Meki Yehovah de yu fertrow
„Fertrow tapu Yehovah en du san bun; . . . feni switi prisiri na ini Yehovah.” — PSALM 37:3, 4.
1, 2. (a) San ben psa na ini na fosi yarhondro nanga den sma di no e fertrow tapu Yehovah, èn nanga den sma di ben e fertrow tapu Yehovah? (b) Sortu aksi wan sma ben kan aksi ensrefi fu afsi fu anbegi na ini wi ten?
INI a fosi yarhondro fu wi Gewoon Teri, den dyu kerki fesiman ben taki dati den e anbegi Gado. Ma den no e fertrow tapu en. Den ben pasa en gebod èn ben ferfolgu den sma di ben teki presi fu en (Mattéus 23:38). Na ini 70 G.T. den Romein legre ben pori Yerusalem nanga en tempel èn disi ben go makandra nanga bigi lasi fu libisma libi na mindri den kerki tiriman nanga den bakaman fu den. Ma den sma di ben fertrow tapu Yehovah ben kisi kibri. Fudi den ben poti prakseri a tapu den warskow fu den takiman fu en èn fudi den ben lon gwe meki den ben kibri den libi. — Mattéus 24:15-22; Lukas 21:20-24.
2 Wi e si na ini den lasti dei disi fu na seti fu sani dati den fasi fu bribi fu na grontapu disi e poti fertrow na ini na tru Gado, Yehovah? Den e gi yesi na en gebod èn e du en wani, ofu den e waka na baka den kerki fesiman fu na fosi yarhondro di Gado ben drai baka gi den? Sortuwan fu den disi ten fasi fu anbegi kan fruwakti dati Yehovah sa kibri den fudi den bakaman fu den ’e fertrow tapu Yehovah èn e du san bun’? — Psalm 37:3.
Pe na brada lobi de?
3. Fu san-ede muiti fu a sei fu kerki ben misi a marki fu tyari vrede kon?
3 No solanga psa kaba Paus Yohannes II ben warskow ’dati na tan a libi fu na heri libismafamiri de ini kefar.’ A ben ferklari nanga tranga dati ’wi kan kakafutu gi den kefar disi moro bun te den muiti fu difrenti kerki grupu bondru kon na wan’. A de a wani fu Gado, a so a ben taki, dati kerki tiriman „wroko makandra” fu na bun fu „vrede nanga verzoening”. Ma efu dati de a wani fu Gado, fu san-ede Gado no ben blesi den muiti di e tan go doro ala den yarhondro na ini a richting dati? A no ben du disi fudi den fasi fu anbegi disi no ben fertrow tapu a fasi fu Gado fu tyari vrede kon nanga yepi fu en Kownowkondre (Mattéus 6:9, 10). Na presi fu dati den ben gi yesi na politiek nanga den feti fu den natie. Fu dat’ede na ini ten fu feti kerkisma fu na wan natie ben kiri kerkisma fu na tra natie, srefi memre fu den eigi fasi fu anbegi. Katholiek ben kiri katholiek, anitri ben kiri anitri, èn asrefi ben de a mindri tra fasi fu anbegi. Ma trutru yeye brada e kiri makandra aladi den e taki dati den e dini Gado?
4. Leki fa Yesus taki dan san de na markitiki gi tru fasi fu anbegi èn fu san-ede disi ben de wan nyun gebod”?
4 Yesus ben poti a marki disi gi a tru fasi fu anbegi di a ben taigi en bakaman: „Mi e gi unu wan nyun gebod dati unu mu lobi makandra; net soleki mi ben lobi un dati unu lobi makandra. Nanga disi ala sma sa sabi dati un de mi disipel efu un abi lobi gi makandra” (Yohannes 13:34, 35). Den sma di e libi akruderi na tru fasi fu anbegi mu lobi makandra sobun. Disi ben de „wan nyun gebod” fu di Yesus ben taki: „Net soleki mi ben lobi unu . . . un mu lobi makandra tu.” A ben de klari fu gi en libi abra fu en bakaman ede. Den ben mu de klari fu du asrefi — no fu teki na libi fu den kompebribiman ma fu gi den eigi libi abra efu dati ben de fanowdu! Na ini dati na nyun pisi fu na gebod disi de, bika sowan sani na wet fu Mozes no ben taki fu en.
5. Fa a Wortu fu Gado e poti krakti na tapu a fanowdu fu lobi èn wanfasi a mindri en tru anbegiman?
5 A Wortu fu Gado e ferklari: „Efu wan sma e taki: ’Mi lobi Gado’ èn toku abi ogri-ati fu en brada, dan a de wan leiman. Bika a sma di no lobi en brada di a ben si, no kan lobi Gado di a no ben si. Èn a gebod disi wi ben kisi fu en dati a sma di lobi Gado, mu lobi en brada ooktu.” (1 Yoh. 4:20, 21) Nanga na lobi disi den sma di e fertrow tapu Gado e kibri internationaal wanfasi. Na apostel Paulus e taki na ini 1 Korinte 1:4: „Now mi e fermane unu brada, nanga na nen fu wi Masra Yesus Kristus, dati alamala e taki ini akruderi nanga makandra èn dati pratifasi no de na un mindri, ma dati wi de krosbei ini wanfasi na ini na srefi geest èn na ini asrefi fasi fu prakseri.” — Luku ooktu 1 Yoh. 3:10-12.
6. Fu san-ede Yehovah Kotoigi kan taki dati den de ’krin fu na brudu fu ala sma’?
6 The World Book Encyclopedia e taki dati milyun sma ben lasi libi na ini na di fu Tu Grontapufeti. Sma fu ibri bigi kerki ben kiri den, boiti Yehovah Kotoigi. No wan fu den sma di ben dede ben lasi libi fudi wan Kotoigi fu Yehovah kiri en, bika den ben gi yesi na a gebod fu lobi makandra èn ben weigri fu bumui na ini den feti fu den natie. Aladi furu kotoigi fu na neutraal standpunt fu den ben dede fu den bribi ede, toku netleki na apostel Paulus den ben taki: „Mi de krin . . . fu na brudu fu ala sma.” — Tori fu den Apostel 20:26.
7, 8. Fa son kerki fesiman e piki taki den abi brudu paiman?
7 Wan katholiek priester, di ben dini leki preikiman na ini a legre gi den man di e frei opolangi èn di ben trowe ini 1945 den atoom bom tapu Yapan, ben ferklari no solanga psa kaba: „Ini den 1700 yari di psa kerki ben si feti wan prenspari sani. Den ben tyari den sma go sofara fu denki dati feti de wan grani wroko gi kristensma. Dati no de tru. Den ben spuru wi edetonton . . . na evangelium fu na regtvaardiki feti de wan evangelium di Yesus noiti ben leri sma. . . . Noti na ini a libi ofu na leri fu Yesus e meki wi hori na a prakseri dati kande a no bun fu bron libisma nanga yepi fu wan kernede, ma de bun fu bron sma nanga napalm bom ofu opolangi di e fringi faya.”
8 Na Catholic Herald fu Londen ben ferklari: „Den fosi kristen ben teki Yesus wortu letterlek èn ben weigri fu du dienst ini na Romein legre, awinsi a strafu fu dede ben de tapu disi. Na heri historia ben sa abi wan tra waka efu na kerki ben hori tranga na a standpunt dati di ben de biginbigin? Efu den kerki fu now ben sa si na kans fu kon a fesi nanga wan gemeenschappeleke veroordeling fu feti . . . , san ben sa wani taki dati ibri kerkiman, netleki den fosi kristen, fu en konsensi ede weigri dienst fu di en konsensi e trobi en, dan trutru a ben sa de mogelek fu dyaranti vrede. Ma wi sabi dati disi noiti sa psa.”
9. Fu san-ede wi kan taki dati Yehovah draibaka gi den fasi fu anbegi fu a grontapu disi?
9 Den fasi fu bribi fu na grontapu disi, sobun ben teki èn gi ini a tori fu Gado wet na wan fasi di tyari rampu kon. Den bakaman fu den ooktu no ben fertrow tapu Gado soleki den Fariseiman ben du disi. „Na publiki den meki bekenti dati den sabi Gado, ma den e sori dati den no sabi en nanga den wroko fu den, fudi den de wan tegu sani èn no e gi yesi èn no de bun gi iniwan bun wroko” (Titus 1:16). Fu dat’ede meki Gado net so definitief ben drai baka gi den fasi fu anbegi leki fa a ben du disi nanga den hoigri dyu fasi fu anbegi na ini den fosi yarhondro. — Mattéus 15:9, 14.
Psa libilibi fudi yu e fertrow tapu Yehovah
10, 11. San kownu Hizkia ben du di Assiria ben aksi fu Yerusalem gi ensrefi abra, èn suma na takiman fu Sanherib ben spotu?
10 No poti yu fertrow na tapu libisma lusu fu den problema fu grontapu. Poti yu fertrow moro furu tapu na Sma di kan meki en pramisi kon tru (Yosua 23:14). Leki wan eksempre luku pikinso san ben psa na ini a di fu aiti yarhondro bifo Kristus na ini den dei fu kownu Hiskia. Na bijbel e ferteri fu en: „A ben tan du san ben de reti na ini Yehovah ai” (2 Kownu 18:3). Na ini en dei na makti grontapu kownukondre Assiria ben opo go feti nanga Yerusalem. Na takiman fu na kownu fu Assiria Sanherib ben aksi Yerusalem fu gi ensrefi abra èn a ben taki: „Disi a kownu ben taki: ’No meki Hiskia bedrigi unu, bika a no sa man ferlusu unu puru fu mi unu, èn no meki Hiskia meki un fertrow a tapu Yehovah.’” — 2 Kownu 18:29, 30.
11 San Hiskia ben du? A bibel e ferklari: „Hiskia ben go a fesi fu Yehovah èn a ben taki: ’O Yehovah na Gado fu Israël, di e sdon na tapu den cherubs, yu wawan na a tru Gado fu ala kownukondre fu na grontapu. Yu ben meki na hemel èn na grontapu. Te Beni yu yesi o Yehovah èn yere. Opo yu ai o Yehovah, èn luku èn yere den wortu fu Sanherib, di a ben seni kon fu kosi na libi Gado. . . . O Yehovah, wi Gado, ferlusu wi grantangi fu en anu, sodati ala kownukondre fu a grontapu mag sabi dati yu, o Yehovah, wawan na Gado.’” — 2 Kownu 19:15-19.
12. Fa Yehovah ben yere Hiskia begi?
12 Yehovah ben yere a begi disi èn a ben seni a profeiti Yesaya fu ferteri Hiskia: „Yehovah ben taki fu a kownu fu Assiria a sani disi: ’A no sa kon na inisei na foto disi èn a no sa sutu no wan peiri kon na ini èn a no sa kon na en fesi nanga no wan skilt èn a no sa opo no wan dan fu lontu en.’” Hiskia ben musu opo feti nanga wan legre teige Assiria? Nono, a ben musu fertrow tapu Yehovah, èn dati a ben du. Èn fa a ben waka? „A ben psa ini a neti dati dati na engel fu Yehovah morofara ben hari gwe èn ini na legre-presi fu den Assiriasma den naki kiri wan hondro aititentina feifi dusun man.” Èn Sanherib srefi ben mu butu fu dati, dati a ben spotu Yehovah nanga en dienstknegti, bika en eigi manpikin ben kiri en bakaten. Ini akruderi nanga Yehovah wortu nowan enkri fetisani ben gebroiki teige Yerusalem. — 2 Kownu 19:32-37.
13, 14. Tapu a gron fu san sma fu ala natie sa psa libilibi na kaba fu na disi ten seti fu sani?
13 Na ini wi ten net so wan sani de fu psa. Den sma di e fertrow tapu Yehovah sa kisi na spotu fu a grontapu disi èn ooktu psa libilibi na kaba fu na grontapu disi. „Den di sabi yu nen, sa fertrow tapu yu, bika seiker yu no sa gwe libi den di e suku yu, o Yehovah (Psalm 9:10). Ma bifo Yehovah tyari en krutu kon tapu na grontapu disi di lai nanga brudupaiman, a e kari reti-ati sma fu kon na en fu feni seikerfasi. Den disi de „wan bigi ipi” fu ala natie, di „komoto fu na bigi benawtu”. Den e psa libilibi na kaba fu na seti disi fudi den fertrow tapu Yehovah èn ben dini en „dei nanga neti”. — Openbaring 7:9-15.
14 Den de den sma di ben gi yesi na a kari di te now ete e kon moro krakti tapu a heri grontapu, soleki Yesaya 2:2, 3 ben taki a fesi: „Èn a musu psa ini a lasti du den dei dati na bergi fu na oso fu Yehovah [en tru anbegi] sa poti steifi . . . èn furu pipel sa go èn taki: ’Un kon, èn meki wi go na a bergi fu Yehovah èn en sa leri wi fu en pasi èn wi wani waka en pasi.’” Vers fo e taki: „Èn den sa mu smeti den fet’owru tron plugu èn den lansri tron kronnefi. Natie no sa opo fet’owru teige natie èn ooktu den no sa leri feti moro.”
15. Suma e meki na profeititori fu Yesaya 2:2-4 kon tru, èn fa?
15 Suma ini a ten disi e ’smeti den fet’owru tron plugu’? Suma ’no e leri feti moro’? Suma abi wan lobi gi en yeye brada nanga sisa di no kan broko na a heri grontapu èn de ini wanfasi nanga den? Suma e fertrow trutru tapu Yehovah èn e kari tra sma fu du asrefi? Den tru tori fu a ten disi e sori dati a piki kan de soso: Yehovah Kotoigi. Netleki Hiskia den e fertrow nanga den heri ati tapu Yehovah èn e sori dati den e gi yesi na en gebod.
Wan brenki tamara
16, 17. Sortu brenki tamara Yehovah e pristeri den sma di e fertrow tapu en?
16 Yehovah e pristeri den sma di e fertrow tapu en na moro brenki tamara di wan sma kan prakseri nomo, te a sa poti ini a presi fu na maatschappij fu na owru grontapu wan nyunwan. Ini na nyun grontapu dya na grontapu no wan frede ofu wantrouwen sa de moro no wan pina, kruktudu ofu ogridu. Sma no sa dede moro ini feti ofu dede nanga yepi fu puru bere. Èn srefi soleki Openbaring 21:4 e pramisi, „dede no sa de moro, no wan row, no wan babari no wan pen no sa de de moro”.
17 Te fu kaba na grontapu sa tron wan paradijs soleki Yesus ben pramisi (Lukas 23:43). Èn fudi srefi dede sa puru a pasi dan den sma di e fertrow a tapu Yehovah kan libi fu tego na tapu na paradijs. Dan Micha 4:4 sa kon tru dorodoro: Trutru ibriwan sma sa sidon na ondro en droifi bon èn na ondro en figa bon, èn nowan sma sa de di e meki a beifi.” Go prakseri dati pikinso fu libi na ini wan maatschappij pe ibriwan sma di yu e miti yu kan fertrow dorodoro! Fu san-ede dati sa de so? Fu di soleki Yesaya 54:13 e taki: „Ala yu manpikin sa de sma di Yehovah e leri, èn na vrede fu yu manpikin sa de pasamarki.”
18. Sortu winimarki den sma di e fertrow tapu Yehovah e kisi srefi now kaba?
18 Ma srefi now kaba, milunmilyun Kotoigi fu Yehovah na a heri grontapu e nyanbun fu en dati den e fertrow tapu Yehovah. Fudi Yehovah dienstknegti e gi yesi na en wet nanga gronprakseri, meki fu eksempre den no kan kisi longkanker leki wan bakapisi fu a smoko fu tabaka. Fudi den e libi ini wan moreel krinfasi ini algemeen den no abi fu frede na kefar fu na pestsiki na a heri grontapu fu siki di e tyari go abra na tra sma nanga yepi fu seksueel kontact, soleki AIDS. Dati den no e gebroiki drugs e kibri den fu siki di e pori yu geest èn di e tyari dede kon èn di furu sma di de srafu fu drugs abi. Èn fudi den no e teki brudutransfusi, meki den no e kisi siki di e tyari dede kon èn di e kon fu brudu pe yu abi na ini hepatitis leki bakapisi dati soso kaba na ini den Verenigde Staten ala yari tin dusun sma di e kisi brudutransfusi e dede fu en ofu e kisi mankeri fu den heri libi langa.
19. Fa Yehovah sa ferlusu den sma di e dini en, srefi efu den e dede now?
19 Awansi son sma di e fertrow now tapu Yehovah e dede leki wan bakapisi fu owru dei fu siki, ofu ongoloku, toku Yehovah sa ferlusu den. Nanga yepi fu wan opobaka a sa meki den kon a libi baka. Na apostel Paulus ben gi wi dek’ati fu dat’ede fu „no poti wi fertrow tapu wisrefi, ma tapu na Gado di e wiki den dedewan.” — 2 Korinte 1:9.
Yehovah e hori baka gi en dienstknegti
20, 21. (a) Sortu gens wi kan fruwakti, soleki e kon na krin ini san ben psa nanga Yesus? (b) Fa Yehovah e gi en pipel a presi fu den, soleki a ben du disi ooktu nanga Yesus?
20 Hori na ini prakseri dati „na heri grontapu de na ini a makti fu na goddelowsuwan”, Satan Didibri (1 Yohannes 5:19). Efu yu e fertrow tapu Gado, dan yu sa ondrofeni sobun gens fu Satan nanga en grontapu. Den sa pruberi nanga spotu ofu ferfolgu fu broko yu fertrow, soleki den ben pruberi dati nanga Yesus. Bakadi den ben anga en na a pina-udu „[den sma di ben e waka psa] ben bigin skempi en, aladi den en seki den ede èn ben taki dan: ’. . . Efu yu de wan Manpikin fu Gado, puru yusrefi dan fu na pina-udu!’ Sosrefi tu den heipriester nanga meister fu wet nanga den owruman ben spotu nanga en, èn ben taki: ’Trawan a ben ferlusu, ensrefi a no kan ferlusu! . . . A ben poti en fertrow tapu Gado, meki en ferlusu en now efu a wani abi en.’” — Mattéus 22:39-43.
21 Dri dei na baka Gado ben ferlusu futru Yesus fudi a ben wiki en puru fu dede. Na a tra sei na geslagti dati fu spotuman den Romein legre ben kiri den ofu meki den tron srafu. Fudi Kristus, leki kownu fu Gado hemel kownukondre sa teki fesi ini a opobaka, dan den spotuman dati efu a mindri den sma sa de di sa kisi wan opobaka, sa mu saka densrefi na a Sma di tu dusun yari psa kaba den ben spotu! Iya, Yehovah e meki en dienstknegti kisi a presi fu den baka te den e taki: „Tapu Gado mi ben poti mi fertrow. Mi no sa frede. San wan sma fu grontapu kan du mi?” — Psalm 56:1.
22. San Yehovah e taki fu den sma di e fertrow tapu en èn fu den di no e du dati?
22 Fu na sei fu en dienstknegti Yehovah e ferklari: „Blesi fu na tranga man na skinfasi di e fertrow tapu Yehovah, èn di e fertrow fu en tron Yehovah. Èn seiker a sa tron leki wan bon di prani na den watra, di panya en rutu go let na a waka fu a watra èn a no sa si te a faya e kon, ma en wiwiri trutru sa sori dati a sa de furu. Èn ini wan yari fu drei a no sa broko-ede, èn ooktu a no sa tan sondro fu „meki froktu.” Ma Yehovah e ferklari ooktu: „Luku fu na tranga man na skinfasi di e fertrow tapu a libisma a grontapu èn di e meki meti de en anu èn di en ati drai ensrefi puru fu Yehovah. Èn seiker a sa tron leki wan bon di tanapu en wawan ini na sabana èn a no sa si te a bun e kon.” — Yeremia 17:5-8.
23. San wi mu du efu wi wani kisi tego libi?
23 Fu dat’ede, na so wi e gi dek’ati na ini a muilek ten disi, „fertrow tapu Yehovah èn du san bun; tan na grontapu èn handri nanga getrowfasi. Feni ooktu switi prisiri ini Yehovah, èn en sa gi yu den begi fu yu ati” (Psalm 32:3, 4). Meki a de so dati a san yu aksi èn kisi fu Gado yu kan abi ooktu na presenti fu tego libi ini na regtvaardiki nyun grontapu di na Gado ben pramisi di wi e poti wi fertrow tapu en.
Aksi fu luku san wi ben leri
◻ Sortu markitiki den sma mu doro di e fertrow tapu Yehovah?
◻ Den fasi fu anbegi fu a grontapu disi e leri sma fu fertrow ini Yehovah?
◻ Fa na fertrow fu kownu Hiskia na ini Yehovah ben kon reti?
◻ Fa na profeititori na ini Yesaya 2:2 e kon tru na ini wi ten?
◻ Sortu tamara sa kon tru gi den sma di e fertrow tapu Yehovah?
[Prenki na tapu bladzijde 8]
Na takiman fu na kownu fu Assyria ben kosi Yehovah èn ben aksi fu Yerusalem gi ensrefi abra
[Prenki na tapu bladzijde 9]
Den sma di e fertrow tapu Yehovah sa nyan bun dorodoro fu vrede nanga seikerfasi na ini na nyun grontapu