Yu abi warderi gi santa sani?
„Feti na baka vrede nanga ala sma èn na a santafasi, di sondro en nowan sma sa si Masra, aladi yu e luku bun . . . dati no wan huruman de èn ooktu no wan sma di no abi warderi gi santa sani soleki Esau di ini wan kenki fu wan preti nyanyan ben gi en reti abra leki fosi geborewan.” — HEBREWSMA 12:14-16.
1. Sortu mankeri fu warderi de fu si na a moro bigi pisi fu libisma, ma fa kristensma de tra fasi?
YEHOVAH wi Gado di lobi sorgu sani nanga en heri ati. A e sorgu na wan fri fasi na ini ala sani san den sani di a meki abi fanowdu. Ma na moro bigi pisi fu na libismafamiri no e tanapu denki disi. Den no e gi Yehovah tangi èn ooktu no e èrkèn na bigi paiman fu den na en. Ma kristensma na a tra sei no e si na bunfasi fu Yehovah leki wan sani di e kon fu ensrefi. Den e gi grani na en fu san a e du fu a bun fu den. Fu na gi di den e gi densrefi na ini a dini fu en meki Yehovah ben gi en pipel wantu sani di na libismafamiri ini algemeen no ben kisi. Den sani disi na diri sani, di poti aparti leki santa èn di abi fu du nanga Yehovah anbegi. Yu sabi sortu sani den santa sani disi de? Èn yu abi wan opregti dipi warderi gi den? — Psalm 104:10-28; Mattéus 5:45; Openbaring 4:11.
2. Suma ben sori wan aparti mankeri fu warderi?
2 No ala memre fu a pipel fu Gado ben abi na yoisti warderi gi santa sani. Isaak manpikin Esau fu eksempre ben misi na ini disi. Paulus e ferteri fu en di a ben skrifi gi salfu Hebrew kristen. Bakadi a ben gi dek’ati na den disi fu ’feti na baka vrede nanga ala sma’, a ben warskow den fu luku a tapu dati a mindri den „no wan huruman ben sa de, èn ooktu no wan sma di no abi warderi gi santa sani, soleki Esau, di ini wan kenki fu wán preti nyanyan ben gi ensrefi abra leki fosi geborewan”. — Hebrewsma 12:14-16.
3, 4. San ben de den santa reti fu na fosi geborewan di Esau ben seri gi Yakob fu wan preti nyanyan fu linze?
3 San ben de den reti disi leki fosi geborewan? Yehovah ben pramisi Esau granpapa Abraham dati komoto fu en èn en bakapikin te fu kba wan sma ben sa gebore di ben sa de na Siri fu na pramisi, na Messias, ofu na Kristus. Nanga yepi fu na Siri disi ala natie ben sa kan blesi densrefi, san ben sa meki dati den ben sa kon fri fu sondu nanga dede. — Genesis 22:15-18; Galasia 3:16.
4 Esau, a fosi gebore manpikin fu Isaak, ben abi na okasi fu ben kan de na famirilin, di ben sa meki na Siri dati. Disi ben de wan pisi fu en fosi gebortureti. Ma leki wan syen gi en a bijbeltori e ferklari: ’Esau ben feragti na fosi gebortureti.’ Wantronwantron so a ben seri en fu wan preti nyanyan — wan nyanyan fu linze èn wan pisi brede. Seiker wi no wani waka na baka na mankeri fu warderi fu en. Na presi fu dati wi mu abi na yeyefasi fu Esau brada, Yakob. En ben kisi leki a sma na baka Esau a fosi gebortureti di a ben bai nanga ini prakseri na krin bewijsi fu mankeri fu warderi fu na sei fu en brada. Yakob ben sorgu nanga na fasi disi dati na reti fu de wan fosten papa ofu mama fu na pramisi Siri, ben gi abra na wan sma di ben gi na santa afersi disi na yoisti waarde. — Genesis 25:27-34.
5. Sortu santa sani wi sa go luku, èn fa wi kan tan farawe fu en fu si den disi leki den kon fu densrefi?
5 Inisei fu na kristen gemeente Yehovah ben poti furu santa sani fu tranga wi na yeyefasi èn alaten tapu na yoisti fasi fu sorgu gi en dienst. meki wi go taki fu wantu fu den. Ibriwan fu wi kan go denki dipi fu disi èn meki a warderi fu wi kon tranga sodati wi no sa si den leki sani di e kon fu densrefi.
Yehovah nen nanga na lusu paiman — de aparti santa
6. Tapu sortu fasi wi kan meki sma si dati wi e si na santa fasi fu Yehovah nen no leki wan sani di e kon fu ensrefi?
6 Na tapsei fu wi lijst fu santa sani Yehovah nen tanapu. O hei a nen dati de ini wi yeye èn wi ati? Di Yesus ben gi a model begi a ben taki: „Yu nen mu de santa” (Mattéus 6:9). Te wi teki dopu, dan wi e tron wan sma fu Yehovah Kotoigi (Yesaya 43:10, 11). Fa dati de wan grani! Èn te wi e taki fu Yehovah bunfasi nanga en gran prakseri, wi e leri tra sma fu sabi en na en eigi nen, èn ooktu den wani dini en dan. Ma efu wan sma e poti en a wan sei fu taki fu en ofu, moro ogri ete, e kon de ini ogridu, dan dati e tyari syen kon tapu Yehovah bun nen nanga barnen. Yehovah getrow kristen kotoigi e feti a baka alaten fu santa en santa nen gi trawan nanga san den e taki èn e du. — Levitikus 22:31, 32; Deuteronomium 5:11.
7. Fu san-ede wi mu abi aparti bigi warderi gi na ferlusu-ofrandi fu Kristus?
7 Hei tapu a lijst fu santa sani de na ferlusu ofrandi. O diri Kristus offer de gi wi? Soso te wi poti bribi dorodoro ini na volmaakti libisma slagti-ofrandi disi wi kan kisi pardon fu wi sondu (1 Yohannes 2:1, 2). Na apostel Paulus e taki fu na salfu gemeente, dati den bai en nanga na brudu fu Gado eigi Manpikin (Tori fu den apostel 20:23; teki gersi nanga 1 Petrus 1:17-19). Yesus, na fosi gebore Manpikin fu Gado, ben libi en positsi na ini hemel, ben libi na grontapu a mindri sondu man nunga uma, èn ben offer dan en volmaakti libisma libi fudi a ben ondrofeni wan tegu dede na a pina-udu sodati wi ben sa kisi tego libi (Mattéus 20:28). A ben sa de wan sori fu no abi tangi efu ala dei wi no ben sa sori warderi gi na diri persenti disi fu Gado. — Hebrewsma 10:28, 29; Yudas 4, 5.
Wi matifasi nanga Yehovah èn en organisatie
8. O diri na matifasi fu wi nanga Yehovah de?
8 Disi e tyari wi go tapu wan tra tumsi santa afersi, wi matifasi nanga Yehovah. Fa wi mu feni na krosbei banti disi nanga wi hemel Tata wan diri sani! Te wi e ’go na Yehovah, dan a sa kon na wi’ (Yakobus 4:8). A lobi wi srefsrefi èn a wani dati wi lobi en nanga wi heri ati (Mattéus 22:37, 38; Yohanes 3:16). David ben gi en manpikin Salomo bun rai fu en matifasi nanga Yehovah. A ben gi na warskow disi a tapu: „Èn yu, mi manpikin Salomo, sabi na Gado fu yu tata èn dini en nanga wan ati di no prati èn nanga wan sili di de klarklari; bika Yehovah e ondrosuku ala ati, èn ibri firi fu den prakseri a e si. Efu yu e suku en, a sa meki yu feni en; ma efu yu gwe libi en, a sa trowe yu fu tego” (1 Kronieken 28:9). Sorgu bun fu dat’ede „fu kibri yusrefi na ini a lobi fu Gado, aladi yu, e wakti na sar-atifasi fu wi Masra Yesus Kristus, nanga tego libi na wi fesi”. — Yudas 21.
9. Tapu sortu fasi wi e sori dati wi si en wan grani fu de wan pisi fu Yehovah organisatie no leki wan sani di e kon fu ensrefi?
9 Yu man ooktu fu warderi fa a de wan santa grani fu den wan pisi fu Yehovah organisatie? No wan fu wi mag frigiti dati wi de na ini en organisatie. Efu wan sma e sori dati a no abi warderi fu disi èn e tron wan sondari di no abi berow, dan a sa lasi a grani disi. Paulus ben warskow: „A sma di denki fu dat’ede dati a tanapu, mu luku bun dati a no fadon” (1 Korinte 10:6-12). Paulus ben gi na warskow disi baka di a ben ferteri fu 23.000 Israëlsma di ben lasi libi fu a dini fu kruktu gado èn hurudu ede. Wi kan sori wi warderi gi na santafasi fu Yehovah organisatie te ibriwan fu wi e du wi plekti fu ori ensrefi fri fu doti libi, hurudu, trobi, bisnis geest èn firi fu heifasi èn krutu sani a fesi (2 Korinte 7:1; 1 Petrus 1:14-16). Wi kan wroko na en fu tranga na banti fu brada lobi, aladi wi e hori bunbun na theokratis orde, èn e wroko makandra nanga den sma di e teki fesi. — 1 Thessalonika 4:3-8; 5:12, 13.
Gado Wortu èn Wet èn na Kownukondre Howpu
10. Fa wi e meki sma si dati wi abi ala warderi gi den santa buku?
10 Na Wortu fu Gado di skrifi ondro krakti fu santa yeye na bijbel, de ooktu santa. Na buku disi abi wortu, instructie, rai pramisi, openbaring fu Gado, iya, ala sani san wi abi fanowdu ’fu sreka wisrefi gi ibri bun wroko’ (2 Timoteus 3:16, 17). Fa wi kan sori warderi gi disi? Ini a fosi presi te wi e studeri a bijbel èn poti ini wi libi san wi e leri. Morofara fudi wi e poti yoisti prakseri tapu ’na nyanyan na a reti ten’ di ben abi en fondamenti tapu a bijbel, èn di Yehovah ben gi nanga yepi fu na „getrow èn koni srafu” (Mattéus 24:45). Èn — san de dan wan praktis sani — wi mu hori wi eigi bijbel, èn ooktu den kristen publicatie di wi e gebroiki na inl wi preikiwroko activiteit netjes èn krin. A ben sa kan tyari syen kon tapu Yehovah efu wi e go fu gi kotoigi èn dan wi e gebroiki wan bijbel di doti ofu no luku moi.
11. Fu san-ede wi no mu si Yehovah santa wet leki wan sani di e kon fu ensrefi?
11 Na ini a Wortu fu Gado yu e feni Yehovah santa wet. Yu e si den disi alaten leki santa, ofu sontron yu e firi fu si den no so prenspari? Yehovah wet de leki marki, indicatie èn skotu fu kibri yu di de tapu a pasi di e go na tego libi. Te wi e gi yesi na den disi, dan na waka fu wi sa de bun èn wi sa doro te fu kaba wi presi na ini Yehovah nyun grontapu; ma efu wi e teki Yehovah gebod èn fermane lekti, dan wi e poti ede e go na rampu. — Psalm 119:10, 11, 35, 101, 102; Odo 3:1-4.
12. Fa na kownukondre howpu fu wi de wan santa afersi?
12 Nanga yepi fu na bijbel wi e kon sabi ooktu wan santa afersi di mi de krosbei fu wi ati: wi Kownukondre howpu. Te Paulus e taki fu na getrow Abraham, a e taki na ini Hebrewsma 11:10: „Bika a ben fruwakti na foto [Gado Kownukondre] di abi trutru fondamenti, a foto di Gado de a bowman èn mekiman fu en.” Yu abi net so wan tranga howpu tapu Gado Kownukondre di e tan go doro? Yu bribi de so tranga dati degedege no de ini yu ati, èn na faya fu yu e tan sondro fu kon moro mendri aladi nanga pasensi yu e wakti te leki Gado pramisi kon tru tapu en reti ten? — Mattéus 24:20-22, 33, 34, 42.
Santa komakandra nanga grani
13. Fu san-ede wi no mu si den winimarki fu den kristen komakandra leki wan sani di e kon fu ensrefi?
13 ’Gi dek’ati fu sori lobi èn tumsi bun wroko, no libi den komakandra fu wi, soleki son sma abi a gwenti’, Paulus ben e gi rai. Disi e sori dati wi kristen komakandra de ete wan santa seti di wan sma no mu teki lekti. Den komakandra e gi wi na tumsi prenspari leri èn na waran demakandra di wi abi tranga fanowdu. Dyaso wi e kisi ooktu na okasi fu gi „wan publiki bekenti fu wi howpu” fudi wi e gi geregeld kommentaar komoto fu na zaal (Hebrewsma 10:23-25). Èn fudi na Kownukondrezaal de na presi pe moro furu fu wi komakandra e hori, meki wi kan aksi wisrefi efu geregeld wi e gi moni bijdrage èn e wroko tranga fu hori na zaal na ini wan bun fasi. — Exodus 35:21.
14. San sa yepi wi fu frustan dati wi kristen diniwroko de wan santa gudu?
14 Na grani di kristen abi fu preiki na bun nyunsu, Paulus e teki gersi nanga wan ’gudu na ini tokotokopatu’ (2 Korinte 4:1, 7) Iya, na kristen diniwroko de ooktu wan santa afersi di wi e warderi srefsrefi. Aladi morofuru sma di wi e preiki gi, de nanga wan mi-no-ke fasi, wi mu tan prakseri doronomo fa a de wan hei grani fu ferteri tra sma fu Yehovah nanga en prakseri. Na so ooktu wi sa tan du wi wroko fu preki na bun nyunsu fu na kownukondre èn fu meki disipel (Mattéus 24:14; 28:19, 20). Fu si nyun disipel e go a fesi, na ete wan reide tu fu prisiri (1 Thessalonika 2:19, 20). Efu wi e si na diniwroko leki wan diri sani, dan wi no sa de ongeregeld ofu inactief ini a preiki fu na bun nyunsu.
15. Fu san-ede na du fu wi graniwroko ini Yehovah organisatie no mu si leki wan sani di no de prenspari?
15 Grani na ini Yehovah organisatie de ooktu santa. Te yu luku en bun dan den sortu grani disi de wan santa sani di wi kisi fu luku (Teki gersi nanga Tori fu den Apostel 20:28.) Efu na frantwortu tapu ensrefi wani taki now, herderwroko, gi leri na sma ofu wan tra dienst gi kompekristen, gi aparti sorgu na en. Srefi efu wan wroko sori dati a no wani taki noti, toku wi no mag teki en lekti ma wi mu du en bun èn wantewante leki gi Yehovah. Go prakseri, „a sma di de getrow na ini a moro mendri sani, de ooktu getrow na ini furu sani”. — Lukas 16:10.
Trowlibi èn osofamiri
16. Tapu sortu fasi wi kan sori dati wi e si na trowlibi èn na osofamiri leki wan santa sani?
16 No frigiti te wi e kari baka makandra den santa sani na trowlibi nanga na osofamiri fu poti na ini na lijst. A de tru dati ooktu sma di no de kristen e trow, ma kristensma e si na trowlibi leki santa, leki wan sani di abi fu du nanga na anbegi fu den fu Yehovah. (Teki gersi nanga 1 Petrus 3:1-7.) Fa den e sori respeki gi na santa afersi disi? Na bijbel e taki na ini Hebrewsma 13:4: „Na trowlibi mu de santa na mindri ala sma èn na trowbedi sondro flaka, bika Gado sa krutu huruman nanga sutaduman.” Yesus ben warslkow dati fu luku doronomo na wan uma fu kisi lostu gi en ben sa wani taki dati wan sma du ini en ati sutadu (Mattéus 5:27, 28). Eyu teki na bosroiti fu trow, du dati dan tapu wan krin fasi. Luku morofara noiti trowlibi leki wan sani di e kon fu ensrefi. Bow ibri dei baka na trutru lobi èn dipi respeki. Efu yu abi pikin ’kweki den dan ini trangaleri èn seryusu fermane fu Yehovah’. Tapu a fasi dati yu osofamiri sa de „santa”. — Efese 6:4; 1 Korinte 7:14.
Yehovah santa yeye èn begi
17. Fu san-ede wi no kan si Gado santa yeye leki wan sani di e kon fu ensrefi?
17 Wi abi ala den seti fu Yehovah fanowdu, èn wán prenspari yepi fu Yehovah de en santa yeye (Yohanes 14:26). Wi no sabi alaten tapu sortu fasi Yehovah e gebroiki en santa yeye fu na bun fu wi, ma wán sani de seiker: Wi no kan de dorosei fu dati. Wi mu begi fu dati, taki a santa yeye e yepi wi fu frustan a tru leri èn fu kakafutu gi tesi. Wi abi na yeye dati fanowdu leki wan yepi fu kweki den froktu fu na yeye (Galasia 5:22, 23). Èn wi e kisi warskow na ini Efese 4:30 dati wi no mu ’gi sari’ na a santa yeye fudi wi e go bumui ini sani di ben sa tapu a yeye. Meki alaten wi warderi Yehovah santa yeye.
18. Fu san-ede begi na wan santa grani?
18 Na lasti santa afersi di wi wani taki fu en, begi, de seiker no moro mendri prenspari. Fa wi abi wan bigi grani dati wi kan taki nanga na Soeverein fu na universum, Yehovah! A de krin dati wi mu go nanga respeki èn grani na en, noiti tapu wan mi-no-ke fasi. Wi kan fertrow na tapu dati a sa arki èn yere den begi fu wi di de ini akruderi nanga en wani. „No broko yu ede fu noti, ma meki na ini ala sani nanga yepi fu begi èn tranga begi makandra nanga taki tangi yu faya begi kon bekenti na Gado” (Filipi 4:6). Begi sa hori wi warderi gi santa sani na libi.
19. Sortu blesi e kon gi den sma di alaten abi na yoisti warderi gi santa sani?
19 Wi ben taki dya fu soso 13 santa sani di wi no mu si noiti leki den kon fu densrefi. Furu moro wi ben sa kan kari. Te wi e warderi den sortu sani disi, dan wi sa abi wan bun matifasi nanga wi Gado, Yehovah, èn kisi aladei en blesi. Fa disi e tyari vrede fu yeye makandra nanga wan bun konsensi kon! No luku na diri matifasi disi noiti leki wan sani di e kon fu ensrefi! Lobi Yehovah nanga yu heri ati, yeye, sili nanga krakti, èn en sa lobl yu alaten (1 Yohannes 4:16). Noti leki yu eigi fasi fu no de getrow kan broko na banti dati fu lobi. — Romeini 8:38, 39.
20. Fa nanga bun winimarki wi kan waka na pasi di tyari wi go na libi na ini Yehovah nyun grontapu?
20 Meki wi tan de ooktu druk bezig na ini wi dienst fu na bow fu na kownukondre, du ala wi grani di wi abi nanga sorgu èn abi warderi gi ala yeye seti. Meki wi de esesi fu gi yesi nanga wan ati di alaten furu nanga tangi gi ala Yehovah santa wet èn fermane na ini a frustan dati den ben poti den a sei a pasi di wi e go fu tan bun tapu a pasi di e go na libi. Èn efu wi e tan waka tapu a smara pasi disi di e go na libi, dan wi abi wan bun kans dati Yehovah no wawan sa meki wi psa libilibi na bigi benawtu ma sa gi wi ooktu tego libi nang tego blesi ini en grontapu di de so krosbei. Èn ala disi fudi wi ben abi warderi gi santa sani.
San yu ben sa piki?
◻ Fa wi kan tan farawe fu en fu si Yehovah nen nanga na lusu-ofrandi leki wan sani di e kon fu ensrefi?
◻ San ben kan sori dati wi no abi warderi gi wi matifasi nanga Yehovah nanga en organisatie?
◻ San na wan tu sani di e meki wi si dati wi abi warderi gi a Wortu fu Gado, en wet, èn na kownukondre howpu?
◻ Fa wi kan sori dati wi no e si kristen komakandra èn theokratis grani leki wan sani di e kon fu ensrefi?
◻ San na ete wantu sani fu san wi mu kweki wan dipi warderi gi den?