Den buweysi taki beybri falsi?

SABIDENSIMAN nanga sma di e feni fowtu tapu na beybri buweysi trutru taki beybri abi fowtu nanga tori di no de tru? Bifo yu teki disi, dan yu musu memre taki furu koniman e pristeri den denki na wan positief fasi di abi pontu, ma taki den no abi leti ala ten. Furutron den ideya fu den abi wan degedege fondamenti.

Denki di yu kan tweyfri na den

Leki wan eksenpre fu moy wortu di abi pontu fu na sey fu wan sma di e feni fowtu tapu na beybri, luku san S. R. Driver taki fu na buku Danièl. Fu sensi owruten sma ben teki taki Danièl srefi skrifi na buku disi na ini na di fu siksi yarihondro bifo G.T. na ini Babylon (Danièl 12:8, 9). Ma Driver ben taki taki den ben skrifi en bun langa baka na ten dati. Fu san-ede? Wán „buweysi” ben de taki na buku abi Griki wortu na ini, èn Driver ben taki: „Den wortu disi, èn so wan sma kan taki en trutru, ben kan kobroyki soso na ini na buku Danièl efu den ben skrifi a buku baka di na makti fu Grikikondre ben panya go na ini Asiya, nanga den wini di Alexander na Bigiwan ben wini kondre.” Den wini di Alexander wini kondre ben feni presi so wan sani fu 330 bifo G.T.

Den wortu fu Driver no ben kan de moro positief leki den de. Fu horibaka gi disi a ben kari soso dri Griki wortu, nen fu sani fu prey poku (Danièl 3:5). Ma den Griki sma fu sensi na fruku bigin kba fu na historiya di sma ben skrifi poti ben hori krosibey banti nanga westsey Asiya, sobun, sortu gron de gi san taki, taki na ini na di fu siksi yarihondro bifo G.T. no wan sani fu prey poku nanga Griki nen ben kobroyki na ini Babylon? Fa disi de wan swaki fondamenti fu tweyfri na a datum nanga na sma di skrifi na buku Danièl!

Ete wan eksenpre de san taki fu den fosi feyfi buku fu beybri. Fu sensi owruten sma e teki taki den ben skrifi den na a ten fu 1500 bifo G.T. moro furu nanga anu fu Moses. Ma sma di e feni fowtu tapu beybri e taki taki den e si difrenti fasi fu skrifi sani na ini den buku. So srefi den e feni taki sontron sani e sori na tapu Gado nanga a nen fu Gado, Yehovah, èn sontron nanga na hebrew wortu gi „Gado”. Fu den sortu sani disi di den si den e bosroyti taki den beybri buku disi te yu luku en bun de wan smelter konmakandra fu buku di skrifi na ini difrenti ten èn taki den ben kon de san den de now wan pisiten baka 537 bifo G.T.

Na theorie disi sma e bribi na ala sey, ma no wan sma tyari kon a krin fu san-ede Moses no ben kan kari na Mekiman Gado èn Yehovah. No wan sma no sori taki Moses no ben kan skrifi sani na ini difrenti fasi te a ben taki fu difrenti tori, taki a no ben skrifi na ini difrenti ten na ini en libi ofu no ben kobroyki moro owru buku. Boyti fu dati, so leki Yohn Romer ben taki na ini en buku Testament — The Bible and History, dan „wan fondamenti bezwaar teyge na heri fasi disi fu ondrosuku sani de, taki te na a dey fu tide sma no feni no wán pisi fu owru tekst di ben sa kan dini leki wan buweysi fu na de fu difrenti tekst pe na nyunten sabidensi e wroko nanga ala prisiri nanga den theorie fu en”.

Wan fondamenti fasi fu denki fu furu sma di e feni fowtu tapu na beybri e tyari kon a krin na ini McClintock èn Strongs Cyclopedia: „Den ondrosukuman . . . e bigin nanga na denki taki den tru sani fu na historiya di de leki fondamenti fu den tori, de soyfri natuurlijk tru sani, fu den srefi sortu leki tra sani di wi sabi . . . . Wan skrifiman e skrifi fu wan sani di de dorosey fu na kontren fu natuurwèt di ala sma sabi leki wan tru sani? Dan . . . na sani di den taki psa no ben feni presi.”

Na so furu sma e denki taki wondru no ben kan feni presi, fu di den de kontrari nanga natuurwèti di ala sma sabi. Na so a musu de tu taki profeytitori di e go bun fara na ini na ten di e kon no kan de so, fu di libisma no kan luku go fara na ini na ten di e kon. Ibriwan wondru musu de wan anansitori ofu wan tori di e go fu falsi gado. Ibri profeytitori di de fu si taki a kon tru, ben musu skrifi baka di a kon tru.a Fu dati-ede son sma e taki, taki den profeytitori ini na buku Danièl ben kon tru na ini na di fu tu yarihondro bifo G.T. èn taki na a ten dati den ben musu skrifi na buku fu dati-ede.

Ma so wan sortu prakseri di den e teki leki tru abi leki fondamenti wan artikel fu bribi: taki Gado no de èn efu a de, noyti e opo du wan sani na ini na historiya fu libisma. Fu tru, na heri tori fu na beybri de, taki Gado de trutru èn de fayafaya e du sani ini na historiya fu libisma. Efu disi de tru — èn den buweysi e sori taki dati de so — dan furu fu na gron fu nyunten fasi fu feni fowtu tapu beybri e lasi en krakti.

Na nyunten sabidensi buweysi taki beybri fowtu?

Ma san de fu taki fu na prakseri taki sabidensi sori taki unu no kan bribi na ini beybri? Na waarheid de, taki, pe na beybri e miti nanga san wi e kari sabidensi, taki san na beybri e taki furutron no de kontrari nanga san disiten sabidensiman e leri.

Fu eksenpre, beybri e gi furu praktis komando ini na tori fu gosontu nanga siki di kan tyari go abra na tra sma. Na ini na buku Manual of Tropical Medicine den taki fu disi: „Ibriwan sma musu kon fruwondru fu na soyfri sabi ini na ten fu Moses fu dringi dresi wakti siki ini na tori fu wan bun gosontu. . . . A de tru taki siki na tapu wan eenvoudigfasi ben poti ini grupu — [namku] tranga siki, di den e kari ’plaag’, èn siki di e tan langa èn di abi leki bakapisi flaka, di den e kari ’gwasi’ — ma den tumusi hebi wèti fu poti na sma aparti ben du furu bun.”

Luku so srefi na ini beybri den wortu: „Ala winter liba e lon go na se; toku na se srefi no e furu. Na a presi pe den winter liba e lon go, na drape den e dray komotu fu lon go baka” (Preykiman 1:7). Disi e piki ini yu yesi leki na fasi fa den e skrifi fu na watra kringloop (waka lontu fu watra) di de fu feni now na ini leribuku. Den liba e tyari watra go na se, pe a e tron danpu èn na ini worku a e tyari go na a kondre, fu fadon drape leki alen ofu snew èn dray go baka na den liba.

Na so den bosroyti fu sabidensiman, taki bergi e opo kon èn e saka gwe èn taki den bergi fu now ben de wan dey na ondro owruten se, e kruderi nanga den wortu fu na psalm powema skrifiman: „Den watra ben de srefi tapu den bergi. Bergi ben opo kon, lagi presi ben saka gwe — na a presi di yu ben poti na fondamenti fu den.” — Psalm 104:6, 8.

Wan skrifiman ben taki: „Ala skrifiman fu na Owru Testamenti ben si na Grontapu leki wan plata plaat èn den ben fruteri sontron fu den postu di e hori en, so leki fa sma ben prakseri.” Ma disi no tru. Yesaya ben taki fu „Na wán di e libi tapusey fu na lontu fu na grontapu” (Yesaya 40:22). Èn Yob ben taki fu na wan disi: „A e span a nordsey abra na leygi presi, e anga na grontapu na noti” (Yob 26:7). Na fruteri di beybri e fruteri fu na grontapu leki wan lontu sani di anga na ini loktu sondro wan sani di yu kan si e hori en e piki ini sma yesi kofarlek modern.

Evolutie

San de fu taki fu na kontrari di de a mindri na beybri nanga evolutietheorie?b Na Encyclopœdia Britannica e fruteri: „Na moro furu fu den sabidensiman e teki na evolutietheorie.” Ma beybri e leri na ini wortu di de eenvoudig nofo fu sma na ini na pisiten bifo na sabidensiten, taki libi de na bakapisi fu na meki di Gado meki den sani ensrefi èn taki den difrenti fondamenti sortu fu libi no kon fu evolutie ma taki Gado ben meki den. — Genesis 1:1; 2:7.

Evolutieman abi furu sani a srefi leki den sma di e feni fowtu tapu na beybri. Den abi wan krakti overtoygi èn den e taki na wan fasi di abi pontu. Ma wantu fu den de eerlijk nofo fu piki taki na evolutie abi swaki pisi. Wan fu den tyari kon a krin: „Fu di te yu luku en bun na evolutiemodel fu Darwin de wan theorie di e pristeri wan luku fa sani ben de baka na ini historiya, meki a no de wan sani di kan fu luku efu a de so nanga yepi fu ondrosuku ofu fu luku na sani langalanga, so leki dati de normaal na ini sabidensi . . . Boyti fu dati, na evolutietheorie e taki fu wan lo aparti sani di psa, na bigin fu libi, na bigin fu na frustan nanga so moro fara. Aparti sani di psa na sani di no kan du ete wantron èn no kan poti go fu ondrosuku na sortu fasi tu” (Evolution: A Theory in Crisis, fu na anu fu Michael Denton). Wan trawan e taki fu „na tru tori fu evolutie”. Toku a e sori tapu wan bigi problema fu buweysi na „tru tori” disi: „Efu wan sma e suku na schakel a mindri prenspari grupu fu meti, dan den no de srefisrefi.” — The Neck of the Giraffe, fu Francis Hitching.

Omeni den kan sabi?

Furu fu na buweysi-materiaal fu evolutie e kon fu geoloogman nanga paleontoloogman — sabidensiman di e stuka na bun fara ten di psa fu na grontapu. Na problema di den sabidensiman disi ben miti de leki na problema di den astronoomman ben miti. Nanga yepi fu difrenti wrokosani, den astronoomman e ondrosuku na faya di, abra wan kofarlek bigi afstand, kon fu stari, planeet, merkipasisistema nanga aparti sani so leki kwasar. Ala di den e kobroyki den tori di den abi someni leki den kan, toku den e meki theorie fu den sortu muylek èn dangra sani disi so leki na fasi fu den stari èn na bigin fu na universum. Pikinso tron den de na ini na okasi fu luku efu den theorie fu den bun, ma te den du disi, den e si nofotron taki den no bun ofu de fowtu.

Na radio-astronoomman Gerrit Verschuur ben skrifi: „Na ondrosuku fu no so langa psa kba fu planeet di na Amerikan ruimtesondes ben du ben tyari wan mankeri fu trutru sabi kon a krin di e seki yu srefisrefi fu na inibere fu na kosmos. Te yu kon krosibey fu Mars, dan a de heri tra fasi leki fa yu e si en dya na grontapu. . . . No wan enkri astronoomman ben fruwakti taki den banti fu Yupiter abi so wan kofarlek strukturu . . . Saturnus ben gi na moro bigi onfruwakti prisiri di den fototoestel fu na Voyager ben tyari linga kon a krin di ben frekti ini makandra, munkenki di na bepaalde ten e frey psa sey makandra èn moro leki dusun smara linga. . . . San de tru gi na loktu, e gersi taki a de so fu den pisi fu sani di den teki fu ondrosuku na ini laboratorium, di den e meki moro nanga moro bigi fowtow fu den. Ibri moro soyfri luku di yu e luku e tyari krinkrin onfruwakti tori kon a doro di e fruwondru wi èn e kenki na denki fu wi di wi ben abi fositen.”

Geoloogman, paleontoloogman nanga trawan di e gi furu fu na „buweysi” fu evolutie, e broko den ede neleki den astronoomman, nanga den sani di e psa èn den sani di de bun fara fu wi — no te yu luku na ofara ma te yu luku en ini yari. Neleki fa den astronoomman e bow tapu swaki faya di e kon na wi fu kofarlek bigi afstand di yu no man marki, so den tra sabidensiman disi musu bow tapu na marki di so maar so ben tan kibri na ini wi planeet ini na fara ten di psa. Neleki den astronoomman na so den musu de fowtu tu na ini furu fu den bosroyti di den meki.

Yu kan bribi na ini beybri?

Sma di e go prakseri sani fu dati-ede no abi fu de tumusi na ondro na indruk fu den prakseri fu sabidensiman taki den no kan poti bribi na ini na beybri. Ma disi wwan no e buweysi, taki yu kan bribi na ini beybri. Fu kan du dati, dan yu musu du san furu sma di e feni fowtu tapu beybri no e du — opo na beybri yu srefi, èn leysi en sondro fu krutu en na fesi (Tori fu den Apostru 17:11). Wantu yari psa kba wan scenario skrifiman na ini Australiya, di ben de ala ten fu feni furu fowtu tapu beybri ben taki: „Fu na fosi tron na ini mi heri libi mi e du, te yu luku en bun, na fosi sani san wan skrifiman musu du: luku efu den tori de tru. . . . Èn mi ben fruwondru, fu di san mi ben leysi [na ini den evangeliumtori] no ben de wan anansitori èn so srefi no ben de wan tori di no de tru. A ben de na skrifi fu nyunsu. A ben de tori di ben kon fu na mofo fu na fosi ofu na di fu tu sma, èn di ben go fu aparti sani di psa. . . . A skrifi fu nyunsu abi wan aparti sani èn na aparti sani dati son sma e feni na ini den Evangeliumtori.”

Wi e gi na deki-ati fu waka na baka en eksenpre. Leysi na beybri yu srefi. Te yu e denki fu den dipi koni fu beybri, na fasi fa den profeytitori ben kon tru èn na fruwondru wánfasi, dan yu sa frustan taki na beybri de moro leki soso wan tyari kon makandra fu anansitori di no de ini akruderi nanga sabidensi (Yosuwa 23:14). Efu yu srefi si fa na koni fu beybri kan kenki yu libi kon bun, dan yu no sa abi no wan enkri tweyfri taki na beybri na a Wortu fu Gado (2 Timoteyus 3:16, 17). Iya, yu kan bribi na ini beybri. — Yohanes 17:17.

[Foetoewortoe]

[Prenki na tapoe bladzijde 7]

Netso leki fa a de muylek gi wan paleontoloogman fu si san ben psa na ini na fara ten di psa, na so a de muylek gi den astronoomman fu si na fasi fu den sani di de na ini na fara kontren fu na loktu