Kownukondrepreikiman e ferteri

Yehovah ben blesi a sei di den ben teki gi en wet

Na ini wan kondre na ini a Mindri-Owtu wan papa ben e repareer wan boro banti di wan oto ben naki en manpikin fu fo yari èn dan ben rij gwe doro esesi. Nanga na pikin di ben kisi mankeri na tapu en mama bowtu a papa rij go na a moro krosbei at’oso pe den ben seni en go na wan tra at’oso 26 kilometer moro fara. A datra ben taki dati a boi ben kisi mankeri na inisei èn ben musu kisi wan operatie pe brudutransfusie ben musu gi. Aiti tra datra ben agri nanga dati. Fudi na papa nanga mama ben sabi Gado wet fu brudutransfusie, meki den no ben gi pasi. Na datra ben wani tapu skreki gi den nanga den wortu: „Yu abi soso feifi ninuut fu teki wan bosroiti noso wi no sa fasi na pikin fu yu srefi efu baka dati yu ben sa agri nanga wan brudutransfusie.” Disten na maag fu na pikin ben tan sweri èn na toestand ben kon de muilek.

Na brada fu na papa na skin sei, di no de na ini waarheid, ben poti druk a tapu a papa fu gi pasi fu wan brudutransfusie. A ben taki srefi: „No si a boi grantangi leki yu pikin, ma leki di fu mi. Fudi yu konsensi e trobi yu, meki mi sa tyari na frantwortu èn mi sa teki den kostu fu na at’oso tapu mi, sodati a pikin kan kisi na brudu di de so fanowdu gi en. Disi na a wan enkri manpikin.” Na druk ben muilek fu tyari, ma a papa nanga mama ben tan hori na a bosroiti fu den.

Den ben teki a boi gwe èn den go suku wan bepaalde at’oso, ma den ben lasi a pasi. Toevallig den ben si wan bord di ben sori go na wan tra at’oso èn den ben go drape aladi a no ben de na at’oso di de ben e suku. Baka di na datra ben ondrosuku na boi, a ben taki: „Na sweri fu na maag fu na pikin kan sori na tapu inisei brudu ma a no afu de so. Tamara wi sa ondrosuku san psa.” Den ondrosuku ben sori dati a no ben de wan brudu ma dati na sweri ben abi fu du nanga na ongoloku. Wan operatie no ben de fanowdu. Na datra ben taki srefi dati wan operatie ben sa de tumsi kefarlek. „Grantangi fu Yehovah”, a papa nanga mama ben taki, „dati a ben kibri a pikin fu wi èn dati a ben tyari wi go na a yoisti at’oso èn na a yoisti datra.”

Fa na situwasi de now tin yari na baka? Na papa e ferteri now: „Na brada fu mi na skin sei di ben poti sowan druk a tapu mi, ben go frustan na bosroiti fu wi èn ben si na tiri fu Yehovah ini na afersi disi. Disi ben wiki en belangstellng gi na waarheid di a ben teki èn now a teki dopu èn a e dini leki owruman ini na geneente. Makandra nanga en uma nanga den pikin e dini Yehovah fayafaya. Mi tu tra brada de ooktu na ini na waarheid nanga den osofamiri fu den. A wan fu den e dini leki dinari na ini a diniwroko. Mi papa nanga mama ben teki dopu no solanga psa kaba, aladi den ben doro wan hei libimarki. Sobun aladi a ben de gi mi uma nanga mi wan kefarlek ondrofeni, dan ala sani ben meki dati sowan 30 famiriman fu mi ben teki na waarheid. Sonwan fu den teki dopu kaba èn e dini leki owruman èn dinari ini na diniwroko, trawan e go a fesi na a sei fu na dopu. Na manboi fu mi di de now tinafo yari de wan gosontu preikiman di abi faya èn e luku na a ten fu teki dopu. Fa mi uma nanga mi gi Yehovah grantangi dati a ben yepi unu fu teki na yoisti bosroiti ini akruderi nanga san en wet e ferteri na ini Tori fu den Apostel 15:29”!