A wiki di ben kenki grontapoe

„Grantangi foe en di e kon ini nen foe Jehovah!” — MATEUS 21:9.

1. Tapoe sortoe toe kontrari groepoe den sani di ben feni presi ini augustus di pasa, ben abi krakti?

„DRI TOEMOESI MOEILEK DEI DI BEN SEKI GRONTAPOE”. Ini augustus 1991 koranti edelin leki disi ben poti krakti a tapoe, dati sma kan broeja grontapoe dorodoro ini soso wan toe dei. Foe taki leti, den lasti dei foe augustus ben de den dei di foeroe prenspari sani pasa, no wawan gi den sma foe grontapoe ma so srefi gi wan groepoe foe sma foe soema Jesus ben taki: ’Den no de wan pisi foe grontapoe.’ Ini a ten disi sma sabi a groepoe disi leki Jehovah Kotoigi. — Johanes 17:14.

2, 3. (a) Fa den ben poti krakti tapoe frifasi na ini Zagreb awasi kefar foe na broko loesoe foe orlokoe ben de? (b) Fa tranga bribi foe den wan na ini Odessa ben kisi pai?

² Na fosi internationaal kongres foe Jehovah Kotoigi di oiti wan ten ben seti gi Joegoslavië, ben sreka foe hori 16 te leki 18 augustus. So leki fa a ben sori, dan a ben o de na fosi bigi kongres foe Jehovah pipel ini wan kondre, di ben de krosibei srefisrefi foe wan borgroe feti. Kotoigi foe a kondre dati, makandra nanga wan toe kotoigi foe birti kondre di ben gi jepi, ben wroko tranga toe moen langa foe meki na a HAŠK Granđanski foetoebal stadion na Zagreb kon njoen baka dorodoro. A ben krin srefisrefi, wan toemoesi moi presi gi na „Sma di lobi fri di Gado gi”-distriktkongres. Doesoendoesoen fisitiman foe difrenti kondre, ben meki plan foe de drape, nanga so srefi 600 foe Amerkankondre. Ala di na kefar foe wan borgroe feti ben kon moro serjoesoe, dan a takitaki ben waka lontoe: „Den Amerkan no sa kon noiti.” Ma den ben kon, makandra nanga fisitiman di den ben seni komoto foe foeroe tra kondre. Den ben froewakti wan nomroe foe 10.000 fisitiman, ma 14.684 ben de ini a stadion a lasti dei! Alamala ben kisi foeroe blesi bika den no ’ben libi a kon na makandra nanga makandra’. — Hebrewsma 10:25.

³ Ini den dri dei baka a kongres foe Zagreb, sma ben doe wan koep ini Rusiakondre, ma sondro boen bakapisi. Na a ten dati, sma di lobi fri di Gado gi, ben sreka den lasti sani gi den kongres na Odessa ini Oekraïne. Den ben sa man hori a kongres? Nanga tranga bribi den brada ben doe den lasti pikin wroko na a stadion di den ben meki kon njoen baka dorodoro, èn den fisitiman foe difrenti kondre ben tan kon. A gersi leki wan wondroe pasa, taki a koep ben kon na wan kaba. Den ben hori wan toemoesi switi kongres tapoe 24 èn 25 augustus nanga 12.115 fisitiman èn 1.943 — 16 prosent foe na heimarki foe fisitiman — di ben teki dopoe! Den njoen Kotoigi disi, makandra nanga sma di, foeroe jari langa kaba ben kibri den soifri retifasi, ben prisiri taki den ben kon na a kongres dati nanga dorodoro froetrow ini Jehovah. — Odo 3:5, 6.

4. Na baka sortoe model di Jesus ben gi, den Kotoigi na ini Owstoe Europa ben waka?

⁴ Den getrow Kotoigi disi ben waka baka na model di Jesus Krestes, na Eksempel foe wi, ben gi. Noiti a ben frigiti foe fisiti den fesa di Jehovah ben komanderi, srefi di den djoe ben soekoe foe kiri en. Di a ben kon na Jerusalem gi a lasti Paska foe en, den djoe disi ben tanapoe ini a tempel èn ben e aksi: „San joe e denki? Dati a no o kon kwetikweti na a fesa?” (Johanes 11:56) Ma a ben kon! Disi ben sreka a pasi gi wan wiki di ben doro en heimarki trafasi leki fa a libisma historia e waka. Wi sa go loekoe now wan toe foe den prenspari sani foe a wiki dati — foe 8 te leki 14 Nisan tapoe a djoe kalender?

8 Nisan

5. San Jesus ben sabi ala di a ben waka go na Betania tapoe 8 Nisan 33 G.T.?

⁵ A dei disi, Jesus nanga den disipel foe en e doro na Betania. Djaso, Jesus sa tan siksi neti na a oso foe en lobi mati Lasarus, di no so langa ete a ben opo baka foe dede. Betania de krosibei foe Jerusalem. Di Jesus ben de en wawan nanga den disipel foe en, a ben taigi den kaba: „Loekoe! Wi e go na Jerusalem, èn den o gi na Manpikin foe libisma na den granpriester èn den Sabiman foe Boekoe, den sa kroetoe en foe a kisi dede, èn den sa gi en na den sma foe den nâsi, foe meki den spotoe en, krawasi en, anga en na wan pina-oedoe, èn na a di foe dri dei a sa kisi wan opobaka” (Mateus 20:18, 19). Jesus sabi heri boen taki a moesoe kisi hebi tesi now. Ma, ala di a ten foe na moro hei tesi dati e kon krosibei, a e doe ala moeiti foe dini den brada foe en na wan lobifasi. Meki ala ten wi abi a „jejefasi disi. . .di so srefi ben de ini Krestes Jesus.” — Filipisma 2:1-5; 1 Johanes 3:16.

9 Nisan

6. San Maria ben doe na a mofoneti foe 9 Nisan, èn san Jesus ben taigi Judas?

⁶ Baka di sondongo, te 9 Nisan e bigin, Jesus e njan na a oso foe Simon, di ben de fosifosi wan gwasiman. Na djaso a sisa foe Lasarus, Maria, e kanti diri switismeri oli tapoe na ede èn den foetoe foe Jesus, èn na wan sakafasi a e drei Jesus foetoe nanga en edewiwiri. Te Judas e taki sani foe gens dati, Jesus e taki: „Libi en, so taki a kan doe a gwenti disi nanga a dei foe a beri foe mi na prakseri.” Di den granpriester ben kisi foe jere taki foeroe foe den djoe e go na Betania èn dati den e poti bribi na ini Jesus, den e meki mofo foe kiri en nanga Lasarus. — Johanes 12:1-7.

7. Fa a nen foe Jehovah ben kisi prèise na a mamanten foe 9 Nisan, èn san Jesus ben taki na fesi?

⁷ Froekoefroekoe mamanten, Jesus e bigin rèis go na Jerusalem. Bigi ipi sma e waka go miti en, e wai nanga palmtaki èn e bari: „Froeloesoe tokoe! Grantangi foe en di e kon na a nen foe Jehovah, ija, na kownoe foe Israèl!” Dan Jesus e meki a profeititori foe Sakaria 9:9 kon troe foe di a e rèi go na a foto tapoe wan boeriki. Te a e kon krosibei foe Jerusalem, a e krei foe en ede èn e taki a fesi dati den Romensma sa lontoe en nanga penti postoe èn sa pori en dorodoro — wan profeititori di, baka so wan 37 jari, ben o kon troe na a srefi fasi leki fa den ben taki foe en na fesi. (Disi e sori so srefi tapoe problema gi a krestenhèit, di ben fadon komoto na bribi foe di a waka baka na eksempel foe Jerusalem foe owroeten.) Den djoe tiriman no wani Jesus leki den kownoe. Nanga atibron den e bari taki: „Loekoe! Grontapoe ben go waka na en baka.” — Johanes 12:13, 19.

10 Nisan

8. Fa Jesus ben sori dipi respeki gi na oso foe begi foe Jehovah tapoe 10 Nisan èn san ben pasa baka dati?

⁸ Agen Jesus e fisiti a tempel. Foe na di foe toe leisi a e trowe gridi hòselman nanga wisselman na doro. Na bisnis jeje — „a lobi foe moni” — no moesoe teki abra ini Jehovah oso foe begi! (1 Timoteus 6:9, 10) No so langa moro, dan Jesus o dede. A e taki foe na prani foe wan siri, foe agersi disi. Na fosi siri e dede, ma a e gi ai foe meki wan taki gro di e tjari karoe pasa marki. Na a srefi fasi, Jesus en dede sa abi têgo libi leki bakapisi gi den bigi ipi sma di e bribi na ini en. Foe di na dede foe en di ben e kon krosibei ben e troeboe en, dan Jesus e begi taki na a fasi dati na nen foe en Tata sa kisi glori. Leki piki, na sten foe Gado e bari taki nanga tranga sten so dati ala sma di ben de drape, kan jere: „Mi ben gi en glori èn mi sa gi en glori baka.” — Johanes 12:27, 28.

11 Nisan — Wan dei foe aktiviteit

9. (a) Fa Jesus ben gebroiki agersitori di a ben e kroetoe den djoe di ben fadon komoto na bribi, froekoe tapoe a dei foe 11 Nisan? (b) Ini akroederi nanga na agersitori foe Jesus, soema ben lasi wan bigi grani?

⁹ Jesus nanga den disipel foe en agen e libi Betania foe abi wan heri dei foe aktiviteit. Jesus e gebroiki dri agersitori foe sori san ede den djoe sma di fadon komoto na bribi fowtoe. A ben floekoe wan figabon di no ben gi froktoe, èn a toemoesi takroe fasi ini san a ben de now e agersi a djoe nâsi di no ben de getrow, di no abi bribi èn no e meki froktoe. Te a e go na ini a tempel, a e froeteri fa gronman, di no ben warti noti, foe wan masra windroifidjari, te foe kaba, e kiri srefi na manpikin foe na masra di ben o erf ala sani — e agersi na tori di den djoe ben o tori na froetrow di Jehovah ben froetrow den, san ben o doro en heimarki nanga a kiri di den ben o kiri Jesus. A e froeteri foe wan trowfesa di wan kownoe — Jehovah — ben sreka èn fa den fisitiman (den djoe) di a ben kari, ben poeroe densrefi taki den no ben man kon foe di den e prakseri densrefi nomo. Foe na reide disi, na kari e go na sma foe dorosei — den Heiden — foe soema wan toe ben kon. Ma efoe den ben feni wan sma sondro trowkrosi, dan den ben trowe en na doro. A ben agersi den so-kari kresten foe a krestenhèit. Foeroe foe den djoe na ini a ten foe Jesus ben kisi wan kari, „ma wan toe foe den nomo den ben teki” foe de na mindri den 144.000 di ben kisi na lakstampoe, èn di o erf na hemel Kownoekondre. — Mateus 22:14; Openbaring 7:4.

10-12. (a) Foe san ede Jesus ben kroetoe den djoe kerkifesiman, èn sortoe hebi kroetoe a e poti tapoe den hoigriman dati na poebliki? (b) Fa den ben tjari kroetoe, te foe kaba, tapoe den djoe di ben fadon komoto na bribi?

¹⁰ Den djoe kerkifesiman di na wan bidrigi fasi ben meki densrefi sori boen, ben soekoe wan okasi foe fanga Jesus, ma a e piki wan toe foe den triki aksi foe den èn a ben tapoe den mofo na fesi den sma. O, den djoe dati di drai baka gi na bribi foe den! Fa Jesus ben taki na wan joisti fasi fa den ben de, di a ben kroetoe den! Den e angri foe sma kan si den moro hei, foe weri spesroetoe priesterkrosi, èn foe abi nen di e piki so hei, so leki „Rabbi” nanga „Papa”, neleki foeroe kerkifesiman na ini wi ten. Jesus e poti a lin: „Bika soema opo ensrefi, en den sa saka, èn soema saka ensrefi, en den sa opo.” — Mateus 23:12.

¹¹ Jesus e kroetoe den kerkifesiman dati hebi na poebliki. Seibi leisi a e bari taki: „Heloe gi joe!”, ala di a e kari den breni tjariman nanga hoigriman. Èn ibri leisi a e gi soifri reide foe na kroetoe di a e kroetoe den. Den e tapoe pasi foe sma go na ini a Kownoekondre foe hemel. Te den e fanga wan proseliet (wan sma di teki a djoe bribi), a e kon toe tron moro wan sani gi Gehenna, foe di so leki fa a sori a ben de kaba tapoe a pasi foe kisi pori foe grofoe sondoe di a ben doe na fesi noso foe onreidelek fajafasi di a ben abi ini en anbegi. „Donman nanga breni wan!” Jesus e taki, bika den fariseiman e poti den ai soso tapoe a gowtoe foe a tempel, prefoe foe tan hori na soifri anbegi drape. Den no ben wani poti prakseri tapoe retidoe, sari-atifasi èn getrowfasi, foe di den e pai wan di foe tin pisi foe a menti di sma wani so te, foe a dille nanga komijn, ma no ben teki notisi foe den moro prenspari sani foe Wet. Ma den wasi foe den di ben abi foe doe nanga wan lo gwenti, noiti sa poeroe na dotifasi di den abi na inisei — soso wan ati di krin nanga jepi foe bribi ini na ofrandi foe Jesus, kan doe dati. Den inisei hoigrifasi nanga gadolowsoefasi e sori krin taki awasi „den wasi densrefi weti” na dorosei, taki disi na wan lei. — Mateus 23:13-29.

¹² Ija, a de foe troe wan heloe gi den fariseiman, di troetroe na „manpikin foe den wan di ben kiri den profeiti” foe owroeten! Sneki, pikin foe toriman den de, di den kroetoe èn feni boen gi Gehena, foe di den no sa kiri Jesus wawan ma so srefi den wan di en e seni go. Disi na wan kroetoe di den o tjari kon „tapoe a famiri lo disi.” Di dati ben kon troe, Jerusalem ben kisi dorodoro pori 37 jari na baka. — Mateus 23:30-36.

13. Sortoe situwâsi ini a ten disi e sori den sani, di Jesus ben taki foe na gi foe moni bijdrage na a tempel?

¹³ Bifo Jesus e gowe foe na tempel, a e taki na wan prèise fasi foe a pôti weduwe di e iti toe pikin pisi moni na ini a monikisi — „ala san a ben abi foe sorgoe ensrefi.” Foe troe a de heri tra fasi leki den gridi goedoewan di, soso na wan simbôlisfasi e poti wan bijdrage na ini a monikisi. Neleki a pôti weduwe, Jehovah Kotoigi ini a ten disi e òfer ten, moeiti nanga moni nanga den heri ati, so taki den kan horibaka èn panja na Kownoekondre wroko tapoe na heri grontapoe. Fa disi de tra fasi leki den doti TV domri di na wan bedrigifasi e poeroe goedoe na a skin foe den skapoe foe den èn e goedoe den srefi! — Lukas 20:45–21:4.

Te 11 Nisan e kon na wan kaba

14. Sortoe sari Jesus ben sori, èn fa a ben piki den tra aksi foe den disipel foe en?

¹⁴ Jesus e krei foe Jerusalem nanga en pipel ede èn a e froeklari: „Bigin foe now, joe no sa si mi moro, teleki joe e taki: Blesi en de di e kon ini na nen foe Jehovah!” (Mateus 23:37-39) Baka ten, te den e sidon tapoe na Olijfbergi, den disipel di a ben abi wan krosibei matifasi nanga den, e aksi en foe disi, èn leki piki Jesus e froeteri den foe a marki foe en denoja ini Kownoekondre makti èn na kaba foe na ogri seti foe sani foe Satan. — Mateus 24:1–25:46; Markus 13:1-37; Lukas 21:5-36.

15. Sortoe marki Jesus ben gi ini a tori foe en denoja foe kroetoe sma, èn sensi oten a e kon troe?

¹⁵ Te Jesus e sori go na a kroetoe foe Jehovah di heri esi a ben o tjari kon tapoe a tempel, dan a e sori dati disi e prenki den sani di ben o abi sari bakapisi èn di ben o feni presi na a kaba foe na heri seti foe sani. A ten dati foe en denoja sa abi leki marki, a broko loesoe foe feti na so wan fasi di noiti ben pasa ete na fesi, so boen angriten, gronseki, pest-siki, makandra nanga a mankeri foe lobi nanga kroektoedoe. Fa disi ben de troe foe na twenti jarihondro grontapoe foe wi, foe sensi 1914!

16, 17. Foe sortoe sani di ben o feni presi na grontapoe Jesus ben taki, èn fa kresten moesoe doe boen tapoe a profeititori?

¹⁶ Wi sa doro wan heimarki ini wan „bigi banawtoe, soleki foe na bigin foe grontapoe te leki now no ben feni presi, nôno, èn so srefi no sa feni presi moro.” Foe di disi sa pori sani neleki na Froedoe ini den dei foe Noa, dan Jesus e warskow foe no meki a feti baka grontapoe sani teki oenoe abra krinkrin. „Tan na ai foe dati ede doronomo, bika joe no sabi na sortoe dei joe masra e kon.” O kolokoe wi kan de dati a Meester poti wan „getrow èn koni srafoe” di kisi salfoe, foe meki sma jere a warskow èn foe sorgoe gi jeje njanjan pasa marki ini den dei disi foe en denoja! — Mateus 24:21, 42, 45-47.

¹⁷ Ini a twenti jarihondro foe wi, wi si „na grontapoe, broeja skreki foe den nâsi di. . . no sabi wan pasi foe komoto,ala di den sma e kon weri foe banawtoe èn froewakti foe den sani di e kon tapoe na grontapoe pe libisma e libi.” Ma Jesus e froeteri wi: „Te den sani disi e bigin feni presi, opo joe borsoe leti-opo, bika joe froeloesoe de krosibei.” Èn a e warskow oenoe: „Poti prakseri na joesrefi, dati joe ati no kon hebi nanga toemoesi njanjan èn dringi te foe droengoe èn foe oenoe broko oen ede toemoesi nanga sani foe a grontapoe disi èn a dei dati no kon fadon onfroewakti na oen tapoe, ini wan momenti, leki wan trapoe.” Soso efoe wi e tan na ai wi kan tanapoe na fesi Jesus, „a Manpikin foe libisma”, ala di a e feni wi boen, na a denoja foe en. — Lukas 21:25-28, 34-36.

18. Sortoe tranga wi kan teki foe den agersitori di Jesus ben gi foe den tin jongoewenke èn den talenti?

¹⁸ Te Jesus e bosroiti en toemoesi boen preiki foe sani di a ben si na fesi, di ben o feni presi ini a njoen modoten foe wi, a e gi dri agersitori. Na a fosi presi, te a e froeteri na agersitori foe den tin jongoewenke, dan agen a e poti krakti tapoe na fanowdoe foe „tan na ai.” Dan, ini na agersitori foe den srafoe nanga den talenti, a e sori fa fajafasi foe wroko e kisi pai foe di wi e kisi wan kari foe ’go na ini a prisiri foe a Meester.’ Kresten di kisi salfoe, èn di Jesus ben prenki na fesi ini den agersitori disi, so boen leki den tra skapoe, kan feni foeroe deki-ati foe den wortoe disi. — Mateus 25:1-30.

19, 20. Sortoe toemoesi moi njoen-modoten matifasi de prenspari ini na agersitori foe Jesus foe den skapoe nanga den bokoboko?

¹⁹ A di foe dri agersitori e sori tapoe na denoja foe Jesus ini Kownoekondre makti, baka di a doro foe sidon na tapoe en glori kownoestoeroe ini hemel. A de wan ten foe kroetoe den nâsi èn foe prati den libisma di de na grontapoe, ini toe groepoe; wan groepoe foe safoe-ati sma, di joe kan agersi nanga skapoe, èn a tra groepoe foe tranga-ede sma, di joe kan agersi nanga bokoboko. Den skapoe e doe foeroe moeiti foe sori taki den e horibaka gi den brada foe a Kownoe — na salfoe fikapisi di de now na grontapoe ete ini a ten disi foe na kaba foe grontapoe. Den skapoe disi e kisi libi leki pai, ala di na a tra sei den bokoboko di no warti e go na ini têgo pori. — Mateus 25:31-46.

²⁰ Fa wi e si wan toemoesi moi krosibei matifasi na mindri den tra skapoe èn den brada foe a Kownoe, na a kaba disi foe na seti foe sani! Ala di a salfoe fikapisi ben tjari na lai foe a moro bigi pisi foe a wroko na a bigin foe na denoja foe a Kownoe, dan tokoe den miljoenmiljoen fajafaja tra skapoe e meki now 99,8 prosent foe Gado dinari na grontapoe (Johanes 10:16). Èn so srefi den ben sori taki den ben wani foe njanpina foe ’angri, dreiwatra, soso skin, siki, èn doengroe-oso’, leki kompe foe den salfoewan di e hori den soifri-retifasi.a

12 Nisan

21. San ben bigin tron wan sani tapoe 12 Nisan, èn foe san ede?

²¹ A mofo di den meki foe kiri Jesus e bigin tron wan sani. Judas e fisiti a granpriester na a tempel, pe a e agri foe tori Jesus foe 30 solfroe pisi moni. Srefi foe disi den ben taki na fesi. — Sakaria 11:12.

13 Nisan

22. Sortoe sani den ben sreka tapoe 13 Nisan?

²² Jesus, di ensrefi e tan na Betania, so leki fa a sori foe begi èn denki dipi foe sani, e seni den disipel foe en go na Jerusalem foe go soekoe wan spesroetoe „So-èn-so.” Ini na oso foe a man disi, na wan bigi tapoesodro kamra, den e sreka sani gi na Paskafesa (Mateus 26:17-19). Te son dongo tapoe 13 Nisan, Jesus e miti den drape gi na moro prenspari fesa foe na heri historia. San e wakti den now na tapoe 14 Nisan? Ini a tra artikel wi sa si dati.

[Foetoewortoe]

Fa joe ben sa piki sjatoe?

◻ Fa sma ben sori foe lobi teki Jesus na oso èn bari en wan switi kon tapoe 8 te go miti 10 Nisan?

◻ Fa Jesus ben tjari a falsi boenfasi foe den kerkifesiman kon a krin tapoe 11 Nisan?

◻ Sortoe prenspari profeititori Jesus ben gi, èn fa a e kon troe na ini a ten disi?

◻ Fa den sani di ben o feni presi ben doro den heimarki tapoe 12 nanga 13 Nisan?

[Prenki na tapoe bladzijde 8]

Jesus e prèise na pôti weduwe di ben gi toe pikin pisi moni — ala san a ben abi