A presenti foe tongo na wan pisi foe a troe krestendom?
„MI BEN firi, ala di mi ben arki fa a ben preiki na ini tongo, neleki wan elektrik krakti ben de ini a loktoe”, Bill ben taki, baka di en nanga siksi trawan ben kon makandra bifo wan domri, krosibei foe na altari foe a kerki. Den ondrofeni disi e meki san a santa jeje ben doe na ini a fosi jarihondro pasa baka? Den e meki sma kon sabi a relisi foe bijbel? Wi kan feni piki, di e gi satisfaksi, te wi e go ondrosoekoe den Boekoe finifini.
Bijbel tori e tjari kon na krin, taki te sma ben kisi wan wondroe presenti foe a jeje, dan awansi fa a no fa, wán foe 12 apostel noso na apostel Paulus ben de drape. A fosiwan foe den dri eksempel foe a taki na ini tongo, di den ben skrifi foe den, ben pasa na mindri 120 disipel foe Jesus, di ben kon makandra na Jerusalem na a Pinksterfesa foe 33 G.T. (Tori foe den Apostel 2:1-4). Dri nanga wan afoe jari baka dati, ala di wan groepoe foe Italiansma di no ben besnij, ben arki a preiki foe Petrus, den ben kisi a jeje èn ben bigin „taki nanga tongo èn ben gi Gado bigi nen” (Tori foe den Apostel 10:44-48). Èn 19 jari baka a Pinksterfesa, wan sani foe 52 G.T., Paulus ben taki nanga wan groepoe na Efeise èn ben poti en anoe na tapoe 12 disipel. Den toe „ben bigin taki nanga tongo èn ben taki profeititori”. — Tori foe den Apostel 19:6.
San na a reide foe a presenti foe tongo?
Leti bifo Jesus ben go na hemel, a ben taigi den bakaman foe en: „Oenoe sa kisi krakti te a santa jeje kon na oen tapoe, èn oenoe sa de kotoigi foe mi na Jerusalem èn . . . te na den moro farawe kontren foe grontapoe” (Tori foe den Apostel 1:8). Loekoe taki a ben gi den so boen, wan marki nomo fa a kefarlek bigi kotoigiwroko ben sa doe — nanga a jepi foe a santa jeje.
Njoenmodo ten kommunikâsi tèknik, di e meki wi man foe seni boskopoe na a heri grontapoe na ini foeroe tongo, no ben de na a ten dati. A boen njoensoe ben moesoe foe panja moro foeroe nanga wortoe foe sma mofo èn dja a wondroe presenti foe taki na ini freimde tongo ben sa sori taki a de wan bigi jepi. Disi ben de a kefal, di kresten foe a fosi jarihondro ben preiki gi djoe èn den proseliet na Jerusalem na ini 33 G.T. Partsma, Mediasma, Elamitsma, Kretasma, Arabiasma, sma di ben libi na Mesopotamia, Judea, Kapadosia, Pontus, èn a distrikt Asia, èn so srefi den sma di ben rèis kon foe Rome, ben jere „den toemoesi moi sani foe Gado” na ini den eigi tongo èn den ben froestan san den kresten ben taki. Dri doesoen ben tron bribiman esi-esi. — Tori foe den Apostel 2:5-11, 41.
Wan sani, di sma e frigiti foeroe tron, na dati a taki na ini tongo ben de soso wán foe den neigi fasi fa a santa jeje, di na apostel Paulus ben kari na ini a brifi foe en gi den kresten na Korente, ben e wroko. Ala di Paulus ben si a taki na ini tongo leki wan presenti di no ben de so prenspari, tokoe a ben abi waarde gi a fosi gemeente foe prati a boen njoensoe foe a hemel Kownoekondre foe Gado. A ben de wán foe den „presenti”, di ben jepi foe a njofi gemeente foe kresten gro ini nomroe èn ben kon tranga. — 1 Korentesma 12:7-11; 14:24-26.
Den difrenti wroko foe a santa jeje ini a fosi jarihondro, di ben abi na ini toe a taki na ini tongo, ben de so srefi wan boeweisi, di sma ben kan si, taki Gado no ben gebroiki moro langa a 1500 jari owroe gemeente foe Israèl leki en spesroetoe pipel. Sondro degedege, a feni di a ben feni sma boen ben rostoe now tapoe a njoen kresten gemeente, di na wan enkri Manpikin foe en ben opo. — Teki gersi Hebrewsma 2:2-4.
Den sori disi foe a santa jeje ben de prenspari bowston foe meki a jongoe kresten gemeente kon boen steifi èn foe jepi en foe gro kon wan lepi sma. Paulus ben froeklari taki baka di den wondroe presenti disi ben dini a prakseri foe den, den ben sa stòp: „Ma awasi [presenti foe] profeteri de, den sa poti den na wan sei; awasi tongo de, den sa tapoe den.” — 1 Korentesma 13:8.
Ija, bijbel e taki krin taki a presenti foe tongo ben sa stòp. Ma oten? Tori foe den Apostel 8:18 e tjari kon na krin taki sma ben kisi den presenti foe a jeje „nanga jepi foe den anoe di den apostel ben poti a tapoe sma”. Dati ede a de krin taki, nanga a dede foe a lasti apostel, a gi foe den presenti foe a jeje na tra sma ben sa tapoe — so srefi a taki na ini tongo. Foe dati ede, te den sma, di ben kisi den presenti disi foe den apostel ben komoto toe na a grontapoe preigron, dan a wondroe presenti ben sa stòp. Na a ten dati a kresten gemeente ben sa abi ten foe kon boen steifi èn ben sa panja na foeroe kondre.
„Tongo di sma no sabi” èn fa den ben froeklari den
„Son sma ben si” a kon, di a taki na ini tongo kon baka ini a ten disi, „leki wan emotioneel sori foe sma, di no e tanapoe steifi èn di e doe disi foe hari a prakseri poti tapoe densrefi, ala di trawan e si en leki wan srefi sortoe sani leki san ben pasa ini a tori foe a taki na ini tongo na ini a ten foe den apostel.” Ini kerki foe a ten disi, konmakandra pe a taki na ini „tongo di sma no sabi” e feni presi, a abi moro foeroe foe doe nanga wan toemoesi prisiri broko kon foe babari di no wan sma man froestan. Ini akroederi nanga disi wan sma ben bekènti: „Mi e gebroiki mi presenti foe tongo moro foeroe te mi de mi wawan foe go prakseri dipi foe sani. . . . Mi e sjen pikinso te mi de na fesi tra sma.” Wan tra man ben froeteri: „Mi e jere mi eigi wortoe, mi no e froestan den, ma mi e tan firi taki wan sani e poesoe a tongo foe mi foe taki.”
Sortoe bodoi di warti troetroe den e gi abra nanga den sortoe tongo disi di sma no sabi, èn san de foe taki foe wan froeklari? Den sma di e taki, dati den e froeklari a taki disi, ben gi difrenti froeklari foe den srefi wortoe di no wan sma man froestan. Foe san ede difrenti froeklari? Den no e si a poeroe foe a broeja disi leki wan bigi sani, foe di den e taki, dati „Gado ben gi a wan sma wán fasi foe froeklari a taki èn wan tra sma wan tra fasi foe froeklari en”. Wan sma ben erken: „Mi ben si okasi pe a froeklari no ben de so finifini.” D. A. Hayes e sori na ini en boekoe The Gift of Tongues (A presenti foe tongo), tapoe wan eksempel pe wan man ben weigri foe froeklari a taki foe wan oema, di ben taki na ini wan tongo di sma no sabi, foe di „a tongo ben de a moro dotiwan foe san doti”. Fa disi de heri tra fasi leki a taki na ini tongo di ben de ini a fosi jarihondro èn di ben de troetroe foe bow a gemeente! — 1 Korentesma 14:4-6, 12, 18.
Sonwan ini a ten disi e taki, dati den ben jere toemoesi moi froeklari, èn taki den kan bribi opregti taki Gado e gebroiki a presenti disi te a „e winsi foe gi wan boskopoe langalanga go na a pipel”. Ma sortoe boskopoe foe Gado wi abi fanowdoe ini a ten disi di Jesus Krestes nanga den apostel no ben gi wi? Paulus, di srefi ben kisi a presenti foe santa jeje, ben taki: „Ala den Boekoe skrifi nanga jepi foe a santa jeje foe Gado èn den boen foe gi leri, foe piri-ai gi sma, foe poti sani reti, foe gi tranga leri ini regtfardikifasi, so taki a sma foe Gado kan de koni dorodoro, de sreka dorodoro gi ibri boen wroko.” — 2 Timoteus 3:16, 17.
A de troe taki, a kresten gemeente no de moro langa ini en pikin-nengre ten, èn dati ede openbaring foe Gado noso wondroe presenti foe a jeje no de fanowdoe moro langa foe sori san na a ròl foe a gemeente. Bijbel e warskow: „Awasi wi noso wan engel foe hemel ben sa meki wan sani bekènti gi oenoe leki boen njoensoe, boiti [„de ini kontrari nanga,” The New English Bible] san wi ben meki bekènti gi oenoe leki boen njoensoe, a de froefroektoe.” — Galasiasma 1:8.
A taki na ini tongo na wan froewondroe fasi, no de moro langa fanowdoe èn no wan bijbel fondamenti de, foe bribi taki a de wan pisi foe a troe krestendom ini a ten disi. Now di wi abi a heri bijbel èn a de foe kisi na heri grontapoe, wi abi san wi abi fanowdoe ini a Wortoe foe Gado. A e gi wi pasi foe kisi wan soifri sabi, foe Jehovah nanga en Manpikin, di abi têgo libi leki bakapisi. — Johanes 17:3; Openbaring 22:18, 19.
Srefi ini a fosi jarihondro, na apostel Paulus ben firi a fanowdoe foe skrifi a gemeente na Korente foe poti a loekoe foe den tapoe a reide foe san ede a presenti foe tongo ben gi na den fosi kresten, reti. A de krin, taki a presenti foe tongo ben hari sonwan èn den ben doe leki pikin-nengre, di no de lepi na jeje fasi. Den ben gi toemoesi foeroe prensparifasi na „tongo” (1 Korentesma 14:1-39). Paulus ben poti krakti a tapoe taki a no ala kresten ini a fosi jarihondro ben taki ini tongo nanga jepi foe wondroe. A no ben de fanowdoe foe den kisi froeloesoe. Srefi ini a ten dati, di a ben de, a presenti foe tongo ben kon baka a profeteri nanga jepi foe wondroe. A taki na ini tongo no ben de èn no de, wan sani di de fanowdoe gi kresten foe kisi têgo libi. — 1 Korentesma 12:29, 30; 14:4, 5.
A krakti baka tongo di sma no sabi ini a ten disi
Sonwan e bribi taki a makti di e boeweigi den sma ini a ten disi, di foe a taki na ini tongo, na den charismatis kerki fesiman di e aksi memre foe na ipi foe den leri foe kisi a man di den man taki na ini tongo disi. Ini son kefal den man doe disi nanga jepi foe emotioneel fasi nanga a de di wan sma no de ini balansi. Cyril G. Williams, e taki ini Tongues of the Spirit (Tongo foe a jeje), dati a ben tron „ini foeroe kefal wan marki foe a soekoe di sma e soekoe a wini foe wan pikin groepoe nomo” èn a e gi wan sma „krakti èn tirimakti ini na ai foe a groepoe èn na ini den eigi ai toe”. San e boeweigi den foe dati ede, ben kan de wan angri foe de foe wan memre foe a prenspari groepoe di e taki tongo di sma no sabi.
Di Donald P. Merrifield ben de presidenti foe na Universiteit foe Loyola, a ben taki, „dati tongo ben kan de wan broejabroeja ondrofeni, noso, so leki fa wan toe sma e taki, wan didibri ondrofeni”. Kerki fesiman Todd H. Fast ben taki: „Tongo de kontrari densrefi. Didibri abi foeroe fasi foe proeberi foe abi krakti na wi tapoe.” Bijbel srefi e warskow taki Satan nanga den ogri jeje foe en man foe abi krakti tapoe sma èn e basi a taki foe den (Tori foe den Apostel 16:17, 18). Jesus ben doe wan sani nanga wan ogri jeje, di ben poesoe wan man foe babari èn fadon na gron (Lukas 4:33-35). Paulus ben warskow taki ’Satan ben o kenki ensrefi na ini wan engel foe leti’ (2 Korentesma 11:14). Den sma ini a ten disi, di e soekoe a presenti foe tongo, di Gado no e kanti moro tapoe a pipel foe en, troetroe e opo densrefi foe meki Satan kori den èn di so leki den e warskow wi, ben sa gebroiki „ibri krakti wroko èn marki di de wan lei èn wondroe”. — 2 Tesalonikasma 2:9, 10.
Tongo — èn a troe krestendom
Den fosi jarihondro kresten, di ben kisi a presenti foe taki na ini tongo ben gebroiki en foe froeklari den toemoesi moi sani foe Gado. Den ben poti krakti tapoe a fanowdoe foe vertaal a boskopoe di gi na ini tongo krin, so taki ala sma ben kan froestan en èn abi leki bakapisi taki foeroe sma kisi leri (1 Korentesma 14:26-33). Paulus ben froemane: „Efoe oenoe nanga jepi foe a tongo no e taki sani di sma man froestan makriki, fa sma sa sabi dan san oenoe e taki? Foe taki en leti, dan oenoe sa taki sani na ini loktoe.” — 1 Korentesma 14:9.
Ala di a jeje foe Gado ben gi a presenti foe tongo na fosi kresten, a no ben meki den taki lawsani sondro foe wan sma man froestan den noso di no wan sma ben man vertaal. Ini akroederi nanga a rai foe Paulus, a santa jeje ben gi taki, di ben abi leki bakapisi taki moro esi a boen njoensoe ben „preiki na a heri mekisani di de na ondro hemel”. — Kolosesma 1:23.
Ini a tori foe den lasti dei disi foe a seti foe sani foe a ten disi, dan Jesus Krestes ben gi a komando: „Ini ala den nâsi a boen njoensoe [foe a Kownoekondre di opo] moesoe preiki fosi” (Markus 13:10). Neleki ini a fosi jarihondro, dan ala sani di Gado meki moesoe jere a boskopoe foe a Kownoekondre. Disi man, foe di now a heri bijbel noso pisi foe en vertaal na ini pikinmoro 2000 tongo. A srefi jeje di ben gi fositen kresten krakti foe taki sondro frede èn nanga deki-ati, e horibaka now gi a bigi èn froewondroe preikiwroko foe a disiten gemeente foe Jehovah Kotoigi. Nanga a wortoe foe sma mofo èn foe di den e gebroiki njoenmodo-ten tèknik foe druk boekoe foe meki sma kisi a bijbel waarheid nanga jepi foe bladzijde di druk, den e taki a „soifri tongo”. A boskopoe disi e go na moro leki 200 kondre nanga eilanti foe a se. Jehovah Kotoigi e tanapoe den wawan leki a pipel di a jeje foe Gado e boeweigi foe meki ala sma sabi den toemoesi moi sani foe Gado. — Sefania 3:9; 2 Timoteus 1:13.
[Prenki na tapoe bladzijde 7]
Oso-foe-oso preikiwroko na Japan
Sipi-foe-sipi preikiwroko na Colombia
Na ondrosei: Bijbelstudie na Guatemala
Moro na ondrosei: Preikiwroko na boitipresi na Bakrakondre