Wan ten foe tesi èn foe poeroe san boen a mindri san no boen

„Èn wantewante sa kon na en tempel na troe Masra, di oenoe e soekoe, èn a boskopoeman foe na ferbontoe . . . Èn a moe sidon leki wan sma di e krin sani.” — MALEACHI 3:1, 3.

1, 2. (a) Sortoe toestand ben de a mindri Gado pipel ini na di foe féfi jarhondro bifo G.T.? (b) Foe san-ede a profétitori foe Maleachi moe abi na belangstelling foe wi?

„PE NA Gado foe geregtigheid de?” Den sma di ini a ten dati na ini a di foe féfi jarhondro bifo wi G.T. ben aksi na tjalansi aksi disi, ben taki ooktoe: „A no abi waarde foe dini Gado.” Na porifasi di ben de na kerkisé nanga moreelsé a mindri Gado en égi pipel, den djoe, ben meki dati sma ben loekoe nanga degedege na a geregtigheid foe Gado. Ma den ai foe na troe Gado, di no e sribi, ben de tapoe den. Èn a ben gi na Hebrewproféti Maleachi na komando foe ferteri den dati wan wroko foe krin sani, wan ten foe tesi, èn foe poeroe san boen a mindri san no boen, ben de a den fesi. Den ben sa kon sabi, „pe na Gado foe geregtigheid” ben de te wantronso a ben kon foe kroetoe sani! — Maleachi 2:17; 3:1, 14, 15.

² A profétitori foe Maleachi moe de moro leki foe historia belang gi wi. Foe san-ede? Foedi a de krin dati a abi wan kontroe na ini wi ten (Romeini 15:4). Ija, Jehovah disiten pipel e psa wan ten foe tesi èn foe poeroe san boen a mindri san no boen! Fa so? Wan finifini ondrosoekoe foe Maleachi profétitori sa jepi wi foe feni a piki.

3. Na proces foe krin sani ini owroeten ben wani taki?

³ Ma meki wi go si foe san-ede Jehovah e meki en pipel psa wan ten foe tesi èn foe poeroe san boen a mindri san no boen? Leki „a ondrosoekoeman foe den ati” a ben poti na prakseri foe krin en georganiseerde pipel (Odo 17:3; Psalm 66:10). Ini den ten foe bijbel na proces foe krin sani ben wani taki dati wan metaal ben kisi faja te a ben doro na punt foe smelter, èn dan den sani di no de soifri, ofoe den doti ben kisi poeroe. Wi e lési: „Na sma di e krin sani e hori na proces ala di a tanapoe ofoe aladi a sidon boen na ai te leki a metaal, di kon smelter, kon loekoe leki wan spikri di krin, pe ibri sani di de a lontoe e de foe si; srefi na sma di e krin sani, te a e loekoe na ini na metaal samasama, kan si ensrefi leki na ini wan spikri, èn na so fasi a kan kon na wan soifri bosroiti foe na soifri fasi foe na metaal. Efoe a de tevrede, dan a faja e saka èn a metaal e teki poeroe foe na onfoe, ma efoe a no feni en soifri, dan moro loto e poti go èn a proces e doe ete wan tron”. (Cyclopedia of Biblical Theological, and Ecclesiattical Literature, foe na anoe foe J. McClintock and Strong) Sowan gowtoe ofoe solfroe di ben krin ben abi wan moro bigi waarde. — Teki gersi nanga Openbaring 3:18.

4. Foe san-ede Jehovah e gi pasi foe poeroe san boen a mindri san no boen feni presi a mindri en pipel?

⁴ Jehovah e gi pasi foe tesi èn poeroe san boen a mindri san no boen kon foe krin ofoe soifri en pipel, foe jepi den, foe sori a prenki foe en moro soifri (Efese 5:1). Na a ten foe a proces foe krin a metaal a e poeroe a doti foedi a e poeroe den leri nanga gwenti di no de soifri (Jesaja 1:25). Ooktoe ai poeroe a mindri en pipel den sma di e wégri foe saka densrefi na ondro na proces foe krin den èn den „di e gi aanleiding foe naki foetoe fadon èn den sma di e doe kroektoedoe”. Nanga disi na pasi e opo gi „den manpikin foe na kownoekondre”, den jeje Israëlsma, foe skijn krin, sodati ooktoe wan grontapoe klasse kan tjari kon makandra, di nanga a ferloesoe foe den a prakseri kan tai densrefi na ini wan krosbé organisatoris wanfasi nanga den. — Mattéus 13:38, 41, 43; Filippi 2:15.

Na wroko foe Maleachi

5, 6. (a) Soema spesroetoe ben de frantwortoe foe na lagi jeje toestand foe den Israëlsma ini Maleachi ten? Foe san-ede? (b) Sortoe takroe krakti disi ben abi tapoe Israëlsma ini algemeen?

⁵ Maleachi ben taki profétitori baka 443 bifo G.T., pikinmoro wan jarhondro baka di den djoe katiboman ben drai kon baka foe Babylon. Moro leki sébitenti jari ben psa sensi na inwijding foe na tempel di Zerubbabel ben bow baka. Den Israëlsma ben saka go te na wan lagi jeje peil. Soema moro spesroetoe ben de frantwortoe foe disi? Den priester! Fa dati so? Den „ben wisiwasi” Jehovah nen foe di den ben teki siki èn malengri mati (Maleachi 1:6-8). Den ’ben meki foeroe sma naki foetoe ini na wet’ foedi den ben misi foe leri a pipel èn foedi den ben sori taki den ben teki wan sma partij ini kroetoe. — Maleachi 2:6-9; Jakobus 3:1.

⁶ A bakapisi ben de dati den Israëlsma ini algemeen ben bigin degedege efoe a ben abi waarde foe dini Jehovah èn srefi ben wégri foe pai den tiende di ben de ferplekti na a wet (Maleachi 3:6-10, 14, 15; Leviticus 27:30). Den ben saka so dipi te joe loekoe a lobi foe den gi a wet foe Gado, dati son wan ’ben handri sondro foe de getrow’ nanga a trow-oema foe den, èn a de krin dati a ben prati foe en foe trow na heiden oema. Ija, srefi tegoe wroko soleki towfroewroko, soetadoe, lé nanga bedrigifasi sma ben e doe algemeen a mindri a pipel foe Gado! — Maleachi 2:10-16; 3:5.

7, 8. Sortoe wroko na proféti Maleachi ben abi?

⁷ A wroko di Maleachi ben kisi ben de krin. Sondro draidrai a ben poeroe den mi-no-ke priester bere kon a doro èn a ben meki den sma ferstan na troetroe jeje situatie foe den. Tokoe a ben sori Itaki na Gado foe sari-ati lobi ben de klari foe gi pardon: „Drai kon baka na mi, èn mi sa drai kon baka na oenoe”, Jehovah ben begi den (Maleachi 3:7). Maleachi ben taki a fesi dati „a troe masra” ben sa kon na en tempel foe hori kroetoe. Den priester ben moesoe kon krin foe „tron gi Jehovah sma di e pristeri wan offfer presenti ini regtvaardikifasi” (Maleachi 3:1-3). Boiti dati, na pipel ben kisi foe sabi dati „a troe masra” „ben sa tron wan es’esi kotoigi” tegen den sma di e hori doro ini tegoe libifasi. — Maleachi 3:5.

⁸ Maleachi ben doe en wroko; a ben meki sma jere na warskow. San a ben taki ben de foe a boen foe den priester èn foe na pipel ini en dé. Ma difrenti jarhondro ben psa bifo wantoe pisi foe en profétitori ben kon troe foe a fosi lési.

A kontroe ini na fosi jarhondro

9. Soema ben de ini a kontroe foe Maleachi profétitori na „boskopoeman”?

⁹ Komoto foe en hé troon ini hemel na Bigi Kroetoeman e taki: „Loekoe! Mi e seni mi boskopoeman, èn en moe sreka wan pasi na mi fesi” (Maleachi 3:1a). Soema ben de na „boskopoeman” dati? Na bijbelskrifiman Markus e tjari den profétitori foe Maleachi 3:1 nanga Jesaja 40:3 kon makandra èn e tjari ala toe kon na tapoe Johannes na Dopoeman (Markus 1:1-4). Ooktoe Jezus Kristus ben meki wi kon sabi bakaten Johannes leki na „boskopoeman” dati (Mattéus 11:10-14). Na so Johannes na Dopoeman ben bigin foe dat’ede ini na lente foe 29 G.T. en wroko leki „boskopoeman” leki a sma di ben sa waka a fesi foe wan trawan. A ben moesoe sreka na pasi gi na kon foe Jehovah foe hori kroetoe, foedi a bô tjari den Israëlsma kon ini geregtigheid bifo a kon foe na Moro Prenspari Sma di e teki presi gi Gado, Jezus Kristus.

10. San Johannes na Dopoeman ben doe foe meki wan pipel di ben sreka, klari gi Jehovah”?

¹⁰ Dati den ben seni Johannes go a fesi, ben de wan sori foe a lobi boenfasi foe Gado gi den djoe. Foedi den ben de ini wan ferbontoe matifasi nanga Jehovah, meki den ben moe abi berow foe den sondoe di den ben doe na a wet. Johannes ben poti den kerki afersi reti èn a ben poti kerki hoigrifasi kon a doro (Mattéus 3:1-3, 7-12). A ben wiki a lostoe ini opregti djoe foe loekoe nanga foeroe ferwakti na a Kristus, sodati den ben sa waka na en baka. — Johannes 1:35-37.

11. Fa wi kan kon sabi soema „de na troe Masra” di ben sa kon wantronso na a tempel?

¹¹ Maleachi profétitori e go doro nanga den wortoe: „’Èn wantewante sa kon na en tempel, na troe Masra, di oenoe e soekoe, èn na Boskopoeman foe na ferbontoe, na ini soema oenoe abi oen prisiri. Loekoe! A sa kon seker’, Jehovah foe den legre ben taki” (Maleachi 3:1b). Soema ben de „na troe Masra” di „wantewante”, ofoe onverwakti, ben sa kon na en tempel? Na Hebrew wortoe di e gebroiki dja, na ha-’A-dhohn’. Na gebroiki foe na bepalende lidwortoe ha („de”; „het”) gi na titel ’A-dhohn’ („Masra; Meestri”) e gebroiki na titel disi soso gi Jehovah Gado. Ija, Jehovah ben sa kon na „En tempel”. — Habakuk 2:20; Psalm 11:4.

12. Soema na a „boskopoeman foe na ferbontoe”, èn foe sortoe „ferbontoe” a ben de na „boskopoeman”?

¹² Baka di Maleachi ben kari wán boskopoeman, a ben sori dati na „troe Masra” ben sa kon na „en tempel” ini kompani foe ete wan tra boskopoeman, „na boskopoeman foe na ferbontoe”. Soema ben sa kan de dati? We, te wi loekoe den sani di ben psa bakaten dan a de redelijk foe teki a bosroiti dati „na boskopoeman foe na ferbontoe” de Jezus Kristus, di Johannes na Dopoeman ben stel voor na en discipel leki „na Lam foe Gado”. (Johannes 1:29-34). Foe sortoe „ferbontoe” na messias de na boskopoeman? A boewijsi materiaal ini Lukas 1:69-75 nanga Tori foe den Apostel 3:12, 19-26 e sori a tapoe dati ai go foe na ferbontoe nanga Abraham, tapoe a gron foe san den djoe ben kisi leki den fosi wan na okasi foe tron kownoekondre erfgenaam.

13. Na sortoe fasi na „troe Masra” Jehovah ben sa kon na a tempel?

¹³ „Na troe Masra” Jehovah no ben kon persoonlijk na a letterlijk tempel ini Jeruzalem (1 Kownoe 8:27). A ben kon na a fasi dati wan sma ben teki en presi, dati wani taki nanga jepi foe en „boskopoeman foe na ferbontoe”, Jezus Kristus, di ben kon na ini Jehovah nen èn di santa jeje foe Gado ben hori baka gi en.a

14. (a) Foe san-ede a krin di Jezus ben krin a tempel ini 33 G.T. ben de wan agersi tesi foe san ben sa kon ete? (b) Fa èn oten na tempel ben kon krin leki wan kontroe foe Maleachi 3:1?

¹⁴ Na ini na lente foe 30 G.T. Jezus ben kon na Jehovah tempel ini Jeruzalem èn a ben jagi den sma poeroe di ben meki „a de wan oso foe seri sani” (Johannes 2:13-16). Ma soso wan agersi tesi foe san ben sa kon ete leki kontroe foe Maleachi profétitori. Baka na sani di ben psa, Johannes ben go leki „na boskopoeman” doro foe dopoe sma èn foe tjari en discipel go na Jezus (Johannes 3:25-30) Ma tapoe 9 Nisan foe na jari 33 G.T. Jezus ben hori en victori waka go ini Jeruzalem sodati a ben pristeri ensrefi leki kownoe (Mattéus 21:1-9; Zacharia 9:9). Johannes ben klari en wroko èn a ben de wan sani foe wan jari a fesi dati Herodes ben koti en ede poeroe. Di Jezus soboen tapoe 10 Nisan ben kon na a tempel, dan disi ben psa leki kontroe foe Maleachi 3:1 èn a ben kon officieel ini na hoedanigheid foe na „boskopoeman foe na ferbontoe”, na kroetoeman di e teki presi foe „na troe Masra” Jehovah. Jezus ben krin na tempel foedi a ben trowe den sma komoto na ini den ben meki a tron wan handel centrum èn ben drai den tafra trowe foe den sma di ben sa broko moni. A ben taki alaten baka: „Boekoe no ben skrifi [ini Jesaja 56:7]: ’Mi oso den sa kari wan oso foe begi gi ala natie’? Ma oenoe ben meki a tron wan olo foe foefoeroeman.” — Markus 11:15-18.

15. Fa den djoe kerki tiriman ben teki leki klasse na proces foe kon krin, ma fa a ben de nanga son priester?

¹⁵ Na so fasi den kerki tiriman foe Israël ben kisi foe jere dati a joeroe foe den ben kon. Leki klasse den ben wégri foe teki Jehovah „boskopoeman foe na ferbontoe”. Den no ben ’kan ferdrage na dé foe en kon’ bika den ben wégri foe saka densrefi nanga sakafasi a ondro na proces foe krin sani foe na bigi-man di e krin sani (Maleachi 3:2, 3). Den ben ferdini foe den ben poeroe den a mindri san ben boen foe gi abra na pori. A de krin dati wantoe „foe den pikin foe Levi” ben tjari na ati tapoe na joisti presi, bika a no langa baka na dede foe Jezus „wan bigi ipi priester [foe Levi] . . . ben gi jesi na a bribi”. — Tori foe den Apostel 5:7.

16. Fa èn oten wan „bigi èn frede dé” foe Jehovah ben fadon kon wantronso na tapoe na djoe natie?

¹⁶ Tapoe 11 Nisan, a dé bakadi Jezus ben krin a tempel, a ben poeroe a bere foe den kerki hoigriman krakti kon na doro èn a ben taki a fesi foe na pori foe na tempel èn na djoe seti foe sani (Mattéus 23, 24). Ija, foe troe, „na Gado foe geregtigheid” ben kon 37 jari a baka na ini 70 G.T., „leki wan esesi kotoigi” tege na djoe natie dati di wan „bigi èn frede dé foe Jehovah” ben fadon kon a den tapoe (Maleachi 2:17; 3:5; 4:5, 6). Tapoe a momenti dati heri Israël leki wan organisatie di joe kan teki gersi nanga wan bon di no e meki boen froktoe, „ben koti trowe èn iti go ini faja” foedi den Romeinsma ben pori en (Lukas 3:3-14). Èn ala disi ben psa ’foedi den no ben si a ten na ini san den ben kon ondrosoekoe den.’ — Lukas 19:44.

Disiten kontroe

17. San e sori dati Maleachi profétitori ben sa abi ete wan kontroe ini a ten disi?

¹⁷ Ma oen kan taki ooktoe dati wan di foe toe ofoe disiten kontroe foe Maleachi profétitori de? Na ini na fosi jarhondro na fosi kontroe ben kon baka di Jezus ben kisi salfoe nanga santa jeje leki na kownoe foe Gado kownoekondre di den ben poti ma di no ben e tiri ete. A wan logis sani dati ete wan kontroe ben moe de foe na profétitori, baka di Jezus Kristus ben sa poti na ini 1914 ini hemel tapoe na troon. Na profétitori ben sori taki a ben sa kon troe „bifo a kon foe a bigi èn frede dé, foe Jehovah” (Maleachi 4:5). Aladi na ini 70 G.T. „na dé foe Jehovah” ben kon abra na djoe seti, tokoe den boekoe e sori a fesi na tapoe wan „dé foe Jehovah” di ben o kon ini a ten foe Kristus „de noja”. — Mattéus 24:3; 2 Thessalonika 2:1, 2; 2 Petrus 3:10-13.

18. Fa a pipel foe Gado ini 1922 ben kon ferstan dati den de ini wan ten foe krootoe?

¹⁸ Sensi 1922 kaba Jehovah pipel ben kisi a ferstan dati den ben de leki wan kontroe foe na profétitori foe Maleachi ini wan ten foe kroetoe. Na Wachttoren (Ingrisi uitgave) foe 1 september ben taki: „Ma Maleachi profétitori no wawan e de troe na wan pisi nomo na a fosi kon foe Masra, ma e loekoe a fesi na a ten pe na Messias moe kon ini glori èn krakti, èn te a moesoe kroetoe abra en pipel . . . Now wan kroetoeten doro baka; agen na pipel di e taki dati a de foe en, e kisi tesi leki psa faja èn den opregti manpikin foe Levi e tjari kon makandra foe doe dienst.

19. Tapoe sortoe pasi wan „boskopoeman” ben seni go a fesi na ini a disiten kontroe?

¹⁹ Soleki Maleachi 3:1 e taki, dan wan spesroetoe boskopoeman bô seni go a fesi. Disi ben sori taki a no de wan aparti sma, ma wan klasse di ben sa doe wan srefi sortoe dienst leki Johannes, na Doponan. Foe sensi 1881 na klasse disi, ini wroko makandra nanga san sma sabi now leki na Watch Tower Bible and Tract Society, ben doe wan aparti bijbel wroko foe leri sma. Disi ben meki dati foeroe fundamenti waarheid ben kon baka tapoe na presi pe den ben de ini na ati foe sma di ben abi lobi gi na bijbel. Wantoe foe den waarheid disi di ben kon boen baka de: Libisma no abi wan sili di no e dede, ma a de wan sili, wan hel pe sma e bron na ini no de; Jezus Kristus no bô drai kon baka ini skin; Jehovah na wán Gado èn no wan dri-wan-gado. Ija, a ben de wan wroko sodati ’wan pasi ben sreka na fesi gi Jehovah’, sodati a ben kan bigin nanga en kroetoewroko.

20. (a) Oten Jehovah ben kon na a tempel? (b) Sortoe aksi disi e tjari kon a fesi?

²⁰ Wantronso Jehovah ben kon leki na „troe Masra”, na en jeje tempel. Oten dati ben de? Na kontroe ini na fosi jarhondro de wan model foe dati. Na a ten dati Jezus ben kon dri nanga afoe jari baka di a ben kisi salfoe na a Jordaan leki kownoe na a tempel èn a ben krin disi. Ini akroederi nanga na model disi dan a gersi dati a de wan redelijk sani foe ferwakti dati, foedi Jezus ben sa poti na ini a bigi dréten foe 1914 na tapoe na troon leki kownoe, a ben sa go dri anga afoe jari a baka nanga na „troe Masra” Jehovah na a jeje tempel. San ben moe psa foe sensi a ten dati leki fa na profétitori taki? Wan tesi èn poeroe san boen a mindri san no boen ben moesoe feni presi. Fa disi e tjari wantoe prenspari aksi kon a fesi: Sortoe boewijsi de foe a krin disi foe sani? A wroko disi foe krin sani e go doro te na a momenti disi ete? Èn o fara disi abi foe doe nanga joe? Meki wi go loekoe dati pikinso.

[Foetoewortoe]

Joe kan memre disi ete?

◻ Foe san-ede Jehovah e gi pasi dati en pipel kisi tesi èn e poeroe san boen a mindri san no boen?

◻ Fa Johannes na Dopoeman ben doe wroko leki „boskopoeman” ofoe leki a sma di e waka a fesi?

◻ Fa Jezus ben kon ini na fosi jarhondro leki na „boskopoeman foe no ferbontoe” na a tempel?

◻ Fa wi sabi dati Maleachi profétitori ben sa abi wan disiten kontroe?

[Prenki na tapoe bladzijde 3]

Leki boskopoeman, Johannes na Dopoeman ben sreka den sma a fesi tapoe na kon foe a „boskopoeman foe a ferbontoe”