Osofamiri problema — Wan marki foe a ten foe wi

OSOFAMIRI problema — foeroe sma e si disi leki wan marki taki den seti foe a trowlibi di sma gwenti èn a kweki foe pikin na sani di no boen moro gi a ten disi. Trawan e si en leki wan sani di e kon foe politiek, ekonomia èn sociaal kenki. Tokoe trawan e si disi soso leki wan tra rampoe sani foe a disiten tèknik. Te joe e loekoe en troetroe, dan den problema di osofamiri e feti nanga den ini a ten disi, e sori go na wan sani di wani taki krinkrin moro foeroe. Loekoe den wortoe na ini bijbel na 2 Timoteus 3:1-4:

„Ma sabi disi, taki ini den lasti dei, moeilek ten sa doro, di tranga foe pasa. Bikasi den sma sa lobi densrefi nomo, lobi a moni, sa de asranti, abi heimemre, gongosaman, no gi jesi na papa nanga mama, sondro tangi, no de loyaal, no abi wan reti lobi, no de klari foe meki no wan kroederi, e taki ogri, sondro foe dwengi densrefi, krasi, sondro lobi gi boen sani, toriman, no e ke foe noti, abi bigi-memre, nanga moro lobi gi prisiri leki lobi gi Gado.”

Den wortoe disi no e sori tapoe a troetroe roetoe foe den problema ini a ten disi? Den osofamiri problema ini a ten disi de krinkrin wan wantewante bakapisi foe den sani di ben taki na fesi taki den ben o pasa ini den lasti dei foe a grontapoe disi. Èn boeweisi di e overtoigi sma de taki a pisi ten disi foe problema ben bigin ini a jari 1914.a Sensi a ten dati, a krakti di a jeje mekisani, di tranga moro libisma èn di nen Satan Didibri abi tapoe sma, ben de foe kiri sma srefisrefi. — Mateus 4:8-10; 1 Johanes 5:19.

Foe di den ben trowe Satan kon na ini 1914 ini a kontren foe grontapoe, a abi „bigi atibron, foe di a sabi taki a abi wan sjatoe pisi ten” (Openbaring 12:7-12). Foe di Satan na wan troetroe feanti foe a Gado, „di ibri famiri na ini hemel èn na grontapoe kisi en nen foe en”, a e gi froewondroe taki grontapoe kon tron wan kefarlek presi gi osofamiri? (Efeisesma 3:15) Satan abi a fasti bosroiti foe meki a heri libisma famiri drai baka gi Gado. Na sortoe moro boen fasi a ben man doro disi leki foe gebroiki problema foe ròs osofamiri?

Moro sa moesoe doe leki den theorie, di sori so koemakriki, foe koniman di abi heimemre, foe kibri osofamiri foe so wan opo di wan sma di tranga moro libisma, e opo kon feti nanga den. Ma tokoe bijbel e taki foe Satan: „Wi no de sondro sabi foe san a abi na prakseri” (2 Korentesma 2:11). Wan marki foe kibri de te wi e sabi den spesroetoe fasi fa a e ròs sma.

Moni èn wroko

Druk na ekonomia sei na wan foe den moro tranga fetisani foe Satan foe ròs sma. Disi na „moeilek ten di tranga foe pasa”, noso so leki fa a Revised Standard Version e vertaal 2 Timoteus 3:1, „ten foe banawtoe”. Ini pôti kondre, problema so leki a de di wroko no de foe feni, a pikinso moni di sma e kisi foe wroko di den doe, èn a mankeri foe den moro prenspari sani di sma abi fanowdoe, e meki taki osofamiri abi foeroe problema. Ma srefi gi Verenigde Staten di goedoe, te joe e teki disi gersi nanga tra kondre, druk na ekonomia sei abi serjoesoe bakapisi. Wan ondrosoekoe na Verenigde Staten e sori taki moni na wan foe den moro prenspari sani di e meki trobi e kon na ini osofamiri. A boekoe Secrets of Strong Families e froeklari taki a „ten, prakseri, [èn] krakti” di sma e gi foe doro san grontapoe wroko e aksi foe den doe, kan de wan „kibri feanti toe di lai nanga triki” èn di e meki sma no doe den froeplekti foe den ini na osofamiri.

Omstandigheid ben dwengi wan heri ipi oemasma foe go soekoe wroko. Skrifiman Vance Packard e skrifi: „Nojaso kande wan di foe fo pisi foe den beibi nanga pikin-nengre di no doro dri jari ete na Amerkankondre abi wan mama di abi a frantiwortoe foe wan wroko dorosei foe na oso.” Foe sorgoe gi den fanowdoe foe pikin-nengre di pikinmoro den no man gi satisfaksi na dati neleki fa wroko kan de wan hebi moeiti di e weri sma — nanga takroe bakapisi gi papa nanga mama èn pikin toe. Packard e taki moro fara taki foe di wan mankeri de foe boen sani foe sorgoe gi pikin na ini Verenigde Staten „wan toe miljoen pikin ini a ten disi e kisi pikinso boen sorgoe nomo ini den jongoe jari foe den.” — Our Endangered Children (Den pikin foe wi di de ini kefar.)

A wrokopresi srefi foeroe tron e njan a wánfasi ini na osofamiri libi na ondro. Foeroe wrokoman e kisi foe doe nanga seks demakandra di no mag nanga kompe wrokoman. Tokoe trawan e kon de foe soso ini wan feti foe abi boen bakapisi èn den e òfer na osofamiri libi foe den foe feti na baka wan moro hei wroko. (Teki gersi Preikiman 4:4.) Wan man ben gi so foeroe ten na a wroko foe en leki wan sma di e waka seri sani, taki a wefi foe en ben taki foe ensrefi leki wan „mama di ben abi wan masra, ma di te joe loekoe en boen en wawan ben sorgoe gi na osofamiri”.

Den banti na ini a trowlibi kon swaki

A seti foe a trowlibi srefi kon ondrofeni ròs toe. A boekoe The Intimate Environment e taki: „Ini a ten di pasa, a froewakti ben de taki wan trowpaar ben o tan nanga makandra te leki wan foe den toe ben doe wan bigi sondoe kontrari a trowlibi — soetadoe, bita-atifasi, noso no ben sorgoe a trowlibi boen kwetikweti. Now moro foeroe sma e si a marki foe a trowlibi leki a satisferi foe densrefi.” Ija, sma e handri nanga a trowlibi leki wan sani di moesoe dresi a de di den no de kolokoe, a sabi di sma no sabi san foe doe nanga den ten, noso a de di sma de en wawan — èn no leki wan froeplekti foe tan nanga wan tra sma en heri libi langa. A prakseri poti now na tapoe san joe e kisi foe a trowlibi, no san joe e poti na ini. (Heri tra fasi leki Tori foe den Apostel 20:35.) A „bigi kenki disi ini den waarde di de lontoe a trowlibi” meki den banti na ini a trowlibi kon swaki srefisrefi. Te trowpaar no man satisferi densrefi moro, dan moro foeroe den e broko-trow leki wan esi-esi loesoe foe den problema.

Ini bijbel den e skrifi na profeitisfasi foe sma ini den „lasti dei” disi, leki sma di „abi wan fasi foe a gi di sma e gi densrefi ini a dini foe Gado ma di sori taki den no abi a krakti foe doe dati” (2 Timoteus 3:4, 5). Foeroe koniman e firi taki a go di relisi ben go na baka ben plèi wan ròl ini a njan di den e njan a trowlibi na ondro. Dr. Diane Medved ben skrifi na ini a boekoe foe en, The Case Against Divorce: „So leki fa foeroe relisi e taki, dan Gado ben taki, dati a trowlibi ben moesoe de wan sani di de foe ala ten. Te joe no de seiker taki Gado de, noso joe no e bribi na ini En, dan joe e doe san joe wani.” Dan leki wan bakapisi, te problema de ini a trowlibi, trowpaar no e soekoe boen loesoe. „Hastihasti den e tjari wan kaba kon na a heri trowlibi”.

Jongoesma di sani e opo kon na den tapoe

Pikin e ondrofeni broeja foe den kwinsi foe a ten disi. Wan sari bigi nomroe foe pikin di den eigi papa nanga mama e fon den na wan ogrifasi èn e meshandri den nanga wortoe noso tapoe kontren foe seks. Broko-trow meki miljoenmiljoen jongoesma moro no e kisi nofo foe a krakti di lobi foe papa èn mama kan abi tapoe den, èn a pen foe a prati di papa nanga mama e prati, nofotron e tan den heri libi langa.

Tranga krakti e trobi jongoesma. Na a ten te wan gemiddelde Amerikan jongoesma doro 14 jari, a sa de kotoigi foe 18.000 kiri di sma kiri trawan nanga wan lo tra fasi foe ogridoe, seks di no mag, feni prisiri na ini a pina di den e pina wan trawan èn takroedoe soso foe di den e loekoe telefisie. Pokoe toe abi wan heri ipi krakti tapoe jongoesma, èn foeroe foe dati abi sani na ini di e seki sma, e taki krinkrin foe seks noso srefi foe sani di abi foe doe nanga Satan. Skoro e sori den jongoewan leri so leki evolutie di e njan a bribi na ini Gado nanga bijbel na ondro. Druk foe speri e meki foeroe jongoewan e go abi prati ini seks bifo den trow èn a fowtoe gebroiki foe tranga sopi noso drug.

A roetoe foe osofamiri problema

A ròs di e kon tapoe osofamiri de foe dati ede wan bigi problema èn kan de wan sani di e pori den. San kan jepi osofamiri foe pasa den? John Bradshaw, di e gi rai na osofamiri, e taki: „Den lin foe wi foe kweki pikin 150 jari langa no ben kenki serjoesoe, kon tron njoenmodowan . . . Mi e bribi taki den owroe lin no e wroko moro langa.” Ma moro lin di libisma meki no de a loesoe. Jehovah Gado de a Roetoe foe na osofamiri. En sabi moro boen leki iniwan sma o prenspari a ròl foe na osofamiri libi de foe wisrefi abi kolokoe èn san de fanowdoe foe meki wan osofamiri de kolokoe èn tranga. A moesoe froewondroe wi taki a Wortoe foe en, bijbel, e gi a loesoe gi osofamiri problema?

A boekoe dati foe owroeten, e froeklari san ben go fowtoe na ini na osofamiri libi. Den ben poti a fosi libisma paar, Adam nanga Eva, na ini wan moi djari seti èn den ben kisi a tjalensi di e pai, foe kenki grontapoe kon tron wan paradijs. Gado ben meki wet taki Adam ben moesoe de na ede foe na osofamiri. Eva ben moesoe wroko makandra nanga a de di Adam ben de edeman, leki en „jepiman” noso „mankeri pisi”. Ma Eva ben opo ensrefi kontrari a seti disi. A ben teki a wroko foe en masra leki edeman abra èn ben trangajesi a wan enkri skotoe di Gado ben gi den. Baka dati Adam ben trowe a wroko foe en leki edeman èn ben go makandra nanga Eva ini na oproeroe disi foe en. — Genesis 1:26–3:6.

Den takroe bakapisi foe di den ben teki wan tra pasi leki a seti foe Gado, ben de foe si wantewante. Foe di Adam nanga Eva no ben de soifri èn sondro fowtoe moro, den ben handri nanga sjen èn firi taki den fowtoe. Adam di moro a fesi ben taki foe a wefi foe en nanga moi wortoe na poewema fasi, now na wan kowroe fasi ben sori go na en leki ’na oema di joe ben gi mi’. Den takroe wortoe dati ben de soso a bigin foe problema ini a trowlibi. A proeberi di Adam ben proeberi foe soso foe kisi a wroko foe en leki edeman baka, ben sa abi leki bakapisi taki a ben o ’basi Eva’. Eva foe en sei, ben sa abi wan „tranga lostoe” gi a masra foe en, leki fa a sori pasa marki noso na wan fasi di no de ini balansi. — Genesis 2:23; 3:7-16.

A no de foe froewondroe taki den problema na ini a trowlibi foe Adam nanga Eva ben abi rampoe bakapisi gi den pikin foe den. A fosi manpikin foe den, Kain, ben tron wan bita-ati kiriman (Genesis 4:8). Lamèk, wan bakapikin foe Kain, ben jepi moro foe na osofamiri libi ben go na baka, foe di a ben tron a fosi man di ben abi moro leki wan wefi èn di den ben skrifi foe en (Genesis 4:19). Adam nanga Eva na so fasi no wawan ben gi sondoe èn dede abra leki wan famiri goedoe, ma den ben gi wi wan eksempel toe foe wan siki osofamiri di ben de a situwâsi foe a libisma ras sensi a ten dati. Ini den lasti dei disi, trobi na ini osofamiri doro wan heimarki moro iniwan ten.

Osofamiri pe sani e waka boen

Ma a no ala osofamiri e beni na ondro den kwinsi foe a ten disi. Wan trowmasra foe eksempel, e libi nanga en wefi èn toe oemapikin ini wan pikin libisma libimakandra na den Verenigde Staten foe Amerkankondre. Ala di na foeroe foe den birtisma foe den papa nanga mama no man koti nanga den pikin foe den, en nanga en wefi no abi a problema dati èn den no e broko den ede toe taki den oemapikin foe den sa go proeberi drug noso seks. Den moendeneti, te den ai foe tra jongoesma fasi na a telefisi, a heri osofamiri e konmakandra lontoe a njantafra foe hori wan bijbel takimakandra. „Moendeneti na wi spesroetoe neti foe de nanga makandra èn foe taki”, a e froeklari. „Den oemapikin foe wi e firi densrefi fri foe taki foe den problema foe den nanga wi”.

Na a tra sei, joe abi wan mama na New York City di de en wawan èn di e njanboen toe foe na osofamiri banti di de wan aparti sani nanga den toe oemapikin foe en. San a e doe foe doro disi? „Wi no e leti a telefisi te na a kaba foe a wiki”, a e froeklari. Wi e taki makandra aladei foe wan tekst di komoto na bijbel. Wi e poti wán neti na wan sei toe foe abi wan bijbel takimakandra nanga na osofamiri.”

Ala toe osofamiri na Jehovah Kotoigi. Den e waka baka a rai gi osofamiri di skrifi na ini bijbel — èn a e go boen. Ma tokoe, den no de den wawan ini a tori disi. Hondrohondro doesoendoesoen osofamiri neleki den de di e kisi boen bakapisi, foe di den e gebroiki den sani di seti gi na osofamiri libi èn di de foe feni ini a boekoe dati.b We, san na den seti disi? Fa den kan abi wini gi joe nanga joe osofamiri? Foe gi wan piki na tapoe dati, dan wi e kari joe foe go loekoe den artikel di e bigin tapoe a bladzijde di e kon now.

[Foetoewortoe]

[Prenki na tapoe bladzijde 4]

Pôti ekonomia situwâsi e meki foeroe problema kon gi osofamiri di e libi ini pôti kondre

[Sma di abi a reti foe a prenki]

U.S. Navy photo

[Prenki na tapoe bladzijde 7]

Foe di foeroe osofamiri e hori den bijbel gronprakseri, meki den e kakafoetoe gi kwinsi ini a ten disi