Na fruwondru bigi kontren fu Gado bunfasi

GADO bun! O furutron yu yere den wortu dati ofu kande kobroyki den yu srefi? Ma yu ben sdon prakseri oyti fu na bigi kontren fu Gado bunfasi fu na bun fu yu? Fu prakseri so dipi fu sani e meki wi warderi gi na Gado di wi e anbegi kon moro dipi.

Ma fosi, wi musu frustan san na bunfasi. Bunfasi a no de fu taki, de na eygifasi fu de bun, san de abrasey fu ogri. Ma bunfasi wani taki moro. A de wan eygifasi di de a wroko. Wan bun sma, e du bun. Èn Gado e du ini en bunfasi so furu bun gi unu, so taki wi ati e firi lobi gi en.

San de alamala na ini Gado bunfasi de fu si na ini den wortu di a ben taygi Moses na ini na bigi sabana fu Sinayi. Drape a ben pramisi en kotrow futuboy: „Mi srefi sa meki ala mi bunfasi hari psa na yu fesi.” Di Gado ben du soleki a ben pramisi èn aladi a ben kobroyki en eygi nen, a ben taki moro fara: „Yehovah, Yehovah, wan Gado fu sari-ati èn bun-ati, di no e kisi atibron esi-esi èn di de psamarki na ini lobi bunfasi èn waarheid, di e kibri lobi bunfasi gi dusundusun sma, di e gi pardon fu fowtu èn a psa fu wèti èn sondu, ma di no sa gi fri fu strafu kwetikweti.” — Exodus 33:19; 34:6, 7.

Fu dati-ede, Gado bunfasi abi na ini en sari-atifasi, sobun leki en bun-atifasi, en lobi bunfasi èn en waarheid. Boyti fu dati, en bunfasi de fu si na ini disi, taki a „no e kisi atibron esi-esi”, de langa fu pasensi. Ma disi no wani taki taki a de wan ppa di no e luku sani fini, di e gi pasi fu sondu go doro fu têgo sondro fu du wan sani. Sondari di no sori berow a „no sa gi fri fu strafu kwetikweti”. Wan bun Gado no kan gi pasi fu ogri tan sondro fu du wan sani.

Na bunfasi fu Gado di e psamarki

Luku now pikinso wantu fasi fa Gado ben sori en bunfasi. Na a fosi presi, a ben de bun gi libisma di a ben meki na grontapu na ini na bigin. A no ben sorgu nomo fu san de tranga fanowdu gi a libi fu libisma. Na presi fu dati, a ben sorgu taki na grontapu fu unu abi ala sani psamarki fu meki a libi na tapu en tron wan trutru prisiri sani. A ben sorgu gi furu difrenti sortu fu nnyan nanga dringi. A ben meki difrenti meti nanga fowru, di e hari yu prakseri èn a ben meki bromki di e gi na kontren fu unu moro kloru èn moyfasi. Boyti fu dati, a ben meki furu difrenti sortu kontren di de wan lostu gi na ay. Iya, ibritron te wi e si wan tumusi moy sondongo ofu wan tumusi moy grupu fu wolku, dan wi e si a buweysi fu Gado en bunfasi!

Gado bunfasi ben de fu si agen di a ben meki na man nanga uma. A ben gi Adam nanga Eyfa wan volmaakti, gosontu skin èn ben poti den na ini na dyari fu Eden. Ne a ben gi den wan span ordru di ben de wan trutru tyalensi: „Furu na grontapu èn poti en na unu ondro.” Na so fasi a ben poti na den fesi na fruwakti fu libi fu têgo tapu wan paradèysi grontapu na mindri fu den furu bakapikin fu den (Genesis 1:26-28; 2:7-9). Fa dati ben de wan tumusi moy trowkado gi na fosi libisma paar!

Srefi di Adam nanga Eyfa ben meki opruru, Gado no ben libi den krinkrin. Efu a ben strafu den a ten dati nanga wan wantewante dede, dan a ben sa du soso san ben de regtfardiki. Ma, Gado ben de bun gi na sondu libisma paar. A ben gi den pasi fu tan wan pisiten a libi èn fu meki pikin. — Genesis 5:1-5.

Boyti fu dati, na bunfasi fu Gado gi na sondu libismafamiri e tan go doro te nanga now. Soleki kownu David ben taki: „Yehovah bun gi ala sma, èn den sari-atifasi fu en de abra ala en wroko” (Psalm 145:9). A e sorgu gi ala sani psamarki na sowan fasi, so taki na libisma libi kan go doro tapu en eygi gudu, na grontapu. Yeyses ben taygi den dyu fu en ten: „Yu Ppa, di de na ini heymel, . . . e meki en son opo kon na tapu den ogriwan èn bunwan èn e meki alen kon na tapu regtfardikiwan èn no regtfardikiwan” (Mateyus 5:45). Efu angri de na wan presi ofu sani no de nofo, dan disi no e kon fu di Gado misi fu sorgu gi na libismafamiri. A e kon fu na bidrigifasi, ogri-atifasi èn na misi di libisma e misi fu doro en marki.

Gado e gi na libismafamiri so srefi pasi fu meki kobroyki fu den mineraal gudu fu na grontapu èn a no ben tapu den fu kisi wan marki fu inzicht na ini na stari heymel èn na natuurkundige samenstelling fu den sani di meki. Fu tru, Yehovah bun gi na libismafamiri, awansi furu sma na wan asrantifasi e taki taki no wan Gado de èn trawan e meki kobroyki na wan fowtu fasi fu en bunfasi gi sani pe den e prakseri den srefi nomo, srefi ini na marki taki den e kwinsi den sma na den sey. — Psalm 14:1.

Gado bunfasi gi bribiwan

Efu Gado bun kba gi na libismafamiri ini algemeen, dan den du fu en gi den bribiwan de trutru wan sani di e waran na ati. Fu bigin, di Adam nanga Eyfa ben sondu biginbigin dan Gado ben taki na fesi, taki wan „siri” ben sa kon di te fu kba ben sa puru den takru bakapisi fu den sondu (Genesis 3:15). Nanga a psa fu na ten dan furu bakapikin fu Adam ben dini Gado kotrow awansi den ben de onvolmaakti èn na fruku profeytitaki disi ben gi den howpu tapu wan moro betre tamara. Wan fu den kotrow anbegiman disi, Abraham, den ben kari srefi „Yehovah mati” — Yakobus 2:23.

Gado ben pramisi Abraham taki den bakapikin fu en ben sa tron furu nâsi èn taki den wan di de wan pisi fu en prenspari famirilin ben sa kisi na kondre Kanan leki den gudu. Leki wan kontru fu disi, dan den Israèl sma, Abraham bakapikin, bakaten ben orga tron wan nâsi (Genesis 17:3-8; Exodus 19:6). Agen, Gado ben bun gi na nyun nâsi disi; a ben fri den puru fu katibo ini Egiptikondre, ben kibri den na ini na bigi sabana, ben gi den wan wètibuku èn wan pristriwroko èn te fu kba ben gi den na fatu kondre Kanan leki gudu.

Te fu kba Israèl ben tron wan kownukondre, èn Yehovah ben gi na di fu dri libisma kownu fu Israèl, Salomo, na ordru fu bow na ini Yerusalen wan tenpri leki na moro prenspari presi na grontapu gi en tru anbegi. Di na tenpri ben kba bow, dan wan tumusi moy inwijdingceremonie èn wan prisiri fesa ben hori. Baka dati, so a tori e taki, „[den Israèl sma ] ben blèsi na kownu èn ben go na den oso, nanga wan breyti èn prisiri ati fu ala na bun di Yehovah . . . ben du” (1 Kownu 8:66). Tra okasi ben de tu pe na ati fu den Israèl sma ben furu psamarki nanga tangi fu na bunfasi ede fu Gado gi den.

Ma, leki wan sari sani den no ben abi alaten warderi gi na grani fu de anbegiman fu na wan enkri tru Gado. Te fu kba den Israèl sma leki nâsi no ben tan kotrow, èn na ini 607 bifo G.T. Yehovah ben gi pasi taki den ben tyari den go na ini Babylon leki strafuman. Soleki Yehovah ben taygi Moses, dan yoysti nanga en bunfasi na prakseri, „a no” ben sa „gi fri fu strafu kwetikweti”. — Exodus 34:7.

Ma baka 70 yari Gado ben de so bun fu tyari wan kotrow fikapisi fu den Israèl sma go baka na den eygi kondre. San ben buweygi en fu du disi? En bunfasi. Yeremiya ben skrifi na wan profeytifasi fu na dray kon baka di den Israèl sma ben dray kon baka fu Babylon: „Seyker den sa kon èn bari wan prisiri bbari na tapu na hey fu Siyon èn den sa brenki fu na bunfasi fu Yehovah.” Na profeyti ben go moro fara: „’Nanga mi bunfasi mi eygi pipri bere sa kon furu’, na so Yehovah e taki.” — Yeremiya 31:12, 14.

Te fu kba Yeyses ben kon na grontapu èn a ben sori taki en ben de na „siri” di den ben taki a fesi fu en na ini na profeytitori di ben taki na ini Eden (Genesis 3:15). Na beybri e taki: „Gado ben lobi grontapu sote taki a gi en wan enkri koboru manpikin, so taki ibriwan sma di e sori bribi na ini en, no ben sa go pori, ma ben sa abi têgo libi” (Yohanes 3:16). Na dede fu Yeyses ben sorgu gi wan lusuprèys di ben kan kobroyki fu bay sma kon fri fu sondu èn fu meki den kon de volmaakti baka. Na so fasi den takru bakapisi fu na sondu fu Adam te fu kba ben puru a pasi. Soleki fa Paulus ben skrifi gi den Rome sma: „Soleki nanga na trangayesi fu na wán sma furu ben tron sondari, na so srefi nanga na gi yesi fu na wán sma furu sma sa tyari kon de regtfardiki” (Rome sma 5:19). Tangi fu Gado bunfasi meki reti-ati sma now ben abi na howpu fu kisi têgo libi. Den kan tron srefi mati fu Gado, neleki Abraham.

Gado e go doro fu sori so srefi na ini na ten disi bunfasi na den wan di e anbegi en. Nanga yepi fu na beybri a e gi ray fu yepi den fa fu du nanga den problema fu den (Psalm 119:105). A e gi na fri presenti fu en yeye fu yepi den fu libi ini akruderi nanga den regtfardiki markitiki fu en. Èn a e meki den prakseri fu en kon na krin, so taki tru kresten e luku go na fesi na wan nyun grontapu fu regtfardikifasi, di sa tyari kon, baka na kba fu na owru grontapu disi (Odo 4:18; 2 Petrus 3:13). Kresten sma e poti ala den frutrow na ini den sani disi, fu di Gado, na ini en bunfasi gi den, e tyari den sani kon na krin na ini en wortu di no kan misi. — 2 Timoteyus 3:16.

Iya, wan ondrosuku fu Gado bunfasi seyker e meki wi ati firi lobi gi en. Ma disi e tyari so srefi wan aksi kon na fesi:

O furu bun yu sa nyan fu na bunfasi fu Gado?

Te yu luku en bun, dan suma yu de tu, yu e nyanbun fu Gado bunfasi. Yu e bro, yu e nyan, yu e dringi, yu e nyanbun fu na libi — alamala presenti fu Gado. Ma yu e feni fu en so furu wini leki a kan? Hori na ini prakseri, taki na bunfasi fu Gado gi Adam nanga Eyfa ben skotu bakadi den ben sondu. So srefi tu a sa skotu en bun-atifasi gi wi boyti efu wi e opo du wan sani tapu den bunfasi fu en. Fa wi kan du disi?

Na psalmsingiman ben begi: „Leri mi bunfasi, frustanfasi èn srefi sabi, bika na ini den komando fu yu mi sori bribi” (Psalm 119:66). Dati musu de na begi fu wi tu. Fu di Gado bun, meki wi musu leri fu de bun neleki en. Paulus ben gi na deki-ati: „Tron sma di e waka baka Gado, leki lobi pikin.” — Efesiya sma 5:1.

Wi e du disi fu di na a fosi presi wi e stuka na beybri fu kon sabi san na bunfasi. Moro fara wi e aksi fu kisi na yepi fu Gado ini a kweki fu na eygifasi disi. Bunfasi na wan froktu fu na yeye makandra nanga „lobi, prisiri, vrede, langa pasensi, switifasi, . . . bribi, safri-atifasi, [nanga] dwengi yu srefi” (Galasiya sma 5:22, 23). Wi kan kweki ala den eygifasi disi, fu di wi e frutrow tapu Gado yeye, e stuka na beybri di skrifi nanga yepi fu Gado santa yeye, e begi Yehovah fu en yepi èn fu demakandra nanga kresten di abi na srefi yeyefasi. — Psalm 1:1-3; 1 Tesalonika sma 5:17; Hebrew sma 10:24, 25.

Na beybri e taki so srefi: „Nanga na fruteri fu na bunfasi fu yu di psamarki den dyonpo fu koloku, fu na regtfardikifasi fu yu ede den sa bigin wan prisiri bbari” (Psalm 145:7). Iya, Gado e fruwakti fu wi e fruteri trawan fu en bunfasi. Wi musu taki na wan fri fasi fu na heymel Tta fu unu.

Leki lasti wi no musu meki fowtu kobroyki fu Gado bunfasi. A de tru taki Yehovah e gi sondu sma pardon. Kownu David ben frutrow a tapu taki Gado ben sa yere en na wan bun fasi di a ben begi: „Den sondu fu mi yongu yari èn den opruru du fu mi, ow no prakseri den. Hori mi na prakseri ini akruderi nanga yu lobi bunfasi, fu yu bunfasi ede, ow Yehovah” (Psalm 25:7). Disi wani taki taki wi kan gi wi srefi pasi fu du sondu ini na seyker fruwakti fu kisi pardon fu Gado? Kwetikweti. Hori na ini prakseri taki Gado bunfasi wani taki, taki „a no [sa] gi fri fu strafu kwetikweti” na sondari di no abi berow.

Nyan bun fu Gado bunfasi

Efu wi ben ondrofeni wan leysi kba na bunfasi fu Gado dorodoro dan fa wi ati e furu nanga lobi gi en! Wi e kisi na deki-ati fu waka baka na tumusi bun frumane fu na apostru Paulus: „Tan waka leki pikin fu leti, bika na froktu fu leti de na ini ala sortu fasi fu bunfasi èn regtfardikifasi èn waarheid.” — Efesiya sma 5:8, 9.

Ibri dey wi de sabisabi fu na lobi sorgu fu Gado gi wi. Srefi na ondro den moro muylek situwâsi wi sabi taki a no e frigiti den sma di lobi en. Iya, wi e ondrofeni na bigi vrede fu yeye fu na psalmsingiman: „Fu tru, soso bunfasi nanga lobi bunfasi sa waka na mi baka ala den dey fu mi libi; èn mi sa libi seyker na ini na oso fu Yehovah fu alaten.” — Psalm 23:6.