Jezus en libi nanga diniwroko

A ben kisi grani bifo en mama ben meki en

NA ENGEL Gabriël ben ferteri na jongoe oema Maria djonsro de dati a ben sa gi libi na wan manpikin di foe tégo sa tiri leki kownoe. Ma Maria e aksi: ’Fa dati kan, bikasi mi no ben libi nanga wan man?’

’Gado santa jeje sa kon abra joe’, Gabriël e tjari kon na krin, ’èn foe dat’ede na boi den sa kari a Pikin foe Gado’. Foe jepi Maria, Gabriël e go moro fara: ’A owroe famiri foe joe, Elisabeth, foe soema den sma ben taki dati a no kan kisi pikin, de now siksi moen nanga bere.’ Maria e bribi san Gabriël e ferteri èn a e taki: ’Meki a pasa net so nanga mi leki fa joe ben taki.’

Sjatoe baka di Gabriël gwe, Maria meki ensrefi klari foe tjari wan fisiti go na Elisabeth, di e libi nanga en man Zacharias na ini na bergi kontren foe Judea. Komoto foe na oso foe Maria na ini Nazareth dan disi de wan langa reis foe kande sowan dri ofoe fo dé. Te Maria te foe kaba doro na a oso foe Zacharias, a e kon a inisé. Baka na odi Elisabeth e kon foeroe nanga santa jeje èn a e taigi Maria: „Joe de wan blesi oema na mindri den oema èn blesi de a pikin di joe sa kisi. Fa a de wan bigi grani dati na mama foe mi Masra e kon na mi! Bika loekoe! na momenti di mi jere joe odi a pikin ben djompo ini mi moeroe foe bigi prisiri ede.”

Nanga prisiri na en fesi Maria e taki: ’Foe bigin nanga now ala sma sa kari mi kolokoe, foe den bigi sani ede di Gado ben doe gi mi.’ Maria e tan sowan dri moen na Elisabeth èn a de foe troe wan bigi jepi ini den laatste wiki foe na bere foe Elisabeth. A de troetroe wan moi sani dati den toe getrow oema disi, di ala toe nanga a jepi foe Gado e ferwakti wan pikin, kan de nanga makandra na ini na blesi ten disi foe den libi!

Joe ben si dati Jezus ben kisi grani kaba bifo a ben gebore?

Elisabeth ben kari en „mi Masra” èn a pikin foe en di no ben gebore ete ben djompo foe prisiri di Maria ben kon na inisé. Tra sma ben gi Maria nanga en pikin di ben moesoe gebore ete grani èn dati no ben de pikinso, soleki wi sa si bakaten. Ma na ini a tra artikel foe wi wi sa kon sabi moro foe a pikin foe Elisabeth, Johannes. Lukas 1:26-56.

◆ San Gabriël ben taki foe jepi Maria foe ferstan fa a ben sa tan nanga bere?

◆ Fa Jezus ben kisi grani bifo a ben gebore?

◆ Olanga Maria ben tan na Elisabeth èn foe san-ede a ben de heri boen dati Maria ben tan na ten dati na Elizabeth?