Angriten di e tjari dede kon ini wan ten pe njanjan de psa marki
„Mi knegti sa njan, ma oenoe sa pina foe angri.” — JESAJA 65:13.
1, 2. (a) Nanga sortoe problema den natie e feti nanga en sondro foe abi winimarki? (b) Tapoe sortoe troetroe howpoe a bijbel e sori?
NA spoekoe prenki foe angriten e opo ensrefi leki wan skreki sani tapoe na heri grontapoe! Na ini wan kommentaar tapoe na moeilijk ten den ben taki ini wan artikel ini na Boston Globe: „Wan grontapoe na ini san pikinmoro wan miljard sma e libi na a lanki foe angri, moesoe feni troetroe foe jepi den moro pina natie, kon wi taki na ini wan seker marki foe prisiri na ini na njanjan di de psa marki na ini san den goedoe natie e prisiri.” Ma srefi den sokari technisch ontwikkeld natie no kan taki dati den mankeri foe njanjan no de kwetkweti. Ooktoe den kondre disi no ben si kans foe meki wan programma nanga san na djaranti e gi dati ala den borgroe foe den sa abi nofo njanjan. Sma, di a sociaal libi foe tra sma e seki den, feti nanga a probleem disi di e gro. Wan loesoe de?
2 Na artikel di kari dja na tapsé ben erken: „Na sani di e meki joe lasi moro ati ini a tori foe no kisi nofo njanjan . . . de dati grontapoe a no de foe taki abi na capaciteit foe gi njanjan na ala sma.” Tokoe na krawasi foe angriiten nanga mankeri foe njanjan e hari go a fesi. Fa dati doe kon? Wi lobi Mekiman ben sorgoe psa marki foe na fanowdoe foe ala den miljardmiljard sma di e libi na grontapoe. Di a ben sreka na grontapoe leki na libipresi foe libisma, a ben gi en na krakti foe meki njanjan psa marki moro leki de fanowdoe gi ala sma (Psalm 72:16-19; 104:15, 16, 24). Srefi na ini den sariten disi wi abi na djaranti dati wi bigi Sorgoeman sa gi nofo njanjan na den di e loekoe na a joisti Fonten. Nanga jepi foe na Sma di a ben gi leki na bigi Man di e loekoe njanjan, a ben ferteri wi: „Tan soekoe na kownoekondre nanga [Gado] regtvaardikifasi fosi, èn ala den tra sani disi [en fanowdoe sani foe tan a libi] joe sa kisi a tapoe.” — Mattéus 6:33; 1 Johannes 4:14.
Wan angriten di e tjari dede kon
3. Sortoe angriten de foe a moro bigi betekenis èn fa den ben taki foe disi a fesi?
3 Foe na moro prenspari sani na grontapoe ini a ten disi de na sari jeje-angriten. Disi abi langalanga foe doe nanga na mankeri foe vrede. Na libismafamiri e waka lontoe nanga degedege, e soekoe wan pasi foe komoto. Foeroe jarhondro psa kaba na Almakti Gado ben boewégi en proféti foe skrifi foe na situatie disi nanga den wortoe: „’Loekoe! Dé e kon,’ na so na Soeverein Masra Jehovah e taki ’èn seker mi sa seni wan angriten go ini na kondre, a no wan angri foe brede, èn a no wan dréwatra foe watra, ma foe na jere foe den wortoe foe Jehovah. Èn seker den sa waka foe se go miti se, èn foe a Noordsé te na pe son e opo. Den sa tan go drape èn jana foe soekoe a wortoe foe Jehovah, ma den no sa feni en.’” — Amos 8:11, 12.
4, 5. (a) Foe san-ede foeroe sma no o feni Gado aladi den e soekoe en? (b) Fa Jezus ben de wan bigi kontrari nanga den kerkitirimn foe en ten?
4 Wan pasi de foe komoto na ini na moeilijk situatie disi? Ija, na apostel Paulus di e gi dek’ati e piki nanga den wortoe: „Na Gado di meki grontapoe . . . ben poti den faste ten nanga faste grens foe den libipresi foe den libisma so dati den ben kan soekoe Gado, efoe den kan firfiri èn ben sa feni en troetroe, aladi te joe e loekoe en boen a no de fara foe ibriwan foe oenoe.” — Tori foe den Apostel 17:24-27.
5 Efoe Gado „no de fara foe ibriwan foe wi”, foe san-ede foeroe sma e firfiri en ma no e feni en? Dati doe kon foedi den e soekoe en tapoe den fowtoe presi. Omeni sma di e kari densrefi kristensma, e go loekoe persoonlijk a fundamenti anoeboekoe foe na kristendom, na bijbel? Omeni sokari „herder” e gebroiki a wortoe foe Gado foe leri den „skapoe”? (Teki gersi nanga Ezechiël 34:10.) Jezus ben taigi den hémemre kerki tiriman foe en ten dati den no ben sabi den Boekoe èn na krakti foe Gado (Mattéus 22:29; Johannes 5:44). Ma Jezus ben sabi den Boekoe èn a ben leri sma den ooktoe, nanga soema a ben abi sari „foedi den ben foefoeroe den èn drifi den go kon leki skapoe sondro herder”. — Mattéus 9:36.
Na sortoe fasi wan ten foe njanjan psa marki
6. Sortoe djaranti di e gi korostoe Jehovah e gi en dienstknegti ini a tori foe a jeje njanjan psa marki?
6 Den sma di e proeberi opregti foe leri sabi Jehovah, e kisi tranga foe en èn de seker foe a sorgoe foe en ooktoe. Te ai pir’ai gi den falsi kerki herder, a e taki nanga mofo foe en proféti Jesaja: „Loekoe! Mi knegti sa njan, ma oenoe sa pina foe angri. Loekoe! Mi knegti sa dringi ma oenoe sa pina dréwatra! Mi knegti sa prisiri, ma oenoe sa kon redi foe sjen” (Jesaja 65:13, 14). Ma fa Gado e sorgoe ini njanjan psa marki gi en égi dienstknegti? San wi moe doe foe gebroiki na wan prisiri fasi na sorgoe di a ben seti foe hori wi a libi, awinsi a disiten jeje angriten de?
7. Sortoe drama foe owroeten tapoe wan lobifasi e gi wi na ini a ten disi dekati?
7 Foedi den sa feni wi boen soso foe kan psa libilibi te wi sabi den sani di Gado e aksi èn e handri nanga bribi ini akroederi nanga dati, dan wi moe go nanga ala prisiri na a Wortoe foe Gado foe proeberi foe kon sabi san en wani de gi wi èn foe si fa a e handri ini a boen foe wi (Johannes 17:3). Te nanga dja wi wani loekoe wan bijbeldrama na ini san wi o feni akroederi nanga sani di e psa na ini a ten disi. Na mama persoon ini a drama disi de na famiri-edeman Jozef. Soleki Jehovah nanga jepi foe Jozef ben seti koni sani gi en pipel, na so tapoe wan lobifasi ai sorgoe ini tiri gi den sma di e soekoe en ini a ten disi. — Teki gersi nanga Romeini 15:4; 1 Korinte 10:11, Ingrisi NW-Verwijsbijbel 1984 voetnoot (*); Galacia 4:24.
Tan a libi nanga jepi foe Jozef
8, 9. (a) Soema e kroederi nanga Jozef èn nanga Jakob èn Farao ini den ten a baka? (b) Fa wi kan abi foe doe srefi nanga a kontroe?
8 Ini a tori foe na afersi foe tan a libi dan a manpikin foe Jakob, Jozef ben pré wan aparti rol. Disi de wan prenki foe wan sani san ben sa sori ensrefi ini den bakapisiten? We, loekoe pikinso fa Jozef ben hori doro ondro na no-ferdini behandeling di a ben kisi foe ferdrage foe en brada, fa a ben kakafoetoe gi moeillijkheid èn tesi na ini wan vreemde kondre, fa a ben sori wan bribi di no ben seki, fa a ben hori tranga na en soifri-retifasi, èn fa a ben opo go na hé ini na positsi foe wan koniman di e loekoe sani ini wan ten foe angriten di ben de wan rampoe (Genesis 39:1-3, 7-9; 41:38-41). Wi no e si wan akroederi ini a libifasi foe Jezus?
9 Jezus ben moe ferdrage foeroe pina foe tron na brede foe libi a mindri foe wan grontapoe di e angri „foe jere den wortoe foe Jehovah” (Amos 8:11; Hebrewsma 5:8, 9; Johannes 6:35). Jakob èn Farao e meki wi prakseri na Jehovah ini na matifasi foe en nanga Jozef èn na a sani di a ben meki doe kon nanga jepi foe en manpikin (Johannes 3:17, 34; 20:17; Romeini 8:15, 16; Lukas 4:18). Trawan ben de ooktoe di ben teki prati na a pré foe na troetroe drama disi, èn wi sa loekoe den rol foe den nanga belangstelling. A drama e memre wi, èn dati no de foe taki a wi égi afhankelijkheid foe na moro bigi Jozef, Kristus Jezus. Fa wi de nanga tangi dati a e kibri wi gi na angriten di e tjari dede kon na ini den „laatste dé” disi di e kon moro takroe! - 2 Timóteus 3:1, 13.
A drama e bigin pré
10. (a) Fa den ben sreka Jozef a fesi tapoe na frantwortoe rol di a ben sa go pré? (b) Sortoe égifasi a ben sori ini en jongoe jari?
10 Ini a ten foe Jozef nowan sma ben kan sabi a fesi san Jehovah ben abi na ini prakseri gi en pipel. Ma na a ten di Jozef ben kisi kari foe go doe en rol foe kibri libi dan Jehovah ben gi en leri kaba èn ben meki den koni foe en kon de volmaakti. A verslag foe en jongoe jari e taki: „Di Jozef ben de tinasébi jari, a ben loekoe den skapoe a mindri den pikinmeti wan dé nanga en brada èn foe di a ben de wan boi ete, meki a ben de nanga den manpikin foe Bilha èn den manpikin foe Zilpa, den oema foe en papa. Jozef dan ben tjari wan takroe njoensoe foe den go na a papa foe den” (Genesis 37:2). A ben sori dati a ben de loyaal na den belang foe en papa, netleki Jezus di sondro foe seki ben de loyaal ini a loekoe foe na ipi foe en Tata a mindri foe wan „gesiagti di no ben e bribi èn di ben kron”. — Mattéus 17:17, 22, 23.
11. (a) Foe san-ede Jozef afoe brada ben abi ogri-ati gi en? (b) Fa ini a geval foe Jezus wan sortoe srefi situatie ben kon?
11 A papa foe Jozef, Israël, ben lobi en moro leki ala en brada èn ben sori en boenati foedi a ben meki den meki wan langa, strepi empi krosi gi en. Foe dat’ede meki den afoe brada foe Jozef ben go „abi ogri-ati foe en, èn den no ben kan taki nanga en tapoe wan vredefasi”. Den ben feni moro rede ete foe abi ogri-ati foe en di a ben kisi toe dren, akroederi na uitleg foe den, ben wani taki dati a ben sa tiri tapoe den. Na asrefi fasi den djoe tiriman ben go abi ogri-ati foe Jezus foe en loyaalfasi ede, foe en leri di overtoigi sma èn foe a krin boewijsi ede de dati Jehovah blesi ben de tapoe en. — Genesis 37:3-11; Johannes 7:46; 8:40.
12. (a) Foe san-ede Jakob ben broko en ede foe a tan boen foe en manpikin? (b) Sortoe akroederi wi e si ini Jozef libi èn di foe Jezus?
12 Wan pisten a baka Jozef brada e tjari den skapoe na ini a birti foe Sichem. Jozef papa nanga leti ben broko-ede bika tapoe a presi dati Sichem nanga tranga ben go didon na Dina nanga na bakapisi taki Simeon nanga Levi makandra nanga den brada foe den ben kiri den man foe a foto dati. Jakob ben aksi Jozef foe go drape foe si efoe den e meki en boen èn dan kon ferteri en fa sani de. Aladi den brada foe Jozef ben abi wan feanti fasi nanga en tokoe a ben go wantewante go soekoe den. Na asrefi fasi Jezus ben teki nanga prisiri a wroko foe Jehovah dja na grontapoe tapoe en, awansi disi ben sa wani taki gi en hebi pina ini ala na ten di a ben tjari kon de volmaakti leki na moro prenspari wrokoman foe jepi. Fa Jezus ben tron wan moi eksempre gi wi alamala nanga na horidoro foe en! — Genesis 34:25-27; 37:12-17; Hebrewsma 2:10; 12:1, 2.
13. (a) Fa Jozef afoe brada ben sori den ogri-ati firi foe den? (b) Nanga san wi kan teki na sari foe Jozef gersi?
13 Jozef tin brada ben si en farawe kaba e kon. Wantewante na atibron foe den tege en kon a tapoe, èn den meki wan komplot foe poeroe en a pasi. Fosi den ben abi na plan foe kiri en. Ma Ruben, foe a broko-ede foe na frantwortoe foe en leki fosi geborewan, ben tjari den kon tapoe a prakseri foe trowe Jozef go ini wan dréwatrapeti, nanga na prakseri foe kon bakaten baka èn foe loesoe en. Ini ala a pisten dati Juda tjari den brada foe en go so fara foe seri en leki srafoe na wantoe Ismaëlsma di joisti ben e psa nanga a karavaan foe den. Morofara den brada foe Jozef ten teki en langa krosi èn dipi en go ini na broedoe foe wan krabita èn ben seni en go na a papa foe den. Di Jakob ben ondrosookoe na krosi a ben bari taki: „A de a langakrosi foe mi manpikin, wan ogrimeti ben moesoe priti en! Jozef sekerseker priti na pispisi!” Net so wan sortoe sari Jehovah ben moe firi foe na pina di Jezus ben ondrofeni di a ben klari en wroko na grontapoe. — Genesis 37:18-35; 1 Johanes 4:9, 10.
Jozef ini Egypte
14. Fa na drama disi foe owroeten kan de wan wini gi wi?
14 Wi no moe teki na bosroiti dati na kontroe foe den sani ini na drama di ben de lontoe Jozef ini nasrefi volgorde baka makandra ben feni presi. Morofoeroe wi e feni drape na ini owroeten wan lo foe patron di e dini wi ini a ten disi leki leri nanga dekati. Soleki na apostel Paulus e ferklari: „Ala sani di ben skrifi fosten, den ben skrifi foe leri wi sodati nanga jepi foe wi horidoro nanga jepi foe den trowstoe foe den Boekoe wi ben sa abi howpoe. Meki now na Gado di e gi horidoro nanga trowstoe gi dati a mindri makandra oenoe abi nasrefi jejefasi di Kristus Jezus ben abi, sodati nanga wan mofo èn ini wanfasi oenoe mag gi grani na a Gado èn Tata foe wi Masra Jezus Kristus.” — Romeini 15:4-6.
15. Foe san-ede Jozef nanga na oso foe Potifar ben kisi blesi?
15 Den ben tjari Jozef go na Egypte èn drape den ben seri en na wan Egypte man di ben nen Poifar, èn di ben de na edeman foe den sroedati di ben e loekoe Farao. Jehovah ben sori taki a ben de nanga Jozef bika a no ben drifi foe den toemsi boen gronprakseri di en papa ben poti go na ini en, awinsi a ben de farawe foe na oso foe en papa. Jozef no ben drai baka gi na anbegi foe Jehovah. En meester, Potifar ben kisi warderi gi den toemsi aparti égifasi foe Jozef, sodati a ben poti en tapoe en heri oso. Jehovah ben tan blesi na oso foe Potifar foe Jozef ede. — Genesis 37:36; 39:1-6.
16, 17. (a) Fa Jozef ben doe tapoe wan tra tesi di ben kon tapoe en soifri-reti fasi? (b) Fa na ondrofeni foe Jozef ini na straf’oso e sori dati Gado ben tiri den afersi?
16 Na so a situatie ben de di Potifar oema ben proeberi foe kori Jozef. A ben tan wégri. Na wan boen dé a oema ben graboe en hori na en krosi ma a ben lon gwe aladi a ben libi a krosi foe en baka ini na anoe foe a oema. A oema ben kragi Jozef na Potifar foe hoeroedoefasi di a ben tjari kon na en, èn Potifar ben meki den trowe Jozef go na ini na straf’oso. Wan heri pisten den ben hori en drape na ini isri boei. Na ini ala den ongolokoe di na ondrofeni foe en ben tjari kon na ini na straf’oso, tokoe Jozef ben tan boewijsi dati a ben de wan man foe soifri retifasi. Foe dat’ede meki na edeman foe na straf’oso ben poti en leki edeman foe ala strafoeman. — Genesis 39:7-23; Psalm 105:17, 18.
17 Baka wan pisten na edeman foe den man di e kanti win gi Farao èn na edeman foe den bakriman ben lasi a boen-ati foe Farao èn den trowe den go na ini na straf’oso. Jozef ben kisi a wroko foe dini den. Agen Jehovah ben drai sani kon poti leki fa en wani. Den toe man foe a kownoe-oso ben kisi dren di den no ben sabi fa foe doe nanga den. Bakadi Jozef nanga krakti ben ferklari dati ’tjari sani kon a krin de wan afersi foe Gado’, a ben ferteri san den dren ben wani taki. Èn joisti soleki Jozef ben tjari kon a fesi, dan dri dé a baka (tapoe a frijaridé foe Farao) a man di e kanti win ben poti baka na ini en wroko, ma na edeman foe den bakriman den ben anga. — Genesis 40:1-22.
18. (a) Fa a ben doe kon dati den ben go prakseri Jozef baka? (b) San ben de grofgrofoe na inbere foe den dren foe Farao?
18 Aladi Jozef ben begi na man di e kanti win foe taki wan boen wortoe gi en na Farao, tokoe toe jari ben psa bifo na man ben prakseri Jozef baka. Èn srefi dan dati ben kon wawan, foedi Farao ini wan neti ben kisi toe tron wan dren di ben broeja en. Di nowan foe den priester foe a kownoe di ben e doe magi ben man foe poeroe san a wani taki, na man di e kanti win ben ferteri Farao dati Jozef ben kan tjari dren kon a krin. Dati meki Farao ben seni teki Jozef di nanga sakafasi ben sori tapoe na Fonten foe troe uitleg di a ben taki: „Gado sa meki san boen bekenti gi Farao.” Na tiriman foe Egypte nanga den wortoe di e kon now ben ferteri Jozef foe den dren:
„Loekoe, . . . mi ben tanapoe na a sjoro foe a liba Nijl. Èn loekoe foe a liba nijl sébi kaw opo kon a tapoe, den ben fatoe èn moi èn den go njan grasi ini na grasi foe na Nijl. Èn loekoe baka den disi sébi tra kaw opo kon a tapoe, mangri èn takroe èn dré. So takroe leki den disi mi no ben si den noiti ete na ini Egypte. Dan den mangri èn takroe kaw ben njan den fosi sébi fatoe kaw. Soboen den disi kon na ini a bere foe den, èn tokoe wan sma no ben kan si dati den ben kon na ini na bere foe den, foe di a dorosé foe den skin ben de net so takroe leki na ini na bigin . . .
Bakadati mi si ini mi dren, èn loekoe, sébi tiki alési gro komoto foe won bosoe, den span èn boen. Èn loekoe baka den disi sébi dré èn mangri tiki alési gro di na oostoewinti ben bron. Ne den dré tiki alési swari den sébi boen tiki alési. Mi ben ferteri soboen den sani disi na den priester di e doe magi, ma nowan sma ben de di ben kan poeroe den gi mi.” — Genesis 40:23—41:24.
19. (a) Fa Jozef ben sori sakafasi? (b) Sortoe boskopoe ben tjari kon abra nanga na tjari kan na krin foe den dren?
19 Fa disi de aparti dren! Fa wan sma ben sa kan poeroe dati now? Jozef ben man foe doe disi, ma no foe ensrefi kisi a grani. A ben taki: „A dren foe Farao de soso wán dren. San na troe Gado e doe a ben meki Farao si” Morofara Jozef go abra nanga den wortoe di e kon now foe tjari kon a krin sortoe kefarlek bigi proféti boskopoe den dren dati ben tjari kon abra:
„Loekoe, sébi jari e kon foe foeroe njanjan psa marki ini heri Egyptekondre. Ma baka den disi seker sébi jari foe nngriten sa doro, èn ala na foeroe njanjan psa marki ini a kondre Egypte sma seker sa frigiti èn a angriten sa njan eenvoudig na kondre. . . . Èn dati foe toe tron ben taki foe a dren gi Farao, wani taki dati na afersi disi de faste na a troe Gado, èn a troe Gado e haasti ensrefi foe doe disi.” — Genesis 41:25-32.
20, 21. (a) Fa Farao ben doe tapoe na warskow? (b) Fa wi kan teki Jozef gersi nanga Jezus ini na pistori foe den sani di psa?
20 San Farao ben sa kan doe nanga na angriten disi di ben de wan bigi kefar? Jozef ben rikomanderi Farao foe poti wan vorsigti èn koniman abra a kondre, foe sreka sani foe poti san tan abra foe a njanjan di koti, foe den boen jari ini maksin. Ala a pisten dati Farao ben si den aparti ègifasi foe Jozef. Farao ben teki en égi zegellinga foe en anoe èn ben poti en na a anoe foe Jozef èn na sofasi a ben poti Jozef abra na heri kondre Egypte. — Genesis 41:32-46.
21 Jozef ben de dritenti jari di a ben tanapoe a fesi Farao. Net so owroe leki Jezus Kristus na a ten di a ben teki dopoe èn ben bigin nanga en diniwroko di bô gi libi. Na tra artikel sa meki oen si fa Jehovah ben gebroiki Jozef leki wan prenki foe Jehovah „Moro Prenspari Sma di a gi makti èn Jepiman” ini wan ten foe angriten, moro spesroetoe ini a tori foe a ten ini san wi e libi. — Tori foe den Apostel 3:15; 5:31.
San na a piki foe joe?
◻ Na sortoe toe fasi na angriten ini a ten disi de wan kefar?
◻ Sortoe toe moi égifasi Jozef ben kweki aladi a ben de makandra nanga en afoe brada?
◻ San wi kan leri foe den fosi ondrofeni foe Jozef ini Egypte?
◻ Sortoe djaranti wi abi tapoe gron foe a sorgoe foe Jehovah gi Jozef èn na pipel di angriten ben kon a tapoe den?