Den laatste dei — Wan ten fu koti nyanyan
„Èn mi ben si èn luku! wan wet wolku, èn tapu a wolku wan sma ben sidon di gersi wan manpikin fu libisma, nanga wan gowtu kroon tapu en ede nanga wan srapu kron-nefi ini en anu.” — OPENBARING 14:14.
1. San na wantu sani di e meki na yarhondro disi wan aparti sani?
FA na di fu twenti yarhondro disi de wan ten di furu nanga bruya! Libisma ben mu psa tu grontapufeti di ben pori sani srefsrefi. Kondre baka kondre ben kisi fu du nanga refo. Angriten ben meki moro pina kon leki ini wan tra ten fu na libisma historia. Economia onseikerfasi, kiri, a doti fu sani èn skreki siki e tapu-skreki gi tanbun fu ibriwan sma. Na a srefi ten libisma ben go na tapu a kontren fu wetenschap na fesi tapu wan kefarlek fasi. A ben man dwengi na krakti fu na atoom èn a ben waka srefi tapu na munkenki. Na geslagti fu wi de trutru ini bun furu fasi aparti. Ma toku ete wán sani ben psa di psa ala tra sani leki moro prenspari sani fu wi ten èn di na sei ala tra sani no e de leki noti.
2. Sortu sani di ben e psa èn fu san Daniël ben taki a fesi, ben sa feni presi ini wi ten?
2 A sani disi di ben psa èn di psa ala tra belang ben taki a fesi na ini a di fu siksi yarhondro bifo wi Gewoon Teri na a mofo fu na profeiti Daniël. Arki na a tori fu en di skrifi na ondro na krakti fu Gado santa yeye: „Mi ben tan luku na ini den neti visioen èn luku drape! Nanga den wolku fu hemel wan sma di gersi wan manpikin fu libisma ben e kon èn a ben kisi pasi fu go na a Owrusma fu den Dei èn den ben tyari en go krosbei fu en, iya fesi fu Disi. Èn den ben gi en tirimakti èn wartifasi èn wan kownukondre, sodati den folku, nationaal grupu èn tongo ben sa dini alamala en.” — Daniël 7:13, 14.
3. (a) Suma na a „Owrusma fu Dei”, èn san a ben gi na „wan sma di ben gersi wan libismapikin”? (b) Suma na a sma disi di „gersi wan libisma pikin”, èn fa den dyu kerki fesiman ben du fu di Yesus ben ferteri disi?
3 „Na Owrusma fu den Dei” na Yehovah Gado. Daniël e si en ini „den wolku fu hemel”, dati wani taki ini na yeye kondre di no de fu si nanga ai, aladi a e gi kownuwroko na wan „sma di gersi wan libismapikin”. Suma na a „sma” dati? Yesus e piki na aksi dati di a ben tanapu na fesi na Sanhedrin (Hei dyu Krutu). Na dyu heipriester ben meki a sweri fu ferteri den efu a ben de a Kristus ofu no. Leki piki Yesus ben tyari sondro fu frede a profeititori fu Daniël kon a tapu ensrefi fudi a taki: „Fu bigin nanga now unu sa si na Manpikin fu libisma sidon na a reti-anu fu na krakti èn sa si en e kon tapu den wolku fu hemel.” Na presi fu bogi gi Yehovah kownu di a ben ferkisi, dan na heipriester ben kragi en dati a e kosi Gado. Morofara den dyu kerkifesiman ben oefen druk a tapu Pontius Pilatus fu krutu Yesus taki a mu dede. —Mattéus 26:63-65; 27:1, 2, 11-26.
4. Fu san-ede Yesus ben kisi na kroon fu kownuwroko, èn aladi sortu gens ben de?
4 Den muiti disi fu meki dati Yesus wortu no ben sa kon tru, ben misi di a ben opo komoto fu dede èn ben opo go na hemel fu wakti drape te leki Yehovah faste ten ben doro fu gi en na kownukondre (Tori fu den Apostel 2:24, 33, Psalm 110:1, 2). A ten dati ben kon ini 1914. Leki fa ala buwijsi ben sori dan Yesus ben kisi na ini a di fu tu pisi fu na yari dati fu „na Owrusma fu den Dei” na kroon fu na kownuwroko èn ben bigin fu tiri (Mattéus 22:3-42). Na nyun kownukondre di ben gebore ben kisi fu du nanga hebi gens. Ma den dyu kerkifesiman fu na fosi yarhondro, den krakti fu den natie di ben bondru kon na wan, èn srefi Satan nanga en ogri yeye no ben kan tapu dati na wani fu Gado ben go doro (Psalm 2:4-6; Openbaring 12:12). Na ini 19l4 precies tapu na faste ten den tranga sten ben de fu yere fu na hemel koor: „Na kownukondre fu na grontapu tron na kownukondre fu wi Masra èn fu en Kristus, èn en sa tiri leki kownu ini ala têgo fasi” (Openbaring 11:15). Fu sensi a ten dati wi e libi ini den „laatste dei” fu na goddelowsu seti fu sani. — 2 Timóteus 3:1.
Wan ten fu koti nyanyan
5. (a) Leki fa na profeititori fu Daniël ben taki dan suma ben sa dini na Kownu di ben kisi kroon nyunyun? (b) Sortu visioen Yohannes ben si di ooktu ben gi wan prenki fu Yesus leki Kownu nyunyun?
5 Te Yesus e kisi en kroon, leki fa Daniël profeititori taki, dan „den pipel, nationaal grupu èn tongo sa dini alamala en”. Fa dati kan efu na libismafamirl e trowe en leki kownu? Ini wan ferwondru visioen di na apostel Yohannes e kisi, e kon na krin san na piki de. Yohannes e ferteri wi san a ben si: „Luku! Wan weti wolku, èn tapu na wolku wan sma ben sidon di ben gersi wan manpikin fu libisma, nanga wan gowtu kroon tapu en ede èn wan srapu kronnefi ini en anu” (Openbaring 14:14). Netleki fa a ben de na ini na visioen fu Daniël na so den e si Yesus dya tapu wan wulku èn ben kon sabi en „leki wan sma di gersi wan manpikin fu libisma”. A e weri na kroon fu a kownuwroko, ma ini en anu a no abi wan regeritiki, ma na kronnefi fu wan sma di koti nyanyan. Fu san-ede?
6. Sortu wroko na Yesus di ben kisi kroon nyunyun mu teki du tapu na komando fu Yehovah?
6 Yohannes e go moro fara: „En wan tra engel ben kon fu na santa presi fu a tempel èn ben bari nanga wan tranga sten gi na sma di ben sidon tapu na wolku: ’Naki yu kron-nefi go na ini na koti nyanyan, bika na yuru doro fu koti nyanyan, bika na koti fu na nyanyan fu na grontapu lepi dorodoro.’” Leki fa a de dan Yesus de kuwnu, ma te now ete a e gi yesi na den instructie di ben tyari kon abra èn di komoto fu Yehovah ini „na santa presi fu na tempel”. Te Yehovah e gi en komando fu teki ne ini a ten fu den laatste dei wan kotiwroko fu du, a e gi yesi fu dat’ede. Yesus „ben trowe en kronnefi go na grontapu èn a grontapu nyanyan ben koti”. — Openbaring 14:15, 16; Hebrewsma 9:24; 1 Korinte 11:3.
7. (a) Na ini san na „koti fu froktu fu na grontapu” de? (b) Nanga san na „koti” disi ben bigin?
7 Ini san na „koti fu nyanyan fu a grontapu” de? Na ini libisma di e kon fu na seti fu sani fu Satan fu dini Yehovah nanga en kownu di a poti. Na koti fu nyanyan e bigin nanga tyari kon makandra fu den memre fu den 144.000 di e mankeri èn di sa tiri makandra nanga Yesus ini en hemel kownukondre (Mattéus 13:37-43). A de den disi „di de na Israël fu Gado”, „fosi froktu gi Gado èn gi na Lam”. Den ben bai den „komoto fu ibri lo èn tongo e pipel èn ibri natie” (Galacia 6:16; Openbaring 14:4; 5:9, 10). Tapu a fasi disi aparti sma fu ala folku, nationaal grupu nanga tongo e bigin fu dini na Yesus di poti na tapu na troon.
8. (a) Na ini sortu yari na tyari kon makandra fu den laatstewan fu den salfuwan ben kon na wan kaba? (b) Leki fa wan tra visoen fu Yohannes e sori dan fa na kotiwroko ben go moro fara?
8 Ma den no de den wan enkriwan. Ini wan tra visioen Yohannes e si na poti fu wan seigelmarki tapu den laatste memre fu den 144.000 (Openbaring 7:1-8). A kan de dati a tyari kon makandra fu den ben doro en marki na a pisiten fu 1935 ma dan, na so Yohannes e ferteri, a si „wan bigi ipi di nowan sma kan teri, fu ala natie èn lo èn pipel, èn tongo tanapu a fesi fu na troon èn fu na Lam” (Openbaring 7:9-17). Na kotiwroko sobun doro èn furu trawan moro ete fu dun „pipel, nationaal grupu èn tongo” e bigin dini Yesus leki a Kownu fu den.
9. Suma na den nyun sma disi di kon na ini, èn sortu tra profeititori e ferteri fu a sori fu densrefi na ini „na laatste fu den dei”?
9 Den nyun sma disi e luku a fesi fu libi ini wan grontapu paradijs ondro na Kownu di Yehovah ben poti (Psalm 37:11, 29; 72:7-9). Na tyari kon makandra fu den ben taki a fesi ini difrenti profeititori. Yesaya fu eksempre ben taki a fesi dati na ini „na laatste fu den dei” natie sa lon go na a oso fu Yehovah (Yesaya 2:2, 3). Haggaï ben taki a fesi fu a seki fu den natie pe „den sani fu ala natie di sma ben sa wani sote ben sa tyari kon makandra” (Haggaï 2:7). Zacharia ben taki fu „tin man fu ala tongo fu den natie”, di ben sa go moksi nanga a pipel fu Gado (Zacharia 8:23). Boiti fu dati Yesus srefi ben taki a fesi fu „na bigi ipi” disi. A ben taki: „Te na Manpikin fu libisma sa kon ini en glori èn ala engel nanga en, dan a sa teki presi tapu en glori troon. Èn ala natie sa tyari kon makandra na fesi en èn a sa prati den sma fu makandra, soleki wan herder e prati den skapu fu den bokoboko. Èn den skapu a sa poti na en reti-anusei ma den bokoboko na en kruktu-anusei.” —Mattéus 25:31-33.
10. (a) Nanga yepi fu san den e tyari „na koti fu froktu fu na grontapu” kon na ini? (b) Suma wawan e wroko na ini makandra nanga den engel?
10 Iya, na heri libismafamiri den e ondrosuku finifini fu si suma de „skapu” èn suma de „bokoboko”. Fa na ondrosuku disi e du? Ini Yohannes visioen na tyari kon na inisei fu „na koti fu nyanyan fu grontapu” e go makandra nanga krakti boskopu di den engel e meki bekenti. Wán engel e meki wan boskopu bekenti „fu tego bun nyunsu”. Wan trawan e ferteri fu na fadon fu Babylon na Bigiwan, èn wan di fu dri e warskow fu na anbegi fu „na wilde meti”, Satan politiek seti fu sani (Openbaring 14:6-10). A de tru dati nowan sma yere trutru den sten fu den engel disi ma wel den ben yere wan srefi boskopu fu den getrow sma (Mattéus 24:14; Yesaya 48:20; Zacharia 2:7; Yakobus 1:27; 1 Yohannes 2:15-17). A de krin dati den boskopu sobun ondro na tiri fu engel e prati nanga yepi fu libisma takiman. Den sma e kon sabi wan sma leki skapu ofu leki bokoboko na a fasi fa a e du wan sani tapu den boskopu di den engel ben tyari kon abra. Ini na pisten fu na twenti Yarhondro dan soso Yehovah Kotoigi ben wroko makandra nanga den engel na wroko disi di abi fu du nanga libi.
11. O prenspari a panya de fu a boskopu disi di engel tyari kon abra?
11 Na prati fu den boskopu disi de wan tranga fanowdu wroko moro leki ibri tra wroko di e du now. No wan politiek doorbraak ofu wetenschappelijke ontdekking kan de moro prenspari. Den boskopu disi e sori tapu a pasi disi fu go na a lusu fu den problema fu na libisma famiri èn e taki fu na tego ferlusu fu getrow sma. Èn san de na moro prenspari sani, den abi fu du nanga na kon santa fu Yehovah nen.
Na yaribericht
12, 13. Gi wantu finifini bodoi fu na yaribericht di e sori dati wan bigi „koti fu froktu” tyari kon makandra kaba?
12 Na fu a reide dati meki Yehovah Kotoigi ibri yari e luku fu a kon fu na yaribuku fu leisi fu den activiteit fu Yehovah organisatie. A e furu den nanga faya efu den si fa a blesi fu den e tan rostu tapu a wroko fu den: Efu yu luku na bericht fu 1987, soleki dati de na tapu bladzijde 3 nanga 4 fu na tijdschrift disi, dan yu sa si dati den engel èn den kompe libisma wrokoman fu den na yari di psa ben de fayafaya srefi.
13 Na bun nyunsu ben de fu yere ini 210 kondre — seiker ’gi ibri lo nanga nationaal grupu nanga tongo’ di wi kan miti nownow (Markus 13:10). Boiti fu dati, dan disi ben de wan wroko di du makandra fu 3.395.612 wan heimarki di noiti a fesi ete wi ben doro ini na kristen historia. Srefi gi son aparti kondre den cijfer de trutru wan ferwondru sani. Ini den Verenigde Staten wan nyun heimarki den ben doro fu 773.219. Tu tra kondre, Brasyon nanga Mexico ben si heimarki fu 216.216 èn 22.168; èn siksi tra kondre ete, Doisrikondre, Ingrisikondre, den Filipijnen, Italiakondre, Yapan nanga Nigeria e ferteri fu heimarki fu moro leki 100.000. Na a tra sei yu abi kondre nanga bigi ipi fu sma di e libi na ini den èn soso wantu dusun preikiman ofu moro mendri ete de. Ooktu den getrowwan disi e du wan bigi prenspari wroko, fu di den e wroko fayafaya fu hori na waarheid leti na ondro muilek omstandigheden dati ai skijn. —Mattéus 5:14-16.
14. Sortu sma den e tyari kon makandra ini Yehovah organisatie?
14 A no de fu taki dati a pipel fu Gado no abi belangstelling fu soso gro fu abi moro sma nomo, ma den sabi dati ala den nyun wan dati di e lon kon na ini Yehovah organisati e de ini Yehovah ai „sani di ala sma ben sa wani sote”. Gi furu sma de dati den „e soktu èn dyeme fu ala den tegu sani” di den ben si e psa ini na kristenheid (Ezechiel 9:4). Alamala e lon go na „a bergi fu Yehovah” fudi den wani meki den gi den leri ini den pasi fu Yehovah (Yesaya 2:2, 3). Fa a de wan krakti buwijsi fu na blesi fu Yehovah — dati fu na pori seti fu sani disi di lobi gudu ala yari agen hondro dusun nyun sma e kon a fesi leki den „sani di ala sma ben sa wani abi sote” fu Yehovah!
Tranga fanowdu ten
15. (a) O bigi na gebied de di den e doro nanga a preikiwroko? (b) O actief na „bigi ipi” de leki fa Yohannes visoen e sori?
15 Na preikiwroko fu Yehovah Kotoigi de wan tranga fanowdu afersi. Fu san-ede? Fu kari wán reide. Na gebied de kefarlek bigi Na ’bun nyunsu’ musu meki bekenti na a „ibri natie èn lo èn tongo” (Openbaring 14:6). Yesus ben taki fu en na ini na agersitori, dati sma fu „ala natie” ben sa prati ini „skapu” èn „bokoboko”. Èn furu wroko de fu du. Fa a de wan sani di fiti. Fu dat’ede „na bigi ipi” di Yohannes ben si, e prijse Gado „dei èn neti” ini en tempel (Openbaring 7:15). Leki wan kon tru fu na visioen disi na bigi ipi ben gi rapport, ini wroko makandra nanga den sa1fu brada fu den, ini yari di psa, ala nanga ala 739.019.286 yuru di ben gi ini na preikiwroko — wan nomru di de tumsi bigi fu kan grabu. Na a heri grontapu, te yu luku en bun, dan disi wani taki gi ibri preikiman wan gemiddelde fu 18 yuru ini wan mun. Efu wi teki disi gersi nanga na gemiddelde fu 12 yuru sowan 10 yari psa kaba, dan wi e si dati na tempo fu na preikiwroko kon moro hei. Fa na persoonlijk gemiddelde fu yu tan te yu poti en na sei di fu a grontapu?
16. (a) San na wan tumsi bunfasi fu du na preiki fu na wortu disi ’leki wan tranga fanowdu afersi’? (b) Omeni ben abi a yari di psa wan prati na a wroko disi?
16 Luku ooktu dati wan nyun heimarki de ini yepi-pionier nanga gewone pionier: 650.095: Disi wani taki dati a yari a fesi moro pionier ben wroko ini a veld leki 25 yari psa yu ben abi. preikiman. Yu ben de wan fu den pionier dati? Efu dati de so, dan yu ben si wan tumsi moifasi fu poti persoonlik na rai fu Paulus ini yu libi: „Preiki na wortu, hori yusrefi nanga en leki nanga wan tranga fanowdu afersi” (2 Timóteus 4:2). Fu san-ede yu no ben sa meki plan fu abi wan prati na a pionierwroko ini a yari 1988 fu moro pikinso wán mun?
Ferwakti fu moro gro
17. Sortu nomru e sori dati na ferwakti fu wan gro ini a ten di e kon de bun?
17 A ferwakti fu gro ini a ten di e kon de trutru tumsi moi. Na nomru fu osobijbelstude de 3.005.048 — èn ibri bijbelstudenti de wan potentieel ’sani di ala sma ben sa wani sote’! Boiti fu dati dan 8.965.221 sma ben de a yari di psa ini april tapu na hori fu na Avondmaal. Den sma dati di ben de drape ben de moro furu sma di no ben de Kotoigi fu Yehovah. Sonwan fu den ben abi belangstelling pas. Wi ben breiti srefsrefi dati den ben de dape èn e gi den dekati futan go bun a fesi. Trawan kande ben ondrofeni den sortu okasi disi wan lo tron kaba. A de krin dati den wani de sote ini na kompani fu den Kotoigi ma den no firi na fanowdu ete fu go moro fara leki disi.
18. San wan sma mu du leki fa den profeititori fu Yesus èn fu Zacharia e taki fu den si en leki wan sma fu Yehovah Kotoigi?
18 Den sortu sma disi e ferdini wan wortu fu prijse fu na belanstelling fu den gi na bijbel waarheid. Ma prakseri dati ini Yesus agersitori den skapu di ben go ini a tego libi, de den sma di ben sori taki den ben wani yepi Yesus salfu brada èn ben wroko nanga den makandra (Mattéus 25:34-40, 46). Ini a profeititori fu Zacharia dan na heri nomru (tin man) e ferklari sondro fu hori wan sani a baka: „Wi wani go nanga unu; bika wi ben yere dati Gado de nanga unu” (Zacharia 8:23). Den no abi wawan wan switi fasi. Dan ’e grabu’ hori Gado pipel èn e go nanga den, fudi den e gi densrefi abra fu dini na Gado fu a pipel disi. Na ini a dei fu wi disi wani taki fu wroko makandra dorodoro nanga Yehovah organisatie.
No langa moro
19, 20. (a) San sa psa leki fa na visoen fu Yohannes e sori te na tyari kon na ini fu na „koti fu froktu fu na grontapu” klari? (b) San disi sa wani taki gi ala sma di no ben saka densrefi na ondro Yesus leki kownu?
19 Wan di fu tu reide de fu na tranga fanowdu fu na kotiwroko. Dyonsro a sa klari (Mattéus 24:32-34). San e psa dan? Leisi san e psa morofara ini Yohannes visioen: „Èn ete wan engel ben komoto kon fu na tempel santapresi, di de ini hemel, èn ooktu en ben abi wan srapu kronnefi. èn ete wan tra engel ben kon fu na altari, èn a ben abi makti tapu na faya èn a ben bari nanga wan tranga sten, gi na sma di ben abi wan srapu kronnefi èn a ben taki: ’Trowe yu srapu kronnefi go na ini fu tyari den bosu kon makandra fu na windroifibon fu na grontapu, bika en droifi kon lepi.’ Èn na engel ben trowe en kronnefi go na grontapu èn ben koti na windroifibon fu na grontapu èn a ben slenger en go ini a bigi winpersbaki fu na atibron fu Gado.” —Openb. 14:17-19.
20 Baka di na koti fu „sani di ala sma ben sa wani sote” tyari konmakadra, dan no wan reide de fu meki na pori owru grontapu disi tan moro langa ete. „Na droifibon fu grontapu”, na heri grontapu seti fu sani disi fu Satan, sa koti trowe èn kisi pori. Dan srefi gensman sa musu erken Yehovah kownu di a poti. Yohannes ben skrifi: „Luku! En [Yesus] e kon nanga den wolku èn ibri ai sa si en ooktu den sma di ben boro en; èn ala lo fu na grontapu sa naki densrefi na ini sari” (Openbaring 1:7; Mattéus 24:30). Dan Yesus wortu gi den dyu kerki tiriman di ben teki den moro prenspari presi na ondro „den sma di ben boro en”, sa kon tru (Mattéus 26:64). A no de fu taki dati den kerki hoigriman dati no sa kisi wan opobaka fu „si” Yesus persoonlijk (Mattéus 23:33). Ma ala sma di e sori now sowan yeyefasi èn e weigri fu teki Yehovah kownu di a teki, sa musu fu erken en te a e kon fu pori den natie na Armageddon. —Openbaring 19:11-16, 19-21.
21. Fu san-ede a pipel fu Gado ini wroko makandra nanga den hemel engel mu wroko tranga?
21 Na tan a libi fu aparti sma de ini kefar. Leki kompe wrokoman fu den engel wi e tyari wan hebi frantwortu. Ma fa a de wan bigi grani! Meki wi go doro ini wroko makandra nanga den hemel engel fu wroko tranga aladi wi a wroko fayafaya fu feni ala den sma di yu kan teki gersi nanga skapu, den „sani san ala sma ben sa wani sote” fu Yehovah, bifo na kotiwroko tapu.
Yu kan tyari disi kon na krin?
◻ San de te so fara na moro prenspari sani na ini a di fu twenti yarhondro disi?
◻ San de na „koti fu froktu fu na grontapu” èn fa disl tyari konmakandra?
◻ San na wantu marki fu Yehovah „skapu”?
◻ Fa na yaribericht e sori dati Yehovah blesi de tapu na kotiwroko?
◻ Fu san-ede a kotiwroko de wan tranga fanowdu afersi?
[Raportu na tapu bladzijde 3, 4]
1987 DINIWROKO RAPORTU FU YEHOVAH KOTOIGI NA HERI GRONTAPU
(Luku a tijdschrift)