Teki a jepi foe Gado foe wini kibri swakifasi

„Gi ala sani mi abi na tranga nanga jepi foe en di e gi mi krakti.” — FILIPI 4:13.

1. Sortoe aksi wan papa di ben e broko-ede ben aksi?

NA JONKOEMAN ben kisi fadonsiki.a A ben kisi skoema tapoe en mofo, ben e kisi treki èn ten foe ten ben e fadon na ini watra ofoe faja. En papa di ben broko ede nanga en go soekoe wan man di ala sma ben sabi dati a ben e dresi sikiman. Di den ben meki na papa disi kon ferstan dati na fasi fa a ben poti en aksi ben kan sori na tapoe wan mankeri foe fertrow na ini a koni foe a man dati, a ben bari taki: „Mi e bribi! Kon jepi mi efoe mi mankeri bribi!”

2. Fa wi kan de séker dati Gado sa jepi wi ini wi swakifasi?

² Wi kan leri wan sani foe a papa disi di ben kari Jezus foe jepi. A man ben piki dati kande a ben mankeri bribi; a ben de ooktoe séker dati Jezus ben wani jepi. A so a kan de nanga wi toe te wi tanapoe fesi na fesi nanga wi égi swakifasi — srefi nanga kibri swakifasi — èn e wroko na den foe wini den. Wi kan fertrow a tapoe dati Jehovah Gado wani foe jepi wi, soleki fa a e jepi trawan ini a ten di pasa. (Teki gersi nanga Markus 1:42.) A ben jepi foe eksempre na apostel Paulus foe kakafoetoe gi swakifasi di kan kon foe na abi foe sani pasa marki ofoe foe pina. Wan sma di póti kan angri foe kisi goedoe, èn na swaki punt foe wan goedoeman kan de dati na wan tevrédefasi a e fertrow tapoe a waka di sani e waka boen gi en èn e brok’ai gi sma di abi mendri (Job 31:24, 25, 28). Fa Paulus ben wini ofoe ben tan farawe foe den sortoe swakifasi disi? A e taki: „Gi ala sani mi abi na tranga nanga jepi foe en di e gi mi krakti.” — Fil. 4:11-13.

3. Foe san-ede a de wan ferstan sani efoe e proeberi foe wini swakifasi?

³ Wi e sori koni foe no waka pasa den swakifasi foe wi foe di tapoe na momenti disi kande den kibri ete, ma foe doe moeiti foe wini den èn foe fertrow na ini disi tapoe a krakti foe Gado. Na Psalmsingiman ben taki foe Jehovah: „A sabi den kibritori foe na ati” (Psalm 44:21). Efoe wi no wini wi swakifasi, dan den kan kon a loktoe èn doe wi moro ogri. Djaso na gronprakseri fiti: „Den sondoe foe son sma de krin foe si èn wantewante e tjari wan kroetoe kon, ma foe taki foe tra sma, den sondoe foe den e kon ooktoe na krin, ma bakaten” (1 Tim. 5:24). Meki wi go loekoe toe algemeen swakifasi di kristen di wani plisi Jehovah moe poti prakseri.

Wan kibri swakifasi di abi foe doe nanga sekslostoe

4, 5. (a) Sortoe balans a bijbel gi a ini a tori foe sekslostoe? (b) Sortoe warskow wi e feni na ini den Boekoe ini a tori foe sekslostoe?

⁴ Wan foe den toemsi moi presenti foe Gado de na trowlibi makandra nanga na makti èn na lostoe foe meki pikin (Gen. 1:28). Na lostoe foe abi seks demakandra na inisé foe na trowbanti de wan natuurlek èn krin sani. Na bijbel e taki dati a de wan natuurlek afersi te wan sma e kisi prisiri foe seks demakandra nanga en masra ofoe oema di de en égi patna (Odo 5:15-19). Ma wan sma no kan libi en sekslostoe meki a go fa a wani. Loekoe leki wan eksempre a lostoe foe wi foe njan. Dati alaten baka wi e abi lostoe foe njan, no wani taki wi moe kweki wan lostoe foe njan di e pasa marki ofoe dati wi no a foe poti no wan skotoe gi wisrefi na a momenti, na presi èn na fasi foe wi foe njan. — Odo 25:16, 27.

⁵ Paulus kande ben trow èn a ben sabi dati normaal sori foe seksfiri na mindri patna ben fiti (1 Kor. 7:1-5.). Soboen a ben moesoe sori na tapoe wan tra sani di a ben skrifi: „Kiri foe dat’ede den leden foe oen skin di de na grontapoe ini a tori foe hoeroedoe, doti seksangri, takroe lostoe èn bigi-ai” (Kol. 3:5). A ben moe poti prakseri na tapoe seks libi na dorosé foe na trow seti ofoe a sori foe seksueel firi di no fiti na inisé foe a trowlibi. Na apostel e taki toe: „Ibri sma moe sabi fa na ini santafasi èn grani foe kon kisi en égi patoe, no ini gridi seks lostoe” (1 Thess. 4:4, 5). A krin rai disi di komoto foe santa jeje de boen gi kristen di trow èn di no trow.

6. Foe san-ede nanga reti kristensma moe tan farawe foe zelfbevrediging?

⁶ Wan foe den fasi tapoe san nofotron wan sma e sori sowan sortoe ’takroe lostoe’ (1 Thess. 4:5, Luther-vertaling) de na pré nanga den égi sjenpresi ofoe doe nanga wan fasi di no fiti nanga den foe na prisiri di e kon foe dati. Disi den e kari masturbatie ofoe zelfbevrediging. A mindri man noso oema di no trow a e kon algemeen voor. Ma ooktoe foeroe sma di trow e hori ensrefi bezig nanga dati. Foe di zelfbevrediging de so algemeen, meki foeroe datra go so fara foe taki dati a de normaal èn srefi boen. Ma na gwenti disi e go langalanga tége na rai foe Gado ini a tori foe „gridi seks lostoe”. Te wi go loekoe wan rai di Jezus ben gi, wi kan ferstan moro boen foe san-ede disi de so èn foe san-ede kristensma moe wini na gwenti disi.

7. Fa Mattéus 5:28 e gi wi ete wan réde foe hori wisrefi fara foe zelfbevrediging?

⁷ Jezus ben taki: „Ibri sma di e tan loekoe wan oema foe kisi lostoe gi en, [ben] doe ini en ati soetadoe nanga en kaba” (Matt. 5:28). A ben sabi dati prakseri foe soetadoe nofotron ben e waka a fesi foe hoeroedoe. Tokoe srefi den sma di e taki boen foe zelfbevrediging e piki dati gewoonlek seks prakseri de ini a tori. Baka di a ben ferteri foe na ’bewuste prakseri foe jongoesma gi na prisiri di zelfbevrediging kan gi’ a boekoe Talking with your teenager (Taki nanga joe tini) e taki moro fara: „Den e si densrefi kande ini wilde seks situatie ofoe nanga patna foe a srefi geslakti ofoe nanga moro owroe sma, foe eksempre nanga onderwijzer, famirman èn srefi [den papa nanga mama foe den]. Den abi kande prakseri foe seks ogridoe. Ala disi de absoluut normaal.” Ma disi de so? Fa kristensma kan si den sortoe prakseri disi nanga zelfbevrediging normaal ini na leti foe Jezus warskow foe ’soetadoe ini na ati’ ofoe na rai foe Paulus tége „gridi sekslostoe”? Nono, den sortoe prakseri disi nanga zelfbevrediging — efoe a e go now foe wan jongoewan ofoe wan bigisma, foe sma di trow ofoe no trow ete — wi moe wini.

Wini na kibri swakifasi disi

8, 9. Te wan sma kon ferstan sortoe sani a kan kisi jepi foe broko nanga na gwenti foe zelfbevrediging?

⁸ Efoe wan kristensma ben sa abi na kibri swakifasi disi, san a ben sa kan doe foe wini dati, sodati „na ini santafasi nanga grani a kan kisi en égi patoe”? (1 Thess. 4:4). Nanga jepi foe en Wortoe Gado e gi warti jepi.

⁹ Ini na fosi presi a de prenspari foe erken dati Jehovah abi markitiki èn dati no de foe taki. A e meki kon na krin dati seks libi dorosé foe na trowlibi, hoeroedoe nanga soetadoe, de fowtoe (Hebr. 13:4). Efoe wi e bribi dati den pasi foe en de moro boen wan, dan soso na inisé foe na trowlibi wi sa soekoe foe dat’ede prisiri foe seksfiri (Ps. 25:4, 5). A boekoe Adolescence (Adolescentie) foe a boekoe foe E. Atwater. e sori dati na ini a tori foe zelfbevrediging jongoesma gewoonlek e sori ’foe hori densrefi a baka sjensjen èn foe abi frede èn degedege’. Wan réde di a e kari foe dati de ’na krosbé matifasi foe wan lobi afersi di de ini wan seksgemeenschap, no de na zelfbevrediging. Ija a e tjari winimarki kon foe basi sekslostoe te leki den kan tjari kon na fesi na ini wan foeroe-nanga-lobi trowlibi demakandra.

10. San de wantoe stap di wan sma kan doe nanga san a kan kisi jepi foe broko nanga na gwenti?

¹⁰ A Wortoe foe Gado e gi moro fara jepi nanga na rai: ’Ala san de troe, ala san de serjoesoe belang, ala san de regtvaardiki, ala san de krin, ala sani di sma e taki boen foe den èn sortoe boen ooktoe de, tan prakseri den sani disi’ (Fil. 4:8). A de krin dati fowtoe nanga hoeroedoe lobitori di e tigri na firi no ’de krin ofoe boen èn dati sma no e taki boen foe en’. Tokoe den sma di e doe na zelfbevrediging nofotron e hori densrefi bezig nanga den sani disi. Ibriwan sma di teki na faste bosroiti foe wini na swakifasi disi, moe tan farawe foe a sortoe materiaal disi di e tigri seksfiri foe dat’ede. Na ondrofeni ben leri dati efoe wan sma lostoe e go na sani di e wiki a firi foe en tapoe wan fasi di fosten ben tjari en go doe zelfbevrediging, wan faste poti ensrefi na tapoe san de regtvaardiki èn krin kan meki den lostoe dati kon moro mendri. Disi de spesroetoe prenspari efoe wan sma de en wawan ofoe de ini doengroe, bikasi dan moro makriki wan sma e broko kindi gi na kibri foe swakifasi foe zelfbevrediging.b — Rom. 13:12-14.

11. Ferteri foe ete wantoe sani di sori taki den boen na ini a feti nanga a swakifasi disi.

¹¹ Wan jepi na ini disi de foe abi foeroe foe doe ini akroederi nanga na fermane: „Loekoe boen fa joe e waka no leki donman, ma leki koniman, bai na boen ten gi joesrefi, bika den dé de godlowsoe” (Ef. 5:15). Aksi wan lepi brada ini fertrow rai foe doe positief sani di joe kan doe (Jes. 32:2). Foeroe sma di ben wini swakifasi disi e piki dati, di den sabi dati wan kristen di e broko ede nanga den ben sa aksi den fa den e go a fesi, ben jepi den foe kweki a fasi foe dwengi densrefi. A no de foe taki dati Jehovah Gado na a sma di moro foeroe wi moesoe teki ini fertrow. A de foe dat’ede prenspari srefsrefi foe go ini begi na en èn soekoe en jepi (Fil. 4:6, 7). Efoe wan sma di wan heri pisten ben feti nanga a swakifasi disi, „ben sa naki foetoe fadon”, a kan aksi Gado foe krakti. Moro fara a kan go doro nanga en moeiti èn séker kande a sa si fa en moeiti srefi ini wan langa pisten sa waka boen nanga winimarki. — Hebr. 12:12, 13; Ps. 103:13, 14.

Teki a stré tége dringi sopi pasa marki

12. San de na kristen loekoe na ini a tori foe dringi di abi sopi?

¹² ’Win e prisiri Gado nanga libisma’, wan bijbelvers e taki (Kroet. 9:13). Kande joe sa agri nanga disi, bika dringi di abi sopi e jepi sma foe ontspan densrefi èn ben gi foeroe sma prisiri (Ps. 104:15). Ma pikinso sma sa taki dati a no de so, dati na gebroiki foe sopi abi ini en kefar na skinfasi èn na moreelsé. Wan bigi problema de a droengoe ded-ded foe wan sma. A sondoe foe disi de so serjoesoe dati Gado e warskow dati droengoeman kan poeroe poti na dorosé foe na gemeente èn dati den no e kisi pasi foe go ini a Kownoekondre (1 Kor. 5:11-13; Gal. 5:19-21). Kristensma sabi disi èn sa agri dati den moe tan farawe foe droengoe. Ma te wi libi droengoe na wan sé, dan fa na gebroiki foe sopi kan tron wan kibri swakifasi?

13. Leg uit fa na anga na sopi ben sa kan gro.

¹³ A kan de dati wan kristen e dringi soso nanga marki èn tokoe abi foe feti nanga wan serjoesoe swakifasi. Loekoe pikinso na ondrofeni foe wan man di wi sa kari Heinz.

En, en wefi nanga en pikin ben tron troe kristen èn ben abi foeroe foe doe ini a gemeente. Baka wan pisten den ben poti Heinz leki owroeman èn den ben si en na ini den gemeente ini na foto leki wan ’pilari’ (Gal. 2:9). A de wan sani foe ferstan dati na a kweki foe en pikin wantoe spanning ben kon na fesi èn dati na sorgoe foe a ipi ben e gi en brok’ede (2 Kor. 11:28). Ma nanga a wroko foe en na grontapoe a ben kon na ondro bigi druk foe di na firma di a ben wroko gi ben kon moro bigi èn en basi ben wani dati a ben moe loesoe foeroe problema èn teki bosroiti.

Foeroe neti Heinz ben de kefarlek nanga span. A ben kon si dati wan ofoe toe sjot, ben jepi en foe ontspan ensrefi. Leki lepi kristen a ben tan farawe èn dati no de toe taki foe dringi toemsi foeroe ofoe kon droengoe. Ala di a neti a ben dringi wantoe grasi toe kisi ensrefi, na déten a no ben abi sopi fanowdoe èn a no ben dringi srefi na moro foeroe ten di a ben njan. Sma no ben sabi en leki wan ’sma di ben e gi ensrefi abra na foeroe win’. — 1 Tim. 3:8.

Onferwakti den ben teki Heinz go na atoso gi wan operatie di e kon foeroetron. Wantoe ongewoon marki ben sori ensrefi na en. San ben de na réde. Heri esi den datra ben kon si dati Heinz ben e sori marki dati a ben moe kon fri foe sopi. Ija, en skin ben anga na a kisi foe sopi. Disi ben froewondroe na osofamiri, ma den ben poti densrefi leki wan man na baka en èn den jepi en na ini en bosroiti foe no dringi no wan dropoe sopi moro.

14. San kan meki dati na tranga dringi e go spotoe nanga wan sma?

¹⁴ Son sma e firi dati sopi ben go teki wan toemsi bigi presi na ini den libi èn den e proeberi foe dat’ede foe kibri dati den e dringi bika den no wani taki den famiri ofoe mati kon sabi ofoeroe ofoe omeni den e dringi. Trawan e méne kande dati den no e anga foe sopi, ma tokoe a dringi de wan sani gi den di aladé den e loekoe na en. Sma na ini ala den toe groepoe disi, abi na bigi risico foe na wan bepaalde okasi foe dringi toemsi foeroe ofoe tron sopiman. Go prakseri na odo disi pikinso: „Win de wan spotoeman, dringi di e meki ai drai, de leki sek’sek-watra, èn ibri wan sma di verdwaal go na dati, no koni” (Odo 20:1). A tori e go foe disi dati wan sma foedi a go dringi toemsi foeroe kan kon so fara foe go handri leki sek’-sek-watra èn meki ensrefi de wan sani foe spotoe. Ma win ooktoe na wan tra fasi kan spotoe nanga wan sma. Wan sma di e denki dati a kan kibri a dringi foe en gi Gado, e ferdini spotoe.

15. A sortoe fasi den wortoe foe Paulus na ini 1 Korinte 9:24-27 kan gebroiki tapoe a dringi foe wan kristen foe sopi?

¹⁵ Wan foe den froktoe foe a jeje foe Gado de dwengi wisrefi, èn dati wi abi fanowdoe tapoe ala kontren foe na libi (Gal. 5:22, 23). Paulus ben teki na kristen gersi nanga wan strélonman. Na wan normaal wedstrijd na lonman e oefen foe dwengi ensrefi na ini ala sani soso „foe kisi wan kroon di e lasi gwe”. Na sotoe wan kristen moe sori „dwengi ensrefi na ini ala sani”, awinsi a de foe kisi wan moro diri prijs — LIBI. Paulus ben poti krakti a tapoe, dati wi moe ’tjari wi skin leki srafoe’ foe de séker dati den no poti wi na wan ofoe tra fasi na wan sé baka te wi ben préki gi tra sma’, foe eksempre foe wan kibri swakifasi ede tapoe na kontren foe sopi. — 1 Kor. 9:24-27.

16. Fa wan sma kan kon si efoe sopi ini en geval de wan swaki punt?

¹⁶ San kan jepi wan kristen foe kaba nanga na swakifasi disi? A de wan boen sani foe ferstan dati aladi wan droengoeman kan kibri en libifasi gi wan tra sma, a no kan kibri en gi Gado (1 Kor. 4:5). Soboen wan sma moe de eerlek na fesi foe Gado — ondrosoekoe en gwenti foe dringi (wi e bedoel dan a dringi foe a prisiri foe en ofoe foe na wroko di a e abi na tapoe en, no a dringi foe pikin hoeveelheid leki na dringi di de a gwenti na a ten foe njan.) Ma son sma kande e taki: ’Ma mi no a foe dringi nomonomo. Mi e abi prisiri gewoon foe en èn a e ontspan mi. Mi kan libi en ooktoe efoe mi ben sa wani.’ We, foe san-ede te joe loekoe den kefar di de foe dringi pasa marki ofoe a anga na sopi, no sa libi en foe wan ofoe toe moen dan? Ofoe, foe di wan tranga firi de foe taki dati a no de wan problema srefsrefi, joe ben sa kan teki na bosroiti foe libi a dringi foe wan moen langa ala ten efoe kon wi taki en normaal joe ben sa wani dringi. Wan sma di gewoonlek e dringi wan sani baka en wroko, bifo a go na bedi ofoe tapoe wan prisiri neti, foe eksempre ben sa kan tapoe foe doe disi. A kan loekoe fa a e firi ensrefi. Efoe ai firi dati a moeilek gi en ofoe no kan ontspan ensrefi, dan a e kon na krin dati a abi wan swakifasi di a no kan loekoe pasa en somaar.

17. Foe san-ede wan kristen di tapoe a punt foe sopi abi wan kibri swakifasi moe doe moeiti foe wini na swakifasi dati?

¹⁷ Te wan opregti kristen a fesi foe Gado e ferstan dati sopi de wan swaki punt gi en, dan a sa de moro makriki foe wini na swakifasi dati. A sabi kande kaba dati a bijbel e taki dati „wan sma sondro ferstan” e tak-go-tak-kon ’dati foefoeroe watra switi èn dati brede di e njan a kibrifasi [ofoe sopi di e dingi na kibrifasi] switi’. Ma Odo e taki dati dan sortoe sma disi te foe kaba sa de sondro makti ini dede. Na koni sma na a tra sé lobi pir’ai èn a e bréti dati en ’kan gwe libi na sma di no abi ondrofeni; a e tan libi foe di a e waka langalanga na a pasi foe na ferstan’ (Odo 9:1, 6, 8, 13-18). Ija, Gado e sorgoe foe ekstra jepi foe wini kibri swakifasi foe di a e meki oen kon sabi san a ten di e kon abi gi wi èn san sa de na kaba pisi te foe kaba.

Gado e pai persoonlek stap

18. Foe san-ede meki wi kan de nanga overtoigi te wi e wini wi kibri swakifasi? (Odo 24:12; 2 Sam. 22:25-27)

¹⁸ Son sma alaten de ini a frede dati sma ofoe Gado sa kon sabi den takroe gwenti foe den. Meki disi no de so nanga wi. Na presi foe dati meki wi libi nanga na ferstan dati wi no kan kibri noti gi En, „bika na troe Gado srefi sa tjari ibri sortoe wroko kon na ini kroetoe ini a tori foe ala sani san de kibri efoe a de boen ofoe takroe” (Prék. 12:14). Meki wi teki a jepi foe Jehovah foe wini den swakifasi foe wi, srefi kibri swakifasi. Dan wi kan loekoe na a ten te den kibrisani foe a doengroe sa tjari kon na krin èn „den prakseri foe na ati” sa kon a publiki. „Dan ibri wan sma sa kisi foe Gado en prijse.” — 1 Kor. 4:5; Rom. 2:6, 7, 16.

[Foetoewortoe]

Joe e memre den punt disi?

◻ Fa Gado e prakseri foe den kibri swakifasi di wi e proeberi foe wini?

◻ Sortoe rai foe bijbel e sori dati wi moe tan farawe foe zelfbevrediging?

◻ Fa wan kristen kan wini na gwenti foe zelfbevrediging?

◻ Ala di a bijbel no e kroetoe a gebroiki foe sopi, fa disi tog kan tron wan kibri swakifasi?

◻ Sortoe ferstan stap wan sma kan doe foe kan broko nanga wan kibri swakifasi tapoe na kontren foe dringi di abi sopi?

[Faki na tapoe bladzijde 5 nanga 12]

A ben tapoe nanga zelfbevrediging

C- leki jongoeman ben abi normaal seksueelfiri, ma a ben abi ooktoe wan problema. Foe sensi en tinadri jari a ben doe na zelfbevrediging (pré nanga en sjenpresi), a ben abi a gwenti foe doe en na ini en sribikamra te a ben de en wawan. A ben sjen pikinso foe dati, ma a ben feni dati a no ben doe no wan sma moro fara ogri nanga dati.

Na a ten foe en tinanégi jari a ben de wan gwenti di ben meki dipi roetoe. Wawantron a ben go bikti na en priester, ma ben kisi foe jere dati a de troe dati a de fowtoe, ma no so serjoesoe. Di C- ben go tron sroedati, a no ben abi foeroe okasi foe de en wawan. Foe dat’ede dati pikinso tron nomo dati a ben e masturbeer (pré nanga en sjenpresi), san ben wani sori, dati a gwenti di a ben abi na fesi, no ben kon foe wan tranga lostoe di joe no kan dwengi.

Di C- ben komoto ini na legre, a ben go baka na oso. A ben bigin foe bai fisti tijdschrift èn nanga disi a ben wiki en firi èn ben fadon go es’esi baka ini en owroe gwenti. Di a ben go libi tapoe ensrefi, a ben de wan makriki sani foe kisi seks boekoe di e wiki wan sma firi. Foeroetron a ben masturbeer difrenti tron ini wan dé.

Ne a bigin studeri na bijbel nanga wan bedinari foe Jehovah Kotoigi. Now di C- ben leri sabi a fasi fa Gado e si hoeroedoe, a ben bigin sjen foe dati, taki a ben bai fisti boekoe èn a ben wani broko nanga na gwenti foe zelfbevrediging. A ben proberi dati. Ma baka wan wiki ofoe toe a ben firi dati a ben kon span na seksueelsé, èn a ben tan tanapoe na wan koranti wenkri èn en firi ben wiki na seksueelfasi nanga den hoeroedoeboekoe. Te a ben doro oso dan a ben feni dati now di a ben misi tog, dati ooktoe a ben kan go moro fara. Baka te a ben doe zelfbevrediging konsens-fonfon ben kon. Noiti a ben sa kan broko nanga na takroe gwenti disi?

Te foe kaba C- taki nanga wan owroeman na jejefasi ini a gemeente. Na bedinari disi ben sori taki a e ferstan en èn jepi en foe soekoe materiaal di ben abi den fundamenti tapoe na bijbel, di ben sa jepi en foe meki a dwengi foe ensrefi kon moro bigi. Ooktoe na bedinari tjari kon na fesi:

’Joe moe ori na prakseri dati na lostoe de leki wan keti. Na fosi ai de pikin èn swaki. Ma ibri tra ai e kon moro bigi èn tranga. A so ai go nanga den sani di e wiki joe firi foe tjari joe go doe zelfbevrediging. Soboen so esi leki joe kan joe moe dwengi den firi. O moro langa a e go doro, o moro tranga joe lostoe e kon. Èn te foe kaba a de wan sani di no man tapoe moro. Proberi soboen foe broko na keti na a fosi ai. Èn sodra joe kisi a firi, GO DOE WAN SANI! Opo tanapoe èn go tanapoe tra fasi, èn krin joe soesoe, légi na dotikisi — a no abi trobi, efoe joe kan broko na ai nomo nanga dati. Joe ben sa kan go lési wan sani tranga, soleki a bijbel, ofoe tra kristen boekoe di e tjari joe prakseri go na ini krin pasi’.

Na bedinari disi ben tan aksi C- tapoe den komakandra fa a ben go, ben prijse en alaten èn ben gi en dek’ati foe tan stanfaste. Sébi wiki baka makandra C- ben man foe doe dati, ne tapoe na momenti di wan tra problema ben broeja en èn ben meki a las’ati, a ben fadon go baka ini a owroe gwenti èn a ben bai wantoe boekoe di ben e go foe lobi tori. Dati ben tjari en foe fadon go baka. Nanga den sortoe sani disi a ben lasi kontren baka. Ma na bedinari ben gi en dek’ati foe feti go doro. Safri-safri den pisten ben e kon moro langa, fosi négi wiki, dan baka dati tinasébi wiki, dan moro langa. Safrisafri ma séker en fertrow ben gro dati a ben sa man foe wini na kibri problema.

Te foe kaba C- ben si na tori na ondro ai dati Jehovah ben sabi ala sani san a ben doe. Efoe a ben wani dini Jehovah nanga wan soifri konsensi dorodoro, dan a ben moe poeroe na gwenti disi foe dat’ede krinkrin ini en libi. A ben man foe doe dati! Now a no e memre sref’srefi moro o langa a ben pasa kaba. C- ben kisi frantwortoe ini na gemeente, foe di a ben de wan boen eksempre leki kristen, èn a e meki plan foe bradi en dienst leki wan grani gi Gado. A de wan tra libisma.