Jezus libi nanga diniwroko

Den ben lon komoto foe na anoe foe wan ogr’ati man

FOE san-ede Jozef e wiki Maria leti na mindrineti? ’Jehovah engel djonsrode ben sori ensrefi na mi’, Jozef e taigi en. Èn a ben taki dati mi nanga joe nanga a pikin moe lowe go na Egypte, bikasi Herodes e kon soekoe Jezus foe kiri en.

Ala den dri sabi foe lon komoto gwe. Èn a ben de let na a jqisti ten bika Herodes ben jere dati den astroloog ben kori en èn ben gwe libi a kondre. Prakseri taki den ben moesoe go baka na en foe ferteri efoe den ben feni Jezus. Herodes ati e bron sref’srefi. Èn foe di a wani proeberi tokoe foe kiri Jezus, a e gi na komando dati ala pikin boi foe toe jari èn moro jongoe na ini a kontren foe Bethelehem den moe kiri. Na libimarki dati a ben teri na anoe foe den bodoi di a ben kisi foe den astroloog na a ten dati.

Na srakti foe ala den pikin boi de wan hogri sani! Den sroedati foe Herodes e pasa go foe na wan oso go na a trawan. Èn efoe den feni wan baby di de wan manboi, dan den e hari en poeroe foe na anoe foe en mama. Oen no sabi omeni baby den kiri, ma te wi loekoe a kré nanga babari foe ala den mama dati dan wan bijbel profétitori foe na proféti foe Gado, Jeremia, e kon troe.

Na ini a pisten disi Jozef nanga en osofamiri e doro Egypte heri boen èn drape den e libi now. Ma na wan neti Jehovah engel e kon baka na ini wan dren na Jozef. ’Opo èn drai go baka nanga Jezus èn en mama na Israël, bika den sma di ben proeberi foe kiri en, dede.’ Na so na osofamiri e drai go na den égi kondre, èn nanga dati ete wan bijbel profétitori e kon troe, wan profétitori di e taki dati a Manpikin foe Gado ben sa komoto foe Egypte.

A de krin dati Jozef abi na prakseri foe go libi na ini Judéa, pe den ben libi bifo den ben lowe go na Egypte. Ma a e jere dati Archeláüs, na goddelowsoe manpikin foe Herodes de kownoe now na ini Judéa èn Jehovah e warskow en baka na ini wan dren foe na gevaar. Foe dat’ede Jozef nanga en osofamiri e waka go na noordsé èn e go libi na ini a foto Nazareth. Na ini a kontren disi, fara foe na centrum foe na djoe kerki libi, Jezus e gro. Mattéus 2:13-23; Jeremia 1:15; Hosea 11:1.

◆ Sortoe ogri sani kownoe Herodes ben doe di den astroloog no ben drai kon baka, ma fa Jezus ben kisi kibri?

◆ Foe san-ede Jozef no ben go libi baka ini Bethlehem di a ben drai komoto foe Egypte?

◆ Sortoe bijbel profétitori ben kon troe na ini a pisten disi?