeruzalem èn bréti nanga en, oen alamala di lobi en. De toemsi prisiri nanga en, oen alamala di e tan sari foe en; bikasi oen sa soigi èn oen bere séker sa foeroe foe na borsoe foe na trowstoe dorodoro foe en; bikasi oen sa dringi pikinso-pikinso èn ondrofeni switi foe na bobimofo foe en glori. Bikasi disi Jehovah ben taki: ’Loekoe mi e meki vréde lon kon na en neleki wan liba èn na glori foe den naatsi neleki wan kriki di foeroe èn e fadon foe tapoe go na ondro, èn séker oen sa soigi. Na a sébere den sa tjari oen èn tapoe den kindi den sa boboi oen. Soleki wan man di en mama e tan trowstoe, na so misrefi sa trowstoe oenoe; èn ini a tori foe Jeruzalem oen sa kisi trowstoe. Èn séker oen sa si en èn oen ati séker sa prisiri toemsi, èn oen bonjo, den dati sa gro neleki na safoe grasi. Èn na anoe foe Jehovah séker sa meki bekenti na en knekti, ma a sa lési srafoe troetroe gi en feanti na publiki.’” — Jes. 66:10-14.
3. Nanga soema den djoe katiboman ben teki gersi soboen, fa den sa prisiri, èn soema anoe den ben sa si ini na afersi disi?
3 Den sma di ben kon fri foe a katibo, na so fasi ben gersi nanga na njoen gebore bébi di e njan njanjan. Gi den djoe katiboman na den liba foe Babylon den wortoe leki soigi na a borsoe, èn dringi pikinso-pikinso na a bobimofo ben wani taki dati wan Jerusalem ben sa bow njoen baka tapoe na presi foe na mamafoto di ben pori; sosrefi toe dati a ben sa tron mama foe foeroe borgroe èn sma di ben sa libi drape èn foe foeroe tra borgroe ini en kondre. (Teki gersi Lukas 13:34.) Soleki fa a ben de na a ten dati na gwenti gi mama ini na Mindri-Ostoe, a so na Jeruzalem di ben bow njoen baka ben sa meki en pikin sidon nanga panja-foetoe na en kroektoe- ofoe retisé djonkoe foe tjari den; èn efoe a ben sidon, a ben sa boboi den tapoe en foetoe. Den djoe ini a ten dati, ini a di foe siksi eeuw bifo G.T, di ben lobi Jehovah organisaatsi di joe kan si nanga ai, ben sa prisiri foe dati, èn den no ben sa kragi moro langa, dati ini den 70 jari foe den katibo ini wan heiden kondre nowan Jeruzalem no ben de leki mamafoto foe Jehovah pipel di a ben verkisi. A prisiri foe den ben de leki ben skrifi ini Psalm 126, san ben de tra fasi leki a sari di e kon na fesi ini Psalm 137. Jehovah dienst-knekti ben si en anoe ini a ferloesoe foe den.
4, 5. (a) San na fikapisi ben doe tapoe a sori foe na anoe foe Gado foe na boen foe den, èn san den ben kon froestan moro leki oiti wan ten? (b) Gi sortoe tra kari na ten ben doro? (c) Fa Jesaja e skrifi foe disi?
4 Disi no ben de moro pikinso na tori nanga den memre foe na jeje „naatsi” di ben gebore ini 1919 G.T. Baka na froewondroe ferloesoe foe den foe den wet di ben skotoe den ini na ten foe na Fosi Grontapoefeti èn baka di na tapoe-skreki, dati den ben sa kiri den poeroe ben komoto, den ben prisiri nanga wan prisiri di no abi marki. A sari foe den ben pasa. Den ben kon froestan leki oiti wan ten, dati Jehovah na den Gado èn dati a abi wan organisaatsi di wi kan si nanga ai, neleki a abi ini hemel wan organisaatsi di joe no kan si nanga ai èn di de leki wan oema gi en. Na organisaatsi disi di joe no kan si de gi na fikapisi leki wan mama, na „Jeruzalem di de na tapoesé” (Jes. 54:1-6; Gal. 4:26). Soboen, di den ben konmakandra baka foe na toestand pe den no ben orga èn pe den ben de na ini na ten foe na Fosi Grontapoefeti, den ben prisiri, dati den ben kisi njanjan foe a jeje „mama” disi — na hemel „oema” ofoe wefi foe Gado, den Tata — èn a ben tjari èn boboi den. Leki „knekti” di nanga jepi foe den moro owroe Brada, Jezus Kristus, den gi densrefi abra a Jehovah a ben gi den trowstoe foe sabi, dati na „anoe” foe Jehovah ben wroko foe a boen foe den. Tra fasi leki disi, na ten ben kon gi en foe ’lési strafoe gi en feanti na publiki’. Na mindri den sma disi ben de den sma di ben abi feanti fasi gi den meki-bekentiman foe en njoengebore kownoekondre, bikasi sma di de feanti foe en pipel di gi densrefi abra de so toe feanti foe en persoonlijk. Jehovah e ferteri moro fara fa a sa tjari en strafoe kon:
5 „’Bikasi loekoe, Jehovah srefi e kon leki wan faja, èn en fetisani de leki wan bigi winti, foe pai en atibron nanga soso bigi ati bron èn en strafoe nanga fajaflam. Bikasi leki faja Jehovah srefi sa teki na trobi, ja nanga en feti-owroe, tegen ala meti; èn den di Jehovah sa naki trowe, séker sa kon tron foeroe. Den di e santa densrefi èn e krin densrefi na fesi den djari baka wán ini na mindri, di e njan hagoemeti èn na tegoe sani, srefi na djompo meti di e bet’beti, den alamala makandra sa kon na den kaba’, Jehovah de taki. ’Èn foe taki foe den wroko nanga prakseri, mi e kon foe tjari ala naatsi nanga tongo konmakandra; èn den sa moe kon èn si mi glori.’” — Jes. 66:15-18.
6. Soboen, fa den Israëlsma ben pasa na wan grofoe fasi na ferbontoe foe den ini den dè foe Jesaja èn fa den ben doti densrefi?
6 Di Jesaja ben skrifi den wortoe dati so wan eeuw bifo na pori foe Jerusalem ini 607 bifo G.T., den Israëlsma ben pasa na wan grofoe fasi na nationaal ferbontoe nanga Jehovah, na Wetferbontoe, di Mozes ben de na mindriman foe en. Den ben santa èn krin densrefi gi afkodré anbegi ini spesroetoe djari èn den ben pasa Gado wet, di ben tapoe den foe njan bepaalde sani. Den ben doti densrefi na fesi foe na Gado foe a ferbontoe foe den èn den no ben doe noti di ben gi en grani.
7. (a) Akroederi en wet foe na ferbontoe, dan fa Jehovah ben handri foe koti na trobi? (b) Nanga soema Jehovah abi ini disi ten wan srefi trobi?
7 Akroederi den wet foe na ferbontoe, a ben tjari foe dat-ede en faja kroetoe di ben de leki bigi winti kon tapoe den sma disi di ben broko a ferbontoe. A ben teki na strafoe-owroe foe koti na trobi di a ben abi nanga ala djoe meti. A no de wan wondroe dati soso wan toe doesoen ben pasa libilibi a nosari-ati pori foe Jeruzalem, san ben tjari leki bakapisi gi den dati den ben srepi den gwe ini a heiden, afkodré Babylon foe wan langa katibo. Ala naatsi nanga tongo-groepoe di ben de a lontoe ben de verprekti foe de kotoigi foe na sori disi foe na glori foe Jehovah leki na Gado di e hori ensrefi na en ferbontoe èn di no e lé. Ala disi e memre wi na wan tranga fasi, dati na srefi Gado na wan moro bigi fasi abi wan trobi nanga na disiten kristenheid di e taki dati a teki na presi foe na Israël foe owroeten leki na pipel foe Jehovah Gado. Leki wan grani gi ensrefi a sa teki en „feti-owroe” foe teki refrensi èn pori na kristenheid krinkrin.
Wan „marki” di e poti na mindri den naatsi
8, 9. (a) Baka di san ben doe kon, èn baka sortoe feti-ondrofeni foe en pipel, Jehovah ben doe en prakseri leki wan grani foe ensrefi? (b) Fa a ben tjari en prakseri kon na krin ini Jesaja 66:19, 20?
8 Leki wan internationaal glori gi ensrefi, na Almakti Gado disi ben doe en prakseri, di no kan kenki foe san ben sa pasa, baka di a ben sorgoe dati „wan kondre ben doe kon tapoe wan dé nanga pen” èn dati „wan naatsi ben gebore ini wan tron”. Ini na Fosi Grontapoefeti na naatsi disi di ben de na fikapisi foe jeje Israëlsma, ben stop foe de wan orga pipel, sondro foe ben abi foeroe howpoe foe pasa libilibi na grontapoe-trobi dati, ma efoe wi e lési Jehovah wortoe ini Jesaja 66:19, 20, dan wi kan tjari kon ini wi prakseri san a ben doe tapoe wan glori fasi sensi na gebortoe foe na naatsi disi ini 1919. A ben taki disi:
9 „’Èn mi wani poti wan marki (Hebrewtongo: ōth; Latijnse Vulgaat: signum) na mindri den èn mi wani seni wantoe foe den wan di ben eskép go na den naatsi, go na Tarsis, Pul, nanga Lud, di e span na bo, Tubal nanga Javan, den farawe eilanti, di no ben jere wan njoensoe foe mi èn no ben si mi glori; èn séker den sa ferteri foe mi glori na mindri den naatsi. Èn troetroe den sa tjari ala oen brada komoto foe ala naatsi leki wan presenti gi Jehovah, tapoe asi èn tapoe wagi èn tapoe sjesi èn tapoe boeriki èn tapoe gaw oema-kaméli, go na mi santa bergi, Jeruzalem’, Jehovah ben taki, ’neleki te den Manpikin foe Israël e tjari na presenti ini wan krin patoe go ini na oso foe Jehovah.’”
10. San ben sori taki dáti ben de na „marki” di Jehovah ben „poti” na mindri den naatsi?
10 San ben sori taki dáti de na „marki” di Jehovah ben „poti” sensi na Fosi Grontapoefeti na den naatsi? A ben de wan libi „marki”. A fesi ini en proféti-tori Jesaja ben taki leki takiman foe Jehovah: „Loekoe! Mi nanga den pikin di Jehovah ben gi mi, de leki marki èn leki wondroe ini Israël foe Jehovah foe den legre ede, di e libi tapoe na bergi Sion” (Jes. 8:18). Ini Hebreer 2:11-13 na kristen apostel Paulus e teki den proféti wortoe dati èn e tjari den kon tapoe Jezus Kristus nanga en discipel di ben kon wiki nanga jeje èn a ben taki: „Bikasi en di e santa leki den di e kon santa e komoto alamala foe wan, èn foe na reden dati a no de sjen foe dat-ede toe foe kari den „brada”, te a de taki: . . . ’Loekoe! Mi nanga den jongoe pikin di Jehovah ben gi mi.’”
11. San den sma di de na „marki” dati ben préki na a heri grontapoe sensi 1914, èn foe san-ede den ben moe tjari kon makandra?
11 Na „marki” di Jehovah ben „poti” na mindri den naatsi foe na grontapoe — foe soema ini 1914 na ten ben doro dati den „ten foe den heiden” ben kon na wan kaba — de foe datede toe na jeje naatsi di de foe sma di e préki tapoe na heri grontapoe, dati Gado kownoekondre ini 1914, na a kaba foe den „faste ten foe den naatsi”, ben gebore ini hemel (Luk. 21:24, Statenvertaling; NW; Matt 24:14). Nanga na prékiwroko disi ini prakseri, Jehovah ben tjari na fikapisi foe den jeje Israëlsma, di ben panja alasé ini na Fosi Grontapoefeti foe na vervolgoe ede, kon baka makandra.
12. (a) Soema ben sa moksi poti na a fikapisi di ben pasa libilibi na Fosi Grontapoefeti? (b) Spesroetoe sensi oten den „wan di ben eskép” ben seni go?
12 Sosrefi toe trawan ben moe tjari kon makandra èn ben moksi go na den jeje Israëlsma di ben pasa libilibi a Fosi Grontapoefeti, sodati na fikapisi foe Kristus jeje „brada” ini disi ten ben sa abi ala memre na a fasi disi (Matt. 25:40). Foe taki reti, dan sensi na fosi algemene congres foe den Internationale Bijbelondrosoekoeman, di ben hori ini na dréten foe 1919 na Cedar Point (Ohio, Amerkankondre), Jehovah ben bigin foe seni „wantoe foe den di ben eskép” foe na fosi fikapisi „go na den naatsi”. A ben doe disi tapoe wan moro spesroetoe fasi tapoe na congres foe den Bijbelondrosoekoeman di ben hori ini na srefi presi pikinso dorosé Sandusky (Ohio, Amerkankondre), di na president foe na Watch Tower Bible And Tract Society ben tapoe na faja lezing foe en gi den sma di ben go na a congres nanga den dramatische wortoe: „Meki bekenti, meki bekenti, meki bekenti, na Kownoe nanga en kownoekondre.” Baka dati den gemeente foe na fikapisi foe den jeje Israëlsma ben meki densrefi klari foe na meki bekenti foe Gado kownoekondre di ben opo „leki wan kotoigi gi ala naatsi”, foe di den seni ala memre go foe gi kotoigi „foe oso na oso” èn ini publiki. Alamala ben de boskopoeman foe na kownoekondre! — Tori foe den Apostel 20:20.
13. Leki wan kontroe foe a profétitori foe Jesaja, soema ben tjari komoto foe ala naatsi, èn leki nanga jepi foe sortoe sani sodati den ben kan go moro esi leki nanga foetoe?
13 Leki wan kontroe foe na profétitori foe Jesaja, dan ala disi ben meki wan toemsi bigi tjari konmakandra foe na fikapisi foe na jeje bradafasi ben kon, leki nanga jepi foe ala transport sani sodati wan sma e go moro esi leki nanga foetoe. Jehovah ben taki dati a ben sa seni „wantoe foe den wan di ben eskép” go srefi na farawe kondre, èn a ben doe disi nanga jepi foe den sma di ben „eskép” libilibi foe den skreki sani foe na Fosi Grontapoefeti: foe na angriten, pestsiki nanga aardbéfi, di ben de leki wan marki foe na pisi ten foe 1914-1918 G.T. di ben tjari dede kon, èn spesroetoe na vervolgoe di ben tron wan pisi foe den Bijbelondrosoekoeman di ben gi densrefi abra èn di na a heri grontapoe ben wroko fajafaja makandra nanga na Watch Tower Bible And Tract Society. Spesroetoe na vervolgoe ben tjari jeje dede kon gi son wan, leki bakapisi dati den no ben abi wan prati na ini foe tjari na fikapisi di ben de ete na libi kon makandra baka, baka a Fosi Grontapoefeti. A wroko disi ben bigin spesroetoe di nanga jepi foe boekoe di druk foe na Genootschap èn nanga jepi foe en vertegenwoordiger di ben waka lontoe èn di ben go fisiti gemeente, wan kari ben go na doro foe opo doe wan sani makandra.
14. Foe sortoe sani den „wan di ben eskép” èn di den ben seni go ben taki, èn sortoe toestand foe a no abi sabi foe sani ben de ini wantoe presi pe den ben go?
14 Ma den getrow wan ben doe soleki Jehovah ben taki na fesi èn „ben ferteri na mindri den naatsi na glori foe Gado” (Jes. 66:19). Den „wan disi di eskép” èn di ben gi jesi ben go na ala kondre èn „naatsi” pe den ben abi pasi foe go, srefi na „farawe eilanti”, foe taki foe na glori foe Jehovah kownoekondre, di ben opo now ini den hemel èn di ben de ini anoe foe na Kownoe di e tiri, Jezus Kristus. Foeroe foe den sma ini den naatsi dati èn tapoe den farawe eilanti dati no ben jere srefi noiti foe na troe Gado, Jehovah èn no ben si kwetkweti dati den marki foe den ten ben e sori dati en glori kownoekondre ben gebore ini den hemel. — Openb. 12:1-5, 10.
15. Ini sortoe jeje toestand den jeje „brada” dati di ben tjari leki wan „presenti gi Jehovah” ben moe kibri densrefi èn foe san ede?
15 Ala sma di ben tjari konmakandra leki jeje „brada” foe „den wan di ben eskép”, ben gi „leki wan presenti foe Jehovah”, no na a wan ofoe tra libisma tiriman foe wan kerki sekte ofoe na a wan ofoe tra grontapoe politiek grontapoemakti, di wani popu stanbai. Foe Jehovah ben kan teki en, dan na „presenti” ben moe de krin. Foe datede meki ini na profétitori foe a tjari foe na libi „presenti” e taki dati disi ben de a srefi fasi „neleki te den manpikin foe Israël e tjari na presenti ini wan krin patoe go ini na oso foe Jehovah” (Jes. 66:20). Foe datede meki den jeje „brada” di de makandra na jeje „presenti”, no de wan pisi foe na grontapoe, ja, den moe „kibri densrefi sondro flaka foe na grontapoe” (Jak. 1:27). Den moe de neutraal nanga na doti politiek foe na doti seti foe sani disi. Foe datede meki Jehovah ben taki dati den ben sa tjari go na „mi santa bergi, Jeruzalem”. Nanga disi den no e sori tapoe na disiten Jeruzalem, a mamafoto foe na politiek kondre Israël. Na naatsi foe san Jeruzalem de na mamafoto de foe 85 procent djoe èn a de wan memre foe na Verenigde Naatsi, wan organisaatsi di abi ini prakseri foe kibri grontapoe-vréde nanga sékerfasi.
16. Foe san-ede meki Jehovah no abi now ini na Mindri-Ostoe noti san ben sa kan kari en „santa bergi”?
16 Na disten Jeruzalem ini na Mindri-Ostoe no abi nowan enkri „santa bergi” di Jehovah na ini bribi fasi ben sa kan kari en bergi. Foe san-ede? Foe di san ben de wan dé en „santa bergi” drape, abi now na en tapoe wan mohamedaan santapresi, na Rotskoepel. Na santapresi disi no de gi anbegiman foe Jehovah, ma foe Allah, wan gado sondro wan ègi nen.
17. San de foe datede na „santa bergi” Jeruzalem, pe den jeje „brada” dati ben tjari go sensi na gebortoe foe a naatsi ini 1919?
17 Te wi loekoe ala sani di abi te make nanga a tori dja na wan opregti fasi, dan wan toemsi prenspari troe tori e kon na krin: Ini na disiten kontroe foe Jesaja 66:20, „mi santa bergi” e sori tapoe wan organisaatsi di gersi wan mama foe den jeje Israëlsma, namkoe, „na Jeruzalem di de na tapoesé”, di Galacia 4:26 e taki foe en. A de na Sion di akroederi Jesaja 66:8 „ben meki en manpikin”. Den „manpikin” dati de na „naatsi” di „ben gebore ini wan tron” ini na jari baka na feti, na jari 1919. Nanga na troe tori dati ini prakseri, den jeje „brada” di „den wan di ben eskép” ben tjari konmakandra sensi na gebortoe foe na „naatsi”, ben presenteri „leki wan presenti na Jehovah” èn den tjari kon ini kontakti nanga en kownoekondre organisaatsi, na „Jeruzalem di de na tapoesé”, a Jeruzalem di na grontapoe Jeruzalem di ben bow kon njoen baka ben de wan agersi prenki foe en. Foe di den disi ben doe kon leki en „manpikin”, meki den ben tjari kon ini na grontapoe pisi foe Jehovah universele organisaatsi di wi kan si nanga ai foe de sma na jeje fasi foe libi ini Jeruzalem.
Na meki kon boen baka foe na soifri anbegi foe Jehovah
18. San ben de na fasi foe doe di ben fiti moro èn di na „naatsi” ben moe sori ini en kondre foe activiteit, foe di Jehovah ben pramisi foe teki wantoe foe na njoen gebore „naatsi” sosrefi „gi den priester, gi den levietsma”?
18 Den memre foe na njoen gebore „naatsi” ini den baka na feti kondre foe jeje activiteit ben teki na heri anbegi dorodoro foe na wan libi èn troe Gado Jehovah? Now di den ben kon fri foe na basifasi foe Babylon na Bigiwan, na grontapoemakti foe falsi bribi, disi ben sa de wan sani di fiti srefsrefi. Èn foe datede meki den ben doe dati toe, akroederi san Jehovah ben pramisi ini Jesaja 66:21 foe doe gi na njoen gebore „naatsi”: „’Èn sosrefi mi sa teki na den mindri wantoe gi den priester, gi den levietsma’, Jehovah ben taki.” Ini na tori foe den Israëlsma wi moe hori ini prakseri, dati ini a 70-jari katibo foe den ini na Babylon foe owroeten, foe 607 bifo G.T. te 537 bifo G.T. den ben moe doe en sondro na actief dienst foe den hépriester èn ondropriester foe a famiri foe Aäron nanga den dinari foe den, den levietsma, foe di na tempel pe den ben doe dienst na ini, ben pori. Ini Hoséa 3:4, 5 Jehovah ben taki disi soifri na fesi nanga den wortoe:
19. Fa Jehovah ben taki na fesi ini Hosea 3:4, 5 foe na kon boen baka foe en anbegi?
19 „Disi foe di den manpikin foe Israël sa libi foeroe dé sondro srakti-ofrandi èn sondro pilari, sondro efod èn terafim. Baka dati den manpikin foe Israël sa drai kon baka èn soekoe séker Jehovah, den Gado, èn David, den kownoe (na Messias); èn seker nanga béfi den sa kon na Jehovah èn na en boenfasi, ini den laatste dé.”
20. San ben sa bow èn pe, nanga na doe disi foe Jehovah, èn nanga sortoe toemsi prenspari fanowdoe ini prakseri?
20 Boiti dati Jehovah ben sa opo tanapoe leki den Ferloesoeman foe a katibo ini Babylon, a ben sa sorgoe sosrefi toe ini den moro prenspari fanowdoe foe den, den jeje fanowdoe. A ben sa poti njoen baka wan wettig hépriester, makandra nanga en ondro priester, di wan groepoe levietsma ben sa asisteri. Nanga disi ini prakseri, dan na tempel ini Jeruzalem ben moe bow baka, sodati den sma disi ben sa kan doe dape den dienst foe den, di ben de so prenspari gi na „naatsi” di ben sa gebore „ini wan tron”. Disi ben sa pasa ini na „kondre” di „tapoe wan dé (ben sa) doe kon nanga pen”, den lobi papakondre. Ja, winsi fa disi kande ben sa gersi dati a no kan. — Jes. 66:8.
21. Sortoe srefi situwasi ben sori ensrefi sensi 1919 ini jeje fasi ini na tori foe na „naatsi” di ben „gebore” na a ten dati?
21 Sensi di Jehovah Gado ben fri na fikapisi foe na jeje Israël ini na jari baka na feti, na jari 1919 G.T. foe Babylon a Bigiwan (na grontapoemakti foe falsi bribi), dan a srefi ben de so nanga den ini jeje fasi. A ben sorgoe fosi gi den jeje fanowdoe foe den. A ben meki den froestan kon krin tapoe a tori foe na positsi foe na Messias Kownoe Jezus Kristus, leki hè-priester foe Gado. A ben krin den foe ala doti na kerki sé di ben de na den ete leki wan bakapisi foe a demakandra foe den nanga Babylon na Bigiwan èn foe na katibo foe en. Leki memre foe „wan libisma-lo di den ben verkisi, wan kownoekondre priester-famiri, wan pipel leki wan spesroetoe goedoe” gi a Moro Hé Gado, den ben go froestan leki oiti ini wan ten fa èn foe san-ede den ben moe de strikt neutraal nanga den politiek afersi foe na disi ten grontapoe disi. Den ben kon froestan dati gi na wan libi èn troe Gado na ten ben doro foe „meki wan nen gi ensrefi”. Èn den ben kon wiki gi den verprekti foe hé Gado égi nen, Jehovah, tapoe ala tra nen. A ben kon krin gi den, dati den ben abi na verprekti foe de kotoigi foe a Gado disi di a nen foe en someni eeuw langa ben poti na baka. Foe datede den ben teki ini na jari foe memre, 1931, nanga reti na nen „Jehovah Kotoigi”. — 1 Petr. 2:9; Jes. 43:12; 63:12.
22. San de na moro prenspari stré-aksi èn na moro prenspari leri foe na bijbel, ala di na ferloesoe foe mekisani abi foe doe nanga dati èn foe san-ede?
22 Ala di ini na bijbel di skrifi nanga santa jeje prakseri, di fiti, e poti tapoe na ferloesoe foe na libisma-famiri èn a ferloesoe foe den foe sondoe èn dede èn foe katibo na Satan na Didibri nanga en organisaatsi, tokoe na ferloesoe disi no de na moro prenspari sani, na moro prenspari leri foe na bijbel. Ini na ede-artikel „Getrowfasi”, di ben kon ini wan foe den nomroe foe Na Wachttoren di ben kon ini na di Foe Toe Grontapoefeti, den ben taki ini a tori disi: „Jehovah ben ferteri krin ini den Santa Boekoe En prakseri foe tiri na grontapoe nanga jepi foe en regtvaardiki Tiri, na THEOKRATSI, di a meki Kristus de na Kownoe foe en. Na fosi stré, di ben komoto foe na sondro sjen tjalansi foe Satan, ben de èn de a di foe na grontapoe-tirimakti” (par. 1, 18). Na moro prenspari prakseri foe datede foe na Moro Hé Gado de na poti reti foe a universele soevereiniteit disi, di soso en wawan abi. Disi a sa doe heri esi tapoe wan glori fasi ini na „feti foe na bigi dé foe Gado na Almaktiwan” tapoe a fetigron na Har-mágeddon (Openb. 16:14-16). Na „santa naatsi” foe na jeje Israël abi na prekti, na grani foe kibri en getrowfasi tapoe a tori foe Jehovah universele tirimakti ofoe soevereiniteit, foe bewijsi na so fasi dati na Didibri na wan léman.
23. San den feanti naatsi ben proeberi foe doe, èn fa na no go doro foe den moeite de wan kontroe foe Jehovah wortoe ini Jesaja 66:22?
23 Den grontapoe naatsi foe Satan organisaatsi di wi e si nanga ai ben proeberi alaten foe pori Jehovah „naatsi”, di ini 1919 ben „gebore” tapoe en „kondre” di ben doe kon njoen, ma te nanga na lati pisi ten disi, ala den moeiti foe den ben tron noti. Disi e pasa leki wan getrow kontroe foe na djaranti di na Universele Soeverein ben gi ini Jesaja 66:22: „’Bikasi neleki den njoen hemel nanga a njoen grontapoe de na mi fesi’, a so Jehovah taki, ’a so den bakapikin foe oenoe nanga na nen foe oenoe sa tan.’”
24. (a) Na tan alaten foe den njoen hemel nanga njoen grontapoe, de sortoe djaranti gi na fikapisi foe a jeje Israël? (b) Na fikapisi sa tron wan pisi foe san te na joisti te doro?
24 O nono! Winsi san Satan a Didibri nanga en ogri jeje di wi no kan si nanga ai, èn en grontapoe organisaatsi di wi kan si nanga ai sa proeberi foe doe toe ini na krosbé ten di e kon tegen den, na fikapisi foe na jeje Israël nanga a nen foe den no sa figi poeroe. Ma den grontapoe bakapikin foe Satan di wi kan si nanga ai foe Satan organisaatsi nanga den nen foe den no sa tan langa moro. Ma leki wan moi kontrari foe disi, den bakapikin foe Jehovah universele organisaatsi, na fikapisi foe a jeje Israël, sa tan; sosrefi den feanti foe den no sa figi den nen foe den poeroe, sodati sma sa frigiti den. Net so séker leki den njoen hemel nanga na njoen grontapoe di na Universele Soeverein Jehovah sa meki sa tan, na so disi sa de toe nanga a fikapisi foe na jeje Israël nanga a grani nen foe den. Disi no wani taki dati na fikapisi foe na jeje Israël sa tan foe tégo na grontapoe. Nono, ma na a joisti ten den sa teki gwe èn tjari kon makandra nanga na Hépriester foe den, Jezus Kristus ini „den njoen hemel” foe doe dienst ini na jeje tempel leki ondropriester.
25. (a) Oten Jehovah ben bigin meki den „njoen hemel” dati? (b) Spesroetoe sensi oten memre ini na ten di e kon foe na fikapisi ben sori densrefi?
25 Jehovah Gado ben bigin foe meki den „njoen hemel” na a kaba foe „den faste ten foe den naatsi” ini 1914 G.T. di a ben poti en glori Manpikin Jezus Kristus tapoe na hemel troon foe tiri dape leki Kownoe foe den kownoe èn Masra foe den masra. Disi na a „Manpikin foe David”, èn di a ben de wan volmaakti libisma na grontapoe, na Universele Soeverein Jehovah ben sroto wan ferbontoe nanga en foe wan tégo kownoekondre (Matt. 21:15). Komoto foe en hemel troon na Kownoe Jezus Kristus e tiri abra wi grontapoebol. Na meki foe na „njoen grontapoe” no wani taki ofoe no e aksi dati wi letterlek grontapoe moe pori. Nono, bikasi a planeet Grontapoe disi sa tan „srefi te ten di no abi marki” (Prékiman 1:4). Gado kownoekondre ondro Kristus sa kenki na grontapoe tron wan tégo Paradijs. Akroederi nanga na toemsi bigi troe tori disi, na meki foe na „njoen grontapoe” wani taki dati Jehovah e meki wan njoen libismamaatschappij di de dorodoro ini wanfasi nanga en èn en regtvaardiki „njoen hemel” (2 Petr. 3:13). Now kaba miljoenmiljoen memre foe na „njoen grontapoe”-maatschappij dati ini na ten di e kon e libi na grontapoe. Spesroetoe sensi na jari 1935 den ben sori densrefi na a grontapoe.
26. (a) Fa Jesaja 66:12 ben sori na a kon foe na „bigi ipi” disi, di ben go moksi densrefi na a fikapisi foe jeje Israël? (b) Pe na „bigi ipi” disi e doe dienst now gi Jehovah?
26 Den disi komoto foe ala naatsi, ras, pipel nanga tongo-groepoe èn den ben gi densrefi abra na Jehovah Gado nanga jepi foe na hépriester Kristus èn den ben agersi na gi di den gi densrefi abra foe meki den dopoe den, foe di den e waka baka den Toemsi Boen Herder Jezus Kristus (Joh. 10:14, 16). Wantoe vers bifo na pramisi foe den njoen hemel èn njoen grontapoe, namkoe, ini Jesaja 66:12, Jehovah ben taki dati a ben sa meki na „glori foe den naatsi” lon kon na a fikapisi foe na jeje Israël, di e teki presi foe na „Jeruzalem foe tapoesé” èn dati disi ben sa de „neleki wan kriki di foeroe èn e fadon foe tapoe go na ondro”. Sensi 1935 na „glori foe den naatsi”, na „bigi ipi” „tra skapoe” foe na Toemsi Boen Herder, na Kownoe Jezus Kristus, ben tan lon kon na a fikapisi foe na jeje Israël (Openb. 7:9-17). Leki wan bakapisi foe a loyaliteit foe den na Jehovah Theokratis Tiri ini anoe foe Kristus, na Toemsi Boen herder ben meki den tron „wan ipi” makandra nanga na fikapisi foe na jeje Israël. Den e tjari go na Jehovah jeje tempel, di den e kari „wan oso foe begi gi ala pipel” (Jes. 56:7; Mark. 11:17). Ini Gado jeje tempel, na presi pe den sortoe internationaal begi disi e seni go na Gado, na „bigi ipi”, „na glori foe den naatsi” e doe santa „dienst gi en dé èn neti”. — Openb. 7:15.
27, 28. O foeroe na „bigi ipi” foe „ala meti” e kon makandra nanga a fikapisi, èn sortoe bakapisi e kon foe di den e teki prati na a kotoigiwroko?
27 Na froewondroe disiten kon foe sani e akroederi nanga san Jehovah e taki moro fara ini Jesaja 66:23: „’Èn séker a sa pasa dati foe njoen moen te go miti njoen moen èn foe sabbat te go miti sabbat ala meti sa kon foe boigi densrefi na mi fesi’, Jehovah ben taki.” — Hag. 2:7-9.
28 Akroederi den bericht, dan na „bigi ipi” foe „ala meti” e kon alaten makandra nanga na fikapisi foe na jeje Israël, leki a de foe „njoen moen go miti njoen moen (ala moen) èn foe sabbat go miti sabbat (ala wiki)”. Den e teki prati nanga na salfoe fikapisi loyaal na a publiki kotoigiwroko èn na a kotoigi di e gi oso na oso, sodati san Jezus ben taki na fesi foe „na besroiti foe na seti foe sani” kan kon troe: „Na boen njoensoe disi foe na kownoekondre sa préki tapoe na heri grontapoe pe libisma e libi leki wan kotoigi gi ala naatsi” (Matt. 24:3, 14). Den sma foe „ala meti” di e teki na préki na wan boen fasi, „e kon foe boigi densrefi gi (na Soeverein Jehovah)”.
29, 30. (a) Fa e kon na krin ini Jesaja 66:24, dat den anbegiman dati foe „ala meti” sa pasa libilibi na „bigi benawtoe” di e pori na seti foe sani disi? (b) Foe san den sa tron na fundamenti, èn baka dati, soema den sa tjari ini na anbegi foe na Mekiman foe hemel èn grontapoe sani?
29 Leki sma di sa pasa libilibi a „bigi benawtoe”, di kan loesoe kon ibri momenti tapoe na grontapoe, den sa de kotoigi fa Jehovah e poti reti en universele soevereiniteit foe di a de pori den feanti foe en èn den ini na benawtoe di sa kon na a heri grontapoe. Nanga disi ini prakseri meki Jesaja e besroiti en profétitori nanga den wortoe: „Èn den (den sma di e pasa libilibi na benawtoe) seker sa go na doro èn loekoe tapoe den dedeskin foe den man, di ben doe sondoe na mi; bikasi den woron srefi, di de tapoe den no sa dede èn a faja foe den srefi no sa dede, èn den moe tron wan tegoe sani gi ala meti.” — Jes. 66:24.
30 Neleki den froefroektoe „bokoboko” foe Jezus agersitori, di e kon troe ini „na besroiti disi foe na seti foe sani”, na so den sma di e doe sondoe na a Soeverein Masra Jehovah sa „go ini na tégo koti-poeroe”, na tégo pori (Matt. 24:3; 25:31-46). Moro fara, den sma di gersi skapoe èn di sa kisi na paradijs-grontapoe èn di de na fundamenti foe na „njoen grontapoe”, sa bari odi gi ala sma ini den mindri di e wiki komoto foe dede kon na libi ini meti na grontapoe. Den sa tjari den sortoe sma disi di opobaka foe dede èn di de wan pisi foe „ala meti” foe anbegi ini wanfasi na Mekiman foe den „njoen hemel” èn na „njoen grontapoe” di ben kisi reti. — Jes. 65:17; 2 Petr. 3:13.
Fa joe ben sa piki den aksi di e kon now foe Jesaja 66:19-24?
Vers 19: Fa „wantoe foe den wan di eskép” ben seni go na den „naatsi”? Nanga sortoe bakapisi?
Vers 20: A sortoe fasi den „manpikin foe Israël” ben tjari wan „presenti” go na a oso foe Jehovah?
Vers 21: Fa wantoe foe den ben teki foe doe dienst leki „priester”?
Vers 22: Sortoe djaranti Jehovah e gi tapoe na tori foe en pipel di ben kon baka boen foe na sani di a de taki foe na sékerfasi foe „den njoen hemel nanga na njoen grontapoe”?
Vers 23: Fa wi e si dati „ala meti” e boigi densrefi na fesi Jehovah „foe njoen moen go miti njoen moen èn foe sabbat go miti sabbat”?
Vers 24: Foe sortoe lot di sa miti den sma di ben sondoe na Jehovah, den sma di sa pasa na „bigi benawtoe” libilibi sa de kotoigi?
[Prenki na tapoe bladzijde 234]
Neleki wan mama, na so Jerusalem ben gi en „manpikin” lobifasi sorgoe
[Prenki na tapoe bladzijde 239]
Baka di den „eskép” foe Babylon na Bigiwan, Jehovah Kotoigi ben hari go nanga na kownoekondre-boskopoe