Un yonguwan san un o du nanga un libi?
„Sodati den di e libi, no ben sa libi moro langa gi densrefi, ma gi en di ben dede gi den.” — 2 KORINTE 5:15.
1. Fa sma ben tyari den tangi kon a fesi, èn fu san-ede?
’GRANTANGI! Mi mu taki yu tangi dati mi de a libi!’ Sma di den ben puru na ini wan oso di ben e bron ofu ben e dede na watra, ben taki den sortu sani disi gi den sma di ben yepi den. Èn kristen yonguwan di de nanga tangi ben taki na sofasi tu gi den papa nanga mama. Den no ben abi na prakseri wawan na libi na skinfasi di den ben kisi fu den papa nanga mama, ma spesrutu tapu na lobi sorgu èn na leri di ben meki den yonguwan disi go waka na pasi di e tyari den go na „a pramisi di ensrefi ben pramisi: na tego libi”. — 1 Yohannes 2:25.
2. Yu mu luku na aksi san yu e go du nanga yu libi te yu luku sortu bodoi?
2 Lobi ben beweigi Yehovah Gado fu poti gi ibriwan fu wi fu kisi tego libi, „na trutru libi”. ’A ben lobi wi èn a ben seni en Manpikin leki zoenofrandi gi wi sondu’ (1 Timotéus 6:19; 1 Yohannes 4:10). Go denki ooktu pikinso na a lobi di en manpikin Yesus ben sori fudi a ben kisi wan pina dede sodati wi ben sa kisi tego libi! (Yohannes 15:13). Te yu luku san ben taki dya a fesi, dan san yu e go du nanga yu libi?
3. San nofotron e bepaal san sma e go du nanga den libi?
3 Na aksi disi furutron e poti gi yonguwan ini wan ofu tra vorm fu a sei fu den skorodecaan ofu tra sma di abi belangstelling gi a tamara fu den. San sa bepaal na piki fu yu? Na sani di persoonlek yu lobi sa bepaal disi? Na rai fu den sma di nanga ala prisiri wani dati yu kisi wan positie ini na grontapu sa meki na wegi naki go na tra sei? Ofu moro hei sani di yu o wegi go wegi kon sa bepaal san yu sa du nanga yu libi? Na fermane di skrifi ondro krakti fu santa yeye e taki: „A dede gi ala sma, sodati den di e libi, no ben sa libi moro langa gi densrefi, ma gi en di dede gi den èn di ben opobaka” (2 Korinte 5:15). Iya, fa a de wan moi sani efu wi gebroiki wi libi so, dati a e sori dati wi de grantangi fu san Yesus Kristus nanga en hemel Tata ben du gi wi!
Populaire eksempre
4. Suma de den moro populair eksempre di sma e teki fu waka na den baka ini a ten disi?
4 Ma sortu sma na a ten disi de moro populair èn di ini algemeen den yonguwan e teki leki eksempre fu waka a den baka? A no de den guduwan èn den barinen man fu a grontapu awinsi fa den moreel markitiki fu den de? Fu suma yu e si fowtow e anga na den skotu efu yu luku lontu ini den kamra fu furu yunguwan? Nofotron fu pokuman, filmster nanga sportman. Bun furutron yonguwan e dren fu en pikin so fu kisi net someni succes ini a grontapu ofu fu trow nanga wan sma di abi den skinmarki disi fu den sortu sma disi. Fa a de nanga yu? San yu e angri fu a libi?
5, 6. (a) Fu san-ede wi kan taki dati grontapu succes no e gi tru satisfaksi? (b) Fu san tru satisfaksi e kon?
5 Efu yu ben sa doro na barinen succes fu barninen sma di sma e bewondru, yu ben sa de trutru koloku èn tevrede dan? Wan fu den filmpreiman fu Hollywood di meki nen ben taki: „Mi abi gudu èn na prisiri fu ala sani na skinfasi. Den no wani taki noti. Dyaso net someni senwe-datra de leki swenpresi, fu mi no taki srefi fu den brokotrow nanga pikin di no wan si den papa nanga mama na ai.” — Preikiman 5:10; 1 Timotéus 6:10.
6 Wan fu den barinen uma-lonman fu na studentigrontapu, di ini 1981 ben de winiman ini na umasmaklassement fu wan prenspari streilon wega fu 10 kilometer ini New York, ben bruya so kefarlek dati a ben du wan sani fu kiri ensrefi. „Ini den mun di psa mi ben leri bun furu waarheid fu a libi”, a ben skrifi bakaten. „Wan fu den disi de dati trutru satisfaksi no e kon tapu fasi fa someni sma e feti na baka volmaaktifasi nanga prestatie. A no ben gi mi satisfaksi dati mi ben de wan superstudenti, dati mi ben de kampioen streilonuma fu na district fu mi ofu dati mi de wan tumsi moi sma.” Ija, sma mu leri dati tru satisfaksi e kon fu wan persoonlek matifasi nanga Gado, na wanenkri sma di kan gi trutru vrede nanga koloku. — Psalm 23:1, 6; 16:11.
7. O prenspari wan moro hei opleiding nanga grontapu succes de efu ai go fu feni tru satisfaksi?
7 Sobun a de krin dati yu no ben sa wani waka na baka den sma di soso de a tapu nomo fu kisi barinen nanga gudu. Srefi grontapu skrifiman e taki dati grontapu succes no e gi trutru satisfaksi. Wan skrifiman Bill Reel e skrifu: „Te yu studeri komoto a skoro, dan yu abi dren fu a tamara di e kon. A sari fu taki dati a moro bigi pisi fu den fruwakti fu yu e fadon broko. Mi no wani meki yu lasi ati, ma yu kan yere net so bun na waarheid: te yu kisi den gudu di yu e angri fu den, efu yu kisi den, èn efu yu kisi den succes di yu e feti a baka den, efu yu kisi den, dan den no sa gi yu satisfaksi. Yoisti tapu den momenti dati tapu san yu ben sa fruwakti fu nyanbun fu den wini fu yu srefsrefi, dan yu sa firi yusrefi leigi na presi fu nanga satisfaksi, nanga brokoskin na presi fu nanga prisiri, no nanga rostu na presi fu nanga vrede” — New York Daily News, 28 mei 1983.
8. Fu sortu krakti reide ede meki wi no mu feti a baka a meki fu carrière ini a grontapu?
8 Ma wi di e opo wi ai bradi gi san den sani di e psa na grontapu wani taki ini na leti fu den bijbelprofeititori, abi moro krakti reide fu no poti grontapu carrièrre tapu na fosi presi ini wi libi (Mattéus 24:14). Wi kan teki wisrefi gersi nanga wan sma di e si wan oso nanga wan bord tapu san tanapu: „Na bedrijf disi e go tapu.” Wi ben sa go aksi drape fu kisi wroko? Kwetkweti! Èn efu wi ben wroko gi sowan bedrijf, dan wi ben sa de so ferstandiki fu suku na wan tra presi wroko. We, Tapu ala instelling alape na ini a grontapu disi na bord tanapu nanga den wortu: „Wi e go tapu, na kaba de krosbei!” Iya, ’a grontapu e psa gowe’, na bijbel e dyaranti wi (1 Yohannes 2:17). Wi e du fu dat’ede bun no fu teki sma leki eksempre di e go krinkrin na ini.
Sortu rai wi mu teki
9. Sortu grontapu rai den sma ben kan gi di leki fa a sori ben sa abi a moro bun sani nanga yu a prakseri?
9 Na libi fu yu no e kenki wawan nanga yepi fu den sma fu suma yu abi respeki, ma nofotron ooktu nanga yepi fu famiriman nanga mati di soleki den e poti en, ’abi a moro bun sani nanga yu a den fesi’. ’Yu mu wroko fu kisi brede’, den e taki kande. Fu dat’ede den ben s kan gi yu na rai fu kisi wan moro hei leri ofu fu go studeri na wan universiteit fu sreka yusrefi tapu wan bun wroko di e pai. ’Na bijbelskrifiman Lukas ben de wan datra’ den e taki kande, èn na aposstel Paulus ben kisi leri fu na leriman fu na wet Gamaliël (Kolosse 4:14; Tori fu den Apostel 5:34; 22:3). Toku yu mu go ondrosuku den sortu rai disi finifini.
10. Sortu rai Lukas nanga Paulus ben gi, èn san wi kan taki fu den activiteit bifo den ben tron kristen?
10 Na datra Lukas noiti ben gi kristensma dek’ati fu teki en fossten wroko leki wan eksempre fudi den ooktu e go tron datra; Lukas moro furu ben poti a libi fu Yesus nanga en apostel leki eksempre. A de krin dati Lukas ben tron datra bifo a ben tron kristen, ma a ben poti baka dati en kristen diniwroko tapu a fosipresi ini en libi. Paulus ben de ini net sowan sortu situwasi. A presi fu a ben gi trawan dek’ati fu waka na en baka soleki a ben waka na Gamaliël baka, Paulus ben skrifi: „Waka na mi baka soleki mi ben waka baka Kristus.” Paulus ben poti someni waarde na a sabi fu Kristus dati a ben taki dati te yu teki en fosten bezigheid gersi nanga dati a ben si en leki wan „ipi doti”. — 1 Korinte 11:1; Filippi 3:8.
11. (a) San Petrus ben taigi Yesus èn fu san-ede? (b) Fa Yesus ben du?
11 Go prakseri dati firi kan meki srefi dati den sma di lobi yu kan beweigi den fu gi yu takru rai. Di Yesus fu eksempre ben taki san ben e wakti en ini en diniwroko ini Yeruzalem, na apostel Petrus ben piki: „De bun gi yusrefi, Masra; a sani disi no sa miti yu srefsrefi.” Petrus ben lobi Yesus èn a no ben wani dati a ben kisi pina. Ma ete Yesus ben pir’ai gi Petrus fudi a ben de sabisabi dati a du fu a wani fu Gado wani taki dati no wawan a ben musu nyan pina ma ooktu dati gensman ben sa mu kiri en. — Mattéus 16:21-23.
12. Sortu rai sma di ben e meine en bun nanga wi ben kan gi yongu sma èn fu san-ede?
12 Na asrefi fasi son papa nanga mama ofu mati ben sa kan gi yu na rai fu no gi yusrefi na wan libifasi pe yu e offer yusrefi. Tapu a gron fu firi di no de yoisti den e draidrai kande fu gi yu dek’ati fu teki wan wroko ini na furuten dienst leki wan pionier, fu dini leki zendeling ofu fu go du friwani wroko tapu wan bijkantoro fu Yehovah Kotoigi. Den e taki kande: ’Fu san-ede yu no e go trow èn kon libi krosbei fu wi?’ Ofu: ’A wroko tapu Bethel hebi, yu sabi. Kande yu kan tan more betre na wi.’ Ofu fu taki en nanga Petrus: „De bun gi yusrefi.”
13. (a) Sortu fasi fu si sani di ben kenki, Petrus ben tyari kon ondro wortu? (b) San de ini a tori fu de wan kristen?
13 Srefi Yehovah dienstknegti wawantron mu go luku a denki fu den nyun baka. Petrus ben musu du dati ooktu, èn fu na fasi fu luku sani fu en di ben kenki a ben skrifi: „Te yu luku en bun dan den ben kari yu kon na a libifasi disi, bika ooktu Kristus ben nyan pina gi yu, èn ben libi gi yu wan model sodati yu ben sa go waka soifri ini en futumarki” (1 Petrus 2:21). Libi wan trutru kristen libi wani taki fu offer yusrefi, ma, Iya, srefi fu nyan pina. A no de wan makriki fasi, ma a de wan pasi di den ben kari wi kon leki kristen. Efu wi e go waka tapu dati, dan dati wani taki dati wi ’no mu libi moro langa gi wisrefi ma gi en di dede gi wi,’ (2 Korinte 5:15). Te wi e poti bun eksempre na wi fesi, dan wi sa feti fu libi wan libi di abi leki marki fu offer wisrefi.
Eksempre fu hori na prakseri
14. Sortu eksempre Yesus ben gi?
14 Na eksempre di moro furu wi mu ori na prakseri na di fu Yesus. Leki volmaakti libisma a ben kan tron na moro bigi atleet, (streilonman), pokuman, datra ofu krutubakra di grontapu ben sa sabi oiti. Ma Yesus heri prakseri ben de tapu a plisi fu en hemel Tata, srefi di a ben de wan yongu boi ete (Lukas 2:42-49). Bakaten a ben taki: „Mi mu meki na bun nyunsu fu na kownukondre bekenti, bika na fu dati den ben seni mi kon” (Lukas 4:43). Na ini a dreiten di ben psa wan brifi ben tanapu ini a kerki tijdschrift Ministry na ini san,ben tanapu: „Wi Yepiman ben lobi fu hari ensrefi puru fu den ipi sma, èn dan a ben go oso-fu-oso fu wini sili. Wan yepi fu wán sili a ben feni moro moi. Dan a ben kan kanti na waarheid èn lobi fu Gado go na ini.” — Lukas 10:1-16.
15. Fu san-ede na oso-fu-oso preikiwroko de wan tyalansi? (b) San e sori dati na oso-fu-oso diniwroko di yonguwan e du de heri bun?
15 A tru, fu preiki oso-fu-oso no makriki. A e aksi fu studeri fayafaya fu ferstan na bun nyunsu fu a kownukondre èn bun furu wroko fu sreka pristeri di wani taki wan sani. Ooktu na dienst disi e aksi dek’ati, fudi den moro bigi pisi fu den ososma no abi belangstelling èn sowan fu densrefi de nanga feiantifasi. Toku na oso-fu-oso diniwroko di unu leki yonguwan e du abi wan tumsi bun bakapisi, soleki na Italiaan parochietijdschrift La Voce e tyari kon a fesi. Na skrifiman ben taki: „Persoonlek mi e firi gi Yehovah Kotoigi”, di, so a tyari kon a krin, „e kon na yu na oso”. A ben taki: „Den Kotoigi di mi sabi, de nanga bun maniri, e taki nanga safri èn switi sten; tumsi moi sma ooktu, èn moro furutron yongu sma; te moifasi ini yongu yari de ini aksi, èn dan den kan overtoigi yu srefsrefi.
16. (a) Fu sortu activiteit ede den mu prijse yonguwan? (b) Fa na organisatie fu Yehovah Kotoigi kan teki ensrefi gersi nanga den kerki efu ai go fu a du fu a moro prenspari wroko a grontapu?
16 Unu, un yonguwan, di e teki Kristus leki model, de fu prijse srefsrefi! Ini den Verenigde Staten moro leki 12.000 yongusma fu 25 yari èn moro yongu de ini na pionierdienst, èn tin dusundusun moro ete e pionier na tra presi (Psalm 110:3). Abi na overtoigi dati no wan tra wroko di yu kan du de moro prenspari! Srefi na skrifman fu na artikel ini na kerki tijdschrift di kari dya na tapsei ben taki: „Gado e taki dati na moro prenspariwroko de na oso-fu-oso fisiti — fu wini sili”, ma a ben taki toku moro fara: „San yu e taki fu dati? Omeni fu den fisiti dati yu èn mi e tyari? Na sortu fu wroko disi mi no ben si nofotron ete dati den ben kari en ini Ministry.” Wi no kan de nanga tangi dati wi de tai nanga wan organisatie di e poti krakti tapu na vereiste fu waka baka Yesus eksempre fu na preikiwroko?
17. San Timotéus ben kisi di a ben de kande wan tini ete, èn fu san a e kon a krin dati na a ten dati a ben de ete so yongu?
17 Fudi san yu e go du nanga yu libi na wan trangafasi sma di yu e bewondru sa abi krakti a tapu, dan a de wan ferstandiki sani ooktu fu kweki bewondrufasi gi na eksempre fu na yonguman Timotéus. Leki yonguman Timotéus di ben gebore syatu bifo Yesus dede, ben gwe libi en famiri èn ben moksi ensrefi na a apostel Paulus tapu en di fu tu zendingwaka. Wan tu mun a baka na gewoon pipel ben dwingi Paulus nanga Silas fu lon komoto fu Thessalonika, ma no bifo den ben meki wantu disipel (Tori fu den Apostel 16:1-3; 17:1-10, 13-15). Syatu bakadati Paulus ben seni Timóteus go na a kefarlek gebied dati fu trowstu den discipel disi ini a tesi fu den (1 Thessalonika 3:1-3). Timotéus ini a ten dati kande ben kan de wan 20 yari, bika sowan twarfu te tina-fo yari a baka Paulus e taki ete fu en „yonguyari” (1 Timotéus 4:12). Yu no e bewondru sowan dek’ati yonguwan di ben offer ensrefi leki Paulus?
18. Fu san-ede Paulus ben wani seni Timotéus go na Korinte?
18 Feifi yari baka di Timotéus ben kisi na wroko fu tranga den brada ini Thessalonika, Paulus ben skrifi komoto ini Efese gi Korintesma: „Waka na mi baka. Fu dat’ede mi e seni Timotéus kon na unu, . . . èn en sa tyari mi methode ini a tori fu Kristus Yesus kon ini prakseri, soleki mi e gi leri alape.” (1 Korinte 4:16, 17). Fudi na yongu Timotéus ben wroko feifi yari kaba nanga Paulus meki a ben sabi bun den leri methode fu Paulus. A ben sabi tapu sortu fasi Paulus ben meki a boskopu bekenti gi den Efesesma, fudi a ben gi den leri ooktu na publiki èn oso-fu-oso” (Tori fu den Apostel 20:20, 21). Fa Timotéus ben kan de wan tumsi moi yepi gi den gemeente, tangi fu na bun opleiding di a ben kisi ini den preikiwroko methode!
19. San Paulus ben taki fu Timotéus moro leki 10 yari baka di den ben go du makandra dienst?
19 Feifi ofo siksi yari e psa agen, èn Paulus de ini na straf’oso ini Rome. Timotéus di syatu kaba ben kon fri fu straf’oso, de na en (Hebrewsma 13:23). Tyari kon ini yu prakseri pikinso na tafereel disi: Kande nanga Timotéus leki sekretarsi Paulus e meki a skrifi wan brifi gi den Filipisma. Paulus nanga ala prakseri e suku en wortu: „Ini fertrow tapu Masra Yesus mi e howpu heri esi fu seni Timotéus kon na unu . . .. bika nowan tra sma fu asrefi yeyefasi leki en mi abi, di trutru sa sorgu gi den sani di abi fu du nanga unu . . . Un sabi sortu bewijsi a ben gi fu ensrefi, dati en, leki wan pikin nanga en Tata ben dini nanga mi leki srafu fu meki na bun nyunsu go na fesi.” — Filippi 1:1; 2:19-22.
20. Fu san-ede Timotéus ben de gi yonguwan sowan bun eksempre fu bewondru èn fu waka na en baka?
20 Iya, na yongu Timotéus de trutru wan eksempre di wi kan bewondru! A ben de wan kefarlek betrowbaar nanga getrow kompe fu Paulus, psa ala tesi a ben de na en, a ben yepi en ini a preikiwroko èn a ben de klari fu dini ope den ben seni en go. A ben offer wan zogenaamd normaal libi na en oso, ma fa a ben gi en wan tevrede-fasi nanga satisfaksi fu poti en libi ini na dienst fu Gado! Timotéus ben libi trutru ’no moro langa gi ensrefi, ma gi Kristus, di ben dede gi en’ (2 Korinte 5:15). Disi e beweigi yu fu waka baka en eksempre?
Libi gi na nyun grontapu
21. Fu san-ede wi kan taki dati Timotéus ben abi yeyefasi?
21 Timotéus ben libi trutru gi a nyun grontapu fu Gado. A no ben e denki soso na a dya èn now, ma ben go denki fa a ben kan gebroiki en libi fu kisi blesi di e tan (Mattéus 6:19-21). Fudi Timotéus papa ben de wan Griki èn leki fa a ben sori e de wan sma di no ben de ini bribi, dan kande a ben gi en tranga fu feti a baka wan grontapu wroko. Grantangi fu na leri fu en mama nanga granmama fu gi ensrefi ini a dini fu Gado meki a kristen gemeente ben teki Timotéus libi krinkrin abra. A ben feti a baka yeye afersi, èn a de krin dati a ben tan wan pisten sondro fu trow èn den ben feni en bun dati a ben du dienst nanga na apostel Paulus. — 2 Timotéus 1:5.
22. Fa na Skoro-brochure e poti a prakseri fu disiten yonguwan tapu wan libifasi leki di fu Timotéus?
22 Fa a de nanga yu? Yu e go gebroiki yu yongu yari tapu a fasi fa Timotéus ben gebroiki en yongu yari? Na brochure Yehovah Kotoigi nanga skoro ben poti prakseri tapu sowan libifasi di ini a tori fu yongu Kotoigi den ben tyari kon a krin: „A moro prenspari marki ini a libi de, fu du a dienst fu den gi Gado tapu wan bun fasi, èn den e si a skoro-opleiding fu den leki wan yepi sani fu doro a marki dati. Fu dat’ede meki na keuze fu den ini algemeen o go na vak di de bun fu kan ferdini ini a grontapu fu tide den brede. Na so furu fu den e go volg bepaalde beroepscursus ofu e go na wan vakskoro. Te den studeer komoto fu a skoro, den e suku wroko di e yepi den fu poti densrefi a tapu a moro prenspari wroko fu den, a kristen diniwroko.”
23. Fu san-ede a no mu de muilek gi kristen yonguwan fu gi piki tapu na aksi: San mi e go du nanga mi libi?
23 Gi yu di abi trutru warderi fu san Yehovah Gado nanga en Manpikin ben du gi yu, a no mu de muilek fu gi wan piki na tapu na aksi: San mi e go du nanga mi libi? Na presi fu yu go libi gi yusrefi èn gi yu persoonlek prisiri, dan yu sa gebroiki yu libi fu du a wani fu Gado èn net soleki Timotéus yu sa libi leki wan sma nanga yeyefasi.
Overzichtaksi
◻ Fu san-ede tru kristen no mu poti wan grontapu carrière tapu a fosi presi ini den libi?
◻ Sortu fowtu rai son sma ben gi, ma san wi kan leri fu na piki di Yesus ben gi Petrus?
◻ Na sortu fasi Yesus nanga Timotéus e gi yonguwan tumsi moi eksempre?
◻ San de ini a tori fu de ini yeye fasi?
[Prenki na tapu bladzijde 3]
Aladi Lukas ben kisi leri leki wan datra, toku a ben poti den kristen activiteit na a fosi presi ini en libi