Wan nyun grontapu de krosibei!
PRAKSERI de psa marki fa fu lusu ala problema na grontapu. Ini algemeen den e aksi fu sma fu firi gi makandra èn fu wroko nanga makandra, èn so srefi den e aksi fu wan kofarlek bigi bondru kon na wan fu den muiti fu ala nâsi na grontapu. Libisma e firi taki omoro den toestand e kon takru, omoro na fanowdu fu den nâsi fu den alamala tan a libi sa dwengi den fu go luku ete wan tron den sani di den ben poti na a fosi presi èn wroko makandra fu meki wan nyun grontapu kon di yu man fu libi na ini. Sma e prakseri taki den kostu fu srudatiwroko sa koti kon moro mendri srefisrefi, so taki moro moni e kon fri fu kibri na libikontren èn, so leki fa na State of the World 1990 e taki, dan „na presi fu den lanti fu den kondre tan hori den eigi bigi ipi fetisani, den sa kan bow na tapu wan moro kofarlek bigi èn tranga VN-vrede makti, di sa man èn di sa abi na makti fu kibri ibri memre fu en gi wan trawan di wani kon feti nanga en”.
Ma den sortu plan disi e misi a marki krinkrin fu tyari den toestand kon di libisma e angri sote fu den èn di wi ben kari na a bladzijde dya a fesi. Den taktik fu libisma wawan na no wan fasi man fu dresi sondufasi nanga gridifasi; den no puru a krutu di sma e krutu sani na fesi kba bifo den ondrosuku den bun èn so srefi den strei a mindri den ras; den no e meki wan lobi di no e suku en eigi bun nomo kon na mindri na heri libismafamiri; èn so srefi den no man gi na dyaranti taki wan kba sa kon na siki nanga dede. Den no e du wan sani nanga ogridu na wan fasi di e tyari bun bakapisi kon, èn den no e taki srefi fu den difrenti na ini relisi èn den firi fu bita-ati. Èn den no man go luku srefi fu puru natuur ranpu. A nationalisme, nanga a krakti fu en fu tyari problema kon, mag tan. Ma leki wan sari sani wi musu kon na a bosroiti taki libisma no man tyari wan praktis lusu kon.
Toku wan lusu de! Iya, ala den sani disi di a libismafamiri e angri fu den, ben gi leki pramisi, èn na pramisi kon fu a Gado di „no kan lei” (Titus 1:2). A sabi soifri san musu du, èn a abi na koni, a makti èn a krakti fu man meki en prakseri kontru.—Openbaring 7:12; 19:1.
Gado e pramisi: „Wan pikin ten libi ete, èn na gadolowsuwan no sa de moro; èn seiker yu sa poti prakseri na a presi fu en, èn a no sa de. Ma den safri-ati sma sa abi grontapu leki na gudu fu den, èn den sa feni trutru den switi prisiri ini vrede psa marki.”—Psalm 37:10, 11
Fa disi o kon tru? Yesaya 11:9 e piki: „Den no sa du no wan ogri noso pori sani na tapu heri mi santa bergi; bika grontapu seiker sa kon furu nanga na sabi fu Yehovah, so leki fa den watra e tapu na se.” Iya, na heri libismafamiri sa kisi leri na ini „a sabi fu Yehovah”, èn ibri aparti sma di e weigri fu skeki den srefi na dati no sa kisi pasi fu tan a libi èn bruya na vrede fu trawan. Sma no sa pori wi tumusi moi grontapu moro langa.
„Kon luku den wroko fu Yehovah . . . A e meki feti kon na wan kba te na den farawe uku fu grontapu,” Psalm 46:8, 9 e pramisi. (Luku so srefi Mika 4:3, 4.) Wan prenspari sani fu tyari vrede kon na a heri grontapu, na fu meki wan kba kon na den kesekese na mindri nâsi, di lobi den srefi nomo. Wroko makandra sa de wan seiker sani, bika na a heri grontapu wán tiri nomo o de — di fu Gado. Èn en tiri na wan kownukondre „di noiti o pori” (Danièl 2:44). Boiti fu dati, na kownu fu en na a Yeises Krestes di opobaka fu dede èn di no man dede, èn di sa tiri na ini retidu nanga regtfardikifasi.—Yesaya 9:6, 7; 32:1.
Ma den sani disi sa kon pori nanga na onvolmaaktifasi di den libisma abi na ini den, èn fu di pen, siki, pina nanga dede de te now ete? Nôno, bika den sani disi so srefi sa de sani fu a ten di psa. Openbaring 21:4 e gi wi a dyaranti: „Èn a sa figi puru ala watra na den ai, èn dede no sa de moro, nowan row, nowan babari, nowan pen sa de moro. Den fositen sani psa kba”. Tapu a gron fu Yeises frulusu-ofrandi, wi sa kisi pardon fu sondu di wi kisi (fu Adam nanga Eva) èn na libismafamiri sa tyari kon kisi volmaaktifasi baka (Rome sma 6:23; Efeisia sma 1:7). Èn suma kan basi den natuur krakti moro betre èn sorgu taki den no du ogri na libisma leki a Mekiman fu den?—Psalm 148:5-8; Yesaya 30:30.
Gado sa du sani san libisma kan howpu èn kan dren nomo fu den. Ma oten? Den beibri profeititori e sori taki den kenki sa feni presi na ini wan ten te den nâsi ben sa kisi „atibron” èn libisma ben sa „pori grontapu” (Openbaring 11:18). „Muilek ten . . . di tranga fu psa” ben sa marki den lasti dei fu na owru grontapu —èn ben sa abi leki bakapisi den toestand di wi e si lontu unu now èn di e kon ogri moro nanga moro (2 Timoteyus 3:1-5, 13). Èn Yeises ben taki na fesi taki a geslakti di ben sa si den sani dati, ben sa si so srefi a kontru fu den pramisi fu Gado tu.—Mateyus 24:3-14, 32-34.
Teki a ten fu leisi den pramisi disi di skrifi na ini a beibri. Bika sma di sabi den pramisi disi bun makandra nanga Gado e agri nanga a tori disi: Now a de a ten gi wan nyun grontapu!