Suma yu kan fertrow trutru na ini a ten fu wi di e gi frede?
„No poti yu fertrow tapu gran suma, no tapu na manpikin fu na grontapu sma di no abi yepi.” — PSALM 146:3.
1. San na wan marki fu a ten fu wi, èn sortu fanowdu sori taki a de sobun?
FOSTEN leki pikin te wi ben frede wan dei, dan wi ben suku trowstu nanga kibri na wi papa nanga mama di lobi wi fudi wi ben fertrow den. Ooktu leki libisma wi abi fanowdu fu sma di wi kan fertrow. Èn disi de spesrutu so na ini a ten disi, now di someini skreki sani e feni presi. Wan Doisri koranti ben taki fu wi ten: „Na grontapu noiti a fesi ben furu so nanga frede.” Someini tron baka tiriman, korantiman, nanga tra sma ben taki fu a brok’ede fu den fu den seryusu problema di a libismafamiri tanapu na den fesi.
2. Fa na frede èn na mankeri fu fertrow gi na geslagti disi ben taki na fesi?
2 Den sortu wortu disi e taki asrefi sani san Yesus Kristus ben taki a fesi fu wi ten di a ben ferklari dati disi ben sa abi leki marki „bruya skreki fu den natie, di no sabi wan pasi fu komoto, aladi den sma e kon weri fu frede èn fruwakti fu sani di e kon tapu na grontapu pe libisma e libi” (Lukas 21:25, 26). A bijbel e taki a fesi na ini den lasti dei dati muilek ten sa doro di tranga fu psa èn dati den sma ’ben sa lobi densrefi nomo, ben sa de deloyaal èn taki ogri fu tra sma èn de toriman’. Den wortu disi e sori dati wán marki fu a ten fu wi, ben sa de wan seryusu mankeri fu fertrow.
Fertrow di e go a baka
3. Sortu bewijsi de dati na fertrow no ben kan hori ensrefi na ini a ten disi?
3 Na ini a ten disi di e gi frede fu dat’ede wi abi bigi fanowdu fu sma di wi kan fertrow, sma di sa de loyaal, wan yepi èn kibri na ini a ten fu nowtu. Ma furu sma e firi dati den sma di den ben fertrow libi den. Na ini wán kondre na edeprakseri di e kon now ben tanapu na tapsei fu wan koranti artikel: „Sma no e fertrovr pikinmoro no wan enkri publiki instelling moro”. Politiekman nanga den bigiman ini a bisnis grontapu kisi moro pikinso fertrow. Ooktu na ini na osofamirilibi a fertrow e go esesi na baka, soleki e kon a krin ini den hei cijfer fu brokotrow. Ini son kondre wán tapu dri trow e kon na wan kaba ini wan brokotrow, ofu srefi kaba wán tapu den tu. Ini wán kondre 70 percent fu ala nyun trow e kon ini wan brokotrow fosi tin yari! Sobun moro nanga moro a fertrow e brokosaka. A mu meki presi gi wantrouwen. A no de wan ongewoon sani moro fu yere sma e taki: „Mi no e fertrow nowan suma moro.”
4. Fa furu yonguwan kon ondro a krakti fu frede?
4 Ini a ten disi someini wantrouwen de fudi wi e libi na ini a ten di e gi moro frede ini a heri libi sma historia. Na yarhondro disi ondrofeni tu grontapu feti èn tintin tra feti di kostu moro leki wan hondro milyun sma libi. Now kernwapen de wan kefar fu pori ala libi na grontapu. Èn disi abi krakti tapu na fertrow fu srefi furu yongusma. Wan datratijdschrift ben ferteri: „Moro nanga moro pikin, iya srefi pikinnengre, e kon frede fu na kefar fu wan nucleaire holocaust.” Wan koranti na ini Canada ben taki dati now na furu yongusma „sondro sarifasi, sari, bita-atifasi nanga wan firi fu de sondro yepi” de. Wan yonguwan ben taki: „Wi e firi dati den bigisma no e kibri wi. Wi ben sa kan gro wan dei kon tron a moro sondro firi geslagti fu alaten.
5. Kon un taki dati den kan taki, ma fa a moro bigi pisi fu grupu fu pikin di no du noti èn no man du noti ben sa taki?
5 Èn san wan tra grupu pikin abi fu taki — efu den ben kan taki — fu na firi dati bigisma no e kibri den? Wi e bedoel den pikin di den kiri nanga a puru fu bere bifo den ben gebore srefi. Wán schatting e poti en so dati a nomru fu puru bere na a heri grontapu de sowan 55 milyun ini wan yari ten. Fa disi de wan brokosaka fu na fertrow fu na moro bigi pisi fu na libismafamiri di no du noti èn di no kan du noti.
6. Fa ogridu ben meki na wantrouwen na ini wi ten gro?
6 Ooktu wan tra skreki-ati di e gro ben meki a gro fu a wantrouwen ini a ten fu wi du kon: na skreki ati fu de wan sma di den sa du hogri. Furu sma e du asrefi leki na uma di ben taki dati na neti alaten a e sribi nanga wan syatu mofo gon na ondro en kunsu. Wan tra uma di e frede ben taki: „A e meki mi law . . . Mi granmama noiti ben e sroto en doro.” Na so wan koranti ini Puerto Rico ben skrifi ini wan redactioneel kommentaar: „Den sma di den e sroto, na wi,” iya, ini wi eigi oso di abi isri nanga sroto. Na skreki-ati disi fu den sma abi en fondamenti. Ini den Verenigde Staten fu eksempre dan wán tapu dri uma ini en libi wan leisi den sa ros en fu didon na en. Na edeman fu na Amerkan gesontudienst ben ferteri dati „ibri yari sowan fo milyun Amerkan e abi fu nyan pina fu seryusu tranga fasi — kiri, go didon na wan uma nanga tranga, fonfon fu masra, mishandeling fu pikin, fufuru na strati”. Èn den ogridu dati ini moro furu kondre de gewoon sani fu aladei, nanga a bakapisi. dati a fertrow fu na wan sma ini a trawan moro e go na baka.
7. Fu san-ede ogri ekonomia toestand e meki wantrouwen du kon?
7 Ini den ontwikkelingskondre a moro bigi pisi fu den sma e pina. Pikinso fu den abi a fertrow dati wan sma sa de tu fu yepi komoto ini disi. Na president fu wán fu sowan kondre ben taki dati na ini wan distrikt 270 fu ibri dusun baby di mama e meki, e dede bifo a owru wan yari. Èn soso wán tapu den 100 oso abi watra. Fu wan tra kondre na tiri e ferklari dati 60 percent fu den pikin e libi na ini pina èn seibi milyun pikin di e libi e gro leki sma di no kan leisi efu skrifi, leki sma di den skopu trowe di no sabi a grontapu èn di den no kan gebroiki.” Ini den Verenigde Staten soleki den schat dan na nomru fu yonguwan di no abi wan dak na tapu den ede de 500.000, aladi sonwan e ferteri dati na trutru nomru de moro bigi. Omeini fertrow den sortu yonguwan dati kan abi ini den papa nanga mama, na ini na maatschappij na ini orde èn wet ofu na ini den pramisi fu tiriman?
8. (a) Fa na stabiliteit fu gudu kondre èn na grontapu ekonomia de ini kefar? (b) O fara wan sma mag howpu dati den sabiman kan lusu ekonomia problema?
8 Ekonomia problema de srefi gi den gudu kondre wan sani di e trobi den. Ini wan yari no solanga psa kaba den Verenigde Staten ben abi na moro bigi nomru bank faillissement sensi na bigi krisis fu den yari 1930. Wan ekonoom ben skrifi: „A netto resultaat de wan bank di de now net so kwetsbaar leki ini den yari 1920”, let bifo a ben fadon panya. Wan sma di ben luku sani bun ben taki fu wan „bigi winti di e kon di e pori sani” ini na grontapu ekonomia. Wan trawan ben taki: „A firi fu a tranga fanowdu fu a ten e kon fudi na overbelasting na ini na internationaal sistema no e taki a o kon, a de kaba.” A fertrow de wan reti wan dati den ekonomiaman sa tyari den natie komoto fu na swampu fu problema? Wan fu den ben taki dati nanga den prognose fu den, ’e misi so kefarlek dati sondro degedege den e sai bruya’.
Na positief luku fu sani di no de yoisti
9. (a) San psa nanga na positief luku di ben de na a kenki fu na yarhondro? (b) Fu san-ede Yehovah Kotoigi no ben sa wani poti den nen na ondro na papira fu den Verenigde Natie na ini 1945?
9 O bigi disi e kenki fu ala sani fu na positief luku fu sani di ben de ini a grontapu ben go ini na di fu 20 yarhondro. Tintin yari wan betrekkelek vrede ben de, èn sma ben bribi dati vrede nanga tanbun ben sa doro nyun heimarki. Na ini 1914 na Fosi Grontapufeti na ini wan slag ben tyari wan kaba kon na a fruwakti dati. Na ini 1945, baka ete wan moro takru di fu tu Grontapufeti, den ben poti den nen na ondro na handvest fu den Verenigde Naties. Den natie ben poti a tapu papira fa den e si baka a feti wan grontapu fu vrede èn geregtigheid. Wan tori no solanga psa kaba e taki: ’51 kondre di e teki presi gi ibri werelddeel, ibri ras èn ibri fasi fu anbegi, ben poti den anu na ondro na definitief papira.’ Toku wán fasi fu anbegi ben de di no ben de drape èn di no ben wani dati ooktu, dati wani taki Yehovah Kotoigi. Den ben sabi dati den pramisi dati fu vrede, tanbun na geregtigheid no ben sa kan kon fu na sei fu ini-wan natie fu na grontapu disi, èn ooktu no fu wan bondru kon na wan fu natie, soleki den Verenigde Natie.
10. Fa na trutru fasi fa sani de now kan teki gersi nanga na dren fu den Verenigde Natie na ini na ten dati na ini 1945?
10 Na srefi tori e taki: ’Fotenti yari na baka a gersi dati a bun fu teki na trutru fasi fa sani de gersi nanga den moro moi sani di wi e fruwakti fu a libi. Na bewijs materiaal e tyari wi kon na wi frustan. Wan grontapu pe mendri geregtigheid nanga mendri bun de èn pe tranga fasi di e gro de a trutru fasi fa sani de. A pisi fu den sma di no abi nyanyan, watra, wan dak a tapu den ede, a sorgu fu gesontu èn a kisi fu leri e gro dei fu dei. Ini na dren fu 1945 den sani disi no ben kon na ini.’ A e taki moro fara: ’fotenti yari baka di den natie ben naki anu go ini wan fu sorgu dati ala sma ben kan libi fri fu frede nanga sorgu, dan na tru fasi fa sani de fu den yari aititenti gi moro pikinso wan kwart fu a libismafamiri de wan kefarlek pina. Na nomru fu dede di abi fu du nanga angri de gemiddeld 50.000 wan dei.’ Toku den natie e gebroiki ibri yuru moro leki honderd milyun dollar gi feti!
11. O betrouwbaar den pramisi fu libisma de fu kisi wan moro betre grontapu?
11 Wi kan poti fertrow ini libisma pramisi dati den problema disi kan lusu, efu wi luku na prenki disi di de sondro trowstu baka ala den yarhondro dati di libisma ben kisi nofo okasi? Den sortu pramisi disi de net so betrouwbaar leki den wortu fu na kapten fu wan bigi se boto di ben taki: „Mi no kan tyari kon ini mi prakseri nowan enkri omstandigheid di ben sa kan sungu [wan bigi] sipi. . . . Na meki fu boto ini a ten disi gro psa na tori dati.” Èn wan matrosi fu na sipi dati e taigi wan sma di ben waka nanga a boto: „Gado srefi no ben kan sungu na boto disi.” Toku na sipi dati, na Titanic ben sungu ini 1912 èn 1500 sma ben dede nanga dati. Na ini 1931 na Nationaal Onderwijs Rai ini den Verenigde Staten ben taki dati tangi fu na onderwijs „meki na du fu hogri bifo 1950 ben de sobun leki a wai puru”. Na ini 1936 wan Ingrisi koranti skrifiman ben skrifi dati na a yari 1960 „nyanyan, krosi nanga wan oso ben sa de net so bunkopu, leki loktu”. Yu no e agri dati na trutru fai fa sani de now e sori taki den pramisi disi no kan tru?
Den sma di warti fu gi den ala fertrow
12. Suma wi kan fertrow dorodoro èn sortu tyariman a ben gi wi?
12 Wi abi fu dat’ede nanga ala howpu fanowdu fu wan betrouwbaar fonten di kan tyari wi psa na ten disi di de nanga frede. Na fonten dati no kan de fu libisma sei. Na libismafamiri ben wroko densrefi go ini den problema di de so bigi dati den no kan komoto na ini moro nanga den eigi krakti. Na fonten di wi kan fertrow dorodoro na a Mekiman fu libisma, Yehovah Gado. En sabi fu san-ede a grontapu kon na ini a toestand disi, pe na situwasi disi e hari go èn san kan du na en. Èn en ben tyari den bodoi disi kon na krin ini a buku di a ben gi wi leki tyariman, na Bijbel. Na ini 2 Timotéus 3:16, 17 den e taki fu na buku dati: „Ala den buku Gado ben meki den skrifi nanga yepi fu en santa yeye èn den de bun fu leri sma, pir’ai gi sma, poti sani reti, fu gi tranga leri ini regtvaardikifasi, sodati na sma fu Gado sa de bekwaam dorodoro, de srekasreka dorodoro gi ibri bun wroko.”
13. San Yehovah Kotoigi e frustan ini a tori fu na bijbel?
13 Luku nanga sortu seikerfasi den e taki disi. Na Wortu fu Gado di skrifi ondro krakti fu santa yeye e poti sani reti. A e ferteri wi san de yoisti. A e meki wi bekwaam dorodoro. Seiker, furu sma no e teki na bijbel fu san a buku disi de — a Wortu fu Gado. Ma Yehovah Kotoigi e du dati (1 Thessalonika 2:13). Wi e frustan dati a Mekiman fu na bigi universum nanga en milyardmilyard stari sistema èn en trilyuntrilyun stari seiker ben man fu meki wan buku du kon. èn en kan sorgu ooktu dati a tan de soifri gi sma di e suku waarheid. — 1 Petrus 1:25.
14. Fa na bijbel de ini akruderi nanga na disi ten trutru fasi fa sani de?
14 San a Wortu fu Gado na ini a ten fu wi di e gi frede abi fu taki fu na afersi disi fu fertrow? Den wortu fu a bijbel de krinkrin ini akruderi nanga den trutru omstandigheden di de. Yeremia 10:23 e taki soifri: „Mi sabi heri bun o Yehovah dati a no de na wan sma fu grontapu fu bepaal en pasi. A no de na wan man di e waka, srefi fu poti en futu na pasi.” Èn Psalm 146:3 nanga reti e gi unu na tranga dek’ati: „No poti un fertrow na tapu heiman, èn ooktu no tapu na manpikin fu na sma na grontapu di ferlusu no de na en.”
15. Sortu rai a bijbel e gi wi ini a tori fu fertrow?
15 A Wortu fu Gado e warskow wi dati wi no mu fertrow srefi tapu wisrefi fudi libisma de onvolmaakti (Romeini 5:12). Yeremia 17:9 e taki: „Na ati de feradelek moro leki wan tra sani.” Fu dat’ede Odo 28:26 e ferklari: „A sma di e fertrow tapu en eigi ati, de sondro frustan, ma a sma di waka na ini koni, en sa psa.” Pe wi kan feni na koni disi di e yepi wi fu pasa? Odo 9:10 e piki: „Na frede fu Yehovah de na bigin fu koni èn na sabi fu na Moro Heiwan, dati na frustan.” Iya, soso na koni fu na Mekiman kan tyari yu psa na ten disi di de nanga frede. Fu dat’ede Odo 3:5, 6 e gi na rai: „Fertrow tapu Yehovah nanga heri yu ati èn no bow tapu yu eigi frustan. Poti prakseri tapu en ini ala yu pasi, èn en sa meki yu pasi reti.”
Na prakseri di Gado abi fu den fasi fu anbegi fu a grontapu disi
16. Sortu fowtu denki den bakaman fu den fasi fu anbegi fu a grontapu disi e feni bun, net soleki den Fariseiman ben du na ini a ten fu Yesus?
16 Na koni disi di komoto fu Gado sa yepi wi fu tan farawe fu na trapu, di o tyari dede kon, èn di den fasi fu anbegi fu a grontapu disi ben kon na ini. Den bakaman fu en fu den kerki disi e feni dati den de regtvaardiki fudi den lobi fu dini Gado. A fasi fu den abi furu fu du nanga san skrifi na ini Lukas 18:9 pe tanapu taki Yesus ben taki „na agersitori di e kon now . . . ooktu gi son sma di e fertrow a tapu densrefi dati den ben de regtvaardiki”. Wán Fariseiman ben gi Gado tangi dati a no ben de wan sondari, ma wan belastingman ben begi doronomo: „O Gado, abi sari nanga mi sondari.” Yesus ben taki: „Mi e taigi unu: Di a sma disi [na sondari] ben go na en oso, a ben sori taki a de moro regtvardiki leki a trawan dati [na Fariseiman], bika ibriwan sma di e hei ensrefi, den sa saka, ma suma e saka ensrefi den sa hei.” — Lukas 18:10-14.
17. Fa Gado e si den muiti fu den fasi fu anbegi fu den sma di de leki den Fariseiman?
17 Na Fariseiman no ben saka ensrefi gi Gado. Na presi fu dati a ben feni ensrefi akruderi en eigifasi regtvaardiki. Ma Gado no ben si a sani so (Mattéus 23:25-28). Na sakafasi sondari na a tra sei ben de a sma di ben sori san Gado Wortu ini Yesaya 66:2 e taki: „Tapu den disi mi sa luku, tapu den mofinawan èn den wan di brokosaka ini yeye èn di e beifi gi mi wortu.” Den kerki fesiman dati no ben e beifi gi a Wortu fu Gado. Den ben poti en na wan sei. Den ben go den eigi pasi èn ben meine morofara dati Gado ben e feni den bun. Ma Yesus ben taigi den: „No ibriwan sma di e taki gi mi: ’Masra Masra’, sa go na ini a kownukondre fu hemel, ma en di e du a wani fu mi Tata di de na ini hemel. Furu sma sa taigi mi tapu a dei dati: ’Masra, Masra na ini yu nen wi ben puru ogri yeye tapu sma èn na ini yu nen wi ben du furu krakti wroko?’ Èn toku na publiki mi sa ferklari gi den: Mi no ben sabi unu noiti! Komoto gwe fu mi, un wrokoman fu kruktudu.” — Mattéus 7:21-23.
18. Fa Gado sa krutu fasi fu anbegi di e taki dati den e dini en ma di no e hori en wet?
18 Den kerki fesiman dati ini na di fu fosi yarhondro no ben fertrow tapu Gado. A presi fu dati den ben fertrow tapu gwenti nanga leri di ben pasa a wet fu Gado (Mattéus 15:3, 9). Fu dat’ede meki Yesus ben meki den kon frustan: „Yu oso den e libi leigileigi na baka” (Mattéus 23:38). Leki buweisi dati Gado futru ben drai baka gi den dyu fasi fu anbegi, dan na mamafoto Yerusalem nanga en tempel ben kisi pori na ini a yari 70 fu un Gewone Teri fu na anu fu den Romein legre. Na ini a ten fu wi a de precies so. Den kerki fesiman fu a grontapu disi abi den eigi markitiki gi anbegi, di no e kruderi nanga den markitiki fu Gado. Fu dat’ede meki den no e du en wani ma den eigi wani. Fu dat’ede meki Gado e si den leki wrokoman fu kruktudu (Titus 1:16). Leki buwijsi dati Gado ben drai baka gi den fasi fu anbegi disi, soleki a ben pori Yerusalem nanga en tempel na ini a fosi yarhondro nanga anu fu den Romein legre. — Luku Openbaring kapitel 17, 18.
19. Sortu aksi wi kan poti ini a tori fu a fasi fu anbegi?
19 Nanga disi wi e gi wan negatief prenki fu den fasi fu anbegi fu a grontapu? Fa wi kan de seiker dati a krutu fu Gadu dyonsro sa kisi den? San wan fasi fu anbegi mu du fu kisi a bun-ati fu Gado? Historia eksempre de di e sori dati Yehovah e kibri den sma di e go opregtl na en èn e saka densrefi na ondro en wet? A tra artikel o piki den aksi disi.
Aksi fu luku san wi ben leri
◻ San meki wantrouwen du kon na ini a ten fu wi?
◻ Fu san-ede na positief luku fu sani fu na grontapu disi fowtu?
◻ Suma wi kan fertrow dorodoro èn sortu tyariman a ben gi wi?
◻ Fu san-ede wi no mu fertrow tapu wisrefi èn ooktu no tapu tra sma?
◻ Fa Gado e si den afsi fu anbegi fu a grontapu disi?
[Prenki na tapu bladzijde 4]
Na Fariseiman ben denki dati a ben de regtvaardiki, ma na sondari ben begi nanga sakafasi fu kisi sar’ati.
[Prenki na tapu bladzijde 6]
Gado e krutu fasi fu anbegi di no e du en wani, joisti leki fa a ben krutu na dyu-bribi na ini na fosi yarhondro, di Romein legre ben pori Yerusalem