De eerlijk ini ala sani
„Wi abi na fertrow dati wi abi wan eerlijk konsensi, foedi wi winsi foe tjari wisrefi na wan eerlijk fasi ini ala sani.” — HEBREWSMA 13:18.
1, 2. (a) San psa na ini wi ten nanga eerlijkfasi? (b) Sortoe sma e meki a fowtoe foe oneerlijkfasi?
OWROESMA kan memre na ten ete dati den sma na foeroe presi na ini grontapoe no ben e sroto den doro. Den no ben e prakseri foe foefoeroe ofoe bedrigi tra sma. Efoe den ben leni moni, dan den ben e firi densrefi moreel ferplekti foe pai baka. Èn joe ben sa ’bow oso’ tapoe a wortoe foe den. Seker, oneerlijkfasi ben de, ma a no ala sani ben lai nanga en. Ma ini a ten disi foefoeroe, lé, nanga bedrigi alape na grontapoe de gewoon sani. Èn foeroe oneerlijk sani den sokari maniri sma e doe di e libi èn wroko ini wan krin birti, di e weri boen krosi, kande abi wan fasi foe bribi èn e si densrefi leki boen borgroe, ija, srefi tiri foe kondre nanga a bisnis libi ben kisi pornen nanga na oneerlijkfasi na mindri hé amtenari nanga hé lantiman.
2 Na ini den Verenigde Staten foe Amerkankondre dan ibri jari moro leki erfoe miljoen bigi ogridoe e psa pe oneerlijkfasi e pré wan rol. Èn ala jari moro leki $250 miljard di sma e wroko no e gi na lanti foe aksi belasting. Na metro foe na foto New York e tjari ala dé sowan 100.000 sma di no e pai. Wan amtenari ben taki dati efoe ala den bedrigiman disi skowtoe ben sa kisi den, „den kroetoe ben sa abi den anoe foeroe nanga wroko foe someni moen langa”. Na ini Japan kon na krin na wan ondrosoekoe na mindri sma di e pai belasting dati 95 procent, èn a mindri den joe ben abi 92 procent foe den afkati ben e meki wan falsi belasting papira. Na ini wán moen ten moro leki 16.000 sma di e waka nanga trein den ben kisi na tapoe rij sondro foe pai.
3. Fa ooktoe na ini na trowlibi oneerlijkfasi kon moro foeroe?
3 Ooktoe na ini na trowlibi na oneerlijkfasi kon moro foeroe. Wantoe jari psa kaba wan ondrosoekoe ben tjari kon a krin dati 30 procent foe den trowoema ini Amerika „e gi densrefi abra na seks dorosé foe na trow”. Na wan ondrosoekoe di no solanga psa kaba a mindri moro leki 100.000 trowoema, dan 50 procent ben piki taki „a moro pikinso wantron den ben abi wan afersi dorosé foe na trow”. Wan sma di e loekoe sani ben ferklari dati kande „90 procent foe den trowman” e bedrigi den trowpatna foe den.
A de wan marki foe den „lasti dé”
4. Foe san-ede a kon moro foeroe foe oneerlijkfasi no de wan ferwondroe sani gi wi?
4 A no de wan ferwondroe sani gi den dienstknegti foe Jehovah dati oneerlijkfasi kon moro foeroe. Den sabi dati na gro dati de wan pisi foe na marki foe den „lasti dé” disi. A Wortoe foe Gado ben taki a fesi foe wi ten: ’Den sma sa lobi densrefi nomo, sa lobi na moni, sa de deloyaal, sondro foe dwengi densrefi, sondro libi gi san boen, sa abi wan fasi foe a gi densrefi abra foe dini Gado, ma no sa sori taki den abi na krakti foe en, èn den sa kon moro ogri’ (2 Timóteus 3:1-5, 13). Wantoe sabiman ben erken dati den libisma na ini na grontapoe „e poti moro nanga moro den waarde foe boen nanga ogri leki fa den ben gwenti na wan sé èn no e poti jesi na a konsensi foe den”.
5. San ben psa di na ini na owroe tinlo-kownoekondre foe Israël so wan sortoe toestand ben de leki na ini wi ten?
5 Na toestand na ini na grontapoe foe tide de moro serjoesoe leki ini a ten leti bifo Jehovah ben tjari en kroetoe kon tapoe na owroe tinlo-kownoekondre Israël. Foe a ten dati Hosea 4:1-3 e ferteri: „Jehovah abi wan kroetoe nanga den sma di e libi na kondre, bika waarheid, nanga lobi boenfasi, nanga sabi foe Gado no de ini a kondre. Na taki foe floekoe èn a doe foe bedrigifasi èn kiri èn foefoeroe èn doe foe soetadoe, dati ben loesoe kon a doro, èn doe foe trowe sma broedoe ben miti tra doe foe a trowe foe sma broedoe. Foe dat’ede na kondre dompoe go ini sari èn ibriwan sma di e libi na ini sa moe dede gwe.” Na kroetoe foe Jehovah tapoe den ben kon na ini 740 bifo G.T. di a ben gi Assyria pasi foe waka psa tapoe Israël nanga en mamafoto Samaria èn foe tjari den sma di ben libi drape go na ini katibo.
6. Foe san-ede Jehovah sa tjari na kroetoe kon na tapoe na disiten seti, èn o faste a kroetoe dati sa de?
6 Na so Jehovah ooktoe abi „wan kroetoe” nanga na oneerlijk grontapoe. Na bijbel e tjari kon a krin dati Jehovah kroetoe en èn a sa „dede gwe” na ini na pori. „Den hemel nanga den grontapoe foe now poti a wan sé gi na faja èn den e kibri den gi na dé foe na kroetoe èn na pori foe den godelowsoe sma” (2 Petrus 3:7). So seker na kontroe foe disi de dati na Wortoe foe Gado e taki foe en leki a sani disi di o psa ben feni presi kaba. „Loekoe! Jehovah kon nanga en santa mirjarde foe tjari na kroetoe kon tapoe ala sma èn foe feni fowtoe na den godelowsoe sma ini a tori foe ala den godelowsoe wroko foe den di den ben doe tapoe wan godelowsoefasi”. — Judas 14, 15.
7. Nanga sortoe tjalansi Jehovah dienstknegti sa abi foe doe nanga den te leki a tjari wan kaba kon na a pori grontapoe disi?
7 Te leki Gado tjari na oneerlijk grontapoe disi na wan kaba, dan en dienstknegti sa moe libi na ini. Kristensma „de ini a grontapoe”, aladi, so Jezus ben taki „den no de wan pisi foe na grontapoe” (Johannes 17:11-14). Soboen den moesoe foe teki aladé moreel bosroiti tapoe na kontren foe eerlijkfasi. Ini disi joe abi situatie na wrokope, na skoro, ini na osofamiri ofoe na mindri mati. Gi ala tjalansi tapoe den konsensi di bijbel oefen dan Jehovah dienstknegti wani denki net so foe a tori leki na apostel Paulus di ben ferklari: „Wi abi na fertrow dati wi abi wan eerlijk konsensi, foedi wi winsi foe tjari wisrefi na wan eerlijkfasi na ini ala sani.” — Hebrewsma 13:18.
No soso ’na moro boen fasi foe waka nanga libi’
8. Foe san-ede eerlijkfasi de gi Jehovah dienstknegti wan fasi foe waka nanga libi?
8 Sma taki wan dé dati ’eerlijkfasi de a moro boenfasi foe libi nanga waka’, èn nanga dati den e bedoel dati eerlijkfasi e tjari praktis bakapisi kon. Ma gi kristensma moro de ini a tori. Gi den a de so dati eerlijkfasi de na wán enkri fasi foe libi nanga waka. Leki dienstknegti foe Jehovah den de ferplekti foe no waka na no wan fasi na baka na grontapoe disi di Gado kroetoe. Na a tra sé dan ala den doe foe den moe de moro nanga moro ini akroederi nanga den wet foe Gado. Èn den wet foe en no kenki ini a tori disi.
9. Fa Jehovah wet gi na owroe Israël ben poti krakti na tapoe eerlijkfasi?
9 Jehovah ben taki foe eksempre gi na owroe Israël: „Joe no mag doe soetadoe. Joe no mag foefoeroe. Joe no mag gi leki kotoigi wan falsi ferklari kontrari joe naaste. Joe no mag abi bigi-ai [foe noti] . . . foe san de foe joe naaste” (Exodus 20:14-17). Na so tanapoe ooktoe na ini Leviticus 19:11, 12: „Oenoe no mag foefoeroe èn oenoe no mag bedrigi, èn oenoe ooktoe no mag handri na wan bedrigifasi, soema ooktoe nanga en kondreman. Èn oenoe no mag sweri tapoe wan lé na ini mi nen, sodati oenoe doti na nen foe den Gado. Mi na Jehovah.”
10. Fa na kristendom e poti krakti na tapoe eerlijkfasi?
10 Den wet disi den e taki gi kristensma na ini tra wortoe. A Wortoe foe Gado e taki foe eksempre: „San! Oenoe no sabi dati onregtvaardiki sma no sa kisi na kownoekondre foe Gado? No kori oensrefi, no den hoeroeman, no den afkodréman, no den soetaman, no den man di den e abi foe doe sani kontrari na natuur, èn no ooktoe den man di e didon na man, no den foefoeroeman, no den gridiman, no den droengoeman, no den skempiman, no den man di e pers sani poeroe na sma skin sa kisi na kownoekondre foe Gado”; èn dati de ooktoe gi ibriwan sma di ’e meki lé de en wroko’ (2 Korinte 6:9, 10; Openbaring 22:15). Ala sma di wani libi na ini Gado njoen seti, moe sori den fasi foe en na ini den libi, èn wan foe den dati de dati „Gado no kan lé” (Titus 2:1; Hebrewsma 6:18). Na oneerlijkfasi e feni en bigin na Satan, „na tata foe den lé”. — Johannes 8:44.
11, 12. (a) Foe san-ede now kaba wi moe leri eerlijkfasi? (b) Foe san-ede wi e firi wisrefi dati wi de kibrikibri na ini na organisatie foe Gado di wan kan si?
11 Foedi na ini na „njoen grontapoe” di Gado pramisi ’regtvaardikifasi sa libi’ „meki a de regtvaardikifasi san den sma di o libi na tapoe na fatoe gron sa leri seker” (2 Petrus 3:13; Jesaja 26:9). Foe dat’ede meki „leri di e go foe den pasi foe Jehovah”, makandra nanga na pasi foe na eerlijkheid e gi now na a nomroe di e gro es’esi foe borgroe foe a ten di e kon foe na paradijs grontapoe (Jesaja 2:3, 4). A Wortoe foe Gado e gi wi foe dat’ede ooktoe na rai: „No lé gi makandra. Poeroe na owroesma nanga den doe foe en” (Kolosse 3:9). Boekoe taki ooktoe: „Soema e foefoeroe no moe foefoeroe moro, ma meki morofoeroe a wroko trmga, foedi a e doe boen wroko nanga en anoe, sodati a kan prati wan sani gi den mofinawan.” — Efese 4:28.
12 Soboen den dienstknegti foe Jehovah moesoe de eerlijk ini ala sani, Foedi na ini na njoen seti ala sma sa moesoe de eerlijk, meki a pipel foe Gado moesoe de dati now kaba. Èn fa a de wan prisiri sani foe de wan pisi foe na internationaal gemeenschap foe miljoenmiljoen sma di e kweki eerlijkfasi! Fa wi e firi wisrefi boen dati wi kibri na ini na jeje paradijs disi, di de wan froktoe foe a makti santa jeje foe Gado, „di Gado gi na den di e gi jesi na en leki Tiriman” (Tori foe den Apostel 5:32). Teki dati pikinso gersi nanga na ongesontoe jeje di soengoe go na ini na grontapoe disi di de na ondro „na gado foe na seti disi foe sani”, Satan Didibri. — 2 Korinte 4:4, Galacia 5:19-24.
Eerlijkfasi di tra sma e si
13, 14. Fa trawan ben gi kommentaar na tapoe na eerlijkfasi foe Jehovah pipel?
13 Na eerlijkfasi foe na pipel foe Gado nofotron tra sma e si. Na koranti El Piccolo na ini Italië foe eksempre ben tjari wan brifi kon a doro foe wan lésiman pe ben tanapoe: „Mi wani taki sote grantangi na a oema di ben pristeri ensrefi leki wan foe Jehovah Kotoigi èn di ben sori eerlijkfasi leki wan eksempre foedi nanga jepi foe na koranti disi ben seni go baka gi mi wan boen bigi pisi moni di mi ben lasi.” Na ini den Verenigde Staten na The Indianapolis Star ben skrifi foe wan kotoigi trowpaar di ben feni $4000 èn ben gi dati baka na na éginari. Na koranti ben ferklari dati na trowpaar no ben degedege srefsrefi san den moe doe. Foe san-ede? Den ben taki: „Wi no ben kan hori en. Wi de Jehovah Kotoigi.”
14 Di wan Kotoigi na ini Missouri ben feni $9500 èn ben tjari a moni go na skowtoe dan wan koranti ben skrifi san wan skowtoe ben taki: „Na wan sani di joe no e si foeroetron dati wan sma feni someni moni èn e tjari en kon na skowtoe. Sofara mi kan memre dan noiti ete afesi wan sma ben kon di ben doe sowan sani. A ben de troetroe wan ferwondroe sani.” Na artikel ben ferteri dati na Kotoigi „no ben prakseri no wan momenti foe hori na moni”. Na skowtoe di ben e doe wroko ben taki dati na kotoigi „ben gi en a bribi baka dati a mindri na libismafamiri eerlijk sma de te now ete”. Na Kotoigi ben taki tapoe disi nanga den wortoe: „Wi leki pipel e si en leki wan grani foe de eerlijk na alafasi.”
15, 16. Sortoe ondrofenitori e sori dati eerlijkfasi, srefi ini pikinsani, tra sma e si en?
15 No wawan na ini bigi sani wi moe de eerlijk. Eerlijkfasi de ooktoe na ini pikin sani (Lukas 16:10). Di foe eksempre wan osofamiri foe Kotoigi ben tan na ini wan hotel na ini Florida, dan en manpikin ben teki wan koensoesropoe go nanga en sondro foe a ben sabi, èn di a ben si leki en empi. Na osofamiri seni en go baka na a hotel èn a hotelman ben skrifi: „Mi wani taki joe tangi sote foe joe eerlijkfasi. Aladi a seni foe na koensoesropoe pikinmoro joe e si leki wan kewoon sani foe grontapoe, tokoe a ben de wan sani gi wi foe prijse.” Èn di wan Kotoigi trowpaar ben teki wan pen per vergissing gwe nanga en foe wan hotel ini Georgia èn ben seni en go baka, a hotelbasi ben skrifi: „Meki mi taki joe tangi dati joe ben teki a ten foe seni a pen kon baka di joe ben poti ini den égi sani foe joe per vergissing. A wan sani di e gi joe kowroe ati foe kisi foe den sortoe eerlijk sma disi di e poti prakseri tapoe trawan brifi soleki di foe joe.”
16 Wan boi ini vijfde klas foe lagi skoro, wan Kotoigi, ben de a skoro e pré honkbal. A ben de wan span momenti inia wega, ma a pikin brada foe wi ben sabi dati a ben de „out”. Den boi foe a team foe en di ben e pré ben proeberi foe taki dati a no ben de „out”. Ma ne wan sma foe a tra partij ben taki dati wán fasi de di no kan misi foe kon sabi na waarheid. A ben taki: „Aksi en efoe a ben de out ofoe no. A de wan Kotoigi èn Kotoigi no e lé”. Na boen waka nanga libi foe na boi ini aladé sani den trawan ben si. Troetroe, te joe e libi akroederi den markitiki foe Gado dan srefi „komoto foe na mofo foe pikinnengre” Jehovah ben sreka prijse. — Mattéus 21:16,
17, 18. Sortoe boen krakti den gronprakseri foe Jehovah di e go foe eerlijkfasi sa abi tapoe sma nanga wan boen ati?
17 Na ini Nigeria na masra foe wan Kotoigi no ben wani kwetkweti dati na oema ben go na wan kringkomakandra. Foe datmeki a ben waka na en baka go drape èn a ben proeberi foe meki wan sani psa. Baka na programma a man ben taki na ensrefi: „Now mi sa tesi oen pikinso, Kotoigi!” Di no wan sma ben e loekoe a ben teki moni foe en saka poti marki a tapoe, kroikikroiki en pikinso èn meki a fadon na gron. Bakaten a ben ferteri dati a ben lasi en moni. Ma a ben kisi foe jere dati a no ben moesoe de ongerostoe, ma dati a ben sa feni en baka. A ben go baka na a presi pe a ben meki a moni fadon ma a no ben de moro. „Aha,” a ben taki, „now mi ben kisi oenoe tapoe oen oneerlijkfasi.” Ne den ben ferteri en dati a moni no ben de drape moro, ma ben tjari go na na afdeling Sani di feni. Na moni di a ben marki troetroe, ben de drape na na afdeling dati èn den ben gi en baka. Na ondrofenitori disi ben gi en dekati foe ondrosoekoe san en oema ben e bribi èn now a de wan foe Jehovah Kotoigi.
18 Na ini wan brifi di skrifi go na na internationaal edekantoro foe Jehovah Kotoigi ini New York, wan oema di no ben de wan Kotoigi ben taki, dati a ben wani ferteri sote san ben psa nanga en oemapikin na skoro. Wan dé den ben foefoeroe wan diri sani di den e weri na wan asi-ede foe tjari na asi. Toe jari na baka na oemapikin ben kisi wan brifi di ben taki so: „Lobi Lili, djaso na sani de di wan asi e weri na en ede foe tjari en èn di 2 jari pasa kaba mi ben foefoeroe. Mi ben teki en, ma now mi de wan Kotoigi foe Jehovah èn mi njoen konsensi no e gi pasi foe mi hori en. Mi e sari foe dati srefsrefi. Gi mi grantangi pardon.” Ija, den di wani dini Jehovah, moesoe kweki wan „eerlijk konsensi”, „foedi wi winsi foe tjari wisrefi na wan eerlijkfasi na ini ala sani”. — Hebrewsma 13:18.
Hori na organisatie krin
19. Efoe wan kristen doe wan oneerlijk sani san a moe doe dan?
19 Efoe wan dienstknegti foe Gado no foe espresi doe wan oneerlijk sani, dan a moe meki esi foe poti na afersi reti, so esi leki a kon sabi dati of efi sma e poti en prakseri a tapoe. Èn efoe wantoe sma a mindri oenoe e lasi den warderi foe den gi bijbel gronprakseri èn e tan hori doro na oneerlijk fasi, dan den no sa kisi pasi foe doti a pipel foe Gado. Den sa poti den a dorosé foe na gemeente (1 Korinte 5:11-13). Wi kan bribi a tapoe na jepi foe hemel, bika Jezus ben taki: „Na Manpikin foe libisma sa seni en engel go èn ala sani di e meki sma naki foetoe fadon èn den sma di e doe kroektoedoe den sa tjari poeroe foe en kownoekondre . . . Na ini a ten dati den regtvaardikiwan sa skijn so krin leki na son ini na kownoekondre foe a Tata foe den.” — Mattéus 13:41-43.
20, 21. (a) Foe san-ede nanga foeroe fertrow wi kan kari safri-ati sma kon foe anbegi Jehovah makandra nanga wi? (b) Sortoe tra pisi foe eerlijkfasi wi sa taki foe en na ini na tra artikel?
20 Tapoe a fasi disi Jehovah organisatie e hori krin. Leki wan bakapisi foe disi a e skijn krin, leki wan marki gi opregti sma. Foe dat’ede wi e taki nanga foeroe fertrow gi safri-ati sma foe na grontapoe: „Oen kon, èn meki oen go na na bergi foe Jehovah [na hé presi ofoe positsi foe na troe anbegi] . . . èn a sa leri wi foe den pasi foe en, èn wi sa waka en pasi.” — Micha 4:2.
21 Foedi Jehovah dienstknegti moe proeberi foe de eerlijk na ini ala sani, dan disi a no de foe taki abi foe doe ooktoe nanga den bisnis kroederi foe den nanga tra Kotoigi. Ooktoe dja sani kan sori densrefi pe na eerlijkfasi foe wan sma kan kon tapoe tesi. San na wantoe foe den tjalansi dati? Fa wi moe kakafoetoe gi den? Na ini a tra artikel na pisi disi foe eerlijkfasi wi sa go taki foe en.
Aksi foe loekoe san wi ben leri
◻ San pasa na ini wi ten nanga eerlijkfasi? Fa dati doe kon?
◻ San a Wortoe foe Gado e taki foe na fanowdoe foe eerlijkfasi?
◻ Foe san-ede wi moe kweki eerlijkfasi ete bifo na kon foe na njoen seti?
◻ Sortoe ondrofenitori e sori na waarde foe eerlijkfasi?
◻ Sortoe djaranti de dati a mindri wi wi moe hori anoe na eerlijkfasi?
[Prenki na tapoe bladzijde 4]
Nownow kaba den borgroe foe a ten di moesoe kon ete foe Gado njoen seti foe sani e kisi leri foe Jehovah pasi foe eerlijkfasi