Un papa nanga mama — Un e doro na ati fu un pikin fu sensi den yongu yari
„Tan kweki [yu pikin] na ini na tranga leri èn seryusu fermane fu Yehovah.” — EFESESMA 6:4.
1. San ben pasa ini na ten fu wan spesrutu tesi ini Yesus libi?
YESUS KRISTUS nanga en disipel ben de na pasi e go na Yerusalem. No langa a fesi dati, èn dati ben de na tu difrenti okasi, Yesus ben ferteri en disipel dati a ben mu nyan furu pina na ini a foto dati èn dati den ben sa kiri en (Markus 5:31; 9:31). Na ini a ten disi fu spesrutu tesi gi Yesus, na so na tori e ferteri wi, „dan den sma ben tyari ooktu den pikinwan fu den kon na en, sodati a ben sa fasi den”. — Lukas 18:15.
2. (a) Fu san-ede meki dan disipel ben pruberi kande fu seni den sma gwe? (b) Fa Yesus ben du tapu na situwasi?
2 San ban psa tapu dati? We, den disipel ben pir’ai gi den sma èn den pruberi fu seni den gwe, seiker nanga na prakseri taki den ben du Yesus wan prisiri te den ben kibri en teige babari nanga drukte di no de fanowdu. Ma Yesus ati ben bron nanga en disipel èn ben taki: „’Meki den yongu pikin kon na mi; no pruberi fu tapu den’ . . . Èn a ben teki den pikin na ini en anu èn ben bigin blesi den” (Markus 10:13-16). Iya, awinsi san ben mag fu de na ini en frustan nanga ati, toku Yesus ben teki ten gi yongu pikin.
San papa nanga mama kan leri fu disi?
3. San papa nanga mama kan leri fu na tori disi?
3 Papa nanga mama mu leri na sani disi: Awinsi sortu tra ferplekti yu abi ofu den moeilijkheid di yu mu kaka futu gi, toku na pasa fu ten nanga yu pikin mu poti na fesi. Na ten di yu pasa makandra nanga den sa yepi yu fu spikri den yeye waarheid go na ini den èn dati sa kibri den ati èn tyari den go na a yoisti pasi (Deuteronomium 6:4-9; Odo 4:23-27). Eunice nanga Loïs, dati ben de na mama nanga granmama fu Timoteus, ben teki na ten fu gi en leri di ben doro en pikin ati èn di ben seti en libi, sodati a ben gro tron wan dienstknegti fu Gado di gi en libi abra. — 2 Timoteus 1:5; 3:15.
4. O diri pikin de, èn fa papa nanga mama mu sori taki den e warderi den?
4 Kristen papa nanga no kan gi densrefi pasi fu no luku den pikin bun di Yehovah ben gi den. Iya, den de wan diri presenti fu Yehovah (Psalm 127:3). Pasa sobun ten nanga den — doro den ati netleki fa Timoteus mama nanga granmama ben gi na eksempre. No wawan yu mu teki ten fu taki nanga yu pikin fu den waka nanga libi èn fu gi den tranga leri, ma yu mu nyan ooktu makandra, leisi èn prei nanga den èn yepi den a neti fu meki densrefi klari fu go sribi. Ala den ten disi di yu e pasa nanga yu pikin de tumsi prenspari.
5. Gi wan eksempre fu wan papa di ben sori warderi gi en frantwortu leki papa?
5 Wan prenspari bisnisman fu Yapan di ben tron wan kotoigi fu Yehovah ben erken disi. Ondro na ede „JNR-topman e libi a wroko fu de na en osofamiri” na Mainichi Daily News fu 10 februari ben ferteri: „Wan hei lantiman fu na Yapan Nationale Loko (JNR) ben teki ontslag na presi fu prati fu en osofamiri. . . . Tamoera e ferklari: ’Na wroko fu driktoro-generaal ibriwan sma kan du. Ma mi de na wan enkri papa fu mi pikin.’” Yu e teki yu frantwortu fu papa nanga mama netso seryusu?
Fu san-ede yoisti now spesrutu muiti de fanowdu?
6. Fu san-ede a de so moeilek na ini a ten disi fu kweki pikin bun?
6 Kande fudi na ini nowan tra ten ini na libisma historia a de so moeilek fu kweki pikin na a fasi di Gado Wortu a aksi fu wi, „na ini na trauga leri èn na seryusu fermane fu Yehovah” (Efesesma 6:4). Disi du kon fudi wi e libi „na ini den laatste dei” èn Satan nanga ogri yeye e meki wan bigi helu kon fudi den ati e bron, fudi den sabi taki wan syatu ten libi ete gi den (2 Timoteus 3:1-5; Openbaring 12:7-12). Den muiti fu papa nanga mama fu kweki den na wan gadofasi e kisi gensi sobun fu na agersi „loktu” di Satan abi makti a tapu. Na „loktu” dati ofu yeye fu prakseri yusrefi nomo nanga trangayesi e pasa go na ini ala sani netleki na letterlek loktu di wi e aribro. — Efesesma 2:2.
7, 8. (a) San kon na ini na oso nanga yepi fu telivisie, èn san furu papa nanga mama e du tog? (b) Fu san-ede a de dati wan sma no e sorgu bun gi e frantwortu leki papa ofu mama efu a e gebroiki tv leki babysitter?
7 Televisie spesrutu e tyari na „yeye fu na grontapu”, a vergif „loktu” disi go na ini den oso (1 Korinte 2:12). Te yu luku en bun dan san e kon tapu televisie, nofotron wan prenspari pisi fu huruman nanga tantaman fu na amusementgrontapu abi krakti tapu en (Romeini 1:24-32). Yu pukin e firi kefarlek es’esi na godelowsu denki èn na moreel dotifasi di sma e pristeri, netso leki fa den de dati gi letterlek doti loktu. Ma san furu papa nanga mama e du?
8 Den e gebroiki na televisie leki wan babysitter, leki wan wa sani luku a pikin. „No now, mi skat. Mi abi tumsi furu wroko. Go luku televisie”, den e taigi den pikin. Wan prenspari man di e kon tapu televisie fu pristeri programma e taki dati „na ini furu Amerkan osofamiri disi de wortu di sma e taki furutron”. Ma seni pikin gwe nanga na boskopu fu go sidon nomo luku san toevallig kon tapu televisie, wani taki te yu luku en bun taki wan sma e libi den na densrefi (Odo 29:15). A de wan sari no sorgu fu na frantwortu leki papa nanga mama. Na televisie di e pristeri proramma èn di un taki dyonsro fu en dya ben taki fu na kweki fu pikin: „Na de fu wan papa ofu mama e kostu ten èn a de wan bigi frantwortu èn yu no mag gi en abra na tra sani, seiker no na televisie.”
9. Wi mu kibri pikin teige sortu dotifasi?
9 Ma fu na druk fu na ten ede pe wi libi na ini, dan netleki den disipel yu kan firi fu seni pikin gwe, soso fu kan de bezig nanga san kande yu e si leki moro prenspari sani. Ma sortu sani de moro prenspari leki yu pikin? Na yeye libi fu den de ini kefar! Yu kan memre kande ete, taki di ini 1986 na ongoloku ben psa nanga na kernreactor na ini Tsjernobyl (Rusland), den ben teki pikin puru fu na gebied dati fu kibri den teige na straling di ben kon fri. Tapu na srefi fasi yu mu kibri na yeye gosontu fu yu pikin, kibri den teige na vergif „loktu” fu na grontapu, di so furu tron e kon fu na televisietoestel. — Odo 13:20.
10. Sortu tra presi fu vergif loktu de wan kefar gi pikin, èn sortu bijbel eksempre e sori disi?
10 Ma moro presi fu vergif „loktu” de ete di kan pori moreel waarde èn di kan meki na yeye fu yongu pikin no firi sani es’esi moro. Demakandra di no de yoisti nanga pikin na ini na birti èn na skoro kan puru bijbel waarheid di prani na ini safu ati (1 Korinte 15:33). Wi kan teki wan leri fu na geval fu na yongu umapikin fu Yakob Dina di ben ’gwenti go a doro fu fisiti den umapikin fu na kondre’ èn leki wan bakapisi fu dati ben lasi en nyunwenkefasi fudi wan fu den yongu man ben didon na en nanga tranga (Genesis 34:1, 2). Pikin mu kisi bun leri nanga kweki fu tan farawe fu den mereel krafana fu wan grontapu di kon pori now moro leki a ben de na a ten dati.
Fu san-ede yu mu gi kweki fu sensi pikinnengre ten?
11. (a) Oten den papa nanga mama mu bigin nanga na kweki? (b) Sortu tumsi moi bakapisi wan sma kan fruwakti?
11 Ma oten den papa nanga mama mu bigin na kweki? Na bijbel e taki taki Tiomteus ben kisi en bun kweki „fu sensi pikinnengre ten” (2 Timoteus 3:15). A de wan moi sani fu si taki bre’fos, na Griki wortu di gebroiki, nofotron e gebroiki gi wan pikin di no gebore ete, soleki na ini Lukas 1:41, 44. Drape den e ferteri taki na pikin Yohannes ben dyompo opo na ini na bere fu en mama. Ma den e gebroiki bre’fos ooktu gi den beibi fu Israël di ben gebore nyunyun na ini Egypte, di a libi fu den ben de ini kefar na ini na ten di Moses ben gobore (Tori fu den Apostel 7:19, 20). Na ini Timoteus geval na wortu abi krin fu du nanga wan trutru yongu pikin, wan beibi. Timoteus ben kisi fu sensi na moro fruku ten di a ben kan memre leri fu den santa buku, fu sensi na ten taki a ben de wan beibi ete. Èn fa dati ben de nanga bun bakapisi! (Filipi 2:19-22). Ma nyunyun pikin kan nyan bun trutru fu so wan fruku leri?
12. (a) Oten kaba bun yongu pikin kan teki tori nanga bodoi na ini den? (b) Oten èn fa papa nanga mama mu bigin fu gi pikin yeye leri?
12 „Wan fu den moro span gro tapu na kontren fu na psychologie na wi nyun inzicht na ini na kefarlek bigi vermogen fu leri sani fu na heri yongu pikin ete”, na so dr. Edward Zigler, heileriman fu na Yale University, ben taki na ini 1984. Na tijdschrift Health e taki srefi: „Beibi di de ete na ini na muru, kande kan si, yere, tesi — èn ’firi’ emotie na so den denki fu frustan ini nyun ondrosuku.” A de krin taki papa nanga mama no kan bigin noiti tumsi fruku fu leri den pikin (Deuteronomium 31:12). Den kan bigin fu meki den pikin si prenki na ini buku èn fu ferteri den tori. „Den yari pe wan bosroiti e fadon”, Masaroe Iboeka, skrifiman fu na buku Kindergarten Is Too Late, e taki, „na den yari mindri na gebortu èn dri yari.” Na yongu frustan de dan safu fu masi èn e teki moro makriki bodoi, soleki fa a e kon na krin ini na esi di wan pikinnengre e leri wan nyun tongo. Wan heileriman na ini fruku leri fu yonguwan na a New Yrok University, ben taki srefi taki „papa nanga mama mu bigin fu leri den pikin fu leisi so esi leki (baka na gebortu) den tyari den komoto fu na atoso kon na oso”!
13. San e sori taki bun yongu pikin kan leri sani kaba?
13 Wan mama na ini Canada e skrifi fu na lerivermogen fu en pikin: „Wan dei mi ben leisi wan tori fu Mi buku nanga bijbeltori gi mi pikin boi fu fo nanga afu yari, Shaun. Di mi ben stop na wan bepaalde punt pikinso, mi ben fruwondru fu si taki a ben go doro nanga a tori, wortu fu wortu, precies soleki a tanapu na ini na Bijbeltori-buku. . .. Mi ben pruberi wan tra tori, èn a ben sabi den alamala na ede. . .. A sabi den fosi tori trutru wortu fu wortu na ede, makandra nanga muilek nen fu presi èn sma.”a
14. (a) Suma no e fruwondru fu na koni fu bun yongu pikin? (b) San mu de na prakseri fu kristen papa nanga mama? (c) Tapu san wi mu sreka pikin na fesi, èn fu san-ede?
14 Den sma di sabi fu na man di heri yongu pikin man fu leri sani bun no e fruwondru fu den sortu du disi. „Na grontapu ben sa kan furu nanga bigiman di tya ede leki Einstein, Shakespear, Beethoven nanga Leonardi da Vinci te wi ben sa leri beibi na presi fu pikin”, Dr. Glenn Doman, driktoro fu na Instituut fu na Kontru fu na Libisma Potentieel, e taki. Na prakseri fu kristen papa nanga mama, a no de fu taki, no de fu meki bigiman di tya ede, ma fu doro na ati fu den pikin fu den, sodati den pikin noiti sa draibaka fu dini Gado (Odo 22:6). Den sortu muiti disi mu du langa bifo a pikin e go fu na fosi tron na skoro, fu sreka en na fesi tapu den tyalensi di a sa feni drape tapu en pasi. Yosyosi-skoro ofu creche fu eksempre e poti furu prakseri tapu friyarideifesa nanga feistidei èn san den e du na so wan dei, kan de heri moi gi pikin. Na pikin mu frustan fu san-ede Yehovah dienstknegti no e teki prati na dati. Noso omoro a kon bigi kande a kan tegu gi na fasi fu anbegi fu en papa nanga mama.
Fa fu doro na ati fu wan pikin
15, 16. San papa nanga mama kan gebroiki leki wan yepi fu doro na ati fu den pikin, èn fa yu kan gebroiki den sani disi heri bun?
15 Fu yepi papa nanga mama fu doro na ati fu den pikin, dan Yehovah Kotoigi sorgu fu publikasi leki Arki na a bigi leriman. Na buku disi e taki na ini na kapitel „Tu man di ben hori friyari” fu fesa ’pe yu kan abi furu prisiri’. Ma na kapitel e tyari kon na krin taki den tu wan enkri friyarifesa di na bijbel e kari, na heidensma ben hori, di no e anbegi Yehovah èn dati tapu ibri fesa ’den ben koti na ede fu wan sma’ (Markus 6:17-29; Genesis 40:20-22). Fa yu kan gebroiki den bodoi disi fu doro na ati fu yu pikin?
16 Yu kan gebroiki na fasi fu tak-go-tak-kon di na Bigi Leriman-buku e gebroiki fudi yu e taki: „Now wi sabi taki ala sani san tanapu na ini na bijbel abi wan reide.” Aksi dan: „San yu e denki taki Gado e ferteri wi sobun fu friyaridei?” Yu pikin e kisi yepi na a fasi disi fu tak-go-tak-kon fu na afersi èn kon na a yoisti bosroiti. Boiti na Bigi Leriman-buku, dan moro stof gi ete di papa nanga mama kan gebroiki, soleki Mi buku nanga bijbeltori èn den lo tori fu „Yesus libi nanga diniwroko”, di sensi april 1985 ben kon na ini ibri uitgave fu Na Wachttoren. Yu ben gebroiki den artikel disi fu leri yusrefi èn ooktu yu pikin?
17. Sortu praktis rai papa nanga mama e kisi?
17 Makandra nanga yu pikin yu mu luku alaten baka matariaal di a handri fu afersi nanga situwasi di a kan miti na skoro. Meki yu pikin sabi taki un alatu mu gi Yehovah frantwortu (Romeini 14:12). Poti krakti tapu den bun sani di Yehovah e du gi wi, sodati nanga dati yu e buweigi na ati fu yu pikin fu wani fu plisi Yehoavh (Tori fu den Apostel 14:17). Meki den ten fu kisi leri leki prisiri momenti. Pikinnengre nanga ala prisiri wani yere tori; span yusrefi trutru fu tyari na leri kon tapu wan libifasi na fesi, di e doro na ati fu na pikin. Furu osofamiri e maki wan tumsi moi okasi grati gwe gi den sortu pisten disi fudi den no e nyan makandra. Yu abi leki osofamiri ten fu nyan makandra? Efu dati no de so, yu kan poti na situwasi reti? — Teki gersi nanga Tori fu den Apostel 2:42, 46, 47.
18, 19. (a) Akruderi sortu schema papa nanga mama mu leri den pikin, èn tapu san wi no kan poti nofo krakti? (b) Sortu pisi fu wan disiten eksempre fu na kweki fu wan papa èn mama e seki yu, èn san yu denki sa de na bakapisi efu papa nanga mama ben sa gebroiki disi?
18 Na ten fu gi leri mu fiti na a yari fu a pikin. Na wan bun yongu pikin di no kan hori en prakseri so langa tapu wan sani, dan yu mu abi sobun wantu syatu pisten ala dei. Meki den dati safrisafri moro langa èn gi moro furu leri. Wi no kan poti krakti nofo a tapu taki yu mu abi faste pisten fu leri yu pikin (Genesis 18:19; Deuteronomium 11:18-21). Wan papa di de now seibitenti ben gi wan tumsi moi eksempre ini na kweki fu en manpikin, di de now wan kristen owruman. Yari psa kaba a ben ferteri fu en programma, pe a ben tyari kon na krin:
19 „Di na boi fu unu ben owru so wan sani fu wán yari, dan mi ben bigin fu ferteri en bifo a ben go na bedi bijbeltori, nanga ala kloru fu meki a si na tori libilibi. Sodra na ini na di fu yari a ben bigin taki, wi ben kindi na en bedi èn mi ben meki a taki na ’Wi Tata’-begi zin fu zin . . . Di a ben de dri yari mi ben bigin wan regelmatige bijbelstudie nanga en. . . . A ben luku na ini en buku èn a ben taki den wortu baka di mi ben taki. Nanga dati a ben taki fu ensrefi den wortu bun èn a ben leri srefi fu taki den bigi wortu krin. . . . Fu yepi en fu spikri den bijbel waarheid go dipi na ini en frustan, wi ben meki di a ben abi dri yari a leri eenvoudig bijbel-tekst na ede. Na a ten di a ben go na yosyosi-skoro, a ben sabi sowan dritenti tekst na ede èn ini september a ben go na gewoon skoro, a ben man fu kari seibi-tenti tekst na ede. . . . Te a boi fu wi e go na bedi, wi e meki a taki wantu tekst na ede. Ooktu te a e opo na mamanten, a e taki nofotron leki wan pisi fu en odi wantu bibeltekst na ede.”
20. San mu teki ooktu ini wan kwekiprograma, èn fa wan pikin kan feni na oso-fu-oso-diniwroko wan prisiri wan?
20 Sowan progressief leriprogramma, makandra nanga na yoisti eksempre fu den papa nanga mama nanga na gi fu konsekwent tranga leri, sa gi yu pikin wan bigin na ini na libi, di a sa de yu alaten grantangi (Odo 22:15; 25:13, 14). Wan prenspari pisi fu na programma mu de na kweki di a pikin mu kisi fu sensi yongu yari gi na publiki diniwroko. Taki dati de wan prisiri ondrofeni fudi yu e sreka yu pikin a tapu fu abi wan prati na ini di abi waarde. Na papa di wi kari dya tapsei ben taki moro fara fu en manpikin: „Fudi a ben de so bun fu kari tekst na ede meki a de heri bun ini en oso-fu-oso-diniwroko, bika furu ososma e fruwondru èn moeilek den kan weigri wan pristeri fu bijbel tijdschrift. Fu sensi en di fu dri yari kaba a e teki prati na a kristen wroko disi èn now (tapu na libimsrki fu siksi) nofotron sani e waka moro bun gi en ini na prati fu bijbel lektuur leki gi mi uma nanga mi.” — Ontwaakt!, 8 mei 1965, bladzijde 3, 4.
21. (a) San na a moro bigi presenti di papa nanga mama kan libi na baka gi den pikin? (b) Sortu fermane papa nanga mama e kisi, èn san ala papa nanga mama mu abi nanga pikinnengre?
21 Iya, kristen papa nanga mama abi wan tumsi moi gudu di den kisi, sabi fu Yehovah, di den kan libi na baka gi den pikin èn nanga dati na fruwakti fu teigo libi, freide nanga koloku ini wan glori nyun grontapu (Odo 3:1-6, 13-18; 13:22). Moro furu yu mu bow fertrow ini na trutru libi fu na tumsi bigi ten di e kon ini na ati fu den pikinwan fu yu, makandra nanga na winsi fu dini Gado. Meki na tru anbegi de gi den leki wan natuurlek èn koloku ondrofeni (1 Timoteus 1:11). Poti go ini den fu sensi pikinnengre yari kaba fertrow na ini Yehovah èn no libi noiti èn ooktu noiti regelmatige pisten fu leri den! Gi disi na moro hei presi, e luku alaten baka san yu pikin abi fanowdu fu bodoi èn fa yu kan doro moro bun na ati fu den. Yu abi furu sani fu du, yu de ondro druk; Satan nanga en grontapu e sorgu fu dati. Ma prakseri Yesus eksempre! No abi en noiti tumsi druk fu abi wan regelmatige studie nanga yu pikin!
[Futuwortu]
a Langaten bifo a ben kan leisi a ben leri den tori dati, fudi a ben arki den casettelolo.
San yu ben sa piki?
◻ Sortu bijbel bewijsi e sori taki papa nanga mama mu gi den fanowdu fu den pikin na moro prenspari presi?
◻ Fu san-ede papa nanga mama spesrutu now mu du muiti fu kibri den pikin fu den?
◻ Fu san-ede a de so prenspari taki pikin kisi kweki fu sensi yongu yari?
◻ San na wantu praktis rai gi papa nana mama fu doro na ati fu den pikin fu den?
◻ San kristen papa nanga mama noiti no mu poti na wan sei?
[Prenki na tapu bladzijde 3]
Kweki wan pikin fu kon bun fu na sei fu wan papa ofu mama no kan bigin biten nofo