Doe moeiti foe kisi a vrede foe Gado na ini na osofamiri libi
„Gi Jehovah, o oen famiri foe den pipel, gi Jehovah glori nanga krakti.” — PSALM 96:7.
1. Sortoe bigin Jehovah ben gi na osofamiri libi?
NA OSOFAMIRI libi di Jehovah ben seti na ini a bigin ben de wán foe vrede nanga kolokoe, di a ben tjari a fosi man nanga a fosi oema kon na wán na ini a trowlibi. Foe taki en leti, Adam ben de so kolokoe, taki a ben sori a prisiri di a ben abi ini a moro owroe poewema di ben skrifi: „Now fosi disi na bonjo foe mi bonjo èn skin foe mi skin. A wan disi den sa kari Oema, bika na foe a man den ben teki a wan disi.” — Genesis 2:23.
2. San Gado ben abi na prakseri nanga a trowlibi, boiti taki a ben sa tjari kolokoe kon gi den libisma pikin foe en?
2 Di Gado ben seti a trowlibi èn a seti foe na osofamiri, a ben abi moro sani na prakseri leki foe tjari kolokoe nomo kon gi den libisma pikin foe en. A ben wani taki den doe a wani foe en. Gado ben taigi a fosi paar: „Oen meki pikin èn kon foeroe èn foeroe grontapoe èn poti en na oen ondro, èn abi na oen ondro den fisi foe se nanga den kriatoeroe foe hemel di e frei, nanga ibri libi kriatoeroe di e kroipi na grontapoe” (Genesis 1:28). Ija, dati na wan wroko di e gi troetroe satisfaksi. O kolokoe Adam, Eva, nanga den pikin foe den di den ben o meki, ben sa de efoe a fosi trowpaar ben gi jesi èn ben doe a wani foe Jehovah!
3. San den osofamiri moesoe doe efoe den wani libi akroederi a gi di den e gi densrefi na ini a dini foe Gado?
3 Ma srefi na ini a ten disi, osofamiri de moro kolokoe te den e doe a wani foe Gado ini wánfasi. Èn fa den sortoe osofamiri dati di e gi jesi, abi toemoesi moi froewakti! Na apostel Paulus ben skrifi: „A gi di wan sma e gi ensrefi na ini a dini foe Gado, boen gi ala sani, foe di a abi wan pramisi gi a disiten libi èn a libi di moesoe kon ete” (1 Timoteus 4:8). Den osofamiri di e gi densrefi troetroe na ini a dini foe Gado, e waka na baka den gronprakseri foe a Wortoe foe Jehovah èn e doe a wani foe en. Den e doe moeiti foe kisi a vrede foe Gado èn dati meki den e feni kolokoe na ini „a disiten libi”.
Na osofamiri libi kon ini kefar
4, 5. Foe san ede wi kan taki dati na osofamiri libi kon ini kefar now na heri grontapoe?
4 Soleki fa a de troetroe, dan wi no e feni vrede nanga kolokoe na ini ibri osofamiri. Di The New York Times ben taki foe wan ondrosoekoe di wan demografisch organisâsi di den kari a bevolkingscommissie foe den VN, ben doe, a e skrifi: „Na ini goedoe kondre èn so srefi na ini pôti kondre, a stroektoeroe foe na osofamiri libi e ondrofeni bigi kenki.” A tijdschrift ben teki den wortoe foe a skrifiman foe na ondrosoekoe disi di ben taki: „Na idea taki na osofamiri de wan tranga pikin groepoe di tai hori na makandra, pe a papa de leki a sma di e sorgoe gi sani na ekonomia sei èn a mama de leki a sma di e sorgoe gi sani na emotioneel sei, na wan falsi idea. A troetroe tori de, taki den sani di e feni presi foeroe, soleki de mama sondro foe trow, a nomroe foe brokotrow di e gro moro nanga moro, [èn] moro pikin osofamiri . . . e feni presi na heri grontapoe.” Foe den sortoe sani disi ede di e feni presi foeroe, meki miljoenmiljoen osofamiri no de tranga, no abi vrede nanga kolokoe, èn foeroe e broko. Na Spanjorokondre, na ini a bigin foe den lasti tin jari foe a di foe twenti jarihondro, a nomroe foe brokotrow ben kren go miti 1 brokotrow na mindri 8 trow, — wan bigi gro foe 1 brokotrow na mindri 100 trow di ben feni presi soso 25 jari na fesi. Den e skrifi taki Ingrisikondre abi wan foe den moro hei nomroe foe brokotrow na Europa — 4 na mindri 10 trow e broko. A kondre dati si toe taki wantronso a nomroe foe osofamiri di abi soso a papa noso a mama, e gro.
5 A e gersi taki son sma no man wakti srefisrefi foe brokotrow. Foeroe sma e go na a „Santa presi di e loesoe banti”, krosibei na Tokio, Japan. A Sjinto tempel disi e teki begi foe brokotrow èn foe broko tra matifasi di sma no wani srefisrefi. Ibri anbegiman e skrifi a begi foe en na tapoe wan plata oedoe planga, a e anga en na a djari foe a santa presi, èn dan a e begi foe kisi wan piki. Wan koranti foe Tokio e taki dati, di a santa presi ben seti pikinmoro wan jarihondro pasa, „den wefi foe goedoe bisnisman foe a presi ben skrifi begi foe aksi taki den masra foe den gowe libi den freiri foe den èn foe kon baka na den”. Ma na ini a ten disi, moro foeroe foe den begi na foe broko a trow, no foe meki den kon boen baka nanga makandra. A de krin taki na osofamiri libi kon ini kefar na heri grontapoe. Disi moesoe froewondroe kresten? Nôno, bika bijbel e gi wi a koni foe man si a moeilek situwâsi na ini san osofamiri de, na ini a ten disi.
Foe san ede na osofamiri de na ini wan moeilek situwâsi?
6. San 1 Johanes 5:19 abi foe doe nanga a moeilek situwâsi foe osofamiri na ini a ten disi?
6 Wán reide foe san ede na osofamiri de na ini wan moeilek situwâsi na ini a ten disi, na disi: „A heri grontapoe e didon na ini a makti foe a godelowsoe wan” (1 Johanes 5:19). San wi kan froewakti foe a godelowsoe wan, Satan Didibri? En na wan ogri leiman di de teige boen gwenti nanga wet (Johanes 8:44). A no de foe froewondroe taki a grontapoe foe en e gi densrefi abra krinkrin na bedrigifasi nanga hoeroedoe, sani di e pori na osofamiri libi so kefalek! Dorosei foe na organisâsi foe Gado, a krakti foe Satan de leki wan kefar foe pori a seti foe Jehovah foe a trowlibi èn foe tjari wan kaba kon na osofamiri libi di abi vrede.
7. Fa den eigifasi di foeroe sma e sori na ini den lasti dei disi, kan abi krakti tapoe osofamiri?
7 Toe Timoteus 3:1-5 e sori wan tra reide foe den osofamiri problema di e trobi a libisma famiri nownow. Den profeiti wortoe foe Paulus di skrifi drape, e sori taki wi e libi na ini „den lasti dei”. Osofamiri no kan abi vrede èn de kolokoe efoe den memre foe den de ’sma [di] lobi densrefi nomo, sma [di] lobi moni, de asranti, abi heimemre, de blasfemiasma, de trangajesi na papa nanga mama, de sondro tangi, no de loyaal, no abi natuurlijk firi foe lobi, no de klariklari foe meki kroederi, de ogri-ati leiman, sondro foe man dwengi densrefi, abi wan krasi fasi foe doe sani, sondro lobi gi boen sani, de toriman, no ke foe noti, abi bigimemre, sma [di] lobi prisiri moro leki den lobi Gado, di abi wan fasi foe gi densrefi na ini a dini foe Gado, ma di no abi a krakti foe dati’. Wan osofamiri no kan de kolokoe dorodoro efoe srefi wán foe den memre foe en no abi natuurlijk firi foe lobi noso no de loyaal. Omeni vrede kan de na ini na osofamiri libi efoe wan sma na ini na osofamiri abi wan krasi fasi foe doe sani èn no de klariklari foe meki kroederi? Moro ogri srefi, fa vrede nanga kolokoe kan de te den memre foe na osofamiri de sma di lobi prisiri moro leki den lobi Gado? Den sani disi na den eigifasi foe sma na ini a grontapoe disi di Satan e tiri. A no de foe froewondroe taki wan kolokoe osofamiri de moeilek foe feni na ini den lasti dei disi!
8, 9. Sortoe bakapisi a fasi fa pikin e tjari densrefi, kan abi tapoe a kolokoe foe osofamiri?
8 Ete wan tra reide foe san ede foeroe osofamiri no abi vrede èn no de kolokoe, na a takroe fasi fa pikin e tjari densrefi. Di Paulus ben taki na fesi foe a situwâsi na ini den lasti dei, a ben taki profeititori taki foeroe pikin ben sa de trangajesi na papa nanga mama. Efoe joe na wan jongoe sma, a fasi fa joe e tjari joesrefi e jepi joe osofamiri foe abi vrede èn foe de kolokoe?
9 Wan toe pikin no de wan eksempre na ini a fasi fa den e tjari densrefi. Foe eksempre, wan jongoe boi ben skrifi en papa a takroe brifi disi: „Efoe joe no wani tjari mi go na Aleksandria, mi no sa skrifi joe wan brifi, noso taki nanga joe, noso teki adjosi foe joe, èn efoe joe go na Aleksandria, mi no sa hori joe anoe noso taki joe odi oiti baka. Disi na san sa pasa efoe joe no wani tjari mi . . . Ma seni wan [harp] gi mi, mi e begi joe. Efoe joe no doe dati, dan mi no sa njan èn mi no sa dringi. Mi sa doe en seiker!” A sani dati gersi wan disiten situwâsi, a no so? We, a brifi dati di wan boi ben skrifi gi en papa, ben skrifi na Egipti foe owroeten, moro leki 2000 jari pasa kaba.
10. Fa den moro jongoewan kan jepi den osofamiri foe den foe doe moeiti foe kisi a vrede foe Gado?
10 A fasi dati fa wan pikin foe Egipti ben tjari ensrefi, no ben jepi foe tjari vrede kon na ini na osofamiri. A no de foe taki, dati na ini den lasti dei disi, moro serjoesoe sani e feni presi na ini osofamiri. Ma oenoe, jongoewan, kan jepi oen osofamiri foe doe moeiti foe kisi a vrede foe Gado. Fa? Foe di oenoe e gi jesi na a bijbel rai disi: „Oen pikin, oen gi jesi na oen papa nanga mama na ini ala sani, bika disi e plisi Masra srefisrefi.” — Kolosesma 3:20.
11. Fa papa nanga mama kan jepi den pikin foe den foe tron getrow foetoeboi foe Jehovah?
11 Fa a de nanga oenoe, papa nanga mama? Jepi oen pikin na wan lobi-ati fasi foe tron getrow foetoeboi foe Jehovah. „Kweki wan boi akroederi a pasi gi en”, na so Odo 22:6 e taki. „Srefi efoe a e kon owroe, a no sa komoto na a pasi.” Nanga den heri boen leri foe bijbel èn nanga den boen eksempre foe papa nanga mama, foeroe boi nanga oemapikin no e komoto na a joisti pasi te den e kon moro owroe. Ma foeroe e anga foe a kwaliteit foe a bijbel leri èn foe o foeroe bijbel leri e gi, èn foe na ati foe a jongoewan.
12. Foe san ede wan kresten oso moesoe abi vrede?
12 Efoe ala den memre foe wi osofamiri e proeberi foe doe a wani foe Jehovah, dan wi moesoe njan boen foe a vrede foe Gado. Wan kresten oso moesoe foeroe nanga „mati foe vrede”. Lukas 10:1-6 e sori taki Jesus ben abi den sortoe sma dati na prakseri di a ben seni 70 disipel go leki bedinari èn ben taigi den: „Awansi pe oenoe e go na ini wan oso, oenoe moesoe taki fosi: ’Meki na oso disi abi vrede.’ Èn efoe wan mati foe vrede de drape, dan oen vrede sa kon na en tapoe.” Te ini vrede den foetoeboi foe Jehovah e go oso foe oso nanga „a boen njoensoe foe vrede”, dan den e soekoe mati foe vrede (Tori foe den Apostel 10:34-36; Efeisesma 2:13-18). A de seiker taki wan kresten osofamiri di abi mati foe vrede, moesoe abi vrede.
13, 14. (a) San Naomi ben wani gi Rut nanga Orpa? (b) Sortoe rostoepresi wan kresten oso moesoe de?
13 Wan oso moesoe de wan presi pe vrede de sondro broko-ede. Na owroe weduwe Naomi ben howpoe taki Gado ben sa gi den jongoe wefi foe den manpikin foe en, di ben tron weduwe, Rut nanga Orpa, a rostoe nanga a trowstoe di e kon te den abi wan boen masra nanga wan boen oso. Naomi ben taki: „Meki Jehovah gi oenoe wan presenti, èn meki oenoe feni wan rostoepresi, ibriwan na ini na oso foe en masra” (Rut 1:9). Wan sabiman ben skrifi foe a winsi di Naomi ben abi, taki na ini den sortoe oso dati, Rut nanga Orpa „ben sa fri foe broeja nanga broko-ede. Den ben sa feni rostoe. A ben sa de wan presi pe den ben kan tan libi, èn pe den moro safoe firi foe den èn den moro boen winsi foe den ben sa feni satisfaksi nanga vrede. Na aparti krakti foe a Hebrew wortoe . . . de krin foe si na den wortoe di abi foe doe nanga dati, na ini [Jesaja 32:17, 18].”
14 Grantangi loekoe a sani di den e sori go na Jesaja 32:17, 18. Drape wi e leisi: „A wroko foe troetroe regtfardikifasi moesoe tron vrede, èn a diniwroko foe troetroe regtfardikifasi, tirifasi nanga seikerfasi te ten di no skotoe. Èn mi pipel moesoe tan na ini wan presi pe vrede de èn na tanpresi pe sma abi dorodoro froetrow na ini èn na rostoepresi pe sma no e kisi no wan broko-ede.” Wan kresten oso moesoe de wan rostoepresi foe regtfardikifasi, tirifasi, seikerfasi, nanga a vrede foe Gado. Ma san wi moesoe doe te tesi, kesekese, noso tra problema e opo ede kon? Dan wi moesoe sabi spesroetoe san na a sroto gi wan kolokoe osofamiri.
Fo prenspari gronprakseri
15. San joe ben sa taki na a sroto gi wan kolokoe osofamiri?
15 Ibri osofamiri na grontapoe kisi en nen foe Jehovah Gado, a Kriaman foe den osofamiri (Efeisesma 3:14, 15). Dati meki den wan di wani wan kolokoe osofamiri moesoe soekoe a tiri foe en èn gi en prèise, soleki fa a psalm singiman ben doe: „Gi Jehovah, o oen famiri foe den pipel, gi Jehovah glori nanga krakti” (Psalm 96:7). A sroto gi wan kolokoe osofamiri de foe feni na ini a Wortoe foe Gado, bijbel, èn te wi e gebroiki den gronprakseri di de na ini. Wan osofamiri di e gebroiki den gronprakseri disi sa de kolokoe èn sa njan boen foe a vrede foe Gado. Foe dati ede, meki wi go loekoe fo foe den prenspari gronprakseri disi.
16. Sortoe ròl a dwengi di wan sma moesoe dwengi ensrefi, moesoe prei na ini na osofamiri libi?
16 Wán foe den gronprakseri disi e poti prakseri tapoe a sani disi: A dwengi di wan sma moesoe dwengi ensrefi de prenspari foe abi a vrede foe Gado na ini na osofamiri libi. Kownoe Salomo ben taki: „Neleki wan foto di den broko go na ini, sondro wan skotoe, na so a man de di no man dwengi en jeje” (Odo 25:28). A dwengi di wi moesoe dwengi a jeje foe wi — foe di wi e dwengi wisrefi — de prenspari efoe wi wani abi wan kolokoe osofamiri pe vrede de. Ala di wi de onvolmaakti, tokoe wi moesoe dwengi wisrefi, wan sani di de wan froktoe foe a santa jeje foe Gado (Romesma 7:21, 22; Galasiasma 5:22, 23). A jeje sa meki na eigifasi na ini wi foe man dwengi wisrefi, efoe wi e begi foe kisi na eigifasi disi, e gebroiki bijbel rai di e taki foe dati, èn abi demakandra nanga tra sma di sori na eigifasi dati. A fasi disi sa jepi wi foe „lowe gi hoeroedoe” (1 Korentesma 6:18). A dwengi di wi e dwengi wisrefi sa jepi wi toe foe no wani doe ogri nanga tranga, foe no de noso kon tron wan srafoe foe sopi, èn foe handri na wan moro bedari fasi na ini moeilek situwâsi.
17, 18. (a) Fa 1 Korentesma 11:3 e fiti kresten osofamiri libi? (b) Fa na erken di memre foe wan osofamiri e erken na edeman-wroko, e meki a vrede foe Gado de na ini wan osofamiri?
17 Wan tra prenspari gronprakseri wi kan poti na a fasi disi: Te wi e erken na edeman-wroko, dan dati sa jepi wi foe doe moeiti foe kisi a vrede foe Gado na ini den osofamiri foe wi. Paulus ben skrifi: „Mi wani foe oenoe sabi taki na edeman foe ibri man na Krestes; a man foe en sei na a edeman foe na oema èn na edeman foe Krestes na Gado” (1 Korentesma 11:3). Disi wani taki dati wan man e teki fesi na ini na osofamiri, taki en wefi e horibaka gi en na wan loyaal fasi, èn taki den pikin e gi jesi (Efeisesma 5:22-25, 28-33; 6:1-4). So wan fasi foe tjari densrefi sa jepi foe meki a vrede foe Gado de na ini na osofamiri libi.
18 Wan kresten masra moesoe memre taki na edeman-wroko di gron tapoe bijbel, no wani taki foe de wan tiriman di e kwinsi sma. A moesoe waka na baka Jesus, na Edeman foe en. Ala di a ben moesoe de „edeman na tapoe ala sani”, tokoe Jesus „no ben kon foe sma dini en, ma foe dini sma” (Efeisesma 1:22; Mateus 20:28). Na wan srefi fasi, wan kresten man e gebroiki na edeman-wroko na wan lobi-ati fasi, di sa meki taki a man sorgoe boen gi den afersi foe en osofamiri. Èn seiker wan kresten wefi wani wroko makandra nanga en masra. Leki en „jepiman” nanga „wan fitipisi”, a e sorgoe gi eigifasi di en masra no abi, èn na so fasi a e gi en a jepi di a abi fanowdoe (Genesis 2:20; Odo 31:10-31). Te na edeman-wroko doe na a joisti fasi, dan dati e jepi masra nanga wefi foe handri makandra nanga lespeki èn dati e boeweigi den pikin foe gi jesi. Ija, te na osofamiri e erken na edeman-wroko, dan dati sa jepi meki a vrede foe Gado de na ini na osofamiri libi.
19. Foe san ede boen komunikâsi de prenspari gi a vrede nanga a kolokoe foe osofamiri?
19 Wan di foe dri prenspari gronprakseri kan kari nanga den wortoe disi: Boen komunikâsi de prenspari gi a vrede nanga a kolokoe na ini na osofamiri. Jakobus 1:19 e froeteri wi: „Ibri sma moesoe de esi foe jere, no esi foe taki, no esi foe kisi atibron.” Den memre foe na osofamiri moesoe arki èn taki nanga makandra, bika komunikâsi na ini na osofamiri e kon foe ala toe sei. Ma srefi efoe san wi e taki de troe, kande a sa doe moro ogri leki boen efoe wi e taki a sani na wan ogri-ati fasi, na wan heimemre fasi noso sondro firi. A taki foe wi moesoe de na wan switi fasi, a moesoe „abi sowtoe na ini” (Kolosesma 4:6). Osofamiri di e waka baka den bijbel gronprakseri èn abi boen komunikâsi e doe moeiti foe kisi a vrede foe Gado.
20. Foe san ede joe ben sa taki dati lobi de prenspari gi a vrede na ini osofamiri?
20 Wan di foe fo gronprakseri na disi: Lobi de prenspari gi a vrede nanga a kolokoe na ini na osofamiri. A lobi di wan man nanga wan oema e firi gi makandra kan prei wan prenspari ròl na ini a trowlibi, èn dipi firi foe lobi kan gro na mindri den memre foe wan osofamiri. Ma san moro prenspari srefi na a lobi di a Griki wortoe a·gaʹpe e sori. Disi na a lobi di wi e kweki gi Jehovah, gi Jesus, èn gi den sma na wi sei (Mateus 22:37-39). Gado ben sori a lobi disi gi a libisma famiri foe di a ben e gi „en wan-enkri gebore Manpikin, so taki ibriwan sma di e sori bribi na ini en, no ben sa kisi pori, ma ben sa abi têgo libi” (Johanes 3:16). Fa a de wan moi sani taki wi kan sori a srefi sortoe lobi gi den memre foe wi osofamiri! A hei sortoe lobi disi na „wan volmaakti banti foe wánfasi” (Kolosesma 3:14). A e tai wan trowpaar na makandra èn a e boeweigi den foe doe san de moro boen gi makandra èn gi den pikin foe den. Te moeilekhèit e bigin kon, dan lobi e jepi den foe handri afersi na ini wánfasi. Wi kan de seiker foe disi, bika „lobi . . . no e soekoe en eigi belang . . . A e froedrage ala sani, e bribi ala sani, e howpoe ala sani, e teki ala sani. Lobi no e misi noiti” (1 Korentesma 13:4-8). Osofamiri, pe a lobi di den abi gi makandra kon moro tranga nanga a lobi di den abi gi Jehovah, de troetroe kolokoe!
Tan doe moeiti foe kisi a vrede foe Gado
21. San kande e meki a vrede nanga a kolokoe foe joe osofamiri kon moro foeroe?
21 Den gronprakseri di kari na fesi, nanga trawan di teki foe bijbel, skrifi na ini poeblikâsi di Jehovah gi wi na wan switi fasi nanga jepi foe „a getrow èn koni srafoe” (Mateus 24:45). Foe eksempre, den sortoe bodoi dati de foe feni na ini a boekoe A sroto gi wan kolokoe osofamiri di abi 192 bladzijde èn di ben tjari kon na doro na a „Boskopoeman foe a vrede foe Gado”-distriktkongres foe Jehovah Kotoigi di ben hori na heri grontapoe na ini 1996 nanga 1997. Persoonlijk studie nanga osofamiri studie foe den Boekoe foe bijbel nanga a jepi foe so wan poeblikâsi kan abi foeroe winimarki leki bakapisi (Jesaja 48:17, 18). Ija, te joe e gebroiki bijbel rai, dan kande dati sa meki a vrede nanga a kolokoe foe joe osofamiri kon moro bigi.
22. San moesoe de a moro prenspari sani na ini na osofamiri libi foe wi?
22 Jehovah abi moi sani na prakseri gi den osofamiri di e doe a wani foe en, èn a e froedini en taki wi e prèise èn e dini En (Openbaring 21:1-4). Meki a de so foe dati ede, taki na anbegi foe a troe Gado na a moro prenspari sani na ini a libi foe joe osofamiri. Èn meki a de so, taki wi lobi-ati hemel Tata, Jehovah, blesi joe nanga kolokoe ala di joe e doe moeiti foe kisi a vrede foe Gado na ini joe osofamiri libi!
San joe ben sa piki?
◻ San osofamiri moesoe doe efoe den wani libi akroederi a gi di den e gi densrefi na ini a dini foe Gado?
◻ Foe san ede osofamiri de na ini wan moeilek situwâsi na ini a ten disi?
◻ San na a sroto gi wan kolokoe osofamiri?
◻ San na wan toe gronprakseri di sa jepi wi foe meki vrede nanga kolokoe de na ini na osofamiri libi?
[Prenki na tapoe bladzijde 24]
Boen komunikâsi e jepi wi foe doe moeiti foe kisi a vrede foe Gado na ini na osofamiri libi