A taki na ini tongo — Wan sani di e sori ensrefi moro nanga moro
„WAN makti dwengi a tongo foe mi èn den wortoe ben lon komoto neleki watra. Fa disi ben de wan prisiri! Mi ben abi wan firi foe toemoesi boen krinfasi. Noiti mi ben de a srefi sensi a ten dati”, wan sma ben bari, di ben abi wan toemoesi aparti ondrofeni foe taki na ini wan „tongo di sma no sabi”.
Dja joe abi san wan sma e taki foe a fosi ondrofeni foe en, foe a taki na ini wan „tongo di sma no sabi”. ’Ma san na dati?’, son sma e aksi kande nanga leti. A e sori na wan doe noso bribi ini son kerki pe man nanga oema e taki, dati a jeje foe Gado e poesoe den foe taki na ini dorosei noso freimde tongo di den no sabi.
A de wan kerkisani, di e sori ensrefi moro nanga moro. Ala di sma ben si a taki na ini tongo wan ten leki wan sani, di ben pasa nanga den bribiman foe a Pinksterfesa wawan, tokoe a e pasa now ini traditioneel groepoe di de bekènti, pe joe abi na ini toe baptistsma, episkopaalsma, anitri, metodistsma, presbiterian nanga lomsoe. Den ben taki foe a kondisi foe wan sma te a de ini a situwâsi disi, leki wan firi di de toemoesi switi, toemoesi prisiri, trance [a jeje e libi a skin gowe na tapoe] nanga hypnotis [meki sma go ini wan sribi nanga jepi foe jeje krakti]. Sonwan ben kari en srefi wan ondrofeni foe broeja. Wan aparti krakti de di e hari sma nanga wan charisma, di abi foe doe nanga a taki na ini tongo.
Foe san ede sma e angri ini a ten disi foe kisi a presenti foe tongo?
Cyril G. Williams e taki ini en boekoe Tongues of the Spirit (Tongo foe a jeje), taki wan „banti [kan de] na mindri a firi foe misi foe doe wan sani, èn na angri gi ’tongo’”. A e taki foe a taki na ini tongo leki wan wrokosani di e meki sma kon fri èn di abi „waarde foe meki sma kon betre leki wan sani di e meki druk kon moro pikin” èn wan „sani di e poeroe sani di e troeboe sma na inisei”. Brokosaka na ini a kerkiwroko, emotioneel banawtoe, a misi di wan sma misi foe doe wan sani na ini a wroko foe en, a lasi di wan sma lasi wan sma na ini dede, druk na oso, noso siki na ini a famiri, na wan foe den sani di den e kari foe jepi sma na so wan fasi foe taki na wan toemoesi switifasi.
Na a srefi fasi John P. Kildahl, e taki na ini The Psychology of Speaking in Tongues (A psychologie foe taki na ini tongo), dati „te wan sma abi broko-ede, dan dati de wan fosi sani, di e meki a taki na ini tongo”. Nanga jepi foe ondrosoekoe, di ensrefi doe èn finifini aksi takimakandra di a ben abi nanga sma, a ben kon si taki „moro leki 85% foe den sma di e taki na ini tongo na fesi ben ondrofeni wan krinkrin banawtoe foe broko-ede di wan sma de na ini, bifo den ben taki na ini tongo”. Foe eksempel, wan mama ben wani foe taki na ini tongo, so taki a ben kan begi gi a manpikin foe en, di ben abi kanker. Wan man ben bigin taki na ini tongo na ini a pisi ten di a no ben man bosroiti fa foe doe nanga wan pristeri di a ben kisi foe teki wan moro hei wroko. Wan oema ben bigin taki na ini tongo na ini wán wiki baka di a masra foe en ben go na ini wan organisâsi di e jepi sma foe wini a problema foe den foe dringi sopi.
San wan sma e ondrofeni?
Wan tra sma, di ben taki na ini tongo foe a fosi tron e froeteri: „Mi ben abi wan firi di ben bron na ini mi heri skin, èn wan kowroe èn bigi swetidropoe, èn wan beifi èn wan sortoe swakifasi ini den anoe nanga den foetoe foe mi.” Makandra nanga na ondrofeni foe taki na ini tongo, dan joe abi moro foeroe wan ongewoon fasi foe doe, di e trobi son sma. Foe eksempel, „wan oemapikin pikinmoro ben stèk ini en eigi spiti, ala di a ben langa ensrefi tapoe wan stoeroe, a neki foe en ben de na a baka foe a stoeroe, den bakafoetoe foe en ben de na tapoe gron, den foetoe foe en ben steifi”. Na wan konmakandra foe wan gemeente „wan man ben meki kòpròl doronomo foe wan sei foe a kerki go te na a tra sei”.
„Gi son sma”, Professor William J. Samarin e skrifi, „a taki na ini tongo na wan kondisi foe kan kisi dopoe nanga Santa Jeje.” Sondro dati, den „e meki den firi pikinso leki den ben misi wan sani”. Sma e si en toe „leki wan piki tapoe begi, wan djaranti taki Gado lobi den èn e teki den”. Trawan ben taki, dati a e libi den nanga wan firi foe wánfasi na inisei, prisiri, nanga vrede, èn nanga wan „moro bigi firi foe makti” èn „wan tranga firi foe sabi soema joe de”.
A taki nanga wan firi di de toemoesi switi, de troetroe wan boeweisi taki a santa jeje e wroko? Na ondrofeni e meki sma si taki a sma disi na wan troe kresten? A taki di sma e taki na ini tongo na wan pisi foe anbegi na ini a ten disi di Gado e teki? Den aksi disi moesoe kisi moro leki wan frafra piki nomo. Foe san ede? Foe di wi wani taki Gado e feni na anbegi foe wi boen èn e blesi en.